Yohana 6
6
UYesu iiliisa avaanu voloofu
(Matayo 14:13-21; Maluko 6:30-44; Luka 9:10-17)
1Pe dzaaviye dzíhelaniidze idzo, uYesu iilowokaga imwambu iyingi iya nyandza ya Galilaya, ilitaawa ilingi yiitambulwa nyandza ya Tibelya. 2Ililugu likomi lya vaanu likumuniniilaga uYesu, pakuva lyali lífiweene ifimanyilo, fye aahuufyaga pa kuvananiya avatamwa. 3Neke uYesu iinukage ku kidunda wuli pamwinga na vanyigendwa vaakwe, iikalasage navo kuuko. 4Umusika ugo, ikyaka kya Paasaka ya Vayahudi kyali biihi.
5UYesu iilolaga, iiwonaga ililugu likomi lya vaanu liikwadza ukwakwe. Neke amuwuudzage uFilipo atigilage, “Twigula kwiya imikaate#6:5 Imikaate Iki kyali kyakuliya kya figono fyonda ku Vayahudi. gya kuvaliisa avaanu vonda ava?” 6UYesu amuwuudziidze ewo uFilipo ukumugemya, pakuva aludzeeliye lwe ahadza iilima. 7UFilipo akumuhigaga iitigilaga, “Nde tukali tugule imikaate gya dinaali#6:7 Dinaali Aga gaali magoobeli ga Valoma. Idinaali yimwinga yaalingʼiine nu luhombo lwa mulima-malimo mu kigono kimwinga. magana gavili (200) ukuta nayula mu vaanu ava anyambase kadoodo kadoodo, gisikwila!” 8Neke uAndeleya, ye aali yumwinga mwa vanyigendwa vaakwe, kangi maamiye va Simoni Petulo, amuhigage uYesu atigilage, 9“Mutwave, apa pwali umudiimi yumwinga, ye ali ni mikaate gihaanu gya wutine wa ngongilwe ni somba ndoodo dzivili. Neke kangi ifi fihadza fiikwila wuli ku lilugu ngita ili?”
10Neke uYesu avalongelage avanyigendwa vaakwe atigilage, “Muvalongele avaanu, ukuta viikale paanyi.” Apoono apo paali nu lusoli loloofu, vonda vakwikalaga paanyi. Mu lilugu ilyo, vaali moovali avamwadaada mbilima dzihaanu (5,000). 11Neke uYesu anyamulage imikaate igyo, amuhongedzage uNguluvi, avagavilage avaanu vonda avaali apo. Iilimaga ndeeni ni somba dzivili idzo, nayula iiliyaga mwe iisakila.
12Avaanu vonda pe viigwite, uYesu akuvalongelaga avanyigendwa vaakwe iitigilaga, “Mulundase utuwuluwulu tonda útusigiye, ukuta katane ukuyaga nambe kamwinga.” 13Neke valundasage, vamemyage ifihiivi finyikyumi ni fivili (12) fya tuwuluwulu twa mikaate gihaanu gya wutine wa ngongilwe, fye vaagombuwe avo avaaliye. 14Avaanu avo vaaviye vákiweene ikimanyilo kye áhuufiidze uYesu, viilongaga viitigilaga, “Ndakyene umuunu uyu muvidzi va Nguluvi, ye tukiihuuvilaga ukutigila iikwadza pe naanyi apa.”#Lwiwuko 18:15, 18 15UYesu pe aadzeeliye ukutigila avaanu avo viisaka vamugagiilidze avedze Mutwa vaawo, iihegaga, iihelelaga mwene kangi ku kidunda.
UYesu iigenda pakyanya pa lulenga
(Matayo 14:22-33; Maluko 6:45-52)
16Umusika gwa pa kyamihe, avanyigendwa va Yesu viikwikaga ku nyandza ya Galilaya. 17Viikwingilaga mu waato, ukuta valowoke ukuhelela ku Kapelenahumu. Umusika ugo kyali kiisi, kangi uYesu aali asinaa afika avedzase navo.
18Inyandza yiitigangikaga, pakuva ilivelo likomi hiilo lyapugaga. 19Avanyigendwa pe vaaviye váheliye lugendo lwa kilometa dzihaanu enewuli mutanda (6) wuli mu waato, vakumuwonaga uYesu iigenda pakyanya pa lulenga, iihegelela pa waato, viikoogopaga mbandu. 20Neke kangi uYesu avalongelage atigilage, “Ye neene, mutane ukoogopa!” 21Neke aveene vasakage iingile mu waato. Umusika guugo, uwaato wiifikaga ku mwambu kwe vaahelelaga.
UYesu gwe mukaate gwa wuumi
22Ikigono ikyafudiike, ililugu lya vaanu avaasigiye ku mwambu ya nyandza, liidzeelaga ukutigila apo poowuli uwaato wumwinga hela. Kangi liidzeelaga ukutigila uYesu asili pamwinga na vanyigendwa vaakwe mu waato uwo, nda haamu, avanyigendwa avo vaali váhegile veene. 23Neke avaanu avangi vaadzage nu waato uwungi ukuhuma ku Tibelya, vafikage apoono pe vaali váliye imikaate avaanu voloofu, nu Mutwa Yesu pe aali ámuhongiidze uNguluvi. 24Suwe ililugu lya vaanu, pe lyaweene ukutigila uYesu sikwali uko nambe vanyigendwa vaakwe, liikwingilaga mu waato, liihelelaga ku Kapelenahumu kumutemula uYesu.
25Ililugu lya vaanu ilyo pe lyalowiike ku mwambu iyingi iya nyandza ya Galilaya, likumuwonaga, likumuwuudzaga liitigilaga, “Muwulanidzaave, ukaadzile ndali kuno?” 26UYesu iihigaga iitigilaga, “Ndakyene ndikuvalongela ndiitigila, mukuunemula, si pakuva mukaalolile ifimanyilo fye ndikaahuufiidze, nda haamu, pakuva mukaaliye imikaate gila nu kwiguta. 27Mutanage ukulima amalimo wiimila wa kyakuliya ikiikwanangika, nda haamu, mulimage wiimila wa kyakuliya ikikuvapeela uwuumi uwa mbeepali. UMuswamuve va Muunu alavapeela ikyakuliya ikyo, pakuva uNguluvi uDaada ámupeeliye uwutawulilwe waakwe wa kulima ewo.”
28Neke aveene vamuwuudzage vatigilage, “Lino tulime kiki, ukuta tulimage amalimo ge iisaka uNguluvi?” 29UYesu akuvahigaga iitigilaga, “Amalimo ge iisaka uNguluvi mulimage ge aga. Mumufuuwage uyo ye ámutumile.” 30Vakumuwuudzaga viitigilaga, “Ongo, uhadza wiihuufya ikimanyilo kiki, ukuta tukiwone nu kukufuuwa? Uhadza wiihuufya kiinu kiki? 31Avakuhwesu vaaliye imana pe vaali mu lungʼalangʼala,#Kuhega 16:11-15 ngita kye lúsimbiilwe mu Wusimbe uWiimike ukutigila, ‘Avapeeliye imikaate ukuhuma kukyanya.’#Ndzimbililo 78:24 ” 32Neke uYesu avalongelage atigilage, “Ndakyene ndikuvalongela ndiitigila, siye Mose ye avapeeliye avakuhwenyo imikaate ukuhuma kukyanya, nda haamu, ye Daada. Umwene akuvapeela umukaate gwa ndakyene ukuhuma kukyanya. 33Pakuva umukaate gwa Nguluvi, ye mwene ye iikwika ukuhuma kukyanya nu kuvapeela uwuumi avaanu vonda pe naanyi.” 34Neke vamuhigage vatigilage, “Mutwave, twinyilika utupeelage umukaate ugo ifigono fyonda.”
35UYesu akuvahigaga iitigilaga, “Uneene gwe mukaate ugwa wuumi. Umuunu ye avedzaga ye iikwadza ukwangu asiidagana nambi, kangi ye avedzaga ye akuufuuwa asiikeluka nambi.#Isaya 55:1-2
36“Neke kangi ndívalongiye ukutigila, nde luvedze múumbwene, napo kangi musikuufuuwa. 37Avaanu vonda ve akuumeela uDaada viikwadza ukwangu nu kuufuuwa. Kangi uneene sindilamukaana nambe yumwinga ye iikwadza ukwangu. 38Sindiikile ukuhuma kukyanya ukuta ndilimage dze ndíkeeliye uneene, nda haamu, ukuta ndilimage dze iikeela uDaada ye áanumile. 39Igi gye mikeelelele gya Daada ye áanumile ukutigila, nditane ukumuyadza nambe yumwinga mu vonda ve áameeliye, nda haamu, ndivadzulubuse pa kigono ikya wusililo. 40Pakuva uDaada iikeela ukutigila, ye avedzaga ye akumuwona uMuswamuve nu kumufuuwa, avedzage nu wuumi uwa mbeepali, na yuune ndilamudzulubusa pa kigono ikya wusililo.”
41Neke aVayahudi vavangage ukungʼuula, pakuva uYesu aatigiye, “Uneene gwe mukaate úgwikile ukuhuma kukyanya.” 42Vakwiwuudzaga viitigilaga, “Umuunu uyu siye Yesu, umuswamuve va Yosefu, ye túvadzeeliye ungʼina nu daadiye? Lino iilonga wuli ukutigila, ‘Ndíikile ukuhuma kukyanya’?”
43UYesu akuvahigaga iitigilaga, “Mutane ukwingʼulandza yuunye veene. 44Sikwali umuunu ye iikwadza ukwangu, ngana uDaada ye áanumile asinaa amukongola. Naane ndilamudzulubusa pa kigono ikya wusililo. 45Lúsimbiilwe mu Wusimbe wa vavidzi ukutigila, ‘UNguluvi alavawulanidza avaanu vonda.’#Isaya 54:13 Neke ye avedzaga ye akumupulikidza nu kwiwulanidza ukuhuma kwa Daada, uyo iikwadza ukwangu. 46Sikwali umuunu ye ámuweene uDaada, nda haamu, uyo ye iihuma kwa Nguluvi, ye mwene ye ámuweene uDaada.
47“Ndakyene ndikuvalongela ndiitigila, umuunu ye akuufuuwa, ali nu wuumi uwa mbeepali. 48Uneene gwe mukaate ugwa wuumi. 49Nde luvedze avakuhwenyo vaaliye imana ku lungʼalangʼala, napo kangi vaafuwe. 50Neke kangi apa pali mukaate úgwikile ukuhuma kukyanya. Wone umuunu aliye umukaate ugo, asilaafuwa nambi. 51Uneene gwe mukaate úgwikile ukuhuma kukyanya, ugukuvapeela avaanu uwuumi. Umuunu ye avedzaga ye iiliya umukaate ugo, iivedza nu wuumi uwa mbeepali. Umukaate ugu gwe muvili gwangu, gwe ndiitawula ku vaanu vonda ukutigila, vavedzage nu wuumi uwa mbeepali.”
52Neke aVayahudi vavangage ukwibeedza nu kwiwuudza vatigilage, “Umuunu uyu akutupeela wuli umuvili gwakwe ukuta tuliye?” 53UYesu akuvalongelaga iitigilaga, “Ndakyene ndikuvalongela ndiitigila, ngana simwiliya umuvili gwa Muswamuve va Muunu nu kunyuwa idanda yaakwe, musili nu wuumi uwa mbeepali mugati umwenyo. 54Umuunu ye avedzaga ye iiliya umuvili gwangu nu kunyuwa idanda yangu, ali nu wuumi uwa mbeepali, naane ndilamudzulubusa pa kigono ikya wusililo. 55Pakuva umuvili gwangu kye kyakuliya kya ndakyene, ni danda yangu kye kinyuwo kya ndakyene. 56Umuunu ye avedzaga ye iiliya umuvili gwangu nu kunyuwa idanda yangu, akwikala mugati umwangu, na yuune ndikwikala mugati umwakwe.
57“UDaada ye ali muumi áanumile, na yuune ndili muumi wugendela waakwe. Ndeeni, umuunu ye avedzaga ye iiliya umuvili gwangu, iivedza muumi wugendela wa neene. 58Uneene gwe mukaate úgwikile ukuhuma kukyanya. Umukaate ugo gusiihwanana ni mana ye vaaliye avakuhwesu, pakuva vaafuwe. Nda haamu, umuunu ye avedzaga ye iiliya umukaate ugo, alaavedza nu wuumi uwa mbeepali.”
59UYesu aalongile amadzwi ago pe aawulanidzaga mu luholanilo#6:59 Luholanilo Lole Uluholanilo ku Figanulo. ku Kapelenahumu.
Avanyigendwa voloofu viibihila ukumufuuwa uYesu
60Voloofu mu vanyigendwa vaakwe pe vaapuliike idzo viitigilaga, “Imbulanidzo idzi dziiviifya hiilo! Ye ani ye iisunga apulikidze?” 61UYesu aadzeeliye mu numbula yaakwe ukutigila, vakwibungula wiimila wa madzwi gaakwe, akuvawuudzaga iitigilaga, “Amadzwi ago gávaviifiidze? 62Lino, ngana mumuwone uMuswamuve va Muunu iikwinuka kukyanya kwe aali pamwandi, apo muhadza mwilonga kiki? 63UMubepo va Nguluvi ye mwene ye akuvapeela avaanu uwuumi uwa mbeepali,#Yohana 3:6 uludali lwa muunu lusiilima ewo. Amadzwi ge ndívalongiye giihuma kwa Mubepo va Nguluvi, kangi gakuvaleetela uwuumi uwa mbeepali. 64Neke kangi poovali avangi umwenyo avasiifuuwa.”
UYesu aalongile ewo, pakuva aludzeeliye ukuhuma pa kutala ukutigila ve va ani avasiifuuwa, kangi ye ani ye ahadza akumusutula. 65Suwe iiginaga ukulonga iitigilaga, “Lwe lwene lwe ndikuvalongela ndiitigila, sikwali umuunu ye iikwadza ukwangu, ngana uDaada asimulongwidze.”
66Ukuhuma umusika ugo, voloofu mu avo avamuniniilaga viipilukaga kumbele, viibihilaga ukumuniniila. 67Neke uYesu avawuudzage avanyigendwa vanyikyumi na vavili avo atigilage, “Ongo, na yuunye mwisaka ukuundeka ndeeni?” 68USimoni Petulo akumuhigaga iitigilaga, “Mutwave, tuhege tuhelele kwa ani? Uveeve yuuve ye uli nago amadzwi agakutupeela uwuumi uwa mbeepali. 69Uneefwe twifuuwa, kangi twidzeela ukutigila, uveeve ye Mwimike ukuhuma kwa Nguluvi.” 70Neke uYesu avalongelage atigilage, “Sindikavahaaguwe unyeenye vanyikyumi na vavili? Neke kangi umuyeenyo yumwinga iilongodzwa nu Setano.” 71UYesu apa amulongaga uYuda umuswamuve va Simoni Isikalyote. Uyo nde avedze aali yumwinga mu vanyigendwa vanyikyumi na vavili, ye mwene ye amusutuwe uYesu pambele.
S'ha seleccionat:
Yohana 6: BEZ
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022 Wycliffe Bible Translators, Inc. All rights reserved.