Lóka 14
14
Yéso anamisi goto nto á esambɔ esa á saɓáto
1Esa á saɓáto moci, Yéso ɗáge k'éndu ndea mɔkɔta moci á Ɓaphaisáyɔ k'aphe á eaga. Kó, ɓakpa ɓáɔmɔnjia bîbíbí. 2Cɔ, nkpa moci áobika omamaga mosá akɛ, n'ana kukuwa á ɓimbaga á nyama. 3Mpɔ Yéso áǒúsia ɓaɗundu-ɛɔphi na Ɓaphaisáyɔ gea: «Ɛɔphi nɛnu asosi, kaɓɛ n'aimisi amisa á nkpa k'ésa á saɓáto?» 4Ɓɔ, ɓáodakana. Mpɔ Yéso áondunga ka nyama, áonamisa, áonsosea ágɛ. 5Mbusa, Yéso áǒngoɗea: «Nanga áɓá esa á saɓáto, ka ɓenu sina mmbé miki, kaɓɛ ngɔmbɛ nɛkɛ n'agui k'écia n'a n'iɓo, kákamisɛgɛku phúia akɛ?» 6Ɓɔ, ɗáɓákátɔki sikisia á nyɔngɔ ka músiɔ ndɔ.
Kókamisɛgɛmbɛ ika ka kankaanga á mosá
7Ɓî, Yéso ɗáɔni gea ɓakpa nde ɓɛ́ɓɔphani ɗáɓásɔmbu ika ka kankaanga á mosá, mpɔ áǒngoɗea mɛní ndee: 8«Mbenɔ nde nkpa aɔkɔɔphana k'ɛ́kɛka, kóikɛmbɛ ka kankaanga á mosá ka ɓɔngá í. Kǎi ɓámɔphani phɔtɔ nkpa nde ɓáonɗokomisa phɛɛ kɔkɔnyɛ́nya. 9Wa, nkpa nde anɔɔphani ɓenu ɓaɓɛ akongoɗeande: ‹Nɗeketea ɔma ndee.› Ôkuwa na soni ka gǎ ika ka kankaanga á mbusa. 10A gǎkɛ oɓá na ɓákɔɔphani, gǎ ndiu óikɛ k'ɔ́ma á mbusa, ka gea, mbenɔ nde mmbé anɔɔphani aobika, ákongoɗeɛ: ‹Dani, táia óikɛ ka kankaanga á mosá.› Ɓondɔ unge aɓande obebɔ mosá á ɓakpa ɓɔbu ɓunde ɓáɓande kimoci n'oɓɛ. 11Nga, nkpa buakɛ mmbé aǒɗokomisa, ɓándidisande. Nkpa nde a ndiu ǒdidisa aámbé ɓánɗokomisande.»
12Mpɔ Yéso áongoɗea nkpa nde ɗámɔphani gea: «Mbenɔ nde ɔɔɓɔngisiaga eea á sɔmani, kaɓɛ nnde á ɔgɔgɔ, kɔ̌ɔphanɛmbɛ ɓadakɔ, ɓana-amakɔ, ɓaɓɔkɔtiakɔ na ɓatɔi nde ɓá bíbí akɔ. Ka ɓánga phɔtɔ gea esa nɛngbo ɓɔ ɓákákɔɔphanɛmbɛ ka sikisiakɔ kema nde ɗógi ka phɔaɓɔ. 13Cɔ, mbenɔ nde ɔ̌ɓɔphana ɓakpa ka jaí, ɔ́ɓɔphana ndiu ɓaúki, ɓaɗɔti na ɓakeíme-íme. 14Kaɓondɔ, oɓande na maseye nga, ɓakpa ndɔ ɓáká na kema á sikisia akɔ. Mokonga akosikisiande mbenɔ nde ɓato á koɗoni ɓájujukande ka kukuwa.»
Mɛní á ɓato á mɔpháni ka jaí
(Ɔna phɔtɔ Mat 22.1-10)
15Nkpa moci ka ɓunde ɗáoeaga na Yéso aɔ́ki ye ɓó, áongoɗea Yéso gea: «Maseye ka nkpa nde aeagaeka ka koɓoamɛ ndea Mokonga!» 16Mpɔ Yéso áongoɗea mɛní ndee: «Nkpa moci ɗáɔmbi eea ásii, â phɔtɔ ɔ̌ɓɔphana ɓakpa ɓásii. 17Aɓi ye ka mbenɔ á eaga, áonteka mbɛɗanigi nɛkɛ ka ngoɗea á ɓakpa nde ɗɛ́ɓɔpháni gea: ‹Cɔ, bikani ɓóeɛgɛ.› 18Ɓɔbu ɓâ gǎkɛ okpanga éɗengemisaga na yɛ. Nto á k'ama mosá-mosá áongoɗea mbɛɗanigi: ‹Nesombi ciko, akeni négɛɔnɛ kau. Neoɗengemisigi ómokuia ngomi.› 19Ɓaangbo áongoɗea: ‹Něsombi ɓangɔmbɛ nkama (10) ka nyɔngɔ á guba. Ne gǎkɛ oga okengisa ɓukpɛkpɛ aɓɔ. Neoɗengemisigi ómokuia ngomi.› 20Ɓaangbo â goto ongoɗea: ‹Nena mpakai, ka nyɔngɔ índɔ unge kɛ́ɔtɔka na nege kó.›
21Mpɔ mbɛɗanigi ndɔ áoja ká tɔ̌mia mɔkɔta nɛkɛ nyɔngɔ ndɔ bui. Nyɔngɔ kau áɔmɓɛisa mɔkɔta éndu. Áongea mbɛɗanigi: ‹Kamisaga gǎ ɔma bui, n'aphe bui á ka ntanga-nji, óbikɛ wani na ɓaúki, ɓaɗɔti na ɓakeíme-íme óngisɛ ɓɔ wani.› 22Mbusa, mbɛɗanigi áongoɗea: ‹Mɔkɔta, nɛtɔtɔkisi kema nde otósosí. Cɔ, ɔma a phɔ́tɔ ɓei.› 23Mpɔ mɔkɔta áongoɗea mbɛɗanigi: ‹Gǎ k'aphe á nji ábɔbɔbɔa, na mpɛphɛ á ciko, ósoseɛ ɓakpa ɓábikɛ, ɓángiɛ, mpɔ endu nɛmɔ átúmɛ.› 24Nekongoɗi gea: ‹Nna na ka ɓakpa nde nɛtɔ́ɓɔpháni mmbé aeande k'éea nɛmɔ.›»
Ɓagoigi ndea Yéso ɓáɗeketɛ kema bui
(Ɔna phɔtɔ Mat 10.37-38)
25Cɔ, usɛsɛ á ɓakpa ɓásii ɗáɓáomɓea, yɛ áɔɔnjia mbusa, áǒngoɗea gea: 26«Nkpa nde aobika mɔtɛ-amɔ akeni ámokondɛ phɛɛ kɔnyɛ́nya abakɛ, amakɛ, nkakɛ, ɓ'anakɛ, ɓana-amakɛ na ɓáwákɛ. Ámokondɛ phɔtɔ phɛɛ kɔnyɛ́nya enda akɛ sasakɛ. Aoɓá na kágǐ ɓó, nkpa ndɔ kátɔkɛku ɓá ngoigi nɛmɔ. 27Nkpa nde nnaokumba moyangɔ nɛkɛ sasakɛ ka ɓeá ani, kákeni áɓɛ ngoigi nɛmɔ.
28Cɔ, aoɓá ka ɓenu n'akondi phɛ̌ka á otá ageande ɓoni? Ande gea te, aikande phɔ́, áokpanga tanga á imɔna na nkumba á mɔphɛkɔ nde aně ka úba mmbe akpeengeanande. 29Ka ɓanga gea, aoɓá n'akpangi mɔphɛkɔ na kágɔɓɛi, ɓakpa ɓunde ɓáɔɔna ɓántɛbɛagande. 30Ɓáogea: ‹Óɓéo, nkpa nde ɗákpangi mɔphɛkɔ, katɔki gǎkɛ gɔɓɛa í!› 31A phɔtɔ ɓó, kaɓɛ moamɛ moci n'age ómanisa dakɛ moamɛ, aikande phɔ́, áoianaga: ɓato émani ɛlɛphu nkama (10.000) ɓunde nena ɓɔ; akeni négɛ manisɛ dani mmbé ana ɓato émani ɛlɛphu nkama iɓɛ (20.000)? 32Aoɓá na kátɔkɛku, áonteka ntɔnganisi-mbino mɔtɛ á dakɛ moamɛ n'a phɔ́tɔ ɗanga ka gea ámɛmɛ moangɔ á ɓujɛjɛ.» 33Mpɔ Yéso â goto ɔyɔnga gea: «A phɔtɔ ɓó ka ɓenu. Aoɓá ka ɓenu na káɗeketi kema nɛkɛ bui, nkpa ndɔ nnaɔtɔka ɓá ngoigi nɛmɔ.
34Eya, mɔnɛi ande kema ánjá. Cɔ, a gǎkɛ oɓá ɓɔɛkɛ í n'asi ye, ɓegeande ɓó ka sikisa á ɓɔɛkɛ í? 35Nna ye ánjá ka oɗo, nanga ka nsɛphɔ. A tɔ maka í ka nsɛngɛ: ‹Cɔ, mmbé ana kecue á ɔkapha, ambe áɔ́kɛ!›»
S'ha seleccionat:
Lóka 14: KMW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc.