KISAH 6
6
Ibou muhwindacan di yahati tut yo di igya kui Yesus
1Jei bi lene yo di ibit Yesus imangti bikum eisi ba, ningot ndig bu. Noro mben Yahudi di imbrap nihyet Yunani ingon dindi tut timiei mben Yahudi nya. Gi hi di imbrap nihyet Yunani ilua sok bipia ide kibom nya ima mun di bahati tut yok bikwop njap-njap sur yam kin kibom nindigsi nya bi. 2Gima rino yo di igya kui Yesus ibou simnaibrimigcan induk yo di ibit Yesus yahagom kwei bipai biyok “Dem tut gima nikes hon midyai nitri tut Allah Nihyetti leu ba, niyai midyai nikwas njita tut kibom nya bi. 3Gima rino nisut bat jen, gi kei mem jidimig ibou muhwindacan di isingat tut tungwatu nya ba, Allah Ninnei de nisindemti srek kwei ei ingonti bingon ki cem leu jikieti leu api nita yok mem igyai midyai dini. 4Lewo nijoi sut nita nibou ei nadi kin nitri tut Allah Nihyetti mem tungwatu nya.”
5Yo di ibit Yesus yahagom ice tut yo di igya kui Yesus ingon kanti dima. Lene idimig Stefanus di ba ningon gom bicom Yesus bibor di Allah Ninnei de nisindemti srek kwei ei ningonti cem. Idimig Filipus kin Prokhorus kin Nikanor kin Timon kin Parmenas kin Nikolaus leu Antiokhia. Ba, Nikolaus ne ngkiai noro tti kin puig Yahudi. 6Yo di ingon jo kep nya ibuwak yo dini bindo yok bak yo di igya kui Yesus leu api yo di igya kui Yesus ikes inda ei ibou nggram him bingat nadi tindei yok.
7Tug hon nisinati dima lene Allah Nihyet kieng kep minu dima hagom. Yo di ibit Yesus imang ndig hi kin yok bu ei minu ndig Yerusalem ba, imam nya cem imang bibor iba ingon com Yesus.
Nibou mben Yahudi nya ikat Stefanus
8Allah singat tut Stefanus nindig bibor apino noni yai nisindemti mem gima bibon mindur kin bindo di mipbor ngat nya ei tungwatu ikieti. 9Noro andigpoi nya di inggre kin Mbusyamei Di Igyati Kwes Nya#6:9: Nipas kep Mbusyamei Di Igyati Kwes Nya: Nipou ne yo dini ne mben Yahudi di inok awak rin noro tini bu ne bihi iba mitiei bipek yonti inyeng lene iceu bat nya ikwek bihi leu awak tu. bihi itte tut Stepanus nihyet. Yo dini ne mben Yahudi di itimieisi leu minu ndig Kirene kin Aleksandria ri. Yo dini kin mben Yahudi ibou poi di itimieisi leu hanjop Kilikia kin Asia iba ighyet bidahat Stefanus nihyet. 10Noro bit bon ibuhup Stefanus nihyet kan bi lewo Allah Ninnei bindei ba, Stefanus ba ningon di ki bibrim ningkek kep yok. 11Gima rino ingot kep ibou poi ba, yuhum insi leu binhyepo ipai kep Stefanus ninghapti “Nyeni nimiap no dima nihyet tirigi noni pai Musa kin Allah kinei.” 12Nok gima lene yo di igyati kwes pima ikes ingon bak tungwatu nya ei minu ndig dima kin nibou kintrorti nya kin guru puig timiei nya leu api yuug kat Stefanus bibuwak noni kwei ei Nikei Puig Yahudi nya yoho bei. 13Ba, ihig yo di ikinei-kinau nya ibou poi kwei mem gima ipai kep Stefanus biris mun ei noniti bipai “No dini srep tut Tuhan De Ig di kwes-kwau dini kin Puig Yahudi nicukti di Allah kes bak Musa cem bikes nihyet tut kan bi. 14Nimiap nihyet di noni pai Yesus leu minu ndig Nazaret minggek Tuhan De Ig binggek tut nyeni igyai kepti nya di iba nyekep leu Musa hagom!” 15Yo di isrig Nikei Puig Yahudi Nya ikieti yahagom itou kep Stefanus nggilun bingat lo, niimaisi dem kep malaikati niimaisi.
S'ha seleccionat:
KISAH 6: HAD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió