Luka 19
19
1Akaingia Yeriko, akaoka ekivetia. 2Heokie na mundu eitangwe izina lakwe Zakayo, mbaha wa wauhia‐lushango, naye mmasi. 3Akaenda ambone Yesu, ni mundu ani; asiidime amu ya wandu kuoka weingi, amu mwenye eokie mundu mfuhi. 4Akarongora ekisara, akakwea wanga ya mkuu ambone; amu ekundie kuvetia nzia ila. 5Na ekinafike hala, Yesu akayoa wanga, akambona, akamburra, Zakayo, sea wangu; amu yoo yaniwe kuikaa nyumbeni hako. 6Akasea wangu akamtigha hena kuizihirwa. 7Na wekinawone wakanunuwikia wose wekiteta, Aingia kusowoka hakwe mundu mwenye ng’oki. 8Zakayo akaimuka, akamburra, Mzuri, mondo ma mali mangu, Mzuri, nawainga wakiwa: na kwakicha namlinganye mundu kiteto huwo, Namhunduia kandu kaanne. 9Yesu akamburra, Yoo lukio lwaza nyumbeni kunu, ekioka naye mwana wa Ibrahimu. 10Amu Mwana wa Adamu ezie aende akije kila kitekie.
11Wekisikia ama akaongeja akateta mfwanano, amu asongeria Yerusalemi, nawo wakaghhshijia chwii ufumwa wa Izuwa unewonwa. 12Huwo akaghamba, Mundu mbaha mwe ezokie kutonga isanga la hae, akuuhie ufumwa, na kuhunduka. 13Akawaitanga wazoro wakwe ikumi, akawainga mina ikumi ya fetha, akawawurra, Areheni zora mtano nineikanihunduke. 14Manoti wakamshishirwa, wakatuma wasu kumratera, wekiteta, Totukundie uu aitorie wanga yetu. 15Ikaoka ekinaoke euha ufumwa akahunduka, akaaghanya waitangwe hakwe wazoro wala ewaingie fetha, awone kutisiwa mbucha jawo ja zora. 16Wa kuwoka akaza akateta, Mzuri mina yako yabigha mbucha mina ikumi. 17Akamburra, Kyedi, Ee muzoro wedi, amu ya kuoka wa lwitikijo hena kindu kidongo, uoke na zinya wanga ya viongo ikumi. 18Akaza wa keri, ekiteta, Mina yako, Mzuri, yabigha mbucha mina sano. 19Akamburra naye, Uoke nawe wanga ya viongo visano. 20Ungi akaza akateta, Mzuri, yoa mina yako ii, niokie nayo igeriwe na kidame: 21amu nikuondoke hena kuoka we mundu udindie, wauha kila usikigera, wafindika kila usikihanda. 22Amburra, Hena itumbu lako ninekuchilia, muzoro mbiwi. Wanitisiwe mi ni mundu nidindie, nikiuha kila nisikigera, nifindika kila nisikihandie; 23nini tougera fetha yangu hena nyumba ya fetha, nikiza niiuhe na mbucha yakwe? Akawawurra wala weimuke afuhi, 24Muhieni mina yakwe mwe, mremwinge mwenye mina ikumi. 25(Wakamburra, Mzuri, ena mina ikumi) 26Namburra unywi, Ose ena mali eneingwa; naye esina, na mala ena eneuhiwa. 27Kake wala wazo wangu wesikundie nitorie wanga yawo, waeteni uko, muwakome msongorana wangu.
28Naye ekiidiwa kughamba ivi, akatonga, ekikwea kutonga Yerusalemi.
29Ikaoka ekinasongerie Betfage na Betania hena nduwi iitangwe ya Zeituni, akatuma waanalosha wakwe weri, 30ekighamba, Tongeni mtano kiongo kioho msongorana wenyu; na mukiingia munewona mwana wa njoe achungiwe, esimekwewa ni mundu; mchungueni mumwete. 31Na mundu ekimbujanya unywi, Nini kumchungua? ni huwo muneghamba, Mzuri emkundie. 32Wala wetumiwe wakatonga, wakawona sandu ewawurrie. 33Nawo wekioka wekimchungua mwana njoe, wenye wakawawurra, Mwamchunguyia kini mwana njoe uu? 34Wakaghamba, Mzuri emkundie. 35Wakamwetie Yesu: wakatandika suke jawo wanga ya mwana njoe, wakamkweja Yesu. 36Naye ekinaoke ekitonga wakaala suke jawo nzieni. 37Na ekinaoke ekisongeria, ghati ya kusea kwa nduwi ya Zeituni, matorano mose ma waanalosha wakawoka kuizihirwa na kumwisisisa Izuwa hena ighonda ibaha hena vindu vibaha vyose weviwonie, 38wekiteta, Etasiwe Mfumwa eza hena izina la Mzuri: luworo wanga, na uwedi wanga ya vyose. 39Wakamburra wandu Wafarisayo ghati ya matorano, Mlosha, uwabohie waanalosha wako. 40Akatalwa akaghamba, Namburra, wekihuja awa, mabwe meneloza.
41Naye ekinasongeria, akakiwona kiongo, 42akakiiyia, ekiteta, Kwakicha watisiwe mtano na we musi uu vindu vya luworo! kake ingeriaha vyawiswa mesoni hako. 43Amu misi inekuzia, maring’a mako wenekawakujengee lusarigho, wenekujunguluka, wenekuchunga mbai jose; 44Wenekughusha si, na waana wako ndeni hako; wasikushigie ibwe wanga ya ibwe; amu toutisiwe magheri ma kuyowa kwako.
45Akaingia hekaluni akawoka kuwang’ola wetaghi; 46ekiwawurra, Itamiwe, nyumba yangu ineoka nyumba ya kuomba; na unywi muiosha mbango ya wasoki.
47Akaoka ekilosha misi yose hekaluni; wakara wabaha, na watama, wakaenda wamteshe, nawo wabaha wa wandu: 48wasiwone kiteto cha kumwarehia, amu wandu wose weokie wegurane naye, wekimsikija.
S'ha seleccionat:
Luka 19: TAVETA
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.