Met 6
6
Jo'ojo'o mboone môta binam
(Nk 34:15-16; 2 Ko 6:14-18; Sam 14:1-4; Rm 3:10-18)
1Eyoñe bôt be nga taté na ba mialan e *si nyô, a na bengon be nga bialé be be, 2ane bone be Zambe be nga yene na bengone be bôt be mbe abeñ, a e nne be nga zu tobe binga bap e be bengone bete.
3Ajô te Nti a nga jô na: E Nsisime wom wo ye bo te tabe be môta binam éyoñ ése, amu a ne fo'o ve minsôn, a mimôse mié mia ye bo mimbu 120. 4Eyoñe te é mbe ji mimben mi mbe *si nyô, valé bone be Zambe be zuya e be bengon be bôt, be ki be biaya be *bon: e mbe bete be mbe beta mimbene ya melu kôa. 5Nti a nga yene na mbia mboone môt a nga dañ anen e si nyô; a na *môs ôse e nleme wé wo bôndé ve mbia b'asimesan. 6Ajô te Nti a nga jôbane na a nga té môt e *si nyô a e nleme wé ô nga wô'ô ôlun. 7Nti nye na: Ma ye fimi môt me nga té e *si nyô été, ataté môt a kui biyem, betite ba woñ a kui anone ya yôp; amu ma jôban ane me nga bo bie. 8Ve Noé a nga bi mvame Zambe.
Nkañete Noé
(Hé 11:7; 1 Pi 3:19-20; Yb 22:15-17)
Ndôn
9E mvoñe bôte Noé e nje nyô:
Noé a mbe zôsôôô môt teke bijô ézezañe bôte ya biyoñe bié; Noé baa Zambe be mbe be wulu'u.
10Noé a nga biaé bobefame belaa: Sem, Kam a Yafet. 11Si é mbe ndaman e mise me Zambe, si é mbe njalane njet. 12Zambe a nga yene na si é mbe ndaman; amu nsôn ôse ô mbe ô wulu'u *abé e *si nyô. 13Ajô te Zambe a nga jô Noé na: Me tyi'iya na ma jiane bevevee bitétéa bise; amu si é ne njalane njet amu be; ajô te ma zu jiane be, nalé fe si. 14Lôñe womiene Ark a élé ba loone gôfér; wo ye bo bitune bi *nda e *ark ate été; wo ye futi meyañ été a atan. 15Avale di e nde wo ye ba nye: ayap menyi'i me mo 300, ndam menyi'i me mo 50, ôyabe yôp: menyi'i me mo 30.
16Wo ye futi ayombô e *ark yôp e too anyi'i wo da; e *mbé wo ye bo mfa'a ya fefe; *ark ate a ye bi nkôñ mfa'a ya si, nalé fe wu baa a wu lale. 17A e mfa'a wom, ma ye soo ndôn e *si nyô, asu ya jian nsôn ôse ô ne yôbe si ô bili mvebe ényiñ; jôm ése é ne si ja ye jañ. 18Ve ma ye bo élate jam a wo; wo ye nyiine *ark été a bobefame bôé, e minga wôé a mimbome miôé. 19Wo ye fe bo na tit ébaé ya aval ese é vee é nyiin, asu ya na be ke ôsu a nyiñ a wo; wo ye nyoñe ngale wua a nnôme wua. 20Ngal a nnôm ya kan ése, ônon, éyem, tit ja woñe si, ba ye zu be wo, nalé ba ye bo te jañ. 21A wo nyoñek ngab éziñe ya bidi bise ba di, a ba'ale bie nga'aban e fefele jôé, nalé ate bia ye volô wo asu bidi biôé a e mfa'a wop.
22Avale te e nde Noé a nga bo; a nga bo mimfa'a mise avale Zambe a nga bendé nye.
S'ha seleccionat:
Met 6: BDCB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible en langue Bulu © L'Alliance Biblique du Cameroun, 2007, 2015.