Lucas 15
15
Ja cheji
(Mt 18:10-14)
1Yajni wa'n sje'jel ja yab'al ja Dyos ja Jesusi, ja ma'tik wa stajb'aye kontribusyon sb'a Roma, cho jach'ni ja ma'tik wax yila ja fariseo jumasa mi jas lek ja jas wa sk'ulane'i ch'ak ochuke mojan smaklajel ja jas wax yala ja Jesusi.
2Yajni yilawe ja fariseo jumasa sok ja ma'tik wa sje'a ja mandar sb'a Moisesi, ti och sk'e'naye ja Jesusi, ti wax yalawe'a: —Ja tan winik iti, lajan sta' sb'aj sok ja tantik mulanum jumasa, wa xcho wa'ye lajan, xchiyexta.
3Yani yab' ja Jesús ja jastal jawi, ti yala jun lo'ila:
4—Junuk ja we'nlexi ay yi'oj jo' tajb'e (100) chej yajni waj ya kwenta, waj yile ch'ayel june, ¿Mi'ma oj ya'kan b'a job' ja chan tajb'e sok b'alun lajune'i (99) ja' oj waj sle'jan ja jun ch'ayel b'a? 5Yajni wa sta'a, wax ya' kajan b'a stejleb', 6Jel gusto wax kumxi jan sok. Stsa'an yajni xk'ot b'a snaji, oj stsom jama' mojan yi'oj sb'aj soki, sok ja ma'tik lek wax yila sb'a soki. Ti oj yal yabye'a: —La'ik jmok b'aj naj, la ajyukotikik gusto. Jta'ata ja chej ch'ayel kuj ajyi—.
7—Jach' junxta b'a satk'inali, jel oj ajyuk ja k'in ta yuj k'a jun mulanum wax sutxi ja sk'ujol b'a oj sk'u'uk ja Dyosi, yuj ja chan tajb'e sok b'alun lajune, (99) mi sk'ana oj sutxuk ja sk'ujole oj sk'u'uke ja Dyosi—.
Ja sat tak'ini
8Ja Jesusi, cho yala pilan lo'il:
—¿Jasun oj sk'ul jun ixuk, ta ay k'a nolan yuj lajune sat tak'in sok talnanub'al ay lek yuji, wajto yil mey june ja tak'in jawi? Wego oj ya ajluk ja k'ak'i, oj och smes ja snaji, oj sle' lek, asta man oj sta'e. 9Jaxa yajni sta'a, oj slok ja ma lek wax yila sb'a soki, sok ja ma mojan yi'oj sb'aj soki, ti oj yal yabye'a: —La'ik b'a jnaj, la ajyukotikik gusto—. —Jta'ata ja sat jtak'in ch'ayel kuj ajyi—.
10—Cho jach'ni wa sk'u'lane ja yanjel jumasa ja Dyosi, wa sk'u'lane jun niwan k'in ja yajni jun mulanum wax sutxi ja sk'ujol oj sk'u'uk ja Dyosi.
Ja tatali, jel ja syajal sk'ujoli
11Ti cho alji yabye yuj ja Jesusi:
—Jun winik ay yi'oj chab' yuntikil: 12Jun k'ak'u, ja ijts'inali, ti yal yab' ja stati: Tatey, a'xa ki ja jdote ja it ojni a waki'i, —xchi. Jaxa tatali, ti sk'epa yi ja sdote schab'il ja yuntikili.
13—Ek' t'usan k'ak'u, ja ijts'inali ti ch'ak schon el spetsanil ja jastik a'jiyi yuj ja stati, ti waj b'a jun chonab' najat lek, yajni ti'xa ay b'a chonab' jawi, jel sk'u'lan ja jas was jk'ana sok ja skwerpo, ch'ak sch'ak el lom lom ja stak'ini.
14—Yajni ch'akta sch'ak spetsanil ja stak'ini, ti jak jun niwan wa'in ja b'a chonab' jawi, jaxa ye'ni mixa jas tak'in yi'oj. 15Ja'yuj ti sle'a ya'tela, ja winik ma a'ji ya'tel yuj ji, ti sjeka b'a slu'um b'a oj waj stalna ja schitam jumasa. 16Jaxa ye'n lajan sok oj yab' ja swa'el ja chitam jumasa, jasa mini ma'x a'jiyi yuj ja.
17—Yajni jak sk'ujol ja jas mi lek wan sk'ulajeli, ti yala sb'aja: Ja b'a snaj ja jtati, ay lek swa'el ja a'tijum jumasa ja b'a wa sk'anawe'i, jaxa ke'n ja ili, wa'non chamel wa'in, —xchi. 18Oj kumxukon b'a snaj ja tati, yajni la k'otyoni ti oj kal yab' jastal ita: Tatey b'a sti' sat ja Dyosi, jta'a ta jmul cho jach'ni sok ja we'ni. 19Oj kal yab'i mokxa yil'on jastal yunin, kechan a ya'ki ka'tel, a yil'on jastal junuk ja ya'tijum jumasa. 20Ja'yuj ti kumxi b'a snaj ja stati.
—Yajni najato ayi, ajnel waj ta'juk yuj ja stati, jel talnaji sya'ujlal ja jastal ayi, stela ele cho yujts'an. 21Ja'xa ye'n ti och yala: —Tatey jta'ata jmul sok ja Dyosi cho jach'ni sok ja we'n—. —Ja ya'n mixa sb'ejuk a wuninukonto.
22—Jaxa tatali, mixa ch'ak smakla ja jas wa'n yal jel ja yunini, ti spaya ja ya'tijum jumasa ti yal yab'a: I'ajik jan jun tsamal sk'u' a'wik slape, cho awik slap jun yaniyo, sok sxanab'. 23—Milawik jun yal wakax b'a kojlel lek, oj k'ultik jun niwan k'in. 24Yuj ja kumxita ja kunini lajan sok chamelxa ajyi, ch'ayta ni ajyi'a jaxa ya'n jta'atikta, —xchi ja tatali.
—Ti stulu yi' ja k'ina.
25—Jaxa b'ankilali ja k'ak'u jawi ti wa'n a'tel b'a yalaj. Ja'xa yajni kumxi jani, mojanxa oj juluk ja b'a snaj ja stati, ti yab' jel ja k'in sok ja cha'neli. 26Ti spaya jan june ja ya'tijum jumasa ja stati ti sjob'o yi'a: ¿Jasunk'a ay b'a?
27—Ti alji yab' yuj ja ya'tijum ja stati: Yuj ja' kumxita jan wa wijts'in it ch'ayel ajyi, jel lek juli, ja'yuj ja wa tati sjeka smiljel jun yal wakax b'a kojlel lek b'a oj k'ulxuk jun k'in yuj ja kumxi.
28—Ja'xa ye'ni jel tajki mi sk'ana oj ochuk. Jaxa stati waj yal yab' a ochuk. 29Jaxa ye'n tajkel lek yal yab' ja stati: —Ja ke'n waxa na'a lek ayxa lek k'ak'u wa'non a'tel amok, sok mini b'a mix k'u'an a wi ja wa wab'ali; b'aya mini jun yal chivo waxa wa'ki b'a oj k'ul sok jun k'in sok ja kamigo jumasa. 30—Jaxa ya'n yuj ja kumxita jan ja wa wunin iti, ja'yuj wa'na smiljel ja yal wakax b'a jel kojleli, mi ja' oj ja na' ja lom waj sch'ak kan ja wa tak'ini, lom stuptalajel tuktukil sche'um jumasa sch'aka kan ja tak'in jawi.
31—Ti yala ja stati: —Kala kerem. Ja we'n tini aya jmok petsanil k'ak'u'a, cho spetsanil ja jas ki'oji nakani a b'aj we'na'a. 32—Jaxa ya'n sb'ejni oj k'ultik jun k'in b'a oj ajyukotik gusto yuj ja kumxita jan ja wa wijts'ini. Yuj ja lajan sok chamelxa ajyi, ch'ayta ni' ajyi'a, jaxa ya'n jta'atikta, xchi ja tatali, jach' yala ja Jesús ja lo'il iti.
S'ha seleccionat:
Lucas 15: YABD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021