Lóka 13
13
Akeni ɓókětiɛ tambea anu
1Ka mbenɔ ndɔ, ɓakpa ɓuangbo ɓáobika ɔntɔmia Yéso te: «Moamɛ Pilátɔ ěmówesi ɓa Galiláya ɓî ɗáɓáotoɓoa phɛ́a ka Mokonga.» 2Yéso áǒsikisia gea: «Ɓookanisia te, Ɓagaliláya ndɔ ɗáɓásí ka nyɔngɔ nde ɗáɓátú ɓato á ɓojeɗe kɔ̌nyɛ́nya Ɓagaliláya ɓunɛngbo? 3Ɓɛɛndɔ! Nenógie, akoɓá na ɓókókěti tambea anu, ɓotindande ɓenu ɓɔbu ɓea ɓɔ. 4Cɔ, ɓooúba nyɔngɔ á ɓakpa nkama na ngianjaga isaɔ (18) ndɔ ɗáɓáku mbenɔ nde otá á ka Silɔámu ɗěgui. Ɓookanisia te, ɓakpa ndɔ ɗáɓátú ɓájeɗe kɔ̌nyɛ́nya ɓakpa ɓunɛngbo á ka Yɛusalɛ́ma? 5Ɓɛɛndɔ! Nenógie, aoɓá na ɓókókěti tambea anu, ɓotindande phɔtɔ ɓenu ɓɔbu ɓea ɓɔ.»
Mɛní á me nde nnaɔgɔmbisa
6Mpɔ, Yéso â goto ɔ̌tɔmiaga mɛní ndee: «Nkpa moci ɗátú na me á mtini ka ciko nɛkɛ á Mujabíbu. Áobika okaɓaga mbuka í kaɔnɛ. 7Mpɔ, mɛna-ciko áongoɗea mbɛɗanigi nɛkɛ: ‹Ɔ́na phɔ́, ka ɓasaga ɓasaɔ, nebiki okaɓaga mbuka ka me nde, kɛ́ɔnɛ. Cɔ, mmbiá. Aoea oɗo jǎi ká ɓo?› 8Mbɛɗanigi ndɔ áonsikisia: ‹Mɔkɔta, nɗeketa phɔ́ goto ka saga ndee. Neɗuiagande cina akɛ, néóbisa nsɛphɔ. 9Aoɓá n'agɔmbi ka saga ndɔ aobika ndɔ, áoɓá ánjá. A gǎkɛ oɓá na kágɔmbi ye, néómbia.›»
Yéso anamisi nke moci esa á saɓáto
10Cɔ, esa á saɓáto moci, Yéso ɗáogoisaga k'éndu á madondanɔ ndea Ɓayúda ka nyɔngɔ á Mokonga. 11Nke moci ɗátú wa, kukuwa á ɓansombo n'anɗɔtisi ye ka ɓasaga nkama na ngianjaga isaɔ (18). Nke ndɔ ɗáká ye na ɓukpɛkpɛ á nanoa ngɔngɔ akɛ nga, ɗěgbuki. 12Ɓî amɔni nke ndɔ, Yéso áɔmɔphana. Áongoɗea gea: «Nke nde ca! Oami ka kukuwa nɛkɔ.» 13Áobisa njaga gǔ akɛ. Ka mbenɔ ndɔ tɔ, ngɔngɔ akɛ áǒnanoa, áombeba Mokonga.
14Ɓoamia ndɔ áɔmɓɛisa moamɛ éndu á madondanɔ ndea Ɓayúda ka nyɔngɔ á Mokonga nga, Yéso ɗánamisi nke ndɔ k'ésa á saɓáto. Kaɓondɔ, áǒngoɗea usɛsɛ á ɓakpa nde ɗáɓátú wa: «Ɓaya! Ɓena esa ngianjaga (6) nnde akeni ɓɛ́bɛɗanɛgɛ kau. Ka ɓ'esa ndɔ unge bikani ɓókaɓɛ ɓoamia. Nna k'ésa á saɓáto!» 15Mpɔ Mɔkɔta áonsikisia gea: «Ɓato á maibe nde ca! Nga nkpa buakɛ sɔsɔɓɛ anu aonkoɗa ngɔmbɛ nɛkɛ na mponda nɛkɛ ka mǒkomba esa á saɓáto ka gǎ nusa akɛ iɓo, nna ɓo? 16Cɔ, nke nde ande mosuko ndea Abalaámu, Sɛtáni ɗángbúki ka ɓasaga nkama na ngianjaga isaɔ (18), kátókeni amisa á nke ndɔ k'ésa á saɓáto?» 17Ɓî Yéso ɗáyɔngi ɓó, ɓaɓiɓia akɛ ɓɔbu ɓáokuwa na soni. Usɛsɛ á ɓakpa ɓɔbu ɓáoɓá na maseye ka kema á ketangaɔ ɗanga-ɗanga nde Yéso ɗátɔtɔkisi.
Ɓekengeanisande koɓoamɛ ndea Mokonga n'eke?
(Ɔna phɔtɔ Mat 13.31-32; Mkɔ 4.30-32)
18Yéso â goto ɔyɔnga gea: «Koɓoamɛ ndea Mokonga a ɓo? Nekengeanisande n'eke? 19Akengeani na mbenɔ nde nkpa moci ɗábɛɗi mbó á Aladáli, áokona ka ciko ndeakɛ. Áɔtɛa, áoɓá me. Ɓambǔ á ka mpɛna ɓáɔphɛka íɓɔ aɓɔ ka ntabi akɛ.»
20Yéso â goto ɔyɔnga gea: «Nekengeanisande goto koɓoamɛ ndea Mokonga n'eke? 21Akengeani na cacu, nnde nke moci abɛɗi áodaɗua na mpusu á nganɔ nde ɓoɗoko í a ɓea kilɔ nkama iɓɛ (20). Cacu ndɔ, áoɓimbisa bubui.»
Ngia ka koɓoamɛ ndea Mokonga
(Ɔna phɔtɔ Mat 7.13-14,21-23)
22Ɓî Yéso ɗáoga na Yɛusalɛ́ma, ɗáɔnyɛ́nya ka ntanga-nji na nji ɗanga-ɗanga n'aogoisaga. 23Nkpa moci áomúsia: «Mɔkɔta, ande gea ɓakpa ɓábɔa tɔ ɓáunge ɓáamande ka měma?» Yéso áǒsikisia: 24«Geani ɓukpɛkpɛ anu ka ngia ka kǐo áɔkɔtɔkana. Nga, nenóngoɗi gea, ɓakpa ɓásii ɓákáɓande ngia kau, ɓákátɔkɛku.
25Mbenɔ nde mɛna-endu aǒmesia, áophembeketea kǐo; ɓoɓande na nsɛngɛ. Kó, ɓokpangande gbondoaga kǐo na ɓoogea: ‹Mɔkɔta, ósoúkuia.› Anóngoɗeande: ‹Kéonoúba!› 26Mpɔ ɓongoɗeande: ‹Ɗéɓéigi na noa kimoci n'oɓɛ. Ɗógoisigi k'aphe á ntanga-nji ndeasu.› 27Â goto onongoɗea: ‹Kéonoúba: ɓenu ɓɔbu ɓabɛɗanigi ɓájeɗe tókani bíbí ani!› 28Kó unge ɓogámande na ea á minyɔ ɓî ɓɔmɔnande Abalaámu, Isáka, Yakɔ́ɓɔ na ɓaɔtu-nyɔngɔ ndea Mokonga ɓɔbu ka koɓoamɛ ndea Mokonga. Cɔ, ɓenu, ɓánomakande ndiu na nsɛngɛ! 29Ɓakpa ɓátókande n'okomo, n'oyonga, gǔ na kusi ɓáikande na eaga ka koɓoamɛ ndea Mokonga. 30Cɔ, kɛ̌kɛnde ɓakpa nde ɓánde ɓato á ka sungiaga, ɓáɓáeka ɓato á k'ama mosá-mosá. Ɓakpa nde ɓá gǎkɛ ɓato á k'ama mosá-mosá, ɓáɓáeka ɓato á ka sungiaga.»
Yéso aogámea Yɛusalɛ́ma
(Ɔna phɔtɔ Mat 23.37-39)
31Cɔ, ka mbenɔ ndɔ, Ɓaphaisáyɔ ɓuangbo ɓáɔsɛkɛɗa bíbí á Yéso ɓáongoɗea gea: «Tóka wani, ógɛ k'ɔ́ma nɛngbo nga, moamɛ Ɛlɔ́dɛ akondi mowa akɔ.» 32Yéso áǒsikisia te: «Gǎni ɓóngoɗeɛ kɛnsɛngɛ ndɔ ɓe: Néǒɓeaga ɓansombo na amisa á ɓato á esambɔ kesande na mama. Esa á ko isaɔ aunge nɛɔgɔɓa ekuma. 33Cɔ, akeni nétútuisɛ tamba kesande, mama na bǎ mama. Nga, kákeni mɔtu-nyɔngɔ ndea Mokonga ákuwɛ ɗanga, ákuwɛ ndiu tɔ ka Yɛusalɛ́ma.
34Hoo! Yɛusalɛ́ma, hoo! Yɛusalɛ́ma, oɓɛ ímbe ǒmowa ɓaɔtu-nyɔngɔ ndea Mokonga, kusa aɓɔ ka makeaga ɛtɛ ɓunde Mokonga aǒteka mɔtɛ-akɔ! Mɔngɔ kǔngaáni ɗékondi dondanisa á ɓakpa nɛkɔ bíbí ani ɓea ama-gbɔ̌kɔ n'aódondanisa ɓ'anakɛ kusi á kepupe akɛ. Cɔ, ɓenu ɗóɓokókóndi gǎkɛ! 35Cɔ, ɓî a ɓó, endu nɛnu ajigande esimɔ. Nenóngoɗi ɓe: ɓɔ́kɔ́mɔɔnɛku ye, na ka ɓî ɓɔyɔngande: Mokonga ábisɛ njaga akɛ gǔ á mmbé abiki k'ína á Mɔkɔta#Ɔna Jab 118.26.»
S'ha seleccionat:
Lóka 13: KMW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc.