John 16
16
1Hapkuninga uqautivagaffi ukpiguiqunahi. 2Tapkua ilaani aturvingnun itiqtailiniaktaahi. Ilaa, ilaani inuk tuquttigumi iliffingnik inminik nakuunahuginiaktuq. 3Taimailiukhunguyun inuit ilait ilihimannginnamitku Angutiga. 4Uvangali hapkuninga uqautivagaffi tapkua naglikhaktinahualiqqahi itqaumaqupluhi uqautigigapkin iliffingnun.
5Tatjali aullarama tilijimnun iliffili apiqhungitkaluaqtaffinga uqaqhuhi, “Nammaungauliqqin”? 6hapkuningali uqautivagaffi quviahugunaiqtuhi. 7Ilumuuqtumiglu uqautigijaraluaffi. Nakuutqijak iliffingnun aullaruma. Aullanngitkuma Ikajuqti qailimainman. Aullarumali tiliniariga tamna iliffingnun. 8Taffuma tikitkumi inuit kangiqhipkagniarain. 9Huinniqinikkun inuit ukpinnginmangaata. 10Ilumuurnikkun ailirama Angutimnun takujunairaffinga. 11Uktuqtaunikkun nunaum uuma inungita ataningat uktuqtaungman. 12Aallaniglu amihumik uqautijumainnaqtaffi tuhaqtitaujunaitkaluaqtuhi tatja. 13Tamnali Ilumuurnim anirninga tikitkumi taffuma hivulliuniaqtaahi ilumuurnim apqutaanun tamainnun. Inminik uqarunairami, tuhariarumi kihimi uqautjiniaqtuq aahiin uqautiniaqtaahi taimaihinniaqtunik. 14Taffuma nakuuginiaqktaanga tuhaajaminik uvamnin uqautiniaramihi. 15Angitingma pitqujain tamaita uvanga nanminirijatka. Talvuna uqaqtunga Anirniq uqautjiniarman piqutimnin. 16“Qakugunnuanguqqan tautugunairiffinga. Aahiin talvangaanin qakugunnguqqan takutqingniariffinga.” 17Malirutaita ilait inmingnik uqallaktun, “Qanurmi uqautiptigut, ‘Qakugunnuanguqqan tautugunairiffinga. Aahiin talvangaanin qakugunnguqqan takuqingniariffinga’? Imaalu ‘Angutimnun aullarniaqtunga’?” 18Talva uqaqtun, “Humik hivuniqaqqa uqarami, Qakugunnuanguqqan'? Uqauhiata itqumatjutaa nalujaqqut.” 19Tapkua apiqhuijumainnaqpiarmata taffuminga Jesus ilihimagami uqallautijain, “Qanurmi apiqhuiliqqihi iliffingnik? Uqauhipkun uqarama, Qakugunnuanguqqan taututagunairuffinga. Aahiin talvangaanin qakugunguqqan takutqingniariffinga? 20Ilumuuqtumik uqautigiffi. Iliffi quviahugungnaiqhungujuhi qialuhi. Nunaum inungit quviahukpiaqtillugit. Ilaanilu quviahugungnaiqqaarluhi quviattakniaraluarmiuhi. 21Arnarluunniin nutaranikjuqiliqhuni uluriahuktuq irnivikhaa tikilirman. Nutaraniqaaqhuni quviattakpiaqtugaluaq nutaraminun. Tamna nunami inuungman. Hivun'ngani uluriahukpallaarami puiguinnaqtuq. 22Iliffilu ajuqhaliqtuhi tatja. Ilaani takutqikkuffi uvamnik quviattakhungujuhi uummatiffingni. Talva quviahugunaiqtitaulimaiqtuhi inungnin talvangaanin.” 23Jesusim malirutini uqautijain uqaqhuni: “Ilumuuqtumik uqautigiffi. Humilliqaak tukhiarvigiguffiuk Angutiga atipkun taffuma tuniniaqtaahi taffuminga. 24Hivun'ngani tukhiajuitpiaqtuhi atipkun: tukhiaritti piqaqupluhi quviahuqupluhilu akhutakjuaq. 25Uuminga uqautigiffi hivunniuniqtigun ilaani hivunniuniqtigun uqarunaiqtunga iliffingnun. Naunaittumigli uqautiginiaqtara Angutiga iliffingnun. 26Talvani tukhiaqhungujuhi atipkun, aahiin uqariijangittunga tukhiaquplunga Angutimnun pipluhi. 27Angutingma inmi nakuugingmahi, iliffi nakuugigaffinga ukpiraffilu Godmin qaihimavunga. 28Angutimnin qaihimagaluaqtunga nunaum inungit tikittugit. Aahiittauq aullaliqtunga nuna qimaglugu ainiarama Angutimnun.” 29Malirutait uqaqtun, “Ai, tatja uqalihaaqtainnaqtutin naunaittumik hivunniurnirmik atunngitkiplutin. 30Tatja ilihimajugut ilvin tamainnik ilihimagavin. Inungnin uqautjaujukhaunngitpiaqtutin. Godmin ilaa qaihimagavin ukpiqtugut uvagut.” 31Jesusim kuijain, “Ukpiqpihii tatjaa? 32Ilaa ilaani, tatjaluunniin tamaffi ukpiqtitauniaqtuhi atuni igluffingnun qimaglunga uvanga. Avaliinngitkaluaqtungali, Angutingma najurmanga. 33Imaittumik uqautivagaffi uvapkun naammaqupluhi. Nunaum inunginni naglikhaaqtitauniaqtuhi. Ihumaaluktaililuhi akimavaktunga tapkunanga.”
S'ha seleccionat:
John 16: AQ
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió