KISAH 7
7
Stefanus tri nihyet bak Nikei Puig Yahudi Nya
1Imam Nibou Ndig hig ser Stefanus “Ipaisi dima gi nijit rin e?” 2#Kej. 12:1 Stefanus buhup “Disut bat kin dicig bat jen, ma jingig jitingou mem dihyet! Nipou tirigi ide pung di intun him di Abraham bong ei nitimieisi ei minu Mesopotamia bikwei bong ei minu ndig Haran bigyo lene Allah di kei-kau-kei ndo Nonti brei binoni, 3bipai bak ‘Ma akes ade bat nya kin atimieisi ei ba, ambut ug ei minu hiter bu di midindo bina.’ 4#Kej. 11:31, 12:4 Gima rino Abraham jo leu nitimieisi ei minu Kasdim buug bong ei minu ndig Haran bu. Niabiati nicig mai leu lene Allah pinak Abraham bikwei bong ei minu nijep di jibong ser dini. 5#Kej. 12:7, 13:15, 15:18, 17:8 Mpe dima lene Allah ndo minu ttou nsi gom bak Abraham binok nide dihyei ninda rom bi. Noni pek hanjop nsi mien hi mem miai ngausi cem bi. Noro Allah preu ei mem noni kin yo di intun noni him bipia inyeng mitak kep minu dini hagom ei nidipti bu. Tirigi Allah preu ei mem noni dima lene Abraham yai nimunggwom hi bigyo. 6#Kej. 15:13-14 Noro Allah pai binoni ‘Ei nidipti bu ne yo di intun nani him mibong ser ingkiaisi binok awak. Ngkiai nya mihwen bit yok kikau mem ari bingwam sratus bitai. 7#Kel. 3:12 Noro midikes hukum ei ngkiai nya dima yok dip drek dip gi ico kep yo di intun nani him binok awak nya. Yo di intun nani him minang leu minu dima leu api mikwei kuk yok biDa ei minu dini.’ 8#Kej. 17:10-14, 21:2-4, 25:26, 29:31–35:18 Allah pai nok bipreu ei mem Abraham tug hon midut sunat. Gima rino tirigi Ishak de njap ug ei njap muhwindaningai lene Abraham basunat noni. Leu api Ishak basunat nipmot Yakub. Ba, Yakub cem basunat nipmot bat nya ibou simnaibrimigcan. Yo dini ne pung di keret Israel nya intun him ri.
9 #
Kej. 37:11, 28, 39:2, 21 Ide pung di nyeni intun him dima yok ingon kinei sut ikinjoi kieti di Yusuf bitri noni nok awak ug ei minu Mesir. Noro Allah nyohou noni kikau, 10#Kej. 41:39-41 biteu noni leu api ningwes ngun leu mun di buhun tak noni hagom. Allah yai ningon di singat kei kin ningon di ki cem bak Yusuf tirigi noni ya ei Firaun di nibou ndig Mesir noho bei. Apino Firaun kon Yusuf ba, yai ninyeng di jei bak binok nibou mem minu Mesir nisurti-nipekti lene ninyeng tak kep Firaun de ig bei nsi nya yahagom cem. 11#Kej. 42:1-2 Lo bi lene ninggum nindig bibor hwen minu Mesir kin Kanaan hagom ba, njita mui bingwig leu tungwatu nya. Gini buhun tak yok nindig bibor. Ninggum nindig bibor dima hwen ide pung di intun him pima yok cem. 12Ba, tirigi Yakub miap tut njita niken di jo ei minu Mesir lene noni pinak nipmot bat di inok pung di nyeni intun him pima yok ug ei minu Mesir nimbigom. 13#Kej. 45:1, 16 Tirigi yuug ei Mesir nimbican bu lene Yusuf ndo nonti brei bak nikindig bat-nikinjoi bat nya. Mpe dima lene Firaun sindi miap tut Yusuf nide bat nya. 14#Kej. 45:9-10, 17-18, 46:27 Leu api Yusuf sok nihyet mem nicig Yakub bipai ‘Suar nani kin ade bat nya jahagom jikwei bong ei minu Mesir.’ Yo dima yahagom imangti ibou ningot muhwindacan ba, muhwi. 15#Kej. 46:1-7, 49:33 Gima rino Yakub nya yuug ei Mesir leu api noni kin nyeni ide pung di intun him nya ide njap ngwig hon ei minu dima. 16#Kej. 23:3-16, 33:19, 50:7-13; Yos. 24:32 Ide limwa nya ikon Yakub kin Yusuf ingut kwei ei Sikhem bitig ingut ei jui nsi di Abraham ba mitiei bipek leu Hemor nipmot bat nya.
17 #
Kel. 1:7-8
Son dideu nicunti mem Allah yai mun bit leu nok Noni preu ei mem Abraham habiei su pima lene mben Israel imangti kum eisi binindig bibor ei minu Mesir. 18Kikau bibou nibou ndig nijep di kan tut mun po Yusuf bibon pima bi kiju ba, ninyeng tak kep mben Mesir bu. 19#Kel. 1:10-11, 22 Noni ba nye di mben Israel bikek ba, hwen bit ide pung di intun him nya nindig bibor. Noni bidip huk yok bicom imunggwom ngwoi nya ei nisai bisindui sut yok bimai bingwig ug. 20#Kel. 2:2 Musa nipmem srek tut noni ei nijam dima bingat lo, ninghuisi llei bibor. Gima rino nipmem om no nyen tut ei ig bei mem bed ningai. 21#Kel. 2:3-10 Ba, tirigi ikes noni cem bisindui sut ei nisai lene Firaun nipmisop ngondut noni ba, usap binyohou nok nonti nipmot.
22Guru nya ingginau kep Musa ba, noni yai ningon di ki tut mben Mesir igyai kepti nya hagom. Ba, yai ninyeng di jei tug hon nihyet buhun kin nisindemti cem. 23#Kel. 2:11-15 Tirigi Musa de njap ug ei ari bingwam ningot bitai lene noni kos tut bipia ngig niyai kep nisut bat mben Israel nya. 24Lene noni tau kep mben Mesir gom di bui mben Israel gom. Gima rino Musa tti kin gi hi di mben Israel bihwen gi hi di leu minu Mesir. 25Noni kan bigya nisut bat mben Israel mingat bipia Allah ba noni biteu yok bingwes ngun leu mben Mesir indati. Noro igingat nok gima bi. 26Njap di hyep bu lene Musa tau kep mben Israel ibou can di ibui yam leu api noni pi bibakei yokti bipai biyok ‘Disut bat jen, jikinjoi bat yam ri. Nggon rino jibui yam i?’ 27Noro gi hi di mbuk tut nisut rok Musa ei nitta bibuhup ‘Tou rino ndo nani nok nibou kin nikei mem nye dino abakei nyeti i? 28Mpaba ma ahwen da noyam kin gino ahwen mben Mesir gom annani pima e?’ 29#Kel. 18:3-4 Tirigi Musa miap tut nipaisi dima lene noni nang leu minu Mesir buug bong ei minu Midian biyai munggwom pinai nya ibou can ei minu dima.
30 #
Kel. 3:1-10
Lo bi lene ug ei ari bingwam ningot bitai bu leu api malaikati gom ttau kep Musa ei iggum ndigsi dideu Nungug Sinai. Malaikati dima ttau ei hum njeng di piga biei mon gom binok hum di sror dimati. 31Nok rino Musa nga leu sut nindig bibor buug ndam biei mon dima bibimian huk. Lene noni miap Allah nihyet di tibim kwei bipai, 32‘Dani ne ade pung di antun him nya kin Abraham kin Ishak kin Yakub ide Allah ri.’ Musa ninghuisi mpig sut nindig bibor bindun bou leu lene bimian huk biei mon dima bu bi. 33Leu api Allah pai binoni ‘Akwek ade srop leu amig jou lewo dipigig sut mpia ttou nsi di ayati dima mem Danti. 34Dingat Ditde limwa nya di igyai ninghuisi wei nindig bibor ei minu Mesir bidiyok ngon kep yok. Dimiap ighyet tut gi yuun-icot nindig bibor tu. Gima rino dijuk kwei mem diteu yok bingwes ngun. Nogindini akwei! Dipinak nani hanyen ug ei minu Mesir.’
35 #
Kel. 2:14
Musa dini ripo mben Israel irok ei itta tirigi isrep tut noni ‘Tou rino ndo nani nok nibou kin nikei mem nye dino abakei nyeti i?’ Noro noni ne no di Allah pinak kwei nok nibou kin no di teu yok bingwes ngun tug hon malaikati di ttau kep noni ei hum njeng di piga biei mon nok hum sror pima nide nisindemti ri. 36#Kel. 7:3, 14:21; Bil. 14:33 Musa dini ripo bie tut yok leu minu Mesir leu api bibon mindur kin bindo ei Mesir kin Muk Ngwoi kin iggum ndigsi kikau mem ari bingwam ningot bitai pima. 37#Ul. 18:15, 18 Musa dini cem ripo pai bak mben Israel ‘Allah midimig nabi gom leu jide adig-ajoi nya ikieti bipinak noni ndam je bit leu nok Noni pinak dani.’ 38#Kel. 19:1–20:17; Ul. 5:1-33 Musa no rima kin mben Israel tirigi imbus yam ei iggum ndigsi. Noni ripo ya hacan mem malaikati di mbrap bit nyeni ide pung di intun him nya ei Nungug Sinai cem. Noni ripo yai nihyet di bit bon pror yon kan bi leu Allah leu binhyepo tri tut hanyen binye.
39Mbro nok gima lo, ide pung di intun him nya ikou sut Musa nihyet. Yoni irok noni ei itta leu api iba yoho rok minu Mesir hanyen. 40#Kel. 32:1 Ipai bak Harun ‘Ma abibon kwar nya mem nye leu binhyepo kwar dima yok ibie tut nye. Lewo nikan tut mun di ndei Musa di buwak nye kwei leu minu Mesir bi!’ 41#Kel. 32:2-6 Lo bi lene ibibon kwar bibingon nok sapi nehen pap leu api ibui mindhe tut ninggrom bak bibon pesta kep cem lewo ingon jei sut mun di ibibon bou inda him. 42#Am. 5:25-27 Gima rino Allah ba ningha biyok bisindui sut yok leu api ikuk yok bak ham nya ei mpia-bbed him. Gima hagom bit leu nok nabi nya ipai ei srat nyati tu bipia,
‘He je di mben Israel e, jikuk je biDa tirigi jibon midut nibui mindhe tut ninggromti mem ari bingwam ningot bitai ei iggum ndigsi pima e? E bi!
43Jibiang prak meng di jibikuk je bak jide kwar Molokh eisi kin ham Refan di nok jide kwar cem ba, jibibon kwar dima yok hagom bou jinda him mem jikuk je bak. Gima rino midicom je ug ei jingkiaisi njiriek minu Babel.’
44 #
Kel. 25:9, 40 Prak meng di ndo tut Allah di ningat rin bit Nide limwa nya jo bit ide pung di intun him nya ei iggum ndigsi. Yoni yohok prak meng dima bit leu nok Allah nicuk Musati ba, noyam kin prak meng ningwes di Allah ndo binoni. 45#Yos. 3:14-17 Ei nidipti bu lene ide pung di intun him nya iba yo kep prak meng dima leu idigup bat-idigai bat nya bibiang-biang nyen tirigi yoni kin Yosua injei bitot ngkiai nya di Allah jji yok bingwig sindam leu api igyai minu dini bigyati. Prak meng dima jo nijoti ug bipek nijam Nibou Ndig Daud. 46#2Sam. 7:1-16; 1Taw. 17:1-14 Daud yai Allah ningon di kei sut noni lene hara Allah leu binhyepo Allah sindui sut ba, noni ngot ig ningat gom mem Allah di Yakub kuk no bak. 47#1Raj. 6:1-38; 2Taw. 3:1-17 Noro bi. Lewo Salomo rino ngot ig mem Allah.
48Gi nok lo, Allah Di Ninyeng Jei Bibor bong ser ig di tungwatu ingot bou inda him bi. Lewo nabi gom pas kep,
49 #
Yes. 66:1-2
‘Allah pai bipia gwamti rinok banggo mbrei mem digwati lene dihyeisi rinok bilen mem dimigya. Jingot ig di nok mindei mem Da i? Nghim nsi mem dibong nyahan eisi rigitou i? 50Danti rino dipai tes mun dima yok hagom bou dinda him bi e?’
51 #
Yes. 63:10
Disut bat jen, jingkek ndok bibor! Nggruk bibor mem gima jibit Allah nihyet cem! Jitingou nam ser Allah nihyet! Jeni kin jide pung di jintun him nya jahagom jisrep tut Allah Ninnei ninno tu! 52Jide pung di jintun him nya ihwen bit nabi yahagom ba, injiriek igom bi. Ihwen yo di igya hacan di Allah pinak yok kwei di itri tut Nide Awak di ningon sren-srau nikweisi nipou su. Njap gi pini jug jibakilak bijihwen Allah De Awak dima tu. 53Jiyai Allah nihyet leu gwamti tug hon malaikati nya indati noro jibit nihyet dima bi!”
Iba tig bihwen Stefanus bimai
54Tirigi Nikei Puig Yahudi Nya imiap mun di tibim ei Stefanus nuhui him lene ingon sibui sut bigga noni nindig bibor. 55Noro Stefanus yai nisindemti leu Allah Ninnei bitou kep ginyo kug ndam gwamti bingat Allah nikei-kau-keisi kin Yesus di ya kui Allah ninda com. 56Noni hara “Jingat i! Dimbou gwamti kau leu ba, Munggwom Tungwatu Nipmot ya kui Allah ninda com!”
57Nikei Puig Yahudi Nya iba ighyet nindig bibor bimbrua kep noni bidat kep ser itingou leu lene yahagom ikiju igkep noni, 58binjei noni ug ei minu ndig Yerusalem nisai leu api iba tig bihwen noni. Yo di ibindei mbut mun di pek kep dima ijuk ide sinsun ndok di jei leu lene ikes bak pinjoi pilei di ninyeng Saulus. 59Iba tig bihwen Stefanus ninno lene noni hara “Tuhan Yesus e, ayai dinnei leu hak ug.” 60Lene noni ba nibiau bicom mpia leu api ba nihyet nindig bahara “Tuhan e, ma akos ser ide sisar leu yok hak ug.” Hara nok lene ninnei kimbas.
S'ha seleccionat:
KISAH 7: HAD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió