Ioane 7
7
1Nou ta’ui dooudo Iesu Galilaiawa naibaha orohowa. Nou Iudaiawa orohowa niro biahai mabu nouri Iudaia oubio aiemahidititutiumo, nou epiamoi. 2Wia Iudaia oubi kuriha horiomoo nou tariwai. 3Nouri nou niamamio nouido naiba iaowaumo: Bati nouowa tabeede, Iudaiaito ta’u ina nouri ro kitomudio mere, nouri tiaha kidodiai na’i ro umori kidodiai, neiio eaurimoi. 4Mabu nouri dubu ataro nou kidodiai na’i nou piroha idodiai biahai ina nou niro oubi auwoha nou umo oitimoi. Ina ro nouri nana idodiaiwa ro himiaro taiwaevia batibati auwohawa. 5Mabu nouri nou himia niamamioo neiio nouido iraromodioumo biahai. 6Nouri Iesu neido naibaha iaowa: Mo himia ta’u doihabuo hiwio biahai, rio himia ta’ui nouri hiwio auwoha. 7Batibati oubi auwoha rioido oriha iaurimo raihe, neiio mo oriha nemeauridumo mabu nouri mo neido kimapoiwai nei himia kiwaati nana’i nei ubaubahari. 8Rio horiomooido tarovioumo, mo horiomooido o’u raihe doihabuo, mabu nouri mo naiheha hiwio’i nou o’u biahai doihabuo. 9Ina nouri nana nou neido tau aro, nou Galilaiawa kemidio’i nouowa.
10Ina nou ta’uwa nou niamamio horiomooido tau orovioumo, dooudo nou himia naibaha ioro. Nou gamooha ko’u biahai, piro piroha o’u. 11Ina Iudaia oubio nou horiomoo batiwa naibaha aiomohowaumo wia neiio naibaha iaowaumo: Tou batiwai nou? 12Wia oubi auwohao nou kidia’i wadeito naibaha omowahuodiowaumo, nei naiba iaowaumo: Nou meaha duburi; amidao naiba iaowaumo: O’o nou oubido kiromohuwodio aibo wade kiaori. 13Wia oubi auwoha nou kidia’i paeha iaomo biahai, mabu nouri nei Iudaia oubido tore imaatiwaumo.
14Wia horiomoo turiwa hiwio’i tariwai, Iesu Tana‐motoito naibaha ioro naiba iatomuaiwa. 15Iudia oubio nou aiemaeawaumo, nei naiba iaowaumo: Teiri nouri dubu nou titi kiapo umora ina nou dubu ataro atomuai biahai? 16Nouri Iesu neido naiba imowameai naiba iaowa: Moro kiatomuai wadei nou mo himia wade biahai, na’u mo nouro notiodoiro nou himia waderi. 17Ina dubu nou niro Iehova niro na’i idodiai, nouri kiatomuai wadei nou umo aiwaiti Iehovaudora e mo himia kiao wadeudora. 18Dubu nou himia nana naibaha iwaduuti nou himia moari nouro naibaha omohouti wia dubu nou niro nou nouro kotiodoi moari, nouri dubu nou naihehari wia ubauba nana amida noumu ia biahai. 19Mosero rioido bubu imaai tatora, ata na’u mere biahai rio auwoha bubu rimododiaiwadumo. Rioo teiri nemahiditidumo mo epiamoi? 20Oubio nou naibaha omowameaiwaumo naiba iaowaumo: Rovia uba urio ramuri; bodioo remahiditidumo ro epiamoi? 21Iesuro naibaha imowameai neido naiba iaowa: Na’u kidodiai na’i moro tau nidodiai ina rio auwoha aiemaeatutiwaumo. 22Mosero rioido tama kiahio kidia tau imatomudio (ata nou Mosero biahai, nou Abeamio o’i) wia Sabati hiwiowa rioo ohio tama ahiaimoi. 23Ina rioo dubu ata tama ahiaimowa Sabati hiwiowa, mabu nouri rioo Mose bubu ahiaimo tore; rio moido gunuuni teiri rimahebidiodumo mabu nouri dubu nou himia goho auwoha moro meaha nidodiai Sabati hiwiowa. 24Rio wegewa kiaa na’i nei imeiwotatutimo aue; rio naiheha taimeiwotatutimo.
25Ina Ierusalemawa kemidio oubi amida naiba iaowaumo: Dubui noura nou remahiditidumo epiamoi? 26Wia taaurimo nou wade pakeha riaodio ina nei wade ata nouido iaomo biahai. Pai‐oubi nei umora nouvia naiheha Kerisora? 27Ata imo umori nouri dubu tou batiudo o’uro, ina nou ta’uwa Keriso aiwauro’ui, dubu amida nei umo biahai tou batiudoi nou. 28Nou ta’uwa Iesu Tana‐motowa viro naibaha iauwoidio nou kiatomuai ta’uwa; nou naiba iaowa: Riovia mo umori wia rio umo mo tou batiudo no’uro; ina mo himiaro o’u biahai wia mo nouro notiodoiro, nouvia naihehari ina rioo nou umo biahai. 29Ata mo umori nou, mabu nouri mo noudo no’uro wia mo nouro notiodoiro. 30Nou ta’uwa nei nou ohiaimo niroi wia dubu amidao nou tuito ohimo biahai mabu nouri nou ta’u o’u biahai. 31Wia oubi godogodo nouido araromodiowaumo wia nei naiba iaowaumo: Ina Keriso aiwau‐ro’ui tiaha kidodiai na godogodo’i nouro idodiaira, nouri dubu kidodiai aibo biahai? 32Parisea oubio naibaha orowaumo, oubi godogodoo nouri kiao wade nouido iaowaumo, wia auwo‐kohena oubira, Parisea oubira hiwaa oubi amida naibaha itiodoumo nou ohiaimoi. 33Nouri Iesu neido naiba iaowa: Mo riomu komu ta’u nemidio ina mo nouro notiodoiro nouido mai na’ui. 34Rioo mo ainaimo‐omohouti ina rioo mo oweamo raihe, wia mo nouowai namidio’i batii rio noito orohomo raihe. 35Iudaia oubi nei himia himia naibaha iaowaumo: Nouri dubu tou batito wairi o’ui ina imoo nou oweamo raihe; noupa nou kihere oubido, douboi oubimu aiwairi o ui wia douboi oubia waiatomuai? 36Nou touna wade riao, Rioo mo ainaimo‐omohouti ina rioo mo oweamo raihe wia mo nouowai namidioi batii, rio noito orohomo raihe?
37Ina dooudo hiwio, horiomoo auwo hiwio’i, Iesu naibaha otoa wia viro naibaha iauwoidio; nou naiba iaowa: Ina dubu nou obo nirowa, nou mo’uro moido obo idioi. 38Moido kararomodio dubu titi naibaha iati: Nou niroudo omo kiiro obo ramu aiwaruoi. 39(Nouri kiao wade nou imini naibari: nou himia kiraromodio oubio Tana‐urio aiwaimo‐oweai; wia ta’ui nouowa nouri Tana‐urio nou ko’u biahai mabu nouri nou ta’uwa Iesu pai oiti biahai.) 40Ina oubi godogodoo nouri kiao wade naibaha irovidiowaumo, neiio naibaha iaowaumo: Naiheha nouri dubu nou nouri peroveta duburi. 41Oubi amida naibaha iaowaumo: Nouri dubu nouvia Kerisori wia oubi amida naibaha atodoumo: Keriso Galilaiaudo a’uro? 42Tana‐buka titi ariati, Keriso nou Davida gudo a’uro wia Betelehema oopoudo a’uro, Davida kemidio oopo’i. 43Nouri oubi auwoha nei aieremautiwaumo mabu nouri. 44Wia oubi amidao nou ohiaimo niroi, ina ata dubu amidao nou tuito ohimo biahai.
45Wia nouri hiwaa‐oubi naibaha araiwaumo auwo‐kohena oubido wia Parisea oubido, wia neiio neido naiba iaowaumo: Tounai rioo nou owoumo tato? 46Hiwaa oubio naibaha imowameaumo: Dubu ata nouri dubu aibo iao biahai. 47Ina Parisea oubio neido naibaha imowameaiwaumo: Rio imini araratowoutidumo? 48Pai‐oubira, Parisea oubi amidara, neiio nouido ariraromodiodumo? 49Wia nouri oubi gema nei bubu umo biahai nouri nei uba aioitiumo. 50Nikodimo neido naiba iaowa: (nouri Iesuido duo ko’u duburi) nou neimu emidio. 51Imo bubui dubu na’uro ariwotoi opuito nou nou korowairi wia nou kidodiai na’i nou umori? 52Neiio nou naibaha omowameaiwaumo, nouido naiba iaowaumo: Ro Galilaia dubura? Ro tamoho wia taauri, peroveta dubu na’u Galilaiaudo o’u biahai.
S'ha seleccionat:
Ioane 7: KXW1941
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Published by the British and Foreign Bible Society in 1941.