Yohana 18
18
1Ekiteta ama Isa akafuma na waanaloshwa wakwe, ekibocha lunyonyo lwa Kedron, ioho ngonde, akaingia uko na waanaloshwa wakwe.
2Akahatisiwa Yuda, ula emng’olie, handu, amu Isa misi mingi etongie uko na waanaloshwa wakwe.
3Amu ii Yuda, ekiuha njama na wandu wawo wakohani wabaha na Mafarisayo, akaza uko na kulangara, na viyaya, na nareta.
4Isa ekivitisiwa vyose vinembona akafuma akawawurra, Mwamwendani?
5Wakamtalwa, Isa Mnazareti. Akawawurra Isa, Nimi. Akaimuka Yuda, ula emng’olie hamwe nawo.
6Chwii ekiwawurra, Nimi, wakahunduka nyuma wakagwasi.
7Akawabujanyawa, Mwamwendani? Wakateta, Isa Mnazareti.
8Akatalwa Isa, Namburra ti nimi, mkinienda mi, shigheni awa watonge hawo.
9Kifike kiteto ekitetie, Wala uniingie simteshie mwe wawo.
10Siman Petro ekioka na muhandi akajuta, akambigha isinga lakwe mkohani mbaha akamchwa isikio la kuume, na izina lakwe isinga Malko.
11Isa akamburra Petro, Hunduia muhandi ghati ya mboni, ndemwa eniingie Apa nisinywe?
12Njama na mchili na wandu wawo Wayahudi wakamwuha Isa, wakamchunga,
13Wakamwete kuwoka hena Anna; niye mkwe Kayafa eokie mkohani mbaha mwaka ula.
14Niye Kayafa ula ewaingie mburi Wayahudi ti iwe mundu mwe ateke hena lwa wandu.
15Akamratera Isa Siman Petro, na mwanaloshwa ungi: mwanaloshwa ula ekitisiwiwa naye mkohani mbaha, akaingia hamwe na Isa ghati ya mbera yakwe mkohani mbaha.
16Petro akaimuka mbengeni some. Akafuma mwanaloshwa ula wa keri, etisiwiwa naye mkohani mbaha, akateta naye mrinda mbenge, akamwete Petro ndeni.
17Akamburra Petro mbora mrinda mbenge, Nawewa wa waanaloshwa wakwe mundu uu? Akateta, Hae.
18Wakaimuka masinga na wazoro, weareha moto wa makaa, ikoka mbeho, wakaoto moto; ghati ya awa na Petro akaimuka akaota moto.
19Mkohani mbaha akambujanya Isa hena vindu vya waanaloshwa wakwe na kichee chakwe.
20Akamtalwa Isa, Mi nitetie hena some na masanga, naloshe hose ghati ya masunagogi na ghati yahekalu, Wayahudi wose wetoraniaho, na hena kuweweda sitetie kiteto.
21Nikini unibujanya mi? Wabujanya wala wesikie nikini niwawurra, wala wetisiwa vindu niviteta.
22Ekiteta ama mzoro mwe eimuke afuhi akambigha luhi Isa, ekiteta, Umtalwa huwo mkohani mbaha?
23Akamtalwa Isa, Idje nateta kiwiwi uniwondjie mburi ya viwiwi, idje vyedi, nikini unibigha?
24Na Anna emwingijie echungwa hena Kayafa mkohani mbaha.
25Akaoka Siman Petro ekiimuka ekiota moto. Amu ii wakamburra, Nawe wa waanaloshwa wakwe? Akakana akateta, Hai.
26Akateta mwe wa masinga makwe mkohani mbaha, na mbare yakwe emchuie isikio Petro, Sikuwonie naye ghati ya ngonde?
27Akakanawa Petro: na ngeriahaichi nguruwi ikaiya.
28Wakamwete Isa ghati ya hena Kayafa mtano Pretorio; ikaoka heyawo kerre; na tewaingie wawo ghati ya Pretorio wesiwone maikwe, kake waile pasaka.
29Akafuma Pilato hawo, akateta, Kulinganya ani mwete wanga ya mundu uu.
30Wakatalwa Wayahudi, Idje teokie uu mundu eareha viwiwi, idje totukimwete hako.
31Akawawurra Pilato, Mumwuheni unwi, mchilieni na uchili wa kihenyu. Amu ii wakamburra Wayahudi, Tekiwe uswi kumkoma mundu.
32Kiteto chakwe Isa kifike ekiteta ekiwondja kufwa ani enefwa.
33Akaingiawa ghati ya Pretorio Pilato, akamwitanga Isa, akamburra, Niwe Mfumwa wa Wayahudi.
34Akatalwa Isa, Wateta ama wa kuoha kwako, au ni weingi wekuwurrie vindu vyangu.
35Akatalwa Pilato, Mi Myahudi? Mbare yako na wakohani wabaha wekuetie hangu; waarehakini?
36Akatalwa Isa, Ufumwa wangu si wa masanga ama, idje ufumwa wangu wa masanga ama idje wandu wangu wekibighana, nising’olwe hena Wayahudi, Kake ngeriaha ufumwa wangu si wa uko.
37Akamburra Pilato, Niwe mfumwa? Akatalwa Isa, Wateta ti mi mfumwa. Mi niwoniwe hena elwa ii, na hena elwa ii nizie masangeni, niwondje mburi ya kididi. Ula eokie wa kididi asikia ighonda langu.
38Akamburra Pilato, Kididi niyo kini? Ekiteta ama akafumawa hena Wayahudi, akawawurra, Siwona kutekwa hakwe pia;
39Niye huwo henyu nimjuuie mwe ghati ya Pasaka, mkundie nimjuuie Mfumwa wa Wayahudi?
40Wakang’ola ighonda ibaha wose, wekiteta, Si uu, nde Barabba. Naye Barabba msoka.
S'ha seleccionat:
Yohana 18: TAVETA
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.