Met 7
7
Noé a nyiin e *ark été
(Met 6:8-22; Mt 24:37-39)
1Nti a nga jô Noé na: Nyi'in e *ark été, womien a e *nda bôte jôé ése; amu me yeneya na, asu dam é ne zôsôôô ézezañe bôte mia be be mia nyiñ éyoñe jia. 2Nyoñek, e fefele jôé, fia zamgbwale ya betite bese be ne *mfuban, #7:2 nnôm a ngal, fombô'ô Lv 11 3nalé fe fia zamgbwal anone ya yôp, nnôm a ngal, nalé ate wo ye ba'ale ényiñe ya mvoñe jap e si nyôna ése été. 4Amu dene melu zamgbwa, ma ma ye zuu mveñ e *si nyô môse mewôm menyin a melu mewôm menyin a ma ye fimi bitétéa bise me nga bo e si nyôna été. 5Noé a nga bo ane Nti a nga bendé nye mimfa'a mise.
6Noé a mbe mimbu 600, éyoñe ndôn é nga kui *si nyô.
7Noé a nga nyiin e *ark a bobefame bé, minga wé a mimbome mié, asu ya mate mendim me ndôn. 8Ngabe ya betit be ne *mfuban, ba be nji bo *mfuban, a nyô ya betite ba woñe si, 9é nga nyiin e *ark été, fefele Noé, befia, nnôm a ngal, avale Zambe a nga bendé Noé.
Mveñ a ndôn
(Mink 29:1; Yb 22:15-18; 2 Pi 2:5-9; 3:3-12)
10Mvuse melu zamgbwa, mendime me ndôn me nga zu *si nyô. 11E mbu 600 ya ényiñe Noé, e ngone baa é too melu 17, *môs ôte, menjeñe mendime ya beta yee, me nga vame si, a mezene mendime ya yôp me nga yombô. 12Mveñ é nga noñe *si nyô môse mewôm menyin a melu mewôm menyin. 13Môse te ôbien Noé, Sem, Kam a Yafet, bobefam be Noé, minga Noé a mimbome mié milaa be nga nyiine ark 14a betite bese ane mevale map me né, biyeme bise ane mevale map me né, betite bese ba woñe si ane mevale map me né, anon ése ane mevale map me né, jôm ése ja yele a é bili mefap. 15Befia be nsôn ôse ô bili mvebe ényiñ, be nga nyiine *ark été e fefele Noé. 16Be nga nyiin, nnôm a ngal be nsôn ôse, avale Zambe a nga bendé de Noé. Wôna Nti a nga dibe *mbé.
17Ndôn é nga tabe *si nyô nté môse mewôm menyin. Mendim me nga bet a kee *ark, nyô a nga beteban yôp. 18Mendim me nga nen a bet abui e *si nyô, a *ark a nga yeñe mendime yôp. 19Mendim me nga dañe dañe nene *si nyô. Minkôle mise mi ne ôyabe yôp mi too yôbe si mi nga ke mendime si. 20Mendim me nga yandane minkô a lôte mie tañe menyi'i me mo awôm a metan. 21Jôm ése é mbe é fô'ôsa'ane si é nga wu, to'o anon, to'o biyem a betit, biôm bise bi mbe bi nyu'uk e si, a bôte bese. 22Jôm ése é mbe é fô'ôsa'an a mvebe ényiñ e mimbile mi môé e nje é mbe e *nkôte si, é nga wu. 23Zambe a nga fimi bitétéa bise bi mbe *si nyô: Bi nga fimban e *si nyô. A nga li'i fo'o ve Noé a jôm ése é mbe a nye *ark été. 24Mendim me nga kui ndôn e *si nyô tañe môse ntet a mewôm metan.
S'ha seleccionat:
Met 7: BDCB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible en langue Bulu © L'Alliance Biblique du Cameroun, 2007, 2015.