Lóka 19
19
Ɓoamia á Jakáyɔ ka měma
1Yéso angí ye ka Yɛíkɔ, áɔɔ́tata ka ntanga-nji. 2Nkpa moci ina akɛ Jakáyɔ ɗáiki kó. Ɗátú mɔkɔta ndea ɓaphendisigi-manjanja, â phɔtɔ oɓá ntɔi. 3Cɔ, ɗáokaɓa ámɔnɛ Yéso ande ani. Katɔkɛ gǎkɛ ka nyɔngɔ á usɛsɛ á ɓakpa nga, yɛ ɗátú nto-angbíngbí. 4Kaɓondɔ, áoga mbangɔ mosá, áoɗapha ka me á mukuyu. Ɗági ɓó ka gea te, ámɔnɛ Yéso, nga anyɛ́nyande wa.
5Yéso aju ye k'ɔ́ma ndɔ, áomesia mɔ̌ akɛ, áɔmɔna Jakáyɔ, áongoɗea: «Jakáyɔ! Kiá mbangɔ! Neogea néikɛ mɔtɛ-akɔ kesande!» 6Jakáyɔ áokia mbangɔ, áonsesea na maseye. 7Ɓakpa ɓɔbu ɓáɔni ye ɓó, ɓáɔngɔngɔnaga, ɓáogea: «Ai! Mogáa nde age oika k'éndu ndea nto á ɓojeɗe?» 8Kaɓondɔ, Jakáyɔ áomama mosá á Mɔkɔta, áongoɗea ɓe: «Mɔkɔta! Kɛ̌kɛnde, nebǒsani nkumba nɛmɔ ka měme, néǒɓopha ɓato á ɓuyɛnɛ phaeka ímoci. Akoɓá na ɗɛ́bɛɗi nkumba ndea nkpa ka maibe, néonsikisia mɔngɔ gena.»#Ɔna Jua 21.37; 2 Sam 12.6; Mɛn 6.31 9Mpɔ, Yéso áongea: «Kesande, ɓoamia angí k'éndu nde nga, mmbé a phɔtɔ mosuko á Abalaámu. 10Nga, eme Muna-Nkpa, nebiki k'aphe á kaɓa na amisa á ɓakpa nde ɗáɓáɓúngigi.»
Mɛní á ɓabɛɗanigi ɓasaɔ
(Ɔna phɔtɔ Mat 25.14-30)
11Ɓî ɓakpa ɗáɓátú ɔɔ́ka nyɔngɔ ndɔ, Yéso áotútuisa na mɛní. Wa, ɗátú bíbí na Yɛusalɛ́ma, ɓakpa ɗáɓáokanisia gǎkɛ te, koɓoamɛ ndea Mokonga aobika kɛ̌kɛndɔ. 12Cɔ, mɛní kau ungee: «Nkpa moci, k'ékombo á ɓakɔta, ɗáge ka nji á ɗanga. Áogea, ɓámophɛ motumbɔ á koɓoamɛ mpɔ ájɛ. 13Mosá á gǎ akɛ, áɔ̌ɓɔphana ka ɓabɛɗanigi nɛkɛ nkama (10), áɔbɛɗa imɔna á láté nkama (10), áǒgabea ú moci-moci. Áǒgea: ‹Bɛɗanagani na imɔna ndee, na ka ɓî nejakuma.› 14Ɓato á koɓoamɛ nɛkɛ ɗáɓánkangei gǎkɛ. Ɓáǒteka ɓatɔnganisi-mbino mbusa akɛ, ɓágayɔngɛ te: ‹Ɓékékondi mogáa ndɔ áɓɛ moamɛ gǔ asu.›
15Nanga ɓó, ɗáɓámophi motumbɔ a koɓoamɛ, áoja. Ajú ye, áɔ̌ɓɔphana ɓabɛɗanigi ndɔ mɔci-mɔci, ɓundɔ ɗéɓophi imɔna, áúbɛ ɛtɔi ángaáni nde ɗáɓátɔi. 16Mmbé ɓa k'ama mosá-mosá áobika, áongea: ‹Mɔkɔta, imɔna ndɔ moci otómopi, nɛtɔi goto na imɔna nkama.› 17Moamɛ áongea ɓe: ‹Cɔ, ɓosegi! Onde mbɛɗanigi anjánjá. Ka nyɔngɔ nde, onde nto á koɗoni ka amba kema ábɔa, nekophi kɔkɔta á ntanga-nji nkama (10).› 18Mbusa, mmbé ɓa ko ɓaɓɛ áobika, áɔyɔnga gea: ‹Mɔkɔta, imɔna moci ndɔ otómopi, nɛtɔi goto na imɔna ɓɔku.› 19Moamɛ áongea: ‹Oɓɛ gǎkɛ nekophi kɔkɔta á ntanga-nji ɓɔku.›
20Mbusa, mbɛɗanigi ɓaangbo áobika, áɔyɔnga gea: ‹Mɔkɔta, imɔna nɛkɔ aungee. Ɗénéɓóege na bɔngɔ. 21Nga, ɗéokoɓánga, ka nyɔngɔ nde, onde nkae. Ɔɔbɛɗa kema, na kóbisi. Ooɗúngua, na kógubi.› 22Moamɛ áonsikisia: ‹Mbɛɗanigi ajeɗe! Nyɔngɔ nde ɔyɔngi aunge neteni nyɔngɔ nɛkɔ ně. Ɗóúbi gea te, nende nkae. Nɛɔbɛɗa, na nekébisi. Neoɗúngua, na nekégubi. 23Cɔ, nyɔngɔ sina nde ɗókóɓophi ɓaambi-imɔna imɔna nɛmɔ? Mpɔ, ka ja ani, ně goto oɓoa imɔna ndɔ na ɓátáisi nɛngbo gǔ í.›
24Mpɔ, moamɛ ndɔ áǒsosea ɓakpa ɓunde ɗáɓátú wa: ‹Utani imɔna á láté nɛkɛ, ɓómophɛ ú, mmbɔ atɔi imɔna nkama (10).› 25Ɓakpa ndɔ ɓáongea: ‹Mɔkɔta, yɛ a ye tɔ na imɔna nkama (10).› 26Moamɛ áǒsikisia: ‹Negie, nkpa nde ana kema, aámbé ɓámophande goto. Mmbé nna na kema, aámbé ɓámutande gǎkɛ n'ǐnde ajigi ně. 27Cɔ, ɓaɓiɓia ani, ɓundɔ ɓánáokonda néɓɛ moamɛ gǔ aɓɔ, obikani ně koni, ɓóótenɛ mosá ani.›»
Sesea á Yéso na maseye ángbó phɛɛ ka Yɛusalɛ́ma
(Ɔna phɔtɔ Mat 21.1-11; Mkɔ 11.1-11; Yoá 12.12-19)
28Mbusa á Yéso tɔ̌miaga á mɛní ndɔ, áɔmɛɛa mosá ka táia na Yɛusalɛ́ma. 29Ɓî ajú ye bíbí á Bɛtɛphágɛ#19.29 Nji ndɔ ɗátú bǎ á mpenga na mamba á Mijɛitúni bíbí á Yɛusalɛ́ma. na Bɛtanía,#19.29 Dátú nji nde a bíbí á Bɛtɛphágɛ. bíbí á mamba ndɔ ɓáɔɔphana Mijɛitúni,#19.29 Ande mamba á okomo á Yɛusalɛ́ma bǎ á mpenga á Kɛdɔ́ni. áǒteka ka ɓagoigi nɛkɛ ɓaɓɛ mosá. 30Aǒngoɗea: «Gǎni ka nji nde á mosá anu. Ɓo ye ojúa ka ngba, ɓondondande miki á mponda na ɓámɓɔi, na kánkúmbimbɛ mɔnɔ nkpa. Cɔ, nkóɗani, ɓómbikɛ ně.» 31Aoɓá nkpa n'anoúsi gea: «Ɓoonkoɗa ka ɓo?» Ɓônsikisia gea: «Mɔkɔta aámbé ammɛmi.» 32Ɓateki ɓáoga ondonda miki á mponda ɓíndɔ Mɔkɔta ɗáengoɗi. 33Ɓî ɗáɓáonkoɗa, ɓamɛna-akɛ ɓáǒúsia: «Ɓoonkoɗa miki á mponda nde ka nyɔngɔ eke?» 34Ɓáǒsikisia te: «Mɔkɔta aámbé ammɛmi.»
35Mpɔ, ɓáombika na miki á mponda ndɔ kuɓî Yéso aɔ. Ɓáobisa bɔngɔ nɛɓɔ gǔ akɛ, ɓáonkambisa Yéso#Ɔna Jak 9.9. 36Mpɔ, Yéso áɔsɛkɛɗa. Ɓakpa ɓáɔɔyia bɔngɔ nɛɓɔ k'aphe.#19.36 Ɔna 2 Ɓam 9.13. Ɔyia á bɔngɔ ka gea nkpa átambɛ gǔ í, ande aphe á ɗokomisa akɛ n'ědidisa mosá akɛ. 37Ɓî ɗá ye tɔ bíbí á dida mamba ndɔ Mijɛitúni, usɛsɛ á ɓagoigi ɓáogua jaí. Ɓáokpanga beba á Mokonga n'ɛsɔ akpɛ ka ketangaɔ nde ɗáɓáɔni. 38Ɗáɓáɔyɔnga ɓe: «Ɓosegi ka Moamɛ, mmbé aobika k'ína á Mɔkɔta, ɓujɛjɛ áɓɛ na koba, ɓoombia áɓɛ ka Mokonga#Ɔna Jab 118.26; Lók 2.14.» 39Ka Ɓaphaisáyɔ ɓunde ɗáɓátú sɔsɔɓɛ á usɛsɛ á ɓakpa, ɓáongoɗea Yéso: «Ngoisigi, óphekeaga ɓagoigi nɛkɔ!» 40Mpɔ Yéso áǒsikisia gea: «Nenóngoɗi, nanga ɓɔ ɓáphɔnga, ɓ'etae ɓáphúiande ɛsɔ akpɛ.»
Yéso aogámea Yɛusalɛ́ma
41Mbenɔ nde Yéso abîmisi ntanga-nji, áɔɔna, áogámea ú, 42n'aɔyɔnga ɓe: «Atúoɓá oɓɛ n'oúbi kesande aphe á ɓujɛjɛ, cɔ, kɛ̌kɛnde nyɔngɔ ndɔ a ye tɔ á ɓɔsɔmɛa k'íso akɔ! 43Nga, ka ɓ'esa ndɔ aobika k'oɓɛ, ɓaɓiɓia ndeakɔ ɓáokombande na mɔphɛkɔ ka manisa akɔ, na phúúmisaga akɔ ɔma bui. 44Ɓɔ, ɓákotúkatúkande na ɓakpa ɓɔbu ɓunde ɓáiki suɓi akɔ. Ɓákáoɗeketɛeku tanda n'ɛtɛ moci gǔ á dakɛ, ka nyɔngɔ nde kótóúbi mbenɔ nde Mokonga ɗábiki okoénga.»
Yéso aeɓǐgi ɓasombisigi nkumba suɓi éndu ndea Mokonga
(Ɔna phɔtɔ Mat 21.12-17; Mkɔ 11.15-19; Yoá 2.13-22)
45Mpɔ Yéso áongia suɓi éndu ndea Mokonga, áǒɓeaga ɓasombisigi-nkumba. 46Na ngoɗea ɓɔ gea: «Ɓáɗundu suɓi á Ɓuku ndea Mokonga ɓe: ‹Endu nɛmɔ aɓande endu ɛ́mɛmi#Ɔna Isa 56.7 .› Cɔ, ɓenu ɓô ndiu obisa ú ɔma á dondanaga á ɓakukuɓa.#Ɔna Yɛɛ 7.11»
47Esa bui, Yéso ɗáogoisaga k'éndu á Mokonga. Ɓagbɛga á ɓatoɓeigi-phɛ́a na ɓaɗundu-ɛɔphi phɔtɔ na ɓakɔta á ɓato á ka nji ɗáɓáokáɓa kusa á Yéso. 48Cɔ, ɓɔ gǎkɛ, ɗáɓákáúbi moangɔ á tɔtɔkisa í nga, ɓakpa ɓɔbu ɗáɓá na mɔphɛ á ɔ́ka akɛ phɛɛ.
S'ha seleccionat:
Lóka 19: KMW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc.