Ioane 6
6
1Ina nouri nana’i idaropoiioumo, Iesu Galilaia auwo turi ata hapuoito naibaha abumo, nouri Taibiria auwo turiri. 2Wia oubi gema nou dooudo naibaha orobodowaumo mabu nouri nou tiaha kidodiai na’i nou temeteme oubido naibaha idodiai neiio aiiauriwaumo. 3Wia Iesu akabu ohuito naibaha ioro wia nou nouowa emidio nou himia kitomudio meremu. 4Wia kiohodio horiomoo, Iudaia oubi horiomoo na’uri, nou tariwai. 5Ina Iesu naibaha iaotai wia oubi godogodo nouido ko’uwa nouro naibaha iauri, wia Pilipoido naiba iaowa: Tobatiudo nimeidaidumo imo dou, nouri oubi gema nei ihomo na. 6Nouri wade nouro naiba aro nouido emahebai, mabu nouri nou umori touna wadodiai. 7Pilipo nouido naibaha omowameai, 200 shilling dou wiha nou modobo biahai auwoha oubi nei kekebuo ihomo tore. 8Nou himia kitomudio mere na’u, paina Anederea, Simona Pita niama, nouido naiba iaowa. 9Nau ohio nouowari nou 5 dou kopi wia na neewa, ina modobo biahai oubi gemanu. 10Wia Iesuro naibaro, Rioo taroumo oubi auwoha memiwamo, wia nouri bati nou pohona batiri. Nouri oubi auwoha naibaha emiwaumo, nei himia modobo tariwai 5,000. 11Wia Iesuro dou kopi naibaha emidai ina nou naibaha emabiti nou himia kitomudio mereido nouro naibaha imaatiwa wia neiio kemidio oubi auwoha naibaha imiowaumo wia na ramu nei modoboha imiowaumo. 12Ina nei niro naibaha iapeuti, nou himia kitomudio mereido nou naiba aro: Auwoha kiaho dou nia’ei rioo taimeiumo ata na’u aratoai tore. 13Nouri neiio naibaha imeiwaumo wia 12 haowa dou nia’ei neiio naibaha ibiwaumo, nouri kiraho douri oubio ihomo biahai. 14Nou ta’uwa nouri oubi, ina neiio naibaha eauriumo nouri tiaha kidodiai na’i Iesuro tau rododiai, neiio naibaha iaowaumo: Nouri dubu nou naiheha peroveta dubu na’uri batibatito aio’uro.
15Ina Iesuro naibaha iauri, nei niro nouido o’umoi wia pupuito ohidiomoi wia nou pai‐dubu owaimoi; nouri batii nouro naibaha emeheai, akabu barito nou himia gauwoha naibaha ioro.
16Ina duo naibaha oiti, nou himia kitomudio mere naibaha iodoi auwo turito. 17Wia pe na’uwa nei naibaha orowutiwaumo wia auwo turiwa naibaha o’umo Kapenaumaito. Ina nou ta’uwa nou duriiri wia Iesu neido o’u raihe. 18Wia auwo goiio naibaha otua; mabu nouri konobo gema naibaha orohuderai. 19Ina nei tutu aibo abidioumo, neiio Iesu naibaha eauriumo, auwo turiwa da’uro wia peito nou naibaha otaumai wia nei tore iatiwaumo. 20Wia nou neido naiba iaowa: Mo nouri, tore moa. 21Ina nei niro Iesu pewa oroviai wia nouri pe gamooiha naibaha aririo batii noito nei naibaha orovidiaumo.
22Wia hiwio ata nouri auwo turi barawa kotoi oubii neiio naibaha eauriumo ata pe biahai na’u nouri kitomudio mere ko’u peri wia Iesu kitomudio meremu peito o’u biahai wia nou himia kitomudio mere nei gauwoha o’umo. 23Ina amida pe Taibiriaudo naibaha o’umo, nei dou kiho batii tariwai nou ta’uwa Auwo‐dubu nouowa emabiti. 24Ina nou ta’uwa oubi gemao naibaha eauriumo Iesu nouowa biahai wia nou kitomudio mere biahai nei peito naibaha orowutiumo wia Kapenaumoito nei naibaha o’umo, Iesu oweamoi. 25Ina neiio nou naibaha oweaumo, auwo turi hapuo atawa nei nouido naiba iaowaumo: Rabbi tou ta’uwa ro’uro ro noito. 26Iesuro neido imowameai naiba iaowa: Naiheha, naiheha, mo rioido ainaro, Rio kiraromo biahai mo tiaha kidodiai na’i, rioo mo ainomohutidumo mabu nouri rioo nou ihoumo doui wia rio niro nou iapeutiumo. 27Kihona oropoiiomowa rioo iwaatimo aue, kihona nei kiaa tuturi kiiro karae karaeito rioo nouri taiwaatimo, nouri kihona Oubiha‐merero rioido aiwaimaati, mabu nouri Iehova, nou Urio Abeari, nouro nouido tau emapoi. 28Ina nei nouido naiba iaowaumo: Imoo teiri naimo‐idodiai ina nou aibo imo Iehova kowaati idodiaimoi. 29Iesuro naibaha imowameai neido naiba iaowa: Nouri Iehova kiwaati na’i, dubu nouro tau otiodoiro rio nouido tararomodioumo. 30Nouri nei nouido naibaha iaowaumo, Taiba modobo iwaeviaro ina imoo iaurimoi wia roido iraromodiomoi; touna na ridodiaiwa ro? 31Imo abeamioo mana burubatiwa naibaha ihoumo nouri nou titi naibaha iati; Kihona toboroudo nouro neido naibaha imaatiro neiio ihomoi. 32Ina Iesu neido naibaha iaowa: Naiheha, naiheha, mo rioido ainaro, Nouri kihona Mosero rioido imaati biahai toboroudo; ina ata mo Abea naiheha dou toboroudo nouro rioido airimaatidioro. 33Mabu nouri dubu nou toboroudo airo’uro wia batibatito auwoha kiiro nouro airimaatiro, nouri Iehova douri. 34Ina nei nouido naiba iaowaumo: Pai‐dubu e, nouri dou hiwio auwoha imoido tanimamaatiro. 35Iesu neido naiba iaowa: Movia kiiro douri. Dubu nou moido airorohodioro, hiwio auwoha nou dou niro biahai; wia dubu nou moido airiraromodioro, hiwio auwoha nou obo niro biahai. 36Wia mo rioido nou naro, rioo mo tau neauriumo ina rioo mo araramodioumo biahai. 37Oubi auwoha Abearo moido ainauro‐emaati, neiio moido aiwaumo‐orohoi wia dubu nou moido o’uwa moro ahoiuti raihe. 38Mabu nouri mo toboroudo no’uro, mo himia niro na idodiaiwai ko’u biahai, na’u mo nouro notiodoiro, nou niro na idodiaiwai. 39Wia mo nouro notiodoiro nou himia niro nari nouri; oubi auwoha nouro moido tau imaatiro ata na’u moro atoai biahai wia dooudo hiwio’i moro nouri dubu nouowa ina ainaitorai. 40Wia nouri mo Abea niro nari, nouri oubi amida nei Mereo airiauridumo wia nouido airiraromodiodumo neiio kiiro karae karae aiwaimo‐irahooi wia dooudo hiwio’i moro nei ainaitorai.
41Ina Iudaia oubio nouido aiemama’utiwaumo, mabu nouri nou aiaro, Movia douri toboroudo noruoro. 42Wia nei naiba iaowaumo, Iesura nou Iosepa mere’i? Nou himia abeara mamura imo umori, teiri raro nou doihabuo, Mo toboroudo noruoro? 43Iesuro naibaha imowameaiwa wia neido naiba iaowa. Rio himiao mo ema’utimo aue. 44Ina Abea, mo nouro notiodoiro, dubu ata ouwou biahai, dubu nouri moido o’u raihe; ina nou o’uwa dooudo hiwio’i moro nou ainaitorai. 45Peroveta oubi bukawa titi tau iatiumo, Iehovaro neido auwoha aiwai‐iatomuai; nouri dubu ata nou Abeaido orovidiowa wia noudo nou umo aiwaiti nou moido airo’uro. 46Oubi auwoha neiio Abea eaurimo biahai, na’u nouri dubu nou Iehovaido o’uro nouro Abea tau eauri. 47Naiheha naiheha mo rioido ainaro; dubu nou moido araromodiowa, nouvia kiiro karae karae aiwaweai. 48Movia kiiro douri. 49Rio abeamioo mana burubatiwa ihotutimo ina nei tau oroihiumo. 50Nouri dou nou toboroudo nou o’uro nou tiahari ina duburo ihowa nou oihiai raihe. 51Movia kiiro douri, toboroudo tau no’uro. Ina dubu ata nouri dou ihowa, hiwio auwoha nou kiiro kemidio kemidio tuturi wia nouri dou moro ainaimaati nouvia mo gohori, nouri moro ainaimamaati batibati auwoha kiiro iwai.
52Nouri Iudaia oubi nei himia himia naibaha oromowamewaumo naiba iaowaumo: Teiri nouri dubu nou himia goho imoido imaati wia imoo ihomoi. 53Nouri Iesu neido naiba iaowa: Naiheha, naiheha mo rioido ainaro, ina rioo Oubiha‐mere goho ihomo tatowa wia nou sawi idiomo tatowa, kiiro rio himia turiwa rioo iworohoumo raihe. 54Dubu ataro mo goho ihowa wia mo sawi idiowa nou kiiro karae karae airiworoho, wia dooudo hiwio’i moro nou ainaitorai. 55Nouri, mo goho nou naiheha kiho nari wia mo sawi nou naiheha kidio nari. 56Dubu ataro mo goho ihowa wia mo sawi idiowa, momu nou airemidio wia mo noumuri. 57Kiiro Abearo mo tau notiodoiro wia mo kiiro mabu nou nou muri, nou aibo dubu nou mo ihowa nou kiiro mabui nou mo muri. 58Nouri dou nou toboroudo koruo douri. Rio abeamio neiio mana aihoumo wia neiio aioroihiumo; dou nouri nou aibo biahai, duburo dou nouri ihowa nou kiiro kemidio kemidio tuturi. 59Nouri nana nou sunagowa naibaha iaowa nou ta’uwa Kapenaumawa nou naibaha iatomuaiwa.
60Nou himia kitomudio oubi godo ina nouri wade neiio naibaha irovidiowaumo nei naiba iaowaumo: Nouri pauwo waderi, bodio’o waimo‐irovidioi? 61Ina Iesu nou himiaro umo naibaha oiti nou kitomudio mereo nou kiao wadei aiema’utiwaumo nou neido naiba iaowa: Nouri wade rio gunuuni aratidiaidumo? 62Ina teiri rioo aiwaimoeauri Oubiha‐mere nou opuito kemidio batii noito aiwai‐ioroi? 63Urioro nou kiiro kowairi, gohoro na ata ododiai raihe; Nouri wade mo rioido nou niao neivia Uriori wia kiirori. 64Wia rio nouowa kemidio oubi amida’i rioo iraromodioumo biahai; mabu nouri kowahoro ta’ui nouowa Iesu umo naibaha oiti nouri oubio nou araromodioumo biahai wia nouri duburo nou piroha waimaai. 65Wia nou naiba iaowa: Mabu nouri mo rioido nou naro, ina Abearo nou owabai tatowa, dubu nou moido o’u raihe.
66Nou ta’uwa dooudo nou himia kitomudio mere godo naibaha araiwaumo wia hiwio amida nei noumu orohomo biahai. 67Ina Iesuro 12 oubido naibaha iaowa: Rioo nei aibo araiwaimo’ira? 68Simona, paina ata Pita, nouido naibaha omowameai: Pai‐dubu e, Imo boti dubuido araiwaimoi? Ro na’uri kiiro karae karae wadei airiworoho. 69Wia imoo ainiraromodiodumo wia umo ainoitutidumo, rovia Kerisori nouri Kiiro Urio‐abea Mereri. 70Iesu neido naibaha imowameai. Rio 12 mere moro iahuruo tatora wia na’u rio aueudo nou ubauba uriori. 71Nouro wadeito naibaha owaduuwa Iuda Isakariota, Simona mere; mabu nouri nouvia nouri duburo nou piroha aiwaimaai wia nou na’u duburi 12 oubi aueudo.
S'ha seleccionat:
Ioane 6: KXW1941
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Published by the British and Foreign Bible Society in 1941.