युहान्ना 10
10
लाखुरिया कालाउ भेडागेलाइको निङपिका
1येसु दोअ्हि, जातिङ भारि का नेलाइहेङ दोअ्खा, हासु बुङ भेडाको ग्वालेङको फिनुसो लिता मादुल्खे कालाउ भेनेङ पाहासो ताङतेङ दुल्खे पानु उङको चोर कालाउ डाकु दोङ। 2कालाउ भेडाको लाखुरिया चाहि फिनुसो लिता दुल्खे। 3पाले वासेहेङ फिनु हिअ्पिखे। कालाउ भेडागेलाइ वाको गाला नाल्खे, कालाउ लाखुरिया ताइको भेडागेलाइको मिङ ह्रुतेङ काइखे, कालाउ भेडागेलाइहेङ ग्वालेङसो गोह्राइतेङ बाहार ओल्लेपाखे। 4लाखुरिया ताइको गोताङ भेडागेलाइ बाहार ओल्लेपाखे कालाउ वा झाराङको लाङ-लाङ हानिखे कालाउ भेडागेलाइ वाकोङ न्हु-न्हु हानिखे हाइपालिपानु इम्बालाइ वाको गाला नाल्खे। 5लाखुरिया बाहेक भेडागेलाइ आरु हासु बुङ काइलाउ वाको लेसारा मापिताइखे भरु वाको गाला मानाल्नाङ भेडागेलाइ थितेङ खाअ्खे। 6येसु इदोइ काथा निङपितेङ दोअ्का हिघाहि। कालाउ हिङकालाइ वाको दोअ्का काथाको माने माबुझिखे।
येसु आसल लाखुरिया
7येसु आरोङ इम्बालाइहेङ दोअ्हि जातिङ भारि का नेलाइहेङ दोअ्खा, का भेडाको ग्वालेङता दुल्का फिनु भाइका हिघा। 8जाइ का खान्तेङ लाम्फा लोहि, इम्बालाइ झाराङ चोर कालाउ डाकागेलाइ हिघाहि कालाउ काङको भेडागेलाइ इम्बालाइहेङ मारेसिहि। 9का भेडाको ग्वालेङता दुल्का फिनु भाइका दोङ हिघा, काङकोसो लिता लोकालाइहेङ परमेस्वर दोङ बान्चि पावा। इम्बालाइ लिता कालाउ बाहार हानिका जेनावा कालाउ चाअ्लि बुङ निनाङ।
10चोरते भेडागेलाइहेङ खुलि, सेअ्लि कालाउ हान्ति पालि दोअ्तेङ खिनिङ लोखे। कालाउ का चाहि इम्बालाइहेङ प्रसस्त जिबन निनाको दोअ्तेङ लोका हिघा। 11का आसल लाखुरिया दोङ हिघा। आसल लाखुरिया ताइको भेडाको भाअ्सिङ ताइको इच्छाहोइ सिपिखे। 12दोरम्हाको चाकारिया जेलाउ खुवाँहेङ लोकाताङ पाका तिङतेङ वा खाअ्तावा। वा भेडागेलाइहेङ लाअ्पियावा हाइपालिपानु वा इम्बालाइको लाखुरिया माको कालाउ भेडागेलाइ वाको माको। ओदोङ भाअ्सिङ खुवाँ भेडागेलाइको हुदा ह्रुता झामिरिखे कालाउ आउलिगिल पापिखे। 13हाइपालिपानु वा दोरम्हामाता ताअ्का चाकारिया खिनिङ हि। ओदोङ भाअ्सिङ वा खाअ्खे कालाउ वा भेडागेलाइहेङ हाइ दोङ मारेसिखे।
14-15का आसल लाखुरिया हिघा। जेसापा आबा कासेहेङ कालाउ का आबाहेङ नाल्का भाइपा, का काङको भेडागेलाइहेङ नाल्खा कालाउ काङको भेडागेलाइ बुङ कासेहेङ नाल्खे। कालाउ का भेडागेलाइको भाअ्सिङ सिलि बुङ तियार हिघा।
16“काङको आरोङ बुङ भेडा हि, जाइ इदोइ ग्वालेङको माको। इम्बालाइहेङ बुङ का चुमालि गोइका हि, कालाउ इम्बालाइ काङको गाला नालावा, कालाउ इम्बालाइ एनोङ दोङ हुल जेङतेङ एनोङ लाखुरिया जेनावा। 17काङको आबा कासेहेङ मायारु पाखे, हाइपालिपानु का ताइको इच्छाहोइ सियाङका कालाउकि का आरोङ सिन्हुलि द्वाको। 18हासु बुङ काङकोसो काङको जिबन ह्रुलि मादाङ, कालाउ का ताइको इच्छासो सियाङका। कालाउ काङको ताइको जिबन पिलि खाबारा का दोफाङ हि, कालाउ आरोङ ह्रुलि खाबारा बुङ का दोफाङ हि, हाइपालिपानु इङको ओदोङ आग्या हि जेदोङ का काङको आबासो निङका हिघा।”
19या काथा हिङतेङ यहुदि आगुवागेलाइको माझाता आरोङ खेङन्हाहि। 20इम्बालाइ मध्येसो हेन्जाङ द्याङगेलाइ दोअ्हि, यासेहेङ भुत-आत्मा धेल्का हि। कालाउ या पागाला जेङका हि, नेलाइ वाको काथा माहिङसु।
21कालाउ आरु द्याङगेलाइ दोअ्हि, भुत-आत्मा धेल्का द्याङको काथा इस्का माजेङखे। एनोङ भुत-आत्मा हेलाउ बुङ एमि कान्हाँ द्याङहेङ एल्पालि मादोअ्खे।
यहुदि आगुवागेलाइ खाङधुरि मापाका
22यरुसेलेम सहरता मुन्दिर समरपनको पार्बा हिघाहि। इदोइ चुङ दिनाको बेला हिघाहि। 23येसु सोलोमोनको बारान्दाता घुराइ गिल्घाहि जेदोङ मुन्दिरको सालेङको लिता हिघाहि। 24कालाउ यहुदि आगुवागेलाइ वाको कोरपाहाङ जोम्तेङ दोअ्हि, नाअ् केलाइहेङ हेन्जाङ सोमोइसोङ दोधारता ताअ्तेङ हिना। एला केलाइहेङ झालाफालापा दोअ् हाइ नाअ् ख्रिस्ट दोङ हिना?
25येसु इम्बालाइहेङ उत्तारा पिहि, का नेलाइहेङ दोअ्लि दोअ्का हिघा, कालाउ नेलाइ खाङधुरि मापा सुखेना। काङको आबाको खाबारा निङतेङ पाका कामगेलाइ दोङ काङको साक्सि हि। 26कालाउ नेलाइ खाङधुरि मापा सुखेना, हाइपालिपानु, नेलाइ काङको भेडा मध्येसो माको।
27जेसापा भेडागेलाइ ताइको सत्ये लाखुरियाको गाला नाल्खे, एन्साङ पातेङ काङको द्याङगेलाइ काङको दोअ्का काथाता ध्यान पिखे। का इम्बालाइहेङ नाल्खा, कालाउ इम्बालाइ काङको चात्यागेलाइ जेङलि दोका हि। 28इम्बालाइहेङ का आनान्त जिबन पिखा। कालाउ इम्बालाइ हेलाउ बुङ नास माजेनाङ, कालाउ हासु बुङ इम्बालाइहेङ काङकोसो घिङतेङ चुम्पुलि माद्वाङ। 29काङको आबा इङको भेडागेलाइ कासेहेङ पिका हि, वा झाराङ खाङतेङ माहान हि, कालाउ काङको आबासो हासु बुङ इम्बालाइहेङ घिङतेङ माचुम्पाङ। 30आबा कालाउ का एनोङ दोङ हिनाहि।
31यहुदि आगुवागेलाइ आरोङ येसुहेङ सेअ्लिको भाअ्सिङ उन्ठुइ कुराइहि। 32कालाउ येसु इम्बालाइहेङ दोअ्हि, “का नेलाइहेङ काङको आबासो हेन्जाङ आसल काम तिम्पाघा, इङको मध्येसो हिदोइ कामको भाअ्सिङ नेलाइ कासेहेङ उन्ठुइ तोअ्लि खाङसुखेना?”
33यहुदि आगुवागेलाइ येसुहेङ उत्तारा पिहि, आसल कामको भाअ्सिङ केलाइ नासेहेङ उन्ठुइ तोअ्लि खाङका माको, कालाउ नाअ् परमेस्वरहेङ मन्दा माताका काथा पान्हा ओदोङ भाअ्सिङ उन्ठुइ तोअ्लि खाङका। नाअ् द्याङ जेङतेङ बुङ ताइमिहेङ परमेस्वर जेङलि खाङखेना।
34येसु इम्बालाइहेङ उत्तारा पिहि, धर्मसास्तर दोअ्खे कि, परमेस्वर ताइको द्याङगेलाइको आगुवागेलाइ दोअ्का हिघाहि कि नेलाइ इस्वर दोङ हिसुना। 35-36कालाउ नेलाइ गिसुखेना कि धर्मसास्तरहेङ बदल्लि मादोअ्खे। ओदोङ भाअ्सिङ परमेस्वर ताइको द्याङको आगुवागेलाइहेङ इस्वर दोअ्हि पानु, जेलाउ का या दोअ्खा कि, का परमेस्वरको चान दोङ दोअ्लाउ कालाउ नेलाइ हाइ पालि नाअ् परमेस्वरहेङ मन्दा माताका दोअ्सु घासुखेना। का ओदोङ दोङ हिघा जाइहेङ आबा खेङहि कालाउ कासेहेङ सुमिङता दिङगिल्हि। 37जेसापा का आबाको काम पाका मान्थुघा पानु, कासेहेङ खाङधुरि मापासु। 38कालाउ जेसापा का आबाको काम पाखा कालाउ बुङ नेलाइ कासेहेङ खाङधुरि मापासुन्हा पानु इदोइ कामगेलाइ ह्रुता खाङधुरि पासु, कालाउ नेलाइ थाहा निङलि दोस्वाना कालाउ बुझिस्वाना, कि आबा काङकोता हि, कालाउ का आबा दोफा हिघा। 39इम्बालाइ आरोङ वासेहेङ रिम्लि भोहि, कालाउ वा इम्बालाइसो दुरे हानिहि।
40येसु आरोङ यर्दन झोराको ओदोइ पार इङको थामेता हानिहि, जेता युहान्ना लाम्फा बप्तिस्ता पिका पिघाहि, कालाउ वा इन्ताङ हि। 41हेन्जाङ द्याङगेलाइ वाकोता लोहि, कालाउ इम्बालाइ दोअ्हि, “युहान्ना हिदोइ बुङ भारभुसाइका चिन्हागेलाइ मापाहि, कालाउ वा येसुको बारेता दोअ्का काथागेलाइ सत्ये जेङहि।” 42कालाउ इन्ता हेन्जाङ द्याङगेलाइ येसु ह्रुता खाङधुरि पाहि।
S'ha seleccionat:
युहान्ना 10: DHINT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Dhimal New Testament, by The Love Fellowship is licensed under Creative Commons Attribution-ShareAlike 4.0 License.