Ruuka 7
7
Obhokumi bho mooto o matöngö
(Mataayo 8:5–13)
1Hano Yesu amariri kobhabhoorera abhaato amangʼana ghayo ghoose ghano ëndiri bhaghooghu, akaru hayo aghaye mo‑moghya o Kabherenawumu. 2Mo‑moghya uyo, naare‑ho omokoro o bhaashirikare bha Keruumi. Omokoro uyo, naare no omutamishi uno are amosiighiri chwee. Wiiki omutamishi uyo naare abhaabhiire arëënda ghoku.
3Mbe, omokoro uyo, eriibhagha oghwire amangʼana ighoro e Yesu, akabhatoma abhagharuka bha Bhayahuuti o‑Yesu bhamusabhe, ache komuhöri omutamishi waache. 4Abhagharuka bhayo, hano bhahikiri o‑Yesu, bhakamusasaama chwee bharamobhoorera bharabhugha, “Omooto uyo, narëngʼaaniire omukörërë angʼana ino, 5gho kubha nasiighiri ase yiito. Niwe atwabhëkiire ne erisinaghooghi.”
6Ibheere Yesu aghaye haghirohamu na abhagharuka bhayo awaache omokoro uyo. Hano bhatingʼiri, omokoro uyo aghatoma abhasaani bhaache bhamobhoorere Yesu kubha, “Oo Omutëmi, otanyaaka, gho kubha eni nteekurëngʼaanera usöhë awaane. 7Wiiki nikyo nerooche kubha nteekurëngʼaanera kuucha ghokoocho. Mbe, noobhughe angʼana hangʼu, omutamishi waane nakuhöra.
8“Koru eni woose neenyi haase e bhukangati. Wiiki, neenyi na abhaashirikare bhano bhaanyi haase yaane. Neramobhoorera umu kubha, ‘Nooghi’, hayo hayo aghi. Wiiki, neramobhoorera owonde kubha, ‘Nuuche’, hayo hayo acha. No omusësë waane, neramobhoorera, ‘Ukörë hangʼu’, woose nibhu aghuköra.”
9Hano Yesu oghwire ghayo, akamoroghoora chwee. Aghiishoororeri erikinda re bhaato bhano ꞉bhaare bharamutambana, akabhabhoorera, “Mbe, ˆnekabhabhoorera, koru mo‑Bhiisiraeri bhoose, nkeere ntiimara ndighi omooto wowoose uno anyi no obhokumi obhokoro bhonga bhuno!”
10Abhaato bhano ꞉bhaare bhatomuru bhaghagharuka awaache omokoro uyo, bhakabhöna omutamishi wuure ahöriri.
Yesu ˆakamoryoki omobhureni uno are akuure
11Akamara eriibhagha isuuhu, Yesu aghaye mo‑moghya o Nayini, anyi haghirohamu na abhaghëndi bhaache na abhaato abhande bhaaru. 12Hano are ˆaghatingʼi ekehita ke moghya, aghatëmëërana na abhaato bhaghëghiri erihundughu re mobhureni. Omobhureni uyo, niwe are omoona omwene chiri o mokungu uyo, wiiki omokungu uyo m‑mosino are. Abhaato bhaaru bha moghya uyo mbaare haghirohamu nawe.
13Hano Omutëmi amorooche omosino uyo, akamoghwera bheghongi, akamobhoorera akabhugha, “Otighe korera.” 14Aghiishukerera machëëra ino ꞉bhaare bhaghëghiire erihundughu riyo, akayeturi. Abhaato bhano ꞉bhaare bharighëghiri, bhakiimeerera.
Yesu akabhugha, “Oo omobhureni, neghakobhoorera, bhooka!” 15Omobhureni uno are akuure, hayo hayo akabhooka, aghiikara, aghasëëma ghosiikëra wiiki. Yesu akamuhaana kwo nyina.
16Abhaato bhayo bhoose, bhaghatiina chwee. Bhaghasëëma koreghongi Eryobha, bharabhugha, “Omurööti omokoro, akarwera ghate yiito!” Wiiki bhakabhugha, “Eryobha, ndiichiri ghotoori abhaato bhaache!” 17Angʼana iyo, eghasancha chwee mo‑mukööwa woose o Yuteya, na mo‑mikööwa eghende ghe haghuhe.
Yohana Omubhatisaachi na Yesu
(Mataayo 11:2–19)
18Hano Yesu are araköra ghayo ghoose, Yohana akahireru amangʼana na abhaghëndi bhaache, eriibhagha riyo mwighërëcha are. Niho akabhabherekera bhabhere ghate yaabho,#7:18 Mööhi Ruuka 3:20. 19akabhatoma kubha bhaghëndë komobhoori Omutëmi Yesu, kubha, “Kana, iye niiye Kirisito wuure akuucha, ghasi tughanye owonde?”
20Hano bhahikiri o‑Yesu, bhakamobhoorera bhakabhugha, “Yohana Omubhatisaachi natotomiri ghokoocho. Tokobhoori, ‘Kana, iye niiye Kirisito wuure akuucha, ghasi tughanye owonde?’ ”
21Kwo riibhagha riyo riyo, Yesu naare arahöri abhaato bhaaru amabhabharu ghaabho. Naare ahöriri koru bhano bhatiiruru ne emisambu. Wiiki ꞉naaghëriri abhahuku bhaaru bhatore korighi.
22Niho, Yesu akabhagharokeri akabhugha, “Mughëndë momobhoorere Yohana ghoose ghano morooche, na ghoghooghu. Kubha, abhahuku ˆbhakarighi, na abhabhëëru ˆbhaghaghënda, na abhabhabharu bha mbiti ˆbhakahöra, na abhakiro ˆbhakooghu, na abhaku ˆbhakaryoka. Wiiki, abhahabhe ˆbhakaraghaneru Angʼana Anchömu e Ryobha.#7:22 Mööhi Isaaya 35:5–6, 61:1. 23Ngʼoni, omooto wowoose uno ataanyi na kemboori ighoro yaane!”
24Hano abhaghëndi bha Yohana bharuure hayo, Yesu aghasëëma ghoghabhoorera amakinda gha bhaato ighoro e Yohana akabhugha, “꞉Mooghiire kumööhi ke iyo mwibhara? Obhunyaaki bhuno bhoghosingisu no obhukama? Tiyaanyi! 25Mbe, moore moraghe kumööhi ke? Omooto uno are abheekiri amaghööti machömu? Tiyaanyi! Abhaato bhano bhahaabheeka amaghööti amachömu, na kumanya eriimanya re kyame, bhayo mbahaabha bhariikara mo‑chanyumba chankoro che ghitëmi!
26“Mbe ꞉mooghiire kumööhi ke? Kana, ꞉mooghiire kumumööhërëri omurööti? Hee! Amare ˆnekabhabhoorera kubha Yohana naghokera omurööti. 27Mo‑Mandëkö Amatööbhiyu, niwe wuure ꞉andëkiiru ghano,
‘Mööhi, ˆnekamotoma omutamishi waane
aghukangate ambërë yaacho,
kubha aghukörërë anchëra.’#7:27 Mööhi Maraaki 3:1.”
28Yesu akabhabhoorera wiiki akabhugha, “Mbe, ˆnekabhabhoorera kubha, ghate e bhaato bhoose bhano ꞉bhiibhwiru na abhakari, taanyi‑ho uno anyi mokoro ghokera Yohana. Amare, omooto uno akorighibhu m‑mosuuhu mo‑bhutëmi bho Ryobha, iwe m‑mokoro komokera.”
29Abhaato bhayo bhoose, haghirohamu na abhatöbhi bha righööti, hano bhooghwire amangʼana ghayo gha Yesu, bhaghiishereri kubha amiihëëbhö gha Ryobha ngaare machömu ghokoobho. Abhaato bhayo ꞉mbiisheriiri gho kubha, nibho bhaare Yohana are amariri kobhabhatiisa. 30Amare Amabharisaayo na abheeghi bha meghiro, ibho bhakaanga ghano Eryobha rëbhëëndiire, gho kubha ꞉mbaangiri kubhatiisu na Yohana.
31Yesu akabhabhoorera wiiki akabhugha, “Abhaato bha rwibhoro runo, nebhatuubhaani na ke? Na m‑bha tëëmö ke moonyi? 32Mbatuubhiine na abhaana bhano bhiikeere mo‑mutëëra na kobhabherekera abhaghëndi bharabhugha,
‘Ntobhatëmiire ebherereesi mwikwirëra,
amare motaabhiniri,
tokabheembera emyembo ghe macheeche,
amare motiihinyeriire!’
33“ˆNekabhabhoorera gho kubha, eriibhagha Yohana Omubhatisaachi ꞉ichiri, taare ararë emighaate, koru kunyo adivaayi. Gho ghayo, inyu mokabhugha kubha, ‘Naghööturu ne emisambu!’ 34Eni Omoona o Mooto ˆnekaacha, eni, neekurë ebhiinyakurë na kunyo adivaayi. Gho ghayo, inyu mokobhugha, ‘Mumööhi! Uno mohobhaaru, wiiki murëëbhi, n‑omusaani o bhatöbhi bha righööti, na bha masari!’ 35Amare amangʼiini gha Ryobha ngahaarighibhu kubha n‑gha hëënë, kwo bhaato bhano bhakoresooka.”
Yesu mo‑ka e Simiyooni Omubharisaayo
36Orosiko oronde Simiyooni Omubharisaayo, akamuraghani Yesu aghi kuraaghëra awaache. Ibheere Yesu aghasöha awaache Omubharisaayo uyo, aghiikara akaraaghëra. 37Mo‑moghya uyo, naare‑ho omukari umu o masari, omusöngörëëri. Omukari uyo, hano oghwire kubha Yesu nakuraaghëra kwo Mubharisaayo uyo, aghasöha muyo na achubha e riighori ikoro e arabhaasita, ino ere na amaghuta gha keneeso. 38Akiimeerera anyuma e Yesu, haghuhe na amaghoro ghaache. Aghasëëma korera, changishori cheeche cheekabha cheramutöönyëra Yesu mo‑maghoro. Akabha aramutareki na chanchweri cheeche, akamutahata amaghoro ghaache, na ghoghahaka amaghuta gha keneeso.
39Omubharisaayo uyo, hano arooche ghayo, akiihëëbha mo‑metema waache akabhugha, “Omooto uno, nangabheere murööti are, nangamanyiri kubha, omukari uno akomughöötaghööta, n‑omooto o ngabhu. Nangamënyiri kubha, iwe n‑omooto o masari, omusöngörëëri!”
40Yesu akamobhoorera akabhugha, “Oo Simiyooni, neenyi na angʼana e ghokobhoorera.” Akamugharokeri akabhugha, “Oo Omweghi waane, nomboorere.”
41Ibheere, Yesu akamobhoorera akabhugha, “Mbaare‑ho abhaato bhabhere, ꞉bhaare na asiire e chambiiri kwo uno are abhaheere asiire iyo. Umu o bhayo, naare aghëghiri chatinaari amaghana ataano. Omughëndi nawe, ꞉naaghëghiri chatinaari miröngö etaano. 42Hano chambiiri chebhoriri che komoreha uno are abhaheere asiire iyo, akabhaabhëra, bhatareha. Mbe, ghate e bhayo bhabhere, w‑wuhe akomosiigha ghokera owonde?”
43Simiyooni akamugharokeri akabhugha, “Nekorighi kubha, neekubha wuure are abhiiru asiire ankoro.” Yesu akamobhoorera akabhugha, “ˆOghangarokeri bhoheene.” 44Hayo hayo, Yesu akamwishororeri omukari uyo, akamobhoorera Simiyooni akabhugha, “Okamorighi omukari uno? Nisöhiri awaacho, amare tungënëhiri gho kuuha amanche gha ghwishaabhi amaghoro ghaane.#7:44 Kwo Abhayahuuti, neere asughara komuha omughëni amanche abhönë ghwishaabha amaghoro ghaache, gho kubha chanchëra ncheere chiichwire orotu. Amare iwe, naachachiri amaghoro ghaane na changishori cheeche, na ghoghatareki gho chanchweri cheeche. 45Hano nisöhiri awaacho, tunkëëriri gho ghuntahata, amare iwe, korwera eriibhagha nisöhiri muno, tatamuru ghutahata amaghoro ghaane. 46Wiiki twërëkiri asooko gho kuhaka omutu waane amaghuta. Amare iwe, naahakiri amaghoro ghaane amaghuta gha keneeso. 47Gho ghayo, ˆngakobhoorera kubha, obhosiighi bho mukari uno m‑bhokoro, mbokwërëki kubha amasari ghaache maaru, ngaabhiiru. Amare wowoose uno abhiiru amasari amasuuhu, uyo, nahaabha no obhosiighi bhosuuhu wiiki.”
48Hayo hayo, Yesu akamobhoorera omukari uyo akabhugha, “Amasari ghaacho, ngamariri kwabhëru.”
49Abhaghëni abhande bhano ꞉bhaare mo‑bhiinyakurë, bhaghasëëma kobhoorani bharabhugha, “N‑niwe uno, akwabhëra koru amasari?”
50Hayo, Yesu akamobhoorera omukari uyo, “Obhokumi bhoocho ˆbhoghakuhöri! Nooghi kwo murëmbë.”
S'ha seleccionat:
Ruuka 7: ntk
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022 Wycliffe Bible Translators, Inc. All rights reserved