Lucas 17
17
Talna a b'aj
(Mt 18:6-7,21-22; Mr 9:42)
1Ja Jesusi, ti yal yab' ja sneb'uman jumasa:
—Ja b'a lu'um iti, jel jitsan ja jas wax ch'ayji yuj ja kristyano'i, ja'yuj ti wa sk'okowe ja smandar ja Dyosi. Ja jawi, yujni jach' spetsanil k'ak'u oj ek'uka. —Jel ajujla sb'aj ja ma ye lel sk'ujol oj ya sch'ay sb'aj ja smoj b'a mi oj sk'u'uk ja Dyosi—. 2Ay k'a ma wax yal yab' junuk ja jneb'uman ke'n ja ma' jelto ya'aw ay mok sk'u'uke ja Dyosi, jelni tsats ja wokol oj a'juk yi yuj ja oj moch juk yi jun niwan ton ja b'a snuk oj jipxuk ko b'a yoj scha'anil ja niwan paman ja'i. 3Ja'yuj, —talna lek a b'ajex sok ja jas waxa k'u'lanexi—.
—Ta yuj k'a ay jas mi lek wa sk'u'lan a wi ja ma' lek xa wila a b'aj soki, ala yab' ke mi lekuk ja jas wa sk'u'lan a wi'i. Ta yuj k'a wax yala wab' mok wa stupe, sb'ejni mok wa stupa. 4Ja b'a jun k'ak'u a'nima jitsan majke oj sk'u'luk a wi b'a mi sb'ejuk; yuj k'a wax yala wab' mok wa stupe, jaxa we'n mok ni wa stupa, —xchi ja Jesusi.
Sk'u'ajel ja yip ja Dyosi
5Ja jekab'anum jumasa, ti yalawe yab' ja Kajwaltiki:
—A'a ki'tikon ja kiptikon b'a oj k'u'uktikon ja Dyosi.
6Ti alji yabye yuj ja Kajwaltik Jesusi:
—Ja' lek jachukukto waxa k'u'anex ja Dyos jastal ja sb'ak mostasa, oj b'ob' a wal'ex yab' ja te' iti: Elan ja ili, tix waj ja ts'un a b'aj yojol, ja niwan paman ja' jaxa te' jawi ojni sk'u'uka.
Ja ma'tik mix a'tiji leki
7—La kaltik junuk ja we'nlex ay jun a wa'tijumex wa'n jutuj lu'um ma wa'n talnuj chej. Jaxa yajnix jijli jani, mini oj ja wal'ex yab'a: La'xa kulanan, ojxa ka wa'an. 8Miyuk, ja waxa walawex yab'i: Lek ay, ja julyata chapaxa ki ja jwa'eli, sok wax k'ana ti oj cho ajyan mojan b'a jts'e'el b'a oj ja majla oj ch'ak wa' k'u' ja'. Tsa'an ti'xa le'a jas oj ja wab' ja we'na —wala chiyex. 9Cho minixa k'anawex yi ts'akatal yuj ja wa sk'u'ane ja wa wab'alexi. 10Jach' ayex jastal it ja we'nlex sok ja Dyosi, yajni ch'akta a k'ulukex spetsanil ja jas wax yala ja Dyosi, mok a majlayex ye'n oj sk'an a wi'ilex ts'akatal. Jel lek a lawik: Ja ke'ntiki, kechan a'tijum aytik sok; cho sb'ejni oj k'u'ltik ja jas wax yala'a, —chi'anik.
Jun winik b'a tuk chonab' sta'a skoltajel
11Ja Jesusi, yajni ti'xa wajum b'a b'ej Jerusaleni, ja' yi'aj ja b'ej it ti wax ek' b'a skol ja chonab' Samaria sok b'a Galilea. 12Yajni k'ot b'a jun yal chonab' ti jak ta'juk yuj lajune winike ja wa'n k'a'el ja sb'ak'tele'i. Ja'yuj mi och sta'e mojan ja Jesusi, najat kanye t'usan 13ti awani ye'a:
—Jesús, je'uman, talna jya'ujlaltikon a tojb'ukotikon—.
14Yajni yila ja Jesusi, ti alji yabye'a:
—Ka'axik b'a snajtsil tsomjel b'a oj sk'el'ex ja pagre jumasa, a yil'ex ke yujni lekxa ayex merana.
Jaxa lajune winik iti, yajni ti'to wajume ja b'a snajtsil ja tsomjeli, wajto sna' sb'aje tojb'iye'ta. 15June ja ye'nle'i, yajni tojb'ita yab'i, wa'n awanel kumxi, ti wax yala'a: —Ts'akatal, Dyos kuj. Ts'akatal lek—. 16Yajni k'ot ja b'a sti' sat ja Jesusi, ti ko' mek'ana man sta'a k'ot ja spatan ja lu'umi, ti cho ya'yi ts'akatala. Ja winik iti, Samaritenio.
17Yajni yila ja Jesús ja jastal jawi, ti sjob'oyi ja sneb'uman jumasa: —¿Mi'ma lajune'uk ja ma tojb'i b'a? ¿b'a'ya b'alune b'a? 18¿Jasyuj ja kechan ye'n ja winik jakel b'a tuk chonab' kumxi jan b'a oj ya' yi ts'akatal ja Dyos b'a?
19Tsa'an ja Jesusi, ti yal yab' ja winik jawi: —Tulu ab'aj ka'axa—. Yuj ja a k'u'anoni, ja'yuj tojb'iyata, xchi ja Jesusi.
¿Ja sk'ak'u oj k'e stul ja ya'tel ja Dyos b'a?
(Mt 24:23-28,36-41)
20Ay chab' oxe fariseo jumasa sjob'owe yi ja Jesusi:
¿Jas k'ak'u oj k'e yal ja yab'al ja Dyos ja il b'a?
Ti yala ja Jesusi:
—Ja yajni oj k'e yal ja yab'al ja Dyosi, mi oj ilxuk. 21Cho mini oj b'ob' alxuk: —Tey itule— ma —Tey tiwi—. Jas yuj ja ma' oj yal ja yab'ali, ti'xani ay a mokexa, —xchi ja Jesusi.
22Tsa'an ja Jesusi, ti yal yab' ja sneb'uman jumasa:
—Oj k'otuk ja k'ak'u oj ja k'an oj ja wil'ex ja yunin ja winiki, mi oj b'ob' a wil'ex ja jastal jas tsamalil ja yipi. 23Ay ma' oj yal a wabyex: —Ja Jesusi tey tiwi—, ma —Oj yal tey ili. Mok wajanik mok a k'u'ukex. 24Yuj ja yajni oj kumxuk ja yunin ja winiki, mini jun ma' mi oj yila, jach' oj jakuk jastal wax lijpi ja tsan tsewal wax ilxi man b'a mi na' b'a man yib' satk'inalila. 25B'ajtan jel oj ki' ja wokoli, jaxa kristyano b'a lu'um iti, mi oj skis'one.
26—Ja yajni oj kumxuk kon ja k'en ja yunin ja winiki, ja kristyano jumasa jach' oj ajyuk jastal ja k'ak'u ti ajyi b'a lu'um ja Noeji. 27Yuj ja k'ak'u mito sb'ut'u ya'lel ja lu'um ja Dyosi, ja kristyano'i wax wa' xyu'aje ja', wax nupaniye, jel gusto wax ajyiye. Tsa'an yajni ochta b'a barco ja Noeji, ti'xa jak ja b'ut' ja'a, spetsanil ja kristyano jumasa ti ch'ak chamuke'a. 28Cho jach'ni ek' ja yajni ti ajyi b'a lu'um ja Loti. Ja swinkil b'a chonab' Sodoma, wax wa' xyu'aje ja', sok jel gusto wax ajyiye', ay jas wa smanawe sok ay jas wa schonowe, wa sts'unu ja jastik sb'aje'i, wa sk'u'lan snaje'. 29Yajni el ja Lot b'a chonab' Sodoma, ti och ko jan k'ak' b'a satk'inali, sokan sok asufre, spetsanil ja swinkil b'a chonab' jawi, ch'ak chamuke.
30—Jach' oj cho ek'uk ja yajni oj kumxuk pilan majke ja yunin ja winiki. 31Ja k'ak'u jawi, ta ay k'a ma' tey b'a s'olom snaj, mokxa k'o b'a oj ya eluk ja jastik sb'aji. Ay k'a ma' wa'n a'tel b'a yalaj, mokxa kumxuk b'a snaj. 32A jak a k'ujolex ja jastal ek' yuj ja sche'um ja Loti, kechan yuj ja lom sk'ela spatiki, ja'yuj paxkan tonil ats'am. 33Ja ma kechan ye'n oj sta' skoltajeli, toj sch'ayelni'a. Jaxa ma wax yala a'nima tix chami, ojni sta' skoltajela.
34—Ja yajni la kumxiyon ja ke'ni, ay k'a cha'wane lajan wa'ne wayel, june oj k'i'e' jaxa juni oj ka'kani. 35-36Jach'ni ta ay k'a cha'wane ixuke lajan wa'ne che'nel, june oj ki'e' jaxa juni oj ka'kani.
37Ti sjob'owe ja sneb'umani:
—Kajwal, ¿b'a oj ek'uk ja jaw b'a?
Ti jak'ji yi'e yuj ja Jesusi:
—Apetsanilex waxa na'awex ja b'a wa stsomo sb'aj ja usej jumasa, yuj ay jas chamel. Jach' oj cho ek' jastal jaw ja yajni la jakyon ja ke'n: Apetsanilex ojni ch'ak a na'ex leka.
S'ha seleccionat:
Lucas 17: YABD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021