लुका 23
23
राजपाल पिलातुसे दरबारै ईशू
(मत्ती 27:1,2,11-14; मरकुस 15:1-5; युहन्ना 18:28-38)
1तेखअ सारी सभा उझ़ुई और तिन्नैं निंयं ईशू राजपाल पिलातुसा सेटा लै। 2तिंयां लागै ईशू लै इहै दोशा लांदै, “हाम्हैं भाल़अ अह म्हारै देशे लोगा रोम राज़े खलाफ शकाऊंदअ और अह करा माहा राज़ै लै कारै दैणा लै नांईं, और आप्पू लै बोला अह मसीहा और राज़अ।”
3पिलातुसै पुछ़अ ईशू का, “तूह यहूदी लोगो राज़अ आसा?”
ईशू दैनअ ज़बाब, “तूह आसा लागअ द आप्पै बोलदअ।”
4तेखअ बोलअ पिलातुसै बडै परोहिता और तिधी होरी लोगा लै, “मुखा निं एऊ मणछा दी किछ़ै दोश शुझदअ।”
5पर तिंयां लागै होर बी खास्सै बोलदै, “अह शकाऊआ गलील लाक्कै ओर्ही इधी तैणीं, सारी यहूदा दी शिक्षा दैई सोभी लोगा।”
6इहअ शूणीं करै पुछ़अ पिलातुसै तिन्नां का, “अह गलील लाक्कै का आसा?” 7पिलातुसै इहअ ज़ाणीं करै कि तेऊ लाक्कै करा हेरोदेस राज़अ राज़। तेऊ छ़ाडअ ईशू हेरोदेस राज़ै सेटा लै किल्हैकि सह आसा त तिन्नां धैल़ै येरुशलेम नगरी आअ द।
हेरोदेस राज़ै सेटा ईशू
8हेरोदेस हुअ ईशू भाल़ी बडअ खुश किल्हैकि सह च़ाहा त कई धैल़ै ओर्ही ईशू भाल़णअ और तेऊ त तेऊए बारै बडअ भारी शूणअ द और तेऊ ती किज़ै नछ़ैणां भाल़णें आशा। 9तेऊ पुछ़ी ईशू का बडी भारी गल्ला पर ईशू निं किछ़ ज़बाब दैनअ, 10बडै परोहित और शास्त्री तै खल़्हुऐ दै बडै तन मन लाई ईशू लै दोशा लांदै। 11तेखअ हेरोदेस राज़ै और तेऊए सपाही किअ ईशूओ सुहांग और बैंज़णीं रंगे झिकल़ै बन्हैऊंईं छ़ाडअ बापस पिलातुसा सेटा लै। 12तेसा ई धैल़ी हुऐ पिलातुस और हेरोदेस आप्पू मांझ़ै साथी, एता पैहलै डाहा तै तिंयां एकी दुजै लै ज़ीद।
मौते सज़ा दैणैंओ हुकम
(मत्ती 27:15-26; मरकुस 15:6-15; युहन्ना 18:39—19:16)
13राजपाल पिलातुसै शादै सोभै बडै परोहित, हाकम और होर लोग, संघा बोलअ इहअ, 14“तम्हैं आणअ अह मणछ मुंह सेटा लै और तम्हैं बोला एऊए बारै इहअ कि अह पाआ लोगा शकाऊई करै कबाता! पर मंऐं हेरअ अह थारै सम्हनै ज़ाच़ी-भाल़ी। पर ज़हा गल्लो तम्हैं एऊ लै दोश लाअ, इहअ निं मुखा एऊ दी सज़ा दैणैं जोगी किछ़ै शुझुअ। 15नां हेरोदेस राज़ै एऊ दी किज़ै दोश भेटअ। किल्हैकि तेऊ छ़ाडअ अह मुंह सेटा लै बापस। ऐबै भाल़ा, एऊ निं इहअ किछ़ै किअ कि हुंह एऊ लै मारनै जोगी सज़ा दैई सके। 16तै ऐबै लाअ मंऐं अह च़िकी करै छ़ाडी।” 17पिलातुस त थैरे धैल़ी तिन्नां लै एकी ज़ुल्म करनै आल़ै कैदी छ़ाडणा लै मज़बूर।
18तेखअ पाअ सोभी हाल्लअ-गोल्लअ और लैल़ा पाई करै बोलअ, “एऊ पाआ मारी और हाम्हां लै छ़ाड बरोबा।” 19बरोबा त ज़ुंणी नगरी दी राज़ द्रोह और हत्या की ती और सह आसा त कैद खानै दी पाअ द। 20पर पिलातुस च़ाहा त ईशू छ़ाडणअ और तेऊ समझ़ाऊऐ तै लोग एकी बारी भी। 21पर लोगै लैल़ा पाई-पाई बोलअ, “एऊ मारा क्रूसा दी।”
22पिलातुसै बोलअ चिऊथी बारी तिन्नां लै, “किल्है, एऊ किज़ै बूरअ काम किअ? मंऐं निं एऊ दी मौता दैणैं जोगी किछ़ै दोश भाल़अ, तै लाअ मंऐं अह च़िकी करै छ़ाडी।”
23पर तिंयां पल़ै पिछ़ू, “एऊ छ़ड़ाऊआ क्रूसा दी” और तिंयां लागै होर बी ज़ोरै लैल़ा लांदै। 24तेखअ दैनअ पिलातुसै हुकम कि ज़िहअ ईंयां बोला तिहअ ई करा। 25तेऊ छ़ाडअ सह मणछ पोर्ही ज़ुंण राज़ द्रोह और हत्या पिछ़ू कैद खानै दी त बंद किअ द। ज़हा तिंयां मांगा तै और ईशू सभाल़अ तिन्नें साबै ज़िहअ तिंयां च़ाहा तै।
ईशू क्रूसा दी छ़ड़ाऊंणअ
(मत्ती 27:32-44; मरकुस 15:21-32; युहन्ना 19:17-27)
26ज़ांऊं तिन्नैं ईशू निंयं ता तिन्नैं ढाकअ शमौन नांओं मणछ कुरेन नगरी का आअ द, सह आसा त गराऊंआं का लागअ द एछदअ, संघा क्रूस लादअ तेऊए कान्हा कि ईशू पिछ़ू-पिछ़ू निंऊं एऊ।
27पिछ़ू लागै बडै भारी खास्सै लोग हांढदै। कई बेटल़ी लागी लेरदी और हिक्का पटाकदी। 28ईशू बोलअ तिन्नां बाखा भाल़ी करै, “हे येरुशलेम नगरीए शोहरीओ, मुल्है निं लेरा लाआ, पर आपणैं-आपणैं शोहरू लै लाआ लेरा। 29किल्हैकि हेरा, तिंयां खरीए धैल़ै एछणैं इहै कि लोगा बोल़णअ इहअ, ‘भागा आल़ी आसा सह बेटल़ी ज़ुंण बांढी आसा, भागा आल़अ आसा सह गर्भ ज़ुंणी कसा लै ज़ल्म निं दैनअ और भागा आल़ै आसा तिंयां दुधू, ज़ुंणी कसा दै दुध निं पणैंऊंअ।’ 30तैहा घल़ी बोल़णअ तिन्नां इना उछ़टी धारा लै इहअ, ‘हाम्हां प्रैंदै ढूल़ा’ और ढेका लै बोल़णअ तिन्नां इहअ, ‘हाम्हां डाहा दाबी।’
31 “किल्हैकि, ज़ै तिंयां हरै बूटा संघै इहअ करा ता शुक्कै लै भुझ़ा तिन्नां कै निं करनअ होए।”
32तिन्नैं सपाही निंयैं दूई होर मणछ बी क्रूसा दी छ़ड़ाऊंणा लै ज़ुंण खुंनी और द्रोही तै।
33ज़ांऊं तिंयां तेसा ज़ैगा पुजै, ज़िधा लै खोपल़ीए ज़ैगा बोला, ता तिन्नैं तिधी तिंयां बूरै कामां करनै आल़ै दूई डाकू बी एक दैहणै और एक बाऊंऐं क्रूसा दी छ़डाऊऐ। 34तेखअ बोलअ ईशू, “हे बाप्पू, इना कर माफ, किल्हैकि इना का निं थोघै कि ईंयां किज़ू करदै आसा लागै दै?” संघा तिन्नैं सपाही बांडै आप्पू मांझ़ै परच़ी पाई करै तेऊए झिकल़ै। (1 पतरस 3:9; याशायाह 53:12; भज़न 22:18)
35लोग तै लागै दै खल़्हुई करै भाल़ै और तिंयां सपाहीए हाकम बी लागै सुहांगा करदै और इहअ बोलदै, “एऊ होर ता बच़ाऊऐ, ज़ै अह मसीहा आसा और ज़ै अह परमेशरो छ़ांटअ द आसा तै आप्पू ता बच़।” (भज़न 22:7)
36सपाही बी आऐ नेल़ और मिल्लै रसा दी चुशू डबेऊई दैनअ तेऊ का च़ाखणा लै। तिंयां बी लागै तेऊए सुहांगा करदै। (भज़न 69:21) 37“ज़ै तूह यहूदी लोगो राज़अ आसा, तै आप्पू ता बच़ हेरुं।” 38तेखअ तेऊ प्रैंदै क्रूसे च़ुंडी टोकी तिन्नैं एक तगती, और तेथ त तेऊओ दोश लिखअ, “यहूदी लोगो राज़अ”।
मना बदल़णैं आल़ै बूरै कामां करनै आल़ै
39ज़ुंण तिंयां ईशू संघै डाकू बी क्रूसा दी तै छ़ड़ाऊऐ दै, तिन्नां मांझ़ै बोलअ एकी निंदा करी करै इहअ, “तूह कै मसीहा निं आथी? तै तूह आप्पू बी बच़ और हाम्हां बी बच़ाऊ।”
40एता लै दुजअ लागअ तेऊ पैहलै झ़ाहल़ काढी करै नैरदअ, “तूह कै परमेशरा का बी निं डरदअ आथी? ताल्है बी ता अह ई सज़ा आसा दैनी दी। 41हाम्हैं आसा फैंसले साबै ठीक सज़ा भुगतदै लागै दै किल्हैकि म्हारै कामों भेटणअ त हाम्हां अह ई फल, पर एऊ निं किछ़ै बूरअ काम किअ आथी।” 42तेखअ बोलअ तेऊ, हे ईशू, “ज़ेभै तूह आपणैं राज़ एछे, तेभै डाहै मेरअ बी खैल।”
43ईशू बोलअ तेऊ लै, “हुंह खोज़ा ताखा सत्त कि तूह हणअ आझ़ ई मुंह संघै स्वर्गे।”
ईशूए प्राण शोटणै
(मत्ती 27:45-56; मरकुस 15:33-41; युहन्ना 19:28-30)
44दपहरा पोर्ही चिऊथै पहरै तैणीं रहअ तेऊ देशै घोर न्हैरअ हई और उडै तैणीं रही ज़ेही राच पल़ी। 45सुरज़ डुबअ और परमेशरे मांदरै लाअ द परदअ धेल़्हुअ प्रैंदा का थाल्लै तैणीं दूई बाखा लै। (आमोस 8:9; इब्रानी 10:19)
46तेखअ बोलअ ईशू ज़ोरै लैल़ पाई इहअ, “हे बाप्पू, मंऐं सभाल़ी आपणीं आत्मां तेरै हाथै।” इहअ बोली करै शोटै तेखअ ईशू प्राण। 47एकी सुबैदारै तेऊ सम्हनै तिधी ज़ुंण हुअ तेता भाल़ी करै की परमेशरे ज़ै-ज़ैकार और बोलअ, “ज़रूर अह मणछ त धर्मीं।”
48खास्सै लोग ज़ुंण तिधी भाल़ै आसा तै आऐ दै, तिंयां नाठै एता भाल़ी हिक्का पटाकदी घरा लै। 49ईशूए सोभ भेतू-बछ़ैणूं और ज़ुंण बेटल़ी गलील लाक्कै का ईशू सेटा आई, तिंयां ती दूर खल़्हुई करै ज़ुंण तिधी हुअ तेता भाल़ी लागी दी। (भज़न 38:11; 88:8)
ईशू दाबी डाहंणअ
(मत्ती 27:57-61; मरकुस 15:42-47; युहन्ना 19:38-42)
50युसुफ नांओं एक बज़ीर त सादअ सिधअ और धर्मीं मणछ। 51सह निं तिन्नें बच़ारा और कामां का खुश आथी त। सह आसा त यहूदी लोगे नगरी अरमतियाह गराऊंओ रहणैं आल़अ और सह बी आसा त परमेशरे राज़ा न्हैल़अ लागअ द।
52सह नाठअ राजपाल पिलातुसा सेटा लै संघा मांगी तेऊ का ईशूए ल्हास। 53तेखअ थुआल़ी तेऊ ल्हास क्रूसा का धरनीं, संघा डाही च़ादरा दी पल़ेटी तेसा घोरी दाबी ज़ुंण भिल़ी दी आसा ती कोती दी और तेथ निं अज़ी बी कोहै डाहअ त। 54सह धैल़ी आसा ती ओवार्णे थैरे तैरी करने धैल़ी और बशैघे धैल़ी ती शुरू हणैं आल़ी।
55तिंयां बेटल़ी ज़ुंण गलील लाक्कै का आसा ती आई दी, तिंयां नाठी पिछ़ू-पिछ़ू और तिन्नैं भाल़ी सह घोर कि ईशूए ल्हास किधी आसा डाही दी। 56बापस फिरी करै बणांअ तिन्नैं खुशबूदार तेल और बशैघे धैल़ी किअ तिन्नैं बधाने साबै राआम। (लुआह 20:10; बधान 5:14)
S'ha seleccionat:
लुका 23: OSJNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.