Jean 7
7
Baana banguji baJesus basamamuvayila yitu
1Amana manovioga Jesus amalinganga o yiari yiGalilee mu mbari baJuif baJudee bamarombanga umuboka. 2Kabogu feta jibaJuif, diwendi rie: feta jimasamba, jimaba bebeli. 3Baana banguji baJesus bamamutsingula rie: Gusuga vava wenda o Judee yiri badukitsi bagu bolaba bisalu abi guisali. 4Mutu aguirondi ujabunu agesueyi bisalu biandi. Kabogu ndeʼ aguisali bisalu bineni kelasa ombu batu.
5(Diwendi rie: baana banguji bandi basamamuvayila yitu.) 6Jesus amabatsingula rie: Diweru diami disakatola tumba ombu genu diweru la diweru. 7Batu bageduvini tumba bepini mu mbari nyivosingi yiri mambu mogu magaa maboti. 8Jenu wendanu o feta eni menu ngowenda mu mbari diweru diami disakatola. 9Anomana ubatsingula nana jandi amasiala o Galilee.
Jesus uwenda ewendi o feta
10Baana banguji baJesus banowenda o feta Jesus amabaduka o musuega. 11BaJuif bamamurombanga mu temu feta na bamawivulanga rie: Jandi aka?
12Bamamuvosilanga puela mambu. Bamosi rie: Muvayitsi maboti. Basusu rie: Nesi, mudunsitsi avu. 13Tumba bamavosa motsu o musuega mu mbari bamalabila baJuif goma.
14Ava gari feta Jesus amakota o Ndagu Nsambina amabanda ulonsa. 15BaJuif bamakambulu na bamawivula rie: Tsie ejabili Bisonu, jandi agusamakota o yikola?
16Jesus amabagabusila rie: Malongi mami mageruyili ombu meʼ beni tumba ombu Nsambi omansindiga. 17Mutu uotsu oyivayi duganu duNsambi ejabi yeri malongi mami meruyili ombu Nsambi vo mavu amami. 18Jandi oyivosi amandi erombi bundumba buandi. Jandi oyirombi bundumba bujandi omamusindiga jandi guna evosi ngensa na ndunsulu tsigaa nandi. 19Moise asamaduvega migaga? Dibandu yi dugemikelisili? Dibandu yi duirondili umboka?
20Bamawagula rie: Ndeʼ guna yinyunyi yibi. Anyi erondi uguboka?
21Jesus amabagabusila rie: Nyimasala mua yisalu yimosi na jenu botsu dumakambulu. 22Moise amadulonsa durebu (adugeruyili ombu Moise tumba ombu bivunda bienu) na jenu duirebi dibaala yilumbu yitsona. 23Pa dibaala amarebu yilumbu yitsona yiri mugaga uMoise udugusu dibandu yi jenu duinyoyili mu mbari nyimabelusa mutu yilumbu yitsona? 24Duyatabula bunsonsi te na dumalegulu motsu, diwendi rie: tabulanu bunsonsi buwelimina.
Je Jesus la Christ?
25Bisi Jerusalem bamosi bamawivulanga rie: Tsia jandi guna berondi uboka, mbeyianu? 26Labatianu evosi na bagemugandisi! Tanguji bivunda betasi yiri jandi la Christ, mbeyianu? 27Ava Christ oruyila jetu tugojaba mbura aji orugasana tumba jandi gugu jetu tugejabi muisi yi avu?
28Jesus amawaka ava amalonsila o Ndagu Nsambi rie: Jenu duinjabi? Duijabi muisi yi nyivu? Nyimasindugu na jandi omansindiga avu ngensa, jenu dugemujabi. 29Menu nyimujabi mu mbari nyimarugasana ombu gandi la jandi omansindiga.
30Kabogu jogu mbe bamugaanga tumba basamarungula mu mbari diweru diandi mbe disakatola. 31Bapuela bamamuvayila yitu na bamawivulanga rie: Ava Christ oruyila jandi ovaga bimaga uviolila abi jandi gugu evayi?
Bagora bamasindugu uyegaanga Jesus
32BaJuif abamaba baPharisie banogulu bevosi nana bamasindiga bagora umugaanga. 33Jesus amavosa rie: Nyikivu nenu mua pesu temu mbana nyuwenda ombu jandi omansindiga. 34Jenu dutomba na dugondaba, via! Dugorungula uruga ombu gami.
35Mu dionyi baJuif bamawivusana rie: Jandi agunyi owendasana yiri tugomuemulaba? Owenda ombu baGrec uyebalonsa? 36Dibandu yi evosili rie: Dutomba na dugorungula uruga ombu gami?
Mamba mamonyu
37Yilumbu yiusita yimaba yilumbu yineni yifeta. Muna yilumbu yieni Jesus amavosa rie: Pa mutu egulu puila aruyi ombu gami uyinu. 38Bisonu bisonugu rie: Jandi oyipayili yitu mamba mamonyu movuvanga o gari andi. 39(Amavosa nana mu diambu diYinyunyi yiNsambi ayiuvegu ombu jogu abomuvayila yitu; Yinyunyi yieni mbe asakavegu mu mbari Jesus mbe asakamatusu.)
Batu bamakegaba mu diambu diJesus
40Banogulu mambu meni bamavosa rie: Dingensa dibaala diedidi divu mubiyitsi! 41Basusu bamavosanga rie: Jandi la Christ na basusu bamawivula rie: Je Christ opalila o yiari yiGalilee? 42Bisonu bisonugu rie: Mutegula uDavid na mu musiengi uBethleem amu David amatsaninanga amu Christ opalila, mbeyianu? 43Kabogu va gari ogu vamaba dugabu. 44Bamosi bamaronda umugaanga tumba basamarungula.
Mirima migala mibivunda bibaJuif
45Bagora bamagabuga miogu na miogu ombu bivunda bibavagulitsi bapagu nombu baJuif abamaba baPharisie. Bamabawivula rie: Mu mbari yi dugaamubeyila?
46Bagora bamabagabusila rie: Mutu asakavosa nana dibaala dieni evosili.
47BaPharisie bamabawivula rie: Je jenu wenu dumadunsu? 48Va bivunda vo baPharisie abomuvayila yitu? 49Tumba abana bagejabi migaga, bavu abalogu!
50Nicodeme agumaruga mukolu ombu Jesus na omaba nogu amawivula rie: 51Tuna musuga uvega mutu mbela pa tusakagulu adi amavaga?
52Bamamuwivula rie: Ndeʼ wagu guji muisi Galilee? Kelula buranga na gulaba yiri babiyitsi bagepalili o yiari yiGalilee. [ 53Mutu mutu amagabuga o ndagu andi.
S'ha seleccionat:
Jean 7: PUU1992
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La sainte Bible en langue Yipunu © Alliance Biblique du Cameroun, 1992.