Mark 15
15
Jisu Pilat Mhodzünu Vokecü
(Mat 27:1-2,11-14; Luk 23:1-5; Joh 18:12-38)
1Siro teisolie tse zievokezhakoe phichüko, thezhokepethako mu mechükehouu pete ze kerüchü. Sidi uko Jisu phalie di ze vo Pilat dzie nu shüwa. 2Sitse Pilat sie puo ki, “No Judako kediu me?” idi ketso. Sitse puo sie, “N kepuu zo.” 3Sitse zievokezhako mha kekra se puo pejota. 4Siro Pilat puo ketso la di, “No mhapuorei pu lho me? Harie mia kiderei n pejo tha mu?” sishü. 5Derei Jisu mhapuorei pu mota, süla Pilat bu puo ngota.
Jisu Gouwanu Pukeshü
(Mat 27:15-26; Luk 23:13-25; Joh 18:39—19:16)
6Siro puoe thenyiu teiki ukoe chakeshü kediemia puo khashü uko tsüya. 7Süki Barabas ükecü puo mia ze sorkari petsou sie di mia dukhriwakecüu rei kedie chü ba. 8Süki themia kro-u vor di Pilat ki thiedzü zho tuoi puo ki cha. 9Sitse puo uko die kela di, “Nieko a bu Judako kediu khashüwa nyüya me?” si. 10Kekreilamonyü zievokezhako puo ngu urokecü la puo khapie puo dzie nu shüükecü puo silieketa la. 11Derei zievokezhako themia kro-u pfü kerhüshüwata di Pilat bu Barabas khashü uko tsüwanu chata. 12Sitse Pilat uko ki, “Siro a bu nieko puo üse Judako kediu üyakezhau pie kedipuo chütuo ga?” 13Sitse uko shiekhoui la di, “Puo gouwalie,” ita. 14Süla Pilat sie, “Kita di, puo kekrükecü mhatho kikecüpuo chüwa ga?” idi uko ketso. Derei uko shie u rhiechükuo di, “Puo gouwacie!” ita. 15Süla Pilat themia kro-u nei chü nyüta, sidi Barabas khapie uko tsüwa; mu Jisu vüwa di puo gouwanu di khapie uko dzie nu shüwata.
Chüpahiko Jisu pie Kethekrekecü
(Mat 27:27-31; Joh 19:2-3)
16Süsie Chüpahiko Jisu ze kedikiu kitiezha nu leta (süue ahng kiu); sidi uko pete kie kengulie. 17Sidi uko puo bu pfhe meriemegekecü selie; mu zohu kechiepie tsüre puo chülie di süu pie puo tsü gei shü. 18Süsie uko puo kelu di sie, “Judako kediu, rhei kechau chücie!” sita. 19Siro uko kethe puo pie puo tsü vü, puo mho mhitsie, tsiu khoutoulie di puo rüsuo. 20Siro puo pie kethekrekewa sie, puo geinu pfhe meriemegekecüu rhuowa di puo pfheneiko pie puo gei shü lashü. Süsie uko puo gouwatuo üdi puo ze vota.
Krus geinu Jisu Goukewa
(Mat 27:32-44; Luk 23:26-43; Joh 19:17-27)
21Süki ukoe rüna nunu Kurinmia Alexander mu Rufu unie puou Simon, kemvü chüpie puo bu Jisu krus pie voketuo la zelie. 22Sidi uko puo ze Golgatha (puoca Tsütsoru) ükecü thechüu nu vorlie. 23Süsie uko zu mu mür kereikecü pie puo tsü; derei puo süu krie mvüta. 24Süsie uko puo gouwata, mu suomia puo pfhenei kiu ngulielietuo shi idi süko dape di kezalie.
25Siro uko puo goukewa ki khise keba thepfüta. 26Siro puo pejokecü die thupiekezha hamhie: “Judamia Kediu,” si. 27Siro uko sekecümia kenie, mia puo puo zatsa mu mia puo puo vitsa idi pie puo sa gou. 28Hakemhie di, “Puo phrüpie thezho kevarhuoko saliete,” idi thupie ketuo kethodieu bu tseilie. 29Siro themia kekhokeke pete tsüge puo rhie di, “Yha, no rüsuokiu bie pesuowa di zha se nu chü lashüketuou sü, 30n thuo n kelalie di krus geinu kerliecie!” sita. 31Sümhie zievokezhako mu thezhokepethako rei puo krenyü di huoniehuo ki, “Puo kekreimia we kelalie, derei puo thuo puo kelalie kenjüte ha! 32Khrista, Israelko kediu bu krus geinu kerliecie, siro hie rei pelelietuo,” ita. Siro Jisu sa goupiekezhanie rei puo kengata.
Jisu Se
(Mat 27:45-56; Luk 23:44-49; Joh 19:28-30)
33Siro keba kerekenie nu vo keba se ketso kijü pete zeibouita. 34Mu keba se ki Jisu melie shiekhoui di, “Eloi, Eloi, lama sabakthani!” puoca “A Kepenuopfü, a Kepenuopfü, no kiüdi a khawata ga?” sishü. 35Siro süki ketha mia huo puo pfhe si di, “Harie, puo Elija kiezhie” si. 36Süki mia puo ta vo sponj puo pie kekhrodzü selie di kethe puo tie nunu pie kho puo bu krienu khapie puo tsü di sie, “Tsiehieluo, Elija vor krus geinu puo pie kershütuo mo lho shi meho tha khe,” sita. 37Süsie Jisu melie shiekhouishü di puo ruopfü khashüwata. 38Mu süki rüsuokiu nu pfhe lhapiekezhau puo tsüle nunu rürha tsu puo phi tso di kenie chüta. 39Siro chüpahi kriemhokezhau puo mhodzüki tha di puo kimhie di siate shicü ngu tse, puo sie, “Themia hau Ukepenuopfü Nuou ketho zo!” sita.
40Süki thenumia huo rei kepecie nu meho tha; süko donu Maria Magdalapfü, Jakob nhicuu mu Joses unie zuopfü Maria, tsiu Salomi uko rei tha. 41Ukoe puo Galil nu bakecü ki puo siemedzi mu puo lie chü; siro thenumia kekrei kekra Jerusalem nunu puo ze kekhoko rei tuo.
Jisu pie Khrukewa
(Mat 27:57-61; Luk 23:50-56; Joh 19:38-42)
42Süsie thevatie ki, mu sünhie mha kesekecü zhau, sabat mhodzü nhiekecü la, 43siro Ukepenuopfü kedi pfhetuoyakezha Josef ükecü Arimathiamia puo vor; puo pehüko donu therhukepfümia puo; puo thepfu se zo di Pilat ki vo Jisu mo-u cha. 44Siro Pilat puo siata ücü si di puo ngota, süla kriemhokezhau kie ze vor di Jisu siaketa puotei chata mo kishicü ketso. 45Siro puo kriemhokezhau ki puo siaketa silie tse, themo-u pie Josef tsüwanushüwa. 46Sitse Josef linen pfhe khrülie, mu themo-u lhouse kerlie, di linen pfheu pie kezülie, sidi pie vo tsiekrie nunu mekhru hopie kezhüu nu khruwa. Sidi puo ketsie kezha puo ketoupie mekhru kikhau khawa. 47Siro Maria Magdalapfü mu Joses-nuo zuo Maria unie puo pie kezhü chüu ngu.
S'ha seleccionat:
Mark 15: ANBRBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Bible Society of India
© 2023, Used by permission. All rights reserved. More