Lukas 12
12
Mba Yésu tagte ghazi'te nu i là
(Mat. 10.26-27)
1A #Mat. 16.6; Mark. 8.15be num yen ngelaṅ nà, bwoṅ benntùn bèn ntse'te yàme, kà tsemo' nke nyiaṅte tsemo'o, Yésu to' netshob ghazi'te nu i ndù: Bin bam nà num ntsha' ba Férésia z'a b'a mfùm nà. 2Mo' #Mark. 4.22; Luk. 8.17ju nelem ke' be z'a ke nsi tum njù mbwôgtshù là; mo' ju ke' bèn mbe ntùm tsham ze bo ke nsi lèn nà; 3mba ju ze bin nsi tshob ntùm dù' njam nà nsi tum ntùm dù' tàyage; ju ze bin tagte toṅ mèn ntùm ndà là, bo nsi tsin num tuba' kà tshobe.
4Là me tshob bin tse bin b'a shun tshàm nà ndù: Kà bin bwôg ben tse bo num nzwi mbàb wut, là ke bèn nku' neghù mo' ju ntshùa yen nà là. 5M'a' tswite mèn z'a bwô ndù bin bwôg i là bin: Bin bwôg mèn z'a num nzwi yôg mèn, mbèn ngù ngù' nema' i ntùm dù' mbwôg là. Ṅ, me tshob bin ndù bin bwôg i, bin bwôg yen mèn nà. 6Bo ke' be swèn ntôgzin ntàn nkeba mbàa ké? Là bin lèn ndù Nsi ke' be lagte sàm ta' i mba ntshù'. 7Mbèn mbe, bo siaṅ njoṅ ntàn nyiaṅtu tsin fa, kà bin bwôg sàm ju, bin tanjoṅ ntshùa ntôgzin yàme.
8Là me tshob bin ndù njoṅ benntùn fa tse bo nsi bam àm mbwe benntùn nà, mba Mén mèn nsi bam yub ze mbwe ba Angél Nsi. 9Mèn z'a gha àm mbwe benntùn nà, me nsi gha i mbwe ba Angél Nsi. 10Mèn #Mat. 12.32; Mark. 3.29z'a nsi tshob ntshob kebwô num Mén mèn nà, bo nsi lagte yi; là bo ke nsi lagte tshabte Ywèt Nelàne. 11Ngelaṅ #Mat. 10.19-20; Mark. 13.11; Luk. 21.14-15bo nsi lo' zin nèn yi ntùm ba sinagogue, mbwe ghatsho'te ntsha, ke mbwe ghatô ngô lo là, kà bin lab wut tsin mfà num nu ze bin tshob kà kwé wut tsin yi, mba mat ze bin tshob yi là. 12Nummbe Ywèt Nelàn nsi tshob ju ze bin tshob là bin be num ngelaṅ mbile.
Nkagni ngankàb
(Mat. 16.26; Luk. 16.19-26)
13Mo' mèn netèt bwoṅ benntùn tshob Yésu ndù: Ngatswite, tshob mfèl àm ndù bag yi ghabte ntsi' tà yag. 14A bùnte yi ndù: We z'a yab àm netèt bin mba ngatsho'te ntsha, mbèn mbe ngaghabte tshu à? 15A bèn ntshob bo ndù: Bin bamnà, nzete num ze'te, nummbe yôg mènntùn ke' yé't'a num tshu tse, a be z'a ghù a yàm mba neyàm nà.
16A tshob mo' tànkùt bo ntshob ndù: Nà mo' ngankàb lo fà tshu yàme. 17A kwate tu i, ntshob ndù: M'a' ghù à ndùke? Nummbe me ke' ghù dù' neyab tshu tshàm bwe. 18A tshob ndù: Tshù ju me nsi ghù li: M'a' kam njoṅ tshàm nta fa, nkaṅ nkut tse ndùbndùb yi, ntse'te njoṅ nsa màm mba njoṅ tshu tshàm fa ntùm bwe; 19ntshob ntù àm ndù: Ntù àm! O ghù tshu ts'o lé' num ngu'njù yàm nà yàme, fite wul o, njù, nu, mbèn ntsiaṅte tsho. 20Là Nsi tshob yi ndù: Nkagni, be num yen tèttswe' li, bo nsi bètt'o ntù o; we z'a nsi ghù tshu ts'o nabte l'à? 21A nsi se' b'a be ndaṅndaṅ num mèn z'a be ntse'te nkàb num tu wul i, ke be ngankàb num miag Nsi là.
Nu nelab wut
(Mat. 6.25-34)
22A bèn ntshob ghazi'te nu i ndù: A b'a ju z'a ghù kà me tshob bin ndù: Kà bin lab wut tsin num yôg sine, num ju ze bin jù là, num ju ze bin ma' num bin nà. 23Yôg tanjoṅ ntshùa jujù, wut bèn ntanjoṅ ntshùa nzwe. 24Bin lôte màla njene, bo ke' be ywit ke bèn ntsho'o, ke ghù nta mba kandà; mba ndùlala Nsi num nkém yube. Bin ke' tanjoṅ ntshùa bon nsaṅ ké? 25We z'a netèt bin ndù a ku'ni nekwi'te mo' mfi' num ntsewul i njam nelab wul à? 26A be ze bin ke' ku'ni num bontsit tshu là, numke bin nke ndab wut tsin num tsemo' à? 27Bin #1 Fen. 10.4-7; 2 Kron. 9.3-6lôte nsàm nenà njene; bo ke' be se' ndeb, ke bèn mba' nzwe, mba ndùlala, me tshob bin ndù mba Salomon ntùm nkuni mi fa, lo ke ket nzwe mba ta' i netèt bo là. 28A be ze Nsi num ma' nzwe num yen nenà li, z'a be sènni, bo ma' i mbwôg ndamnjù là mb'a ke' ku'ni nema' nzwe mba num bin zin ké, ghabamntù metsili? 29Kà bin ke ndiag ju ze bin nsi jù là, mba ju ze bin nsi nu là; kà bin ghùtni wut tsin num tshen tshu là. 30Njoṅ tshen tshu là fa, a b'a ghakelèn Nsi tse ntùm yen njù li bèn nke ndiag ndùlala. Tà zin lèn ndù bin bwoṅ tshen tshu là. 31Bin bwôgmbwe ndiag nda' nufen se, njoṅ tshen tshu là fa nsi se' bin njam bwe.
32Kà bwôg me metsit bwoṅ njùmbwe, nummbe Tà lo yen ndù a bwô nefà nufen se bin.
33Bin swèn njoṅ tshu tsin fa, njwimte bwoṅbwoṅ yi. Bin ghù mbàm mi a ke' be ywèn nà, ngù nkàb tanjoṅ z'a ke' be mi là mfe kamànyam, dù' ze tshô ke' ku'ni neyi, dù' ze mbé' ke' ku' nebagte là. 34Nummbe dù' ze nkàb zin be là, mba ntù tsin bèn mb'a bwe.
Nezi tshùalo
(Mat. 24.42-44; 25.1-13; Mark. 13.33-37)
35Bin #Mat. 25.1-13taṅ kob tun bin, mbèn nte mbwôg num ndambo mine. 36Bin #Mark. 13.34-36be ndaṅndaṅ mba ben tshen nà tse bo tshwèt nke mbéb tà yub z'a fe nandà yoṅ tsho' nzendà yi, ngelaṅ z'a nsi se' ke'te là. 37Ghafen b'a ghafa' tse tà yub nsi se' tèt yub ndù bo tswe ke ke nzi là, kua' nenùne, me tshob bin ndù a nsi taṅ kob se, ghù bo tswe téblé, a se' mfa' bo. 38Ghafen b'a ghafa' tshen nà tse be tà yub bèn mbe bèn njam num mbatte bàa ke mbatte tat lo, ntèt yub bo nke nzi tshùalo là.
39Bin #Mat. 24.43-44lèn yen nu li ndù: A be ze tàndà lèn nyam ze ntshô nsi se' là, mb'a nsi zi tshùalo ke faṅ ndù bo to ndà i. 40Mba bin zin, bin be tswe, nke mbébe, nummbe Mén mèn nsi se' à num nyam ze bin ke' kwate ndù a' se' là.
41Pétro bètte, ntshob ndù: Tshùaben, o tshob yen tànkùt li à bag k'o tshob à mba tsemo' benntùn yub à? 42Yésu tshob ndù: A zit ngalé' tshu ze nenùn mbèn mbe ngazete ze be tàfa' faṅ ben tse yi ndù a ke mfà bàn bo kua' njoṅ ze bo kô là ngelaṅ i à? 43Ngafen b'a yen ngafa' là ze tàfa' nsi be bèn njam tèl i, a ke ngù ndùlala là. 44Kua' nenùne, me tshob bin ndù mb'a nsi faṅ njoṅ tshu tse fa yi, a ke ndé'é. 45Là, a be ze yen ngafa' li tshob ntù i ndù: Tàa nsi be se' sène, nto' nelab tsemo' ghafa' tse bandum mba tse bènnzwi, njù, nu, mbèn mbume, 46tàfa' se' mum lé'njù s'a lo mbe ke ke mbéb là, mba num nyam z'a ke' lèn nà, mfagt'é, njab ze bag i boa tse bo ke' be ben nenùn nà.
47Yen ngafa' z'a lèn ju ze tàfa' kô, mbe tswe ke ke mbébe, ke bèn ngù ju z'a kô là, bo nsi tsham i nto' yàme. 48Là mèn z'a ke' lèn yen nekô là, nzin mat mb'a lo mbwô ndù bo tsham i nto' yàm nà, bo nsi tsham i à nda' metsili. Mèn ze bo fà yi yàm nà, bo nsi kwé yi yàme; mèn ze bo lé' yi yàm nà, bo nsi bèn bètt'é yi yàme.
Lèn ngelaṅ
(Mat. 10.34-36)
49Me se' nema' à mbwôg ntùm njù, me tshwèt nekô ndù a kù ndende. 50Mo' #Mark. 10.38ntse bwe mi bo nsi nyu' àm bwe là, là me tswe à ntùm nge' tà nkum ngelaṅ z'a nsi bumte là.
51Bin kwate ndù me lo' à fite nse' yi num tsha' ké? Me tshob bin ndù nga, là nda' fagte. 52Lo sènni, a be ze benntùn tàn be ntùm ta' ndà là, mba bo nsi fagte, tse tat bàn tse bàa, tse bàa bèn mbàn tse tat. 53Tà #Mik. 7.6nsi ke mbàn mén, mén bèn nke mbàn tà; mà bàn ngon i, ngon bèn mbàn mà; màndu bàn nzwimén i, nzwimén bàn màndu i.
54Yésu bèn nke ntshob mba bwoṅ benntùn ndù: A num mbe ngelaṅ bin yen ndot lo bag mbinyam nà, bin yoṅ ntshob ndù: Mbaṅ nsi lo. A yoṅ mbumte. 55Bin num ntshob ngelaṅ ze fetmbaṅ fe mà ntèn kà ntshu' là ndù: Nyam nsi tà kua' neta, a yoṅ mbe be ndaṅndaṅ. 56Ghamfùm, bin lèn mba ntshù' nsitsha' mba kamànyam be là; ke z'a ghù bin ke lèn yen ngelaṅ ni à?
57Numke bin ke be lôte zin tu, njen ju z'a be netsin n'à? 58Ngelaṅ z'o tshwèt nke nèn mbwe ngatsho'te ntsha bin ngakeban o là, kagtùn ndù bin yi miagte ntsha num manze, mbwôg ndù k'a soṅ o nèn yi mbwe ngatsho'te ntsha, ngatsho'te ntsha fà o ngabéb ndàtsha, ndù kà ngabéb ndàtsha ma' o ndàtsha. 59Me tshob wù ndù o ke nsi tum bwe, ke be ndù o fà nkàb tà nèn nkum num miagte keba.
S'ha seleccionat:
Lukas 12: BMa
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Sainte Bible en Bamiléké-Medùmba © Alliance Biblique du Cameroun, 1993. All rights reserved.