Lucas 14
14
Ja Jesusi, ay ma ya tojb'uk
1Jun sk'ak'u'il jijlel ja Jesusi, ti wa'n wa'el b'a snaj june ja ma' ay ya'tel yujile ja fariseo jumasa. Sok spetsanil ja ma'tik tey tiwi, jel wa stalnaye ja Jesusi. 2Waj yile cho tey jun winik sits'el yok sk'ab', ti k'e' tek'an b'a sti' sat. 3Jaxa Jesusi, ti sk'ela ja fariseo jumasa sok ja ma'tik wa sje'a ja mandar it a'ji yi ja Moisesi, ti sjob'o yi'e'a: —¿Sb'ej ma, ma miyuk ja oj a'xi tojb'uk jun ma' mi lek ay ja sk'ak'u'il jijleli? —xchi ja Jesusi. 4Jaxa ye'nle'i, mi sna'a jas oj yal'e.
Ja'yuj ja Jesusi, ti syama yi ja sk'ab' ja ma' mi lek ayi, ya tojb'uk, ti'xa yal yab' a'xa wajuka. 5Tsa'an ti sjob' yi ja ma'tik tey tiwi: —Jun a wuntikilex ma jun a wakaxex ta wan k'ax mok' k'e'en, ¿Mi' ma oj waj ja wa'wex eluk a'nima ja'uk ja sk'ak'u'il jijlel b'a?—. 6Jaxa ye'nle'i, mini jas b'ob' yal'e'a.
Ja ma'tik lokji wa'eli
7Yajni yila ja Jesús ja lok jumasa wa'ne k'oteli, ti wax ch'ak waj kulanuke b'a lekil kujlayub' jumasa. Ja'yuj ti alji yabye yuj ja Jesusi.
8—Ta ay k'a ma wa slokowa b'a jun ch'ak ab'al, mok ti wajan kulan b'a jel tsamal ja kujlayub' jumasa. Yuj k'a waj k'ot june ke mas chapan yuj ja we'n, 9Ja ma' slokowa, ti oj yala wab'a: —A'yi ja b'a kulana ja jun lok iti. Ja jastal jawi, jel k'ixwela a b'aj ja we'n, ti oj elana, ti oj wajan mech'an man b'a tsa'an.
10—Ja'yuj ta ay k'a ma wa slokowa b'a jun k'in jastal jawi, ti la kulani b'a tsa'an, yajni oj k'otuk ja ma slokoneja ti oj yala wab'a moj alijel la' la kulanan ili; ja ili yuj mas lek. Ja jachuki, mas lek oj yil'a ja tuk lok jumasa. 11Yuj ja ma' jel niwan wax ya'a sb'a yuj ja tuk jumasa, jelni ch'in oj iljuka. Jaxa ma' ch'in wax ya'a sb'aji, jel niwan oj iljuk, —xchi ja Jesusi.
12Tsa'an ja Jesusi, ti cho yal yab' ja winik it lokji yuj wa'eli:
—Yajni oj ja k'ul jun k'in ma jun wa'el, moka lok ja ma'tik lek waxa wila b'aj soki, mini wa moj alijel jumasa, mini ja tuk a moj alijel jumasa, mini ja ma' mojan a wi'oj it jel ja stak'ine'i. Yuj k'a ye'n oj ja lok e' ojni cho slok a ja we'na, yuj k'a jach' oj ja k'u'luki, lajan sok tupub'alxa ni wala kana. 13Mas lek yuj k'a oj ja k'ul jun k'in ja tsa'ani, ja'xa loko ja ma' ajula sb'aji, ja ma'tik k'un yok sk'ab'i, ja ma' mix b'ob' b'ejyuki, sok ja ma'tik mix yila k'inali. 14Ja ye'nle'i, mini jas oj b'ob' ya'we a wi'a, jaxa Dyosi, jel lek oj yil'a. Ye'n oj ya'wi wa ts'akol ja yajnix sak'wi ja ma'tik lek ja jas sk'u'lane'i.
Ja niwan wa'elali
(Mt 22:1-10)
15Yaj ni ch'ak yabye ja jastal iti, june ja lok jumasa ti yal yab' ja Jesusi:
—Ja b'a mas lek ja' oj ajyuk ochel ja b'a niwan k'in oj ajyuk b'a kulan ja Dyosi—.
16Ti jak'ji yi'e yuj ja Jesusi:
—Ja jun majke'ili, jun winik schapa jun niwan wa'el sloko jitsan kristyano. 17Yajni chapanxa ja wa'eli, ti sjeka ja ya'tijum b'a oj waj spay ja lok jumasa, ti yala'a, la'ikxa, ja wa'eli chapanxa spetsanil, —xchiye.
18—Jasa, b'a kada jujune ja lok jumasa sle'a jas oj yal'e b'a mi oj wajuke'i. Ja juni yala: Ala yab' wa wajwali mi oj b'ob' wajkon t'ani yuj wantox ch'ak jman xe'n jlu'um wax k'ana ojto waj kile.
19—Jaxa juni yala: Mi oj b'ob' wajkon, yuj wantox ch'ak jman jo' te'ele jwakax ja' oj k'ajtes.
20—Jaxa juni ti yala'a: Ja ke'n wantox ch'ak nupanukon, ala yab'i, mi oj b'ob' wajkon.
21—Ti'xa kumxi ja a'tijum jawi, waj yal yab' spetsanil ja yajwal ja jas alji yab'i. Yajni yab' ja ajwalali jel tajki, ti yala'a: —Yuj k'a jach jastal jawi, ka'ax ja b'a niwan b'ej sok b'a ch'in b'ej jumasa b'a chonab'i, kax i'ajan ja ma jel ajula sb'aji, ja ma'tik k'un yok sk'ab'i, ja ma mix yila k'inal sok ja ma mix b'ob' b'ejyuki. A jak wa'uke.
22Yajni kumxi ja a'tijumi, ti yal yab' ja yajwali, jk'u'lanta ja jas a wala kab'i, ayto lugar b'a na'itsi oj ochuke mas.
23—Jaxa ajwalali, ti cho yal yab' ja ya'tijumi: Ka'ax ja b'a b'eji, al yab' t'ilan ja ma oj ja ta'i a jak wa'uke, wax k'ana oj b'ut'uk ja jnaji. 24Mini june ja ma jlokowe b'ajtani, mi oj yabye yajb'al ja wa'el b'a naji.
Ja jastal ja snochjel ja Jesusi
(Mt 10:37-38)
25Jitsan lek ja kristyano nochob'al yuj ja Jesusi, ti sutu sb'aja ti yala'a:
26—Ay k'a junuk ja we'nlex waxa k'ana oj ochanik jneb'umanil, jel t'ilan mas oj syajtayon ja ke'n, ke yuj ja snan stati, jach' mas oj syajtayon ja ke'n yuj ja sche'um sok ja yuntikili, mas oj syajtayon ja ke'n yuj ja smoj alijel winik ma ixuki. Ja we'nlexi, mi oj b'ob' ochanik jneb'umanil ta yuj k'a kechan we'n mas waxa k'ana oj ja yajta a b'ajex ke yuj ja ke'n. 27Ay k'a ma' mi oj kuch yuj ja wokol jumasa, ma yuj mi oj sk'u'luk ja jas oj kali, mi oj b'ob' och jneb'umanil.
28—Ay k'a junuk ja we'nlex wa sk'ana oj k'ul jun cha'anil ts'akab', ¿jasunka b'ajtan wa sk'u'lani? mi ma b'ajtan wax och kulan wax och k'ul pensar janek' ma oj yi'e, ti oj yil ta ay yi'oj ja tak'in janek' oj makunuki. 29Yuj k'a oj och ya k'e jun na'its mi ocheluk kulan b'ajtan b'a oj spensara'uk jaye tak'in oj yi'e, ja tsa'ani mi oj b'ob' ch'ak sk'u'luk, kechan ita b'a oj ya' sb'a k'ixwel. 30Spetsanil ja kristyano jumasa, ti oj yal'e'a: —Jelto ko'elat'ana— A nocho yi sk'u'lajel ja sna'itsi, jaxa ya'n mixa oj ch'ak tojb'uk a wuj. —Oj chi'uke.
31—¿Jasun wa sk'u'lan jun mandaranum ta kechan k'a lajune (10,000) mil soldado yi'oji, yuj k'a wa sk'ana oj tiro'anuk sok pilan mandaranum b'a ay yi'oj jun tajb'e (20,000) mil soldado? b'ajtan oj spensarauk ta oj b'ob' sk'ul ganar ja lajune (10,000) mil soldado it mi lek wax yila sb'aj soki. 32Yuj k'a yila mi oj b'ob' sk'ul ganar. Leka najato ay ja skontra ti oj sjek june ja ya'tijum b'a oj waj yal yab' mas lek ja ajyuke lamani.
33—Ja'yuj na'awik lek, ta yuj k'a oj ochanik jneb'umanili, t'ilan oj ch'ak a wa'wex kan spetsanil ja jas a wi'ojexi, —xchi ja Jesusi.
Ja ats'ami
(Mt 5:13; Mr 9:50)
34-35—Ja ats'ami jel ni leka, jaxa yajni wax ch'ak ja yipi, mixani lekuka, ojxa b'ob' jipxuk b'a ts'i'lel, mixani b'a oj och b'a yoj orno mi oj makunuk, mixani b'a abono mi oj makunuk,#14:34-35 Ja tiempo jawi, wax makuni yujile ja sat ats'am b'a wa stikawe yi b'a yoj orno b'a oj ya k'ixnajuk juts'in, wax cho sokowe sok k'oy chante b'a oj makunuk sb'a abono. ja ma jaman ja chikini a yab' ja iti, —xchi ja Jesusi.
S'ha seleccionat:
Lucas 14: YABD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021