EVASELIO A MALEKO 13
13
Palalau i te mouga o Oliveto
Maumaui o Selusalemi
1I te mavae a Sesu mai te fale tapu, nee ui leva e he tahi o ana tisipulo kia ia: Pule, sio ki te lalahi o te u maka, pea mo te lalahi o te u fale! 2Nee tali leva e Sesu kia ia: E ke sio ki te u fale lalahi aena? E mole toe hili anai he foi maka i oluga o he tahi maka, koteuhi e laku fuli anai natou ki lalo.
3Nee nofo leva ia ia i te mouga o Oliveto, o tuha mo te fale tapu. Pea ko Petelo, mo Sakopo, mo Soane, mo Atelea, nee natou fai leva kia ia te fehui aeni, i tanatou to ateaina mo Sesu: 4Fakaha mai kia matou, pe ko afea e hoko ai anai te mea aia, pea kotea te fakailoga e iloi ai anai ka hoko anai te u mea fuli aia?
Temi fakamuli
5Nee ui leva e Sesu kia natou: Koutou tokaga naa kakaai koutou e he tahi. 6Koteuhi e hau anai he kaugamalie i toku huafa, o ui: Ko au. Pea e natou kakaai anai he hahai kaugamalie. 7Ka kotou logo anai ki te palalaui o ni tau kua hoko, pea mo ni tau e teuteui, aua naa kotou matataku, koteuhi e tonu ke hoko te u mea aena. Kae e mole ko te aho fakamuli anai aia. 8E malaga ake anai he puleaga o fakafehagai ki he tahi puleaga, pea mo he puleagahau o fakafehagai ki he tahi puleagahau; e i ai anai he u mafuike i te u potu kehekehe, pea e i ai anai he u hoge. Ko te kamataaga anai aia o te u mamahi fanau. 9Koutou tokaga kia koutou totonu. E ave anai koutou ki te u telepinale, pea e haha anai koutou aki ni akau i te u sinakoka; e koutou tutuu anai ia mua o ni kovana pea mo ni hau, o tupu ko au, koteuhi ke kotou fakaha te mooni kia natou. 10E tonu mua ke fakaha te logo lelei ki te u puleaga fuli. 11Ka ave anai koutou o fakamaaui, aua naa kotou tuania te mea ae ka kotou palalau anai ki ai i mua, kae kotou fakaha te mea ae e tuku atu anai kia koutou i te hola totonu aia; koteuhi e mole ko koutou ae e palalau anai, kae ko te Laumalie Maonioni. 12E tuku anai e te tehina tona tehina ki te mate, pea ko te tamai tana fanau; e tutuu ake anai te u fanau ki anatou matua, o tuku natou ke tamatei. 13E fehiainai anai koutou e te u hahai fuli, o tupu ko toku huafa, kae ko ae e kataki fualoa anai o kaku ki te fakaosi e haofaki anai.
Te fakalialia o te maumau
14Ka kotou sisio anai ki te tagata ae e higoa ko te fakalialia o te mamahi kua fakanofo i te kogamea ae e mole tonu ke nofo ai, ko ae e lautohi ke tokaga, pea ko natou ae e nonofo anai i Sutea ke feholaki ki te u mouga; 15ko ae e nofo anai i te tuapatu o tona fale ke aua naa hifo anai ia ia ki tona loto fale, o too he mea ke alu mo ia; 16pea ko ae e nofo anai i te u gaueaga ke aua naa toe liliu ia ia ki tona fale, o too tona pulupulu. 17Malaia ki te u fafine ae e faitatama anai pea mo natou ae e natou fakahuhu anai ni toe i te u aho aia! 18Kotou faikole ke aua naa hoko te u mea aena i te temi momoko.
Te mamahi lahi
19Koteuhi e lahi age anai te mamahi i te u aho aena i te u mamahi fuli ae kua ha talu mai te fakatupu o te malamanei e te Atua o kaku mai ki te temi aena, pea e mole toe i ai anai ni ihi aho o tatau mo natou ki amuli. 20Pea kapau nee mole fakanounou e te Aliki te u aho aia, e mole haofaki anai he tahi; kae nee ina fakanounou te u aho aia o tupu ko tana kau filifiliia. 21Ka ui atu anai e he tahi kia koutou: E nofo ia Kilisito i heni, pee: E nofo ia ia i he, aua naa koutou tui kia ia. 22Koteuhi e malaga anai ni kilisito lohi mo ni polofeta lohi; pea e natou fai anai ni mea fakaofolele, mo ni milakulo ke fakahehe ai te kau filifiliia, mo kapau nee feala.
Te toe liliu mai a Sesu-Kilisito
23Ke kotou tokaga: Kua au fakaha fakatomua atu kia koutou te u mea fuli. 24Kae i te u aho aena, i te osi o te mamahi aena, e fakapouli anai te laa, pea e mole toe tuku anai e te mahina tona malama, 25pea e maluluku anai te u fetuu mai te lagi, pea e galulu anai te u malohi fuli o te lagi. 26Pea fokifa pe e sio anai ki te Foha o te tagata e hifo mai i te ao mo te malohi lahi pea mo te kololia. 27Pea e ina fekaui anai te kau aselo, pea e ina tanaki fakatahi anai te kau filifiliia mai te u potu matagi e fa, mai te gataaga o te kele ki te gataaga o te lagi.
Folafola o te fuu fiki
28Koutou ako mai he folafola fakatata kua too mai te fuu fiki. Ka kamata malulu ona vaa, pea mo hohomo ona lau, e kotou iloi kua ovi mai te temi vevela. 29Pea e feia pe mo koutou, moka kotou sisio anai kua hoko mai te u mea aena, ke kotou iloi kua ovi te Foha o te tagata, i te matapa. 30E au ui mooni atu kia koutou, e mole pe puli anai te taitupu aeni, kae e heeki hoko te u mea fuli aena. 31E puli anai te lagi mo te kele, kae e mole pe puli anai aku folafola.
Fakalotomalohi ki te mauli alaala
32O uhiga leva mo te aho pee ko te hola, e mole pe iloi ia ia e he tahi, pee ko te kau aselo i te lagi, pee ko te Alo, kae ko te Tamai toko tahi. 33Koutou tokaga, koutou alaala pea koutou faikole; koteuhi e mole koutou iloi pe e hau fakaa anai te aho aia. 34E hage anai ko he tagata ae ka folau e ina tuku tona fale, pea e ina tuku te pule ki ana tagata faifekau, o fakailoilo ki te tagata taki tahi tana gaue, pea nee ina fakatotonu ki te tagata leo matapa ke alaala. 35Koia, koutou alaala, koteuhi e mole kotou iloi te lakaga e liliu mai anai te pule o te fale, pee ko te afiafi, pee ko te vaelua po, pee ko te uua o te u moa, pee ko te uhu. 36Kotou matataku naa hau fakafokifa ia ia, o mau mai koutou e kotou momoe. 37Ko te mea e au fakaha kia koutou, e au fakaha ia ia ki te hahai fuli: Koutou alaala.
S'ha seleccionat:
EVASELIO A MALEKO 13: WB2011
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland