Jean 8
8
Yimbembu yimugetu
1Jesus amagabuga o julu mukongu umiOlive. 2Tumba kedi jineni amavindama na amamuekota o Ndagu Nsambi. Puela batu bamamueruga ombu gandi kabogu anotsana amabalonsa. 3Mbana basonitsi na baJuif abamaba baPharisie bamabega mugetu agumatsukugu ava evayili bumbembu. Bamamupalisa va gari batu na 4bamatsingula Jesus rie: Mugetu egugu atsitsukugu ava evayili bumbembu. 5Mu mugaga uMoise amatuvega musuga yiri munongu mugetu egugu aboku na mamanyi. Kabogu ndeʼ yi guivosi?
6Bamavosa nana umuweliga yiri bomufuengilila. Tumba Jesus amabandama, amasona va tsi na mulembu andi. 7Ava bamamuwivulila na yindandi jandi amasimbuga na amabatsingula rie: Jandi agusakavaga disumu atindi dimanyi ditega.
8Amamuebandama na amasona va tsi. 9Ava bamagululu dionyi bamagusuga umoʼ umosi ubanda na bivunda te na bangebi. Jesus amasiala pinsa na mugetu. 10Anomuesimbuga amalaba mugetu wandi pinsa. Amamuwivula rie: Mugetu abegufundisi baka? Mutu agaaguvega mbela? 11Amagabusila rie: Nyiina, Mulonsi! Jesus amamutsingula rie: Menu wami ngeguveyi mbela. Wendanga guyamuevaga masumu.]
Jesus la yijalala yibulongu
12Jesus amamuevosa nogu rie: Menu la yijalala yibulongu. Jandi oyinduki odila yijalala yimonyu na agolaba pisama.
13Mbana baJuif abamaba baPharisie bamawaka rie: Ndeʼ guikesingisila bumbeji; bumbeji buagu bugaa na tsongu.
14Jesus amabagabusila rie: Ne nana nyikesingisila bumbeji, buvu bungensa mu mbari nyijabi agu nyimarugasana na agu nyiwendi tumba jenu dugejabi agu nyiruyi vo agu nyiwendi. 15Duitabuli bunsonsi nana bansonsi benu betabulili; menu ngetabulili mutu bunsonsi. 16Ne pa nyutabula bunsonsi, bunsonsi buami buvu buboti mu mbari ngaa pinsa. Taji ami omansindiga aji nami. 17Dimasonugu mu migaga mienu yiri bumbeji bubatu babeji buvu na tsongu; 18nyikesingisila bumbeji na Taji omansindiga ensingisili bumbeji.
19Kabogu bamamuwivula rie: Taji agu aka?
Jesus amabagabusila rie: Jenu dugenjabi yika tsie dujabila Taji ami? Mbe duinjabi mbe dujaba Taji ami wandi.
20Jesus amavosa mambu meni ava amalonsila o Ndagu Nsambi va mbura ajimaba yisuegulu yipagu. Mutu asamamugaanga mu mbari diweru diandi mbe disakatola.
Dugorungula uruga agu nyiwendi
21Jesus amamuebatsingula rie: Nyiwendi na dutomba na dufu mu masumu menu; dugorungula uruga agu nyiwendi.
22BaJuif bamawivusana mu dionyi rie: Jandi okeboka mu mbari evosi rie: Dugorungula uruga agu nyiwendi?
23Amabatsingula rie: Duji bisi tsi; menu nyiji muisi julu. Duji aba bulongu buebubu; menu ngaa agu bulongu buebubu. 24La dibandu nsidutsingulila yiri dufu mu masumu menu. Diwendi rie: dufu mu masumu menu pa dugepayili yitu yiri menu nyivu. 25Bamamuwivula rie: Ndeju la qyi?
Jesus amabagabusila rie: Adina nyimadutsingula kala. 26Nyina mambu mapuela udutabulila bunsonsi tumba omansindiga avu ngensa na ama nyimagulu nandi nyimadendulili batu.
27Basamajaba yiri evosi mu diambu diTaji. 28Kabogu Jesus amabatsingula rie: Yiotsu ayi dulabila yiri Muana Mutu avu muneni mbana dujaba agu menu nyivu na dujaba yiri ngekevayila ne diambu dimosi tumba nyivayi yika adi Taji amandonsa. 29Omansindiga aji nami; asamansila pinsa mu mbari nyivayingi amemulasi ubueji temu tsiotsu. 30Ava Jesus amavosila nana bapuela bamamuvayila yitu.
Bafumu na baviga
31Jesus amavosa na baJuif abamamuvayila yitu rie: Pa duikelisi mambu mami duji badukitsi bami bangensa; 32dujaba ngensa na mu jionyi dujegusulu.
33Bamamugabusila rie: Jetu tuji bategula baAbraham na tusamaleba baviga; tsie guivosili rie: Jenu dujegusu?
34Jesus amabavindiyila rie: Dingensa nyidutsinguli yiri uotsu oyivayi masumu aji muviga umasumu. 35Muviga agaa muviga ufumu andi mutubu tumba muana onengulyngu na diina ditaji andi mutubu. 36Kabogu pa Muana amadujeyisa ngensa dumajegusu. 37Nyijabi yiri duji bategula baAbraham. Ne nana duirondi umboka mu mbari dugesingi mambu mami. 38Nyivosi adi nyimalaba ombu Tata; jenu duivayi ama dumalonsu na taji enu.
39Bamamugabusila rie: Taji etu tsiri Abraham? Jesus amabagabusila rie: Mbe duji baana baAbraham mbe dusala bisalu biAbraham. 40Nyisamavaga disusu yika udutsingula ngensa aji nyimagulu ombu Nsambi tumba namunyi duirondi umboka. 41Abraham amavaga nana? Duisali bisalu bibataji benu.
Bamamutsingula rie: Jetu tugaa baana babutsuari. Tuna taji mosi buandi, Nsambi.
42Jesus amabatsingula rie: Mbe Nsambi aji Taji enu mbe dumatonda mu mbari nyimasindugu nandi. 43Dibandu yi dugegululu malongi mami? Tsiri mu mbari dugorungula usinga malongi meni? 44Duji baana badiabu na duirondi uvaga durondu duandi. Ubanda vadibandu aji yikongu. Asakavosa ngensa mu mbari ngensa jigaa nandi. Ava efurili evosi tindi mbembu andi mu mbari mufuritsi avu na avu taji bafuritsi. 45Menu nyivosi ngensa na dugepayili yitu. 46Anyi va gari enu ombelisa mu diambu dimasumu? Pa nyivosi ngensa dibandu yi dugepayili yitu? 47Jandi ojivu mutu Nsambi egulu mambu maNsambi; jenu dugegulu mu mbari dugaa aba Nsambi.
Jesus na Abraham
48BaJuif bamamuwivula rie: Jetu tugaa na musuga uvosa yiri guji muisi Samarie na guna yinyunyi yibi? 49Jesus amavosa rie: Ngaa na yinyunyi yibi tumba nyiyitsi Taji ami na duibusi ukitsa. 50Ngekerombila bundumba. Va mutu umosi aguibutombili na aguvu nsonsi. 51Nyidutsinguli rie: Dingensa pa mutu ekelisi mambu mami jandi guna agofu, via!
52BaJuif bamamutsingula rie: Namunyi tuijabi yiri guna yinyunyi yibi. Abraham amafu kala na babiyitsi wandi na ndeʼ guivosi rie: Pa mutu ekelisi mambu mami agofu, via! 53Taji etu Abraham amafu; guimuviolili buneni? Babiyitsi wandi bamafu. Yi yivu nagu?
54Jesus amagabusila rie: Pa nyikedodisa bundumba buami bugaa na tsongu. Oyipeyi bundumba la Taji ami; jandi agu jenu duivosi yiri aji Nsambi enu, 55dugemujabi tumba menu nyimujabi. Pa nyuvosa yiri ngemujabi nyubagunu nenu noba mufuritsi. Tumba nyimujabi na nyikelisi mambu mandi. 56Taji enu Abraham amalaba nsangu ava amatasila ulaba temu ami; amajilaba na nsangu.
57BaJuif bamamutsingula rie: Ndeʼ gusakaba na magumaranu mabilima na gumalaba Abraham?
58Jesus amabatsingula rie: Dingensa ne Abraham akaburu menu nyimaba nana nyivu.
59Bamabola mamanyi umutindila tumba Jesus amasuema na amapala o Ndagu Nsambi.
S'ha seleccionat:
Jean 8: PUU1992
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La sainte Bible en langue Yipunu © Alliance Biblique du Cameroun, 1992.