युहान्ना 11
11
लाजरस सिका
1बेथानिया देराता लाजरस मिङ पाका एमि द्याङ मासाधेका हिघाहि, इङकोङ देराता मरियम कालाउ वाको बाइ मार्था हिघाहि। 2उङको ओदोङ मरियम हि जाइ न्हुसो हानितेङ प्रभुको खोकोइता जाङका आत्तर हुपितेङ ताइकोङ पुसुङहोइ योपिका हिघाहि। याकोङ ओने लाजरस मासाधेका हिघाहि। 3मार्था कालाउ मरियम प्रभु जाइहेङ नाअ् मायारु पाखेना, वा मासाधेका हि, दोअ्का बानाल येसुकोता पिगिल्हि।
4कालाउ इदोइ हिङतेङ येसु दोअ्हि, “इदोइ मासाधिकाहोइ सिका माचुमाङ, कालाउ या परमेस्वरको महिमाको भाअ्सिङ हि, कालाउकि इदोइ पाहासो दोङ का परमेस्वरको चानको महिमा ज्याको।” 5येसु मार्था, मरियम कालाउ वाको ओने लाजरसहेङ मायारु पाघाहि। 6कालाउ बुङ लाजरस मासाधिका हि दोअ्का हिङतेङ येसु जेता हिघाहि आरोङ झन न्हेनि थेकापा इन्ताङ हि।
7न्हेनि न्हुसो येसु चात्यागेलाइहेङ दोअ्हि, एला, केलाइ आरोङ यहुदिया जिल्लाता घुरितेङ हानाइने यहुदि जिल्लाको बेथानिया देराता लाजरस हिघाहि।
8चात्यागेलाइ वासेहेङ दोअ्हि, “गुरु ज्यु एनाङ खिनिङ यहुदि आगुवागेलाइ नासेहेङ उन्ठुइहोइ तोअ्तेङ सेअ्लि खाङघाहि, कालाउ हाइ आरोङ नाअ् इन्ताङ हानिलि भोअ्खेना?”
9येसु उत्तारा पिहि, “हाइ दिन्ता तेन्हे घान्टा मान्थुखेरो? कालाउ दिन्ता हिगिल्का द्याङगेलाइ माबोखेखे, हाइपालिपानु वा इदोइ सुमिङको सान्हेको फाइसालामका तिङखे। 10कालाउ न्हिसिन्ता हिगिल्कालाइ बोअ्खेखे, हाइपालिपानु उङको द्याङगेलाइ दोफा हाइ दोङ फाइसालामका मान्थुखे।”
11इङको न्हुसो येसु इम्बालाइहेङ दोअ्हि, “केलाइको सानाइति लाजरस निन्धाता परिका हि, कालाउ उङकोहेङ जागिपालि का इन्ता हानाङका।”
12चात्यागेलाइ येसुहेङ दोअ्हि, “प्रभु, उङको निन्धाता परिका हि पानु उङको एलाङ।” 13येसु लाजरसको सिका बिसोइता दोअ्का हिघाहि, कालाउ चात्यागेलाइ चाहि लाजरस जातिङकोङ जिम्का खिनिङ हि दोअ्का फोम पाका हिघाहि।
14ओदोङ भाअ्सिङ येसु इम्बालाइहेङ झालाफालापा दोअ्पिहि, “लाजरस सिका हि। 15नेलाइ खाङधुरि पासु दोअ्तेङ नेलाइको भाअ्सिङ का इन्ता माहिकाता खुसि हिघा। हाइ दोङ जेङलाउ बुङ केलाइ वाकोता हानाइने।”
16कालाउ चात्यागेलाइ मध्ये दिदुमस दोअ्का थोमा बुङ ताइको सानाइति चात्यागेलाइहेङ दोअ्हि, “ते केलाइ बुङ हानाइने, कालाउ वा दोफा सियाइने।”
येसु सिन्हुका कालाउ जिबन हि
17जेलाउ येसु कालाउ वाको चात्यागेलाइ बेथानिया देराता लोहि, कालाउ लाजरसहेङ तोम्ता लिका द्यानि जेङका थाहा गिहि। 18बेथानिया देरा यरुसेलेम सहरसो लगभग सुम किलो मिटर दुरे हिघाहि। 19हेन्जाङ यहुदि द्याङगेलाइ मार्था कालाउ मरियमकोता वाको सिका ओनेको बिसोइता इम्बालाइहेङ सान्त्वाना पिलि लोका हिघाहि। 20जेलाउ येसु लोकाताङ पाका हिघाहि दोअ्का हिङतेङ मार्था हानिहि कालाउ वासेहेङ दामाता दुसुहि। कालाउ मरियम चाहि साअ्ताङ योम्तेङ हि।
21कालाउ मार्था येसुहेङ दोअ्हि, “प्रभु, नाअ् इता हिलि गोइधाना कालाउ काङको ओने मासिधाङ। 22कालाउ एला बुङ का गिखा, नाअ् जेदोङ परमेस्वर दोफा ह्रेखेना, परमेस्वर नासेहेङ पिखे।”
23येसु मार्थाहेङ दोअ्हि, “नाङको ओने आरोङ सिन्हुताङ।”
24मार्था येसुहेङ दोअ्हि, “का गिखा, लाजरस इङको न्यायको दिनाता जेलाउ झाराङ सिकासो सिन्हुतेङ ल्होकाङ कालाउ वा बुङ आरोङ सिन्हुताङ।”
25येसु मार्थाहेङ दोअ्हि, “का ओदोङ हिघा जाइ सिका द्याङगेलाइहेङ आरोङ जिबन पिखे। जाइ कासेहेङ खाङधुरि पाखे, जेसापा वा सिलाउ बुङ आरोङ सिन्हुताङ। 26कालाउ जाइ कासेहेङ खाङधुरि पातेङ बान्चिखे वा आरोङ हेलाउ बुङ मास्याङ, हाइ नाअ् या काथाता खाङधुरि पाना?”
27मार्था येसुहेङ दोअ्हि, “नेउ प्रभु, का खाङधुरि पाखा, नाअ् सुमिङता लोका परमेस्वरको चान ख्रिस्ट हिना।”
लाजरस सिन्हुहि
28एसा दोअ्तेङ मार्था हानिहि, कालाउ ताइको ओने मरियमहेङ सुतुक्क काइतेङ दोअ्हि, “गुरु ज्यु लोहोइ, कालाउ नासेहेङ काइखे।” 29इदोइ हिङतेङ मरियम जुरुक्पा ल्होतेङ येसुहेङ भेतिलि हानिहि। 30इङको बेला थेकापा येसु देरासो बाहार हिघाहि, कालाउ वा इङको थामेता हिघाहि जेता मार्था वासेहेङ दुसुका हिघाहि। 31साअ्ता मरियमहेङ सान्त्वाना पिलि लोका यहुदिगेलाइ मरियम जुरुक्पा ल्होतेङ बाहार हानिका तिङतेङ, वा इङको तोम्ता खार्हि हानिकाबे दोअ्तेङ वाको न्हु-न्हु हानिहि।
32जेलाउ मरियम येसु हिका थामेता थुकाल्हाहि कालाउ वासेहेङ तिङहि, कालाउ एसा दोकाताङ वा येसुको खोकोइता तुघुरतेङ दोअ्हि, हे प्रभु, नाअ् इता हिनुते काङको ओने मासिधाङ।
33जेलाउ येसु मरियमहेङ कालाउ वाको दोफा लोका यहुदिगेलाइहेङ बुङ खार्तेङ हिका तिङतेङ, येसु दायाहोइ पोङघातेङ दुखित जेङहि। 34येसु इम्बालाइहेङ हिअ्हि, नेलाइ लाजरसहेङ हिदोइ थामेता ताअ्का हिसुना, इम्बालाइ वासेहेङ दोअ्हि, “प्रभु, लोतेङ खाङ।”
35कालाउ येसु खार्हि। 36ओदोङ भाअ्सिङ यहुदिगेलाइ दोअ्हि, “खाङ, वा लाजरसहेङ हेथे मायारु पाघाखे।”
37कालाउ आधिमि दोअ्हि, वा दोङ कान्हाँहेङ एल्पाहि। वा लाजरसहेङ बुङ सिकासो बान्चिपालि दोअ्धावा।
38कालाउ येसु आरोङ मेनाङ दुखित जेङहि कालाउ तोम्ता हानिहि। इङको एनोङ घोपा हिघाहि कालाउ इङको को नुइ एनोङ बार्का उन्ठुइहोइ थुम्का हिघाहि। 39येसु दोअ्हि, “उन्ठुइ लापासु।” सिका द्याङको बाइ मार्था वासेहेङ दोअ्हि, हे प्रभु, एला थेकापा ते न्हाम्लि दोहोइ वाला हाइपालिपानु उङको सिका द्यानि जेङहोइ।
40येसु उङकोहेङ दोअ्हि, “हाइ का नासेहेङ दोअ्का माको, नाअ् खाङधुरि पान्हा पानु परमेस्वरको महिमा तिनाना?”
41कालाउ इम्बालाइ उन्ठुइ लाअ्पाहि, कालाउ येसु ह्रुता म्हाल्तेङ दोअ्हि, “हे आबा, का नासेहेङ धन्यबाद पिखा, हाइपालिपानु नाअ् काङको बिन्ति हिङना। 42का गिघाखा कि नाअ् काङको बिन्ति जेलाउ बुङ हिङखेना। कालाउ इता जाअ्तेङ हिका द्याङगेलाइ खाङधुरि पाको दोअ्तेङ का दोङ बार्का गालाहोइ दोअ्घा, कि नाअ् कासेहेङ दिङगिल्का हिना।”
43कालाउ इदोइ काथा दोअ्लि दोअ्तेङ न्हुसो येसु बार्का गालासो काइहि, “लाजरस, बाहार ओल्लेतेङ लौउ।” 44कालाउ लाजरस खुर-खोकोइ धाबाहोइ जिङन्हाकाङ कालाउ वाको ह्राइ धाबाहोइ#11:44 यहुदिगेलाइ सिका जिउहेङ लुन्धाइलिको भाअ्सिङ एनोङ ह्रिङका धाबा कालाउ ह्राइहेङ लुन्धाइलिको भाअ्सिङ भेनेङ धाबा लागाइघाहि। लुन्धाइनाकाङ बाहार ओल्लेतेङ लोहि। कालाउ येसु इम्बालाइहेङ दोअ्हि, “इङको को धाबा खाइपिसु, कालाउ उङकोहेङ हानिलि पिसु।”
येसुहेङ सेअ्लिको भाअ्सिङ दाउ
(मति 26:1-5; मर्कु 14:1-2; लुक 22:1-2)
45कालाउ मरियमहेङ भेतिलि लोका हेन्जाङ यहुदिगेलाइ येसुको पाका काम तिङतेङ वासेहेङ खाङधुरि पाहि। 46कालाउ इम्बालाइसो आधिमि द्याङ फारिसिगेलाइकोता हानिहि, कालाउ येसुको पाका कामगेलाइको बारेता दोअ्पिहि।
47कालाउ मुलि पुजारिगेलाइ कालाउ फारिसिगेलाइ माहासभाको सदस्यगेलाइहेङ काइतेङ उङकोहेङ दोअ्हि, “एला केलाइ हाइपाङ? इदोइ द्याङते हेन्जाङ भारभुसाइका चिन्हागेलाइ पातेङ हिखे।” 48जेसापा केलाइ वासेहेङ एलाङ मारोकिहे पानु, झाराङ द्याङगेलाइ वासेहेङ ख्रिस्टको दोअ्तेङ खाङधुरि पावा कालाउ रोमिगेलाइ लोतेङ केलाइको मुन्दिर कालाउ केलाइको द्याङगेलाइ नासा पावा।
49कालाउ माहासभाको सदस्यगेलाइ मध्ये एमि, कैयाफा मिङ हिका द्याङ हिघाहि। जाइ इङको बासारको प्राधान पुजारि हिघाहि। वा इम्बालाइहेङ दोअ्हि, “नेलाइ हाइ दोङ मागिसुखेना! 50केलाइको गोताङ द्याङगेलाइ नास जेङका खान्तेङते भरु केलाइ झाराङको भाअ्सिङ एमि द्याङ खिनिङ सिलि रेम्का हि दोअ्का काथा नेलाइ माबुझिसुखेना?”
51इदोइ काथा येसु ताइ पाहा दोअ्का मान्थुघाहि, इङको बासारको प्राधान पुजारि जेङकानाङ येसु इस्राएललिगेलाइको भाअ्सिङ सियाङ दोअ्का आगमबानि पाका हिघाहि। 52कालाउ इस्राएललिगेलाइको भाअ्सिङ खिनिङ माको कालाउ इदोइ सुमिङता आउलि गिल्का परमेस्वरको आरु सान्तानगेलाइहेङ ए दोफाङ जोम्पालि येसु सियाङ दोअ्का हिघाहि। 53ओदोङ भाअ्सिङ इङको दिनासो यहुदि आगुवागेलाइ येसुहेङ सेअ्लि योजाना पालि तेङहि।
54ओदोङ भाअ्सिङ येसु आरोङ यहुदिगेलाइको माझाता भाइ-भाइपा माहिगिल्हि। कालाउ वा इन्तासो चाका-मान्दा थामेको भेरपाङ हिका एफ्राइम दोअ्का देराता हानिहि, कालाउ इन्ताङ ताइको चात्यागेलाइ दोफा हि।
55यहुदिगेलाइको निस्तार पार्बाको सोमोइ भेरपाङ लोलि तोम्का हिघाहि, कालाउ हेन्जाङ द्याङगेलाइ पार्बा लोका खाङतेङ लाम्फा दोङ ता-ताइमिहेङ इम्बालाइको मुन्धुम आन्सार सुद्द बानाइलि यरुसेलेम मुन्दिरता हानिहि। 56इम्बालाइ येसु ल्वाङ दोअ्तेङ दामा खाङतेङ हिघाहि। मुन्दिरता जोम्लाउ इम्बालाइ ता-ताइमिता एसा दोअ्लि तेङहि, “नाङको हाइ बिचार हि? हाइ वा पार्बाता ल्वाङ कि माल्वाङ?” 57कालाउ मुलि पुजारिगेलाइ कालाउ फारिसिगेलाइ आग्या पिका हिघाखे कि जेसापा हासु बुङ येसु हिसो हि दोअ्तेङ थाहा गिहेपानु, केलाइकोता बानाल चुमालि गोइस्वाना कालाउकि केलाइ येसुहेङ रिम्लि द्वाङ।
S'ha seleccionat:
युहान्ना 11: DHINT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Dhimal New Testament, by The Love Fellowship is licensed under Creative Commons Attribution-ShareAlike 4.0 License.