Yaya 5
5
Ɛnza ŋé kuugba lɔ lákɛɛnyala Yeluzalɛmu
1O tínminnin ngwɔ́, Yawudhyaa ólu yɛ́ fɛ́ti lɔ tɛ́ɛ kɛ́la Yeluzalɛmu. Ɛnza ŋé táa yé. 2Yeluzalɛmu só o lona min ŋe kíila ko Sáa ólu ta lonaa o, o la o tɔ́ɔfɛ, jí jáan lɔ́ tɛ́ɛ yé, íi ó ywáa ó kíila Ebulukan ŋó lɔ́ kó Bɛtizata. O ywáa ó lɔ́ íi gbáta lóo lɔ́ ɲɔ́ɔn ɲúuman yé. 3O gbá ólu kɔ́ɔ, yangalotɔ ólu tɛ́ɛ í lála yé shɛ́ɛman né: Fyóo ŋólu, sengeeman ŋólu, óni kuugba ólu. [Olu tɛ́ɛ í lála yé kɛ jí ó lámaanmaan wáati ó mánkɔɔn. 4Kɛ mansɔɔ sán lɔ lɔ́, Mantii ó yɛ́ malɛɛka lɔ́ tɛ́ɛ í yíila ji o lɔ kɛ́ jí o lámaanmaan. Ni yangalotɔ mínngɛ í láteeya kɛ́ í yíi jónan jí ó lɔ́ a lámaanmaannin ó kwɔ́, ó tíi óo kɛ́ɛnya, yáanin ni a yɛ́ yangalo o kɛ́ gbɛ́ya ɲán óo ɲán man.] 5Cɛ lɔ́ tɛ́ɛ yé, ó sánɲin bísawa ni sɛ́ɲin né tɛ́ɛ a yɛ́ yangalo o lɔ. 6Ɛnza ŋé cɛ ó lánin ɲé, kɛ́ a lɔ kó a yɛ́ yangalo ó wɛ́ɛ myɛ́n a lá koyoongɛ. Aa a mánɲaankɛ kó: «Ii fɛ́ kɛ́ kɛ́ɛnya a?» 7Aa a yawi kó: «Mantii ó, mɔɔn tɛ́ móo mín ngáa ndá kɛ́ náyii jí jáan ó lɔ a lámaanmaan wáati ó lɔ. Sánni ní fɔ ngó ngáa ɲíi, lɔ́ é í láteeya kɛ́ í yíi né ɲɛ́n.» 8Ɛnza ŋé fɔ a yɛ́ kó: «I wíi kɛ́ í yɛ́ naan ŋó tá kɛ́ táamankɛ.»
9O ywáaninngee ó lɔ, cɛ óo kɛ́ɛnya, aa í wíi kɛ́ a yɛ́ naan ŋó tá tó kɛ́ táa. O ló ŋó tɛ́ɛ Yawudhyaa olu yɛ lɔnwɛɛnlilo ne lé.
10O lɔ, Yawudhyaa ólu fɔ cɛ kɛ́ɛnyanin ŋó yɛ́ kó: «Bí é lɔnwɛɛnlilo ne lé, i mánngan kɛ́ i yɛ́ láfe ŋo ta kɛ́ táa.» 11Wáa aa í yawi kó: «Cɛ min ŋé né lakɛ́ɛnya, ó lée fɔ ne yɛ kó ní ɲɛ́n láfe ŋó tá kɛ́ táamankɛ!» 12Íi a mánɲaankɛ kó: «Yɛ́ɛtii é fɔ i yɛ́ kó ii i yɛ́ láfe ŋó tá kɛ́ táamankɛ?» 13Waa mɔɔn min ndɛ́ wɛ́ɛ cɛ ó lakɛ́ɛnya, a tɛ́ mán ó lɔ bhée. Kɛ mansɔɔ Ɛnza ndɛ́ wɛ́ɛ túun yaman ó cɛ́man.
14O kwɔ́, Ɛnza ŋé cɛ ó kunmyɛ Ala bhatobhomba ó kɔ́ɔnnɔn, aa fɔ a yɛ́ kó: «I wɛ́ɛ kɛ́ɛnya sísan, waa í kɛ́nan kóyoo ngbɛ́ɛ kɛ́ bhée ké kóyoo ngbɛ́ɛ kɛ́nan i sɔ́ɔ bhée.»
15Cɛ óo táa fɔ Yawudhyaa ólu yɛ́ kó Ɛnza née á lákɛɛnya. 16Kɛ á ta o wáati óle man, Yawudhyaa ólu í wíi Ɛnza nganman, kɛ mansɔɔ Ɛnza ŋwɛ́ɛn mɔɔn lɔ lákɛɛnya lɔnwɛɛnlilo ŋó lá. 17Waa Ɛnza ŋé i yawi kó: «Nvá é bháala la yáanin bí, o lɔ, né lo ŋé bháala la.» 18O le kósɔn, Yawudhyaa ólu kúnndii olu tɛ́ɛ Ɛnza náɲiinan kɛ́ a Fáa. Lɔnwɛɛnlilo ŋó bhátobhɛɛya kée ŋó tɛ́ tɛ́ a kún ŋó lé. Wáa í kó, ko aa Ala kíila kó a Fácɛ, óni kó aa a yɛ́ɛ lála Ala lé mán.
Fá ó sé dila a Dhyénjɛ ó mán
19 Ɛnza ŋé i yawi o le lɔ kɛ́ fɔ i yɛ́ kó: «Tínɲan in ne ní fɔ́la a yɛ́ ngó, Dhyé ŋó tɛ́ sé kɛ́ fósi kɛ́ í yɛ́ɛ mán. Aa a Fá tá kɛ́ko ó lé mánfɛɛ lá. Ni a Fá o kɛ́ fé ŋóo fé ngɛ́, Dhyé ŋóo o lé ɲɔ́ɔn ngɛ́la. 20Kɛ mansɔɔ Dhyé ŋó ko a dí a Fá yɛ́, o lɔ aa a yɛ́ kokɛta ó bɛ́ yáala a lá. A káa lɔ́ gbɛ́ɛlu yɛ́ɛ yáa a lá mínnu káa tínmin míinnu ka fɔ kɛ́ a gbúlu káwakoya.
21Nvá é su ólu lákuunnan kɛ́ ní dí ólu man ɲánminman, o ɲán kée ŋó man, a Dhyénjɛ óo fɛ́ kɛ ní o di mɔɔn mínnu man aa a dila o léelu man. 22Nvá mánfaa mɔɔn sí ta kíti tɛ́ɛ. Kɛ mansɔɔ a wɛ́ɛ kítitɛɛ ko ó bɛ́ tó a Dhyénjɛ óle bhóolɔ, 23ké bɛ́ a a Dhyénjɛ ó bwóɲan óyoo íi Fá ó bwóɲanla ɲánminman. Ni mɔɔn min mán Dhyénjɛ ó bwóɲan, o tíi ó man Fá o le bwóɲan wé, min ŋé a cébhaa ó lé.
24Tínɲan in ne ní fɔ́la a yɛ́ ngó, ni mɔɔn mínngɛ ɲɛ́n kóman ó lɔ́myɛn kɛ lá njébhaa ó lá, ó tíi ó wɛ́ɛ wɛ́ɛ ɲáanmanɲan wɛ́ɛbhɛɛ ó sɔ́ɔla. Mánfaa o tii o ta kíti o tɛɛ, o tii o wɛ́ɛ bhɔ́ saya ó lɔ́ kɛ́ lo ɲaanmanɲan ó lɔ́. 25Tínɲan in ne ní fɔ́la a yɛ́ ngo, wáati lɔ́ yáa sé. A yɛ́ɛ wɛ́ɛ wɛɛ séla. Su ólu yáa Ala dhyénjɛ o kómankan ŋo myɛ́n. Mínnu wɛ́ɛ a yɛ́ kóman ó myɛ́n, ólu yáa ɲáanmanɲan o sɔ́ɔ. 26Nvá lée ní o tíi ó lé, o lɔ́, a wɛ́ɛ ní díko ó sé dí a Dhyénjɛ o mán. 27A wɛ́ɛ kíti tɛ́ɛko ó sé o dí a mán, kɛ mansɔɔ ale lée mɔɔn Dhyénjɛ ó lé. 28Áa a mánfɛɛ, a kɛ́nan káwakoya. Wáati lɔ́ yáa sé, su min núu kábulu ólu lɔ́ ólu bɛ́ yáa a kómankan ŋó myɛ́n. 29Í yáa kúun. Mínnu tɛ́ɛ kóbhɛɛ kɛ́la, olu yáa kúun kɛ síin hɛ́lɛ ó sɔ́ɔ. Kóyoongɛbhaa ólu yáa kúun kíti ó kanman.
30Né tɛ́ sé kɛ́ fósi kɛ́ ɲɛ́ɛ mán. Née min myɛ́nnan Ala fɛ́, née kíti tɛ́ɛla kɛ́ kéeɲan ni ó lé le. Né yɛ́ kíti ó téenin née. Kɛ mansɔɔ né tɛ́ ngbú sao ó kɛ́la fɔ né cébhaa ó sao ó.»
Ɛnza ŋé a yɛ́ɛ kó fɔ́la kɛ́ gbɛ́ Yawudhyaa ólu yɛ́
31Ɛnza ŋé fɔ kó: «Ní a tɛ́ɛ kɛ́ ké né ngbú lée ɲɛ́ɛ kó fɔ́la, kéni kó mínnu fɔ́la ɲɛɛ man o lɔ tɛ tínɲan lé. 32Waa mɔɔn gbɛ́ɛ lée né sɛ́ɛya ladila. Álee min nvɔla ɲɛn kó ó lɔ, óo tínɲan gbú lé lé. 33A tɛ wɛ́ɛ mɔɔn ólu bhyáa Yaya mán kɛ́ a mánɲaankɛ. Aa tínɲan o fɔ a yɛ́ né yɛ́ kó ó lɔ́.
34Né manko tɛ Adamandhye ŋo yɛ sɛ́ɛya lá. Waa ni o kóman o fɔ́la le ké áa kísi. 35Yaya é kɛ́ óyoo laman, íi mín namaannan ke aa kɛɛn lábhɔ a cɛ́man. Áa sɔ́n kɛ́ í nisɔdhyaa a yɛ́ kɛ́ɛnɲan ó fɛ́ wáati dɔ́ɔnin ngɔ́ɔnnɔn. 36Sísan, sɛ́ɛyaman gbɛ́ɛ é móo, sɛ́ɛyaman mín ŋan bwó Yaya tá ó lé. Nvá é bháala mínnu dí né mán, ní mínnu kɛ́la, ó lée yáala óo Fá o lée né cé. 37Nvá míin njé, o wɛɛ né sɛ́ɛya ladi. Waa ále man sɔ́n kɛ́ a saaninkan ŋó lɔ́myɛn, óni a man yé í ɲanla. 38A yɛ́ kóman ó siilaa tɛ́ a yóso ó lɔ́, kɛ mansɔɔ a wɛ́ɛ min bhyáashaa, a lánin ndɛ́ ó lá. 39Áa Ala yɛ́ Kitabu ó kalanan gbútuukɛ kɛ mansɔɔ áa í milila ko a yáa ɲáanmanɲan wɛ́ɛbhɛɛ ó sɔ́ɔ o kaa ŋó kósɔn. Kɛ́ɛke o Kitabu olu né lé kofɔla. 40Waa a lo ndɛ́ fɛ́ kɛ́ lá né lá kɛ ɲáanmanɲan ó sɔ́ɔ.
41Né yɛ́ kunnanwee ó sɔ́ɔ ó, o mán bhɔ́ Adamandhye ŋólu fɛ́. 42Ní a lɔ́, né gbú o a lɔ ŋóo Ala man dí á yɛ́. 43Ni nan nvá Ala lé tɔ́ɔ lá, waa ále man sɔ́n né mán. Ni mɔɔn lɔ́ kɛ́nan a yɛ́ɛ tɔ́ɔla nín, a yáa sɔ́n ó mán. 44Áa sé kɛ lá né lá dí lé? Ále min núu a yɛ́ kunnanwee ŋó sɔ́ɔla Adamandhye ŋólu fɛ́, sannin áa ó ɲíin Ala kée nvɛ́. 45A kɛ́nan í míli ko né lé káa a yáayi kiti tɛ́ɛlo ŋó lá nvá ɲánkɔɔ lɛ! A yáayibhaa óo Musa lé le, áa a yée lá min nga. 46Ni a lanin ndɛ́ɛ kɛ Musa lá tínɲan in ne, a tɛ́ɛnan lá né lá. Kɛ mansɔɔ Musa é né lé kofɔ a yɛ́ sɛ́wɛ ó kɔ́ɔnnɔn. 47Aa mín nzɛ́wɛ, ní a man lá o lá, née min nvɔla, a káa sé kɛ lá o lá dí lé?»
S'ha seleccionat:
Yaya 5: MXX
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.