Lóka 20
20
Ianaga á cina á kɔkɔta ndea Yéso
(Ɔna phɔtɔ Mat 21.23-27; Mkɔ 11.27-33)
1Cɔ, esa moci Yéso ɗáǒgoisaga ɓakpa na tɔ̌mia aɓɔ Mbino-Ánjá suɓi éndu ndea Mokonga. Wa, ɓagbɛga á ɓatoɓeigi-phɛ́a, ɓaɗundu-ɛɔphi na ɓakɔta á ɓato á ka nji ɓáobika, 2ɓáomúsia: «Moko, ósóngoɗea phɔ́ kɔkɔta sina nde ɔɔtɔtɔkisa na nyɔngɔ ndɔ, na ani mmbé akophi kɔkɔta ndɔ?» 3Mpɔ Yéso áǒsikisia gea: «Neɓande phɔtɔ na músiɔ moci ka ɓenu. Cɔ, ómongoɗeani, 4‹Ani mmbé ɗámophi Yoáni kɔkɔta á ɓatisa#Ɔna Lók 3.3,7. Ande Mokonga, kaɓɛ n'ande ɓakpa?›»
5Mpɔ, ɓáoianaga ngǔngu aɓɔ, ɓáogea: «Aoɓá na ɓegi te: ‹Mokonga aámbé ɗánteki›, ámbé asoúsiande gea: ‹Ka nyɔngɔ éke nde ɗóɓokómɓeeki gǎkɛ Yoáni?› 6Aoɓá na ɓegi gǎkɛ atóki ka ɓakpa, ámbé ɓakpa ɓɔbu ɓásoɓeagande n'ɛtɛ ka gea ɓékuwɛ. Nga, ɓáɓeeki ɗoni gea Yoáni ande mɔtu-nyɔngɔ ndea Mokonga.» 7Ɓâ ndiu onsikisia Yéso gea: Ɓákáoúba cina á kɔkɔta ndea Yoáni. 8Yéso â phɔtɔ ǒngoɗea gea: «Eme gǎkɛ kénongoɗeɛku cina á kɔkɔta nde nɛɔtɔtɔkisa ně.»
Mɛní á ɓagubi ɓájeɗe
(Ɔna phɔtɔ Mat 21.33-46; Mkɔ 12.1-12)
9Mpɔ Yéso áokpanga ngoɗea á ɓakpa mɛní ndee: «Nkpa moci ɗákoni ciko á mujabíbu#Ɔna Isa 5.1. Mbusa, áɔɔ́kana na ɓagubi nde ɓáɓande ɔɓɔngisiaga ciko ka nyɔngɔ á ophendɔ. Mɛna-ciko áɔmɛa tamba, áoika kó matú éndǎ.
10Cɔ, ka mbenɔ á ɗungu, áonteka mbɛɗanigi moci gea, ɓabɛɗanigi ka ciko ɓántekisiɛ keɓu ínɛkɛ. Ɓagubi ɓâ gǎkɛ ɔmɓɛta, ɓáonjisa njaga jǎi. 11Mɛna-ciko â goto onteka mbɛɗanigi ɓaangbo, ɓâ goto tɔ ɔmɓɛta mmbɔ na kusa akɛ na soni, ɓáonjisa njaga jǎi. 12Áosuia goto teka mmbé ɓa ko ɓasaɔ, ɓáontúma mmbɔ na ɓeaga akɛ.
13Mpɔ mɛna-ciko áɔyɔnga gea: ‹Negeande ye goto ɓo? Nentekande miki-mǒko nɛmɔ ékondi, kǎi mmbɔ aámbé ɓámɓángande.› 14Cɔ, ɓagubi ɓámɔni ye miki ndɔ, ɓáɔyɔngaga sɔsɔɓɛ aɓɔ: ‹Eya! Mɛna-ɓotukɔ aámbɔ! Ɓémmowɛni ka gea ɓotuko ndɔ áɓɛ asu!› 15Ɓáonga na miki ndɔ bǎ á ciko, ɓáommowa.» Mpɔ Yéso áǒúsia: «Mɛna-ciko ěgeande ɓagubi ndɔ ɓo? 16Abikande, áǒmowa ɓagubi ndɔ. Mbusa í, aeɓophande ɓakpa ɓunɛngbo ciko ndɔ.» Ɓakpa ɓáɔ́ki ye ɓó, ɓáɔyɔnga gea: «Kaɓɛmbɛ tanda ɓó.»
17Mpɔ Yéso áɔ̌ɔnjia, jaa! Áǒngoɗea gea: «Ɓáɗundu suɓi á Ɓuku á Mokonga ɓe: ‹Etae nde ɓaphɛki ɗáɓáyé, aunge a ye tɔ etae á kantíti ka mɔphɛkɔ#Ɔna Jab 118.22›. Cɔ, kanisia nde á suɓi á nyɔngɔ ndɔ a ɓo? 18Nkpa buakɛ mmbé aoguia etae ndɔ, aɓunukande. Nkpa nde etae ndɔ a gǎkɛ onguia, etae ndɔ ankpɔtande.#Ɔna Isa 8.14-15; Dan 2.34-35; Lók 2.34»
19Cɔ, ka mbenɔ ndɔ tɔ, ɓaɗundu-ɛɔphi na ɓagbɛga á ɓatoɓeigi-phɛ́a ɓáokaɓa dunga á Yéso nga, ɗáɓáúbi gea ɗáyɔngi mɛní ndɔ ka phɔa ɓɔ. Ɗáɓákandungi gǎkɛ nga, ɗáɓá na kɔɓɔɓɔkɔ á ɓakpa.
Tombaga á Yéso ka nyɔngɔ á phenda á manjanja ka moamɛ Kaisáa
(Ɔna phɔtɔ Mat 22.15-22; Mkɔ 12.13-17)
20Mpɔ ɓáokpanga ɓɔgɔmɛaga á Yéso, ɓáǒteka ɓakpa nde ɗáɓáǒdemisaga gea ɓánde ɓato á koɗoni ka gea, Yéso átɛ ka mɛ̌kɔ nɛɓɔ mbenɔ nde aɓande ɔyɔnga. Wa unge ɓántɔngande mɔtɛ á mmbé ana kɔkɔta á nji bui. 21Ɓato á ɓɔgɔmɛaga ɓáomúsia Yéso: «Ngoisigi, ɓeoúba nyɔngɔ nde ɔɔyɔnga n'índe oogoisaga ande ɗoni. Kóotena nyɔngɔ ndea nkpa ka ɓeá keongi akɛ. O ndiu ogoisaga aphe á Mokonga ka koɗoni. 22Cɔ, ósóngoɗea phɔ́: Ɛɔphi nɛsu asososi phenda á manjanja á Kaisáa, mɔkɔta á Ɓalɔ́ma, kaɓɛ na kásososi phenda í?»
23Ɓî Yéso ɗáúbi maibe nɛɓɔ, áǒgea: 24«Ómophangiani phɔ́ ka imɔna á ngɔa ndɔ moci.» Áǒúsia te: «Keongi nde na ɗundua nde ande á ani?» Ɓáonsikisia gea: «Bui a tɔ á Kaisáa.» 25Mpɔ Yéso áǒngoɗea gea: «Cɔ, ɓaya, mophani Kaisáa kema nɛkɛ, ɓómophɛ phɔtɔ Mokonga kema ínɛkɛ.» 26Ɗáɓákátɔki gǎkɛ koɗa á Yéso ka mɛ̌kɔ nɛɓɔ mosá á ɓakpa. Ɓâ ndiu oyayama ka nyɔngɔ nde Yéso ɗěsikisíí, ɓáɔkɔɓa, phio!
Músiɔ ka nyɔngɔ á jujúka ka kukuwa
(Ɔna phɔtɔ Mat 22.23-33; Mkɔ 12.18-27)
27Ka Ɓasadukáyɔ ɗáɓámbikíí Yéso. Ɓɔbu ɓánáoɓeekea nyɔngɔ á jujúka á ɓakpa ka kukuwa#Ɔna Eku 23.8. Ɗáɓábiki omúsia Yéso gea: 28«Ngoisigi, Mósa ɗáɗundu kasu ɛɔphi ɓe: Aoɓá mǒko n'aku, n'anɗeketi nke na káonji, muna-amakɛ na mǒko ndɔ aku angííande nke á kekusa ka gea ámɓɔkɔtɛɛ mɔkɛnji á phɔmiakɛ ɓaniki#Ɔna Tɔl 25.5-6. 29Cɔ, ɓaganda ɗáɓáɓɔkɔtɛani ngianjaga iɓɛ (7) ka sɔphɔ ndea amaɓɔ. Ánge ɗámukí nke, áokuwa kángá ɓɔkɔta na nke ndɔɔ. 30Moganda ɓa ko ɓaɓɛ áomuka nke á kekusa. Mmbɔ â goto tɔ okuwa kángá ɓɔkɔta. 31Mmbɔ ɓa ko ɓasaɔ tɔ ɓó. Ɓɔbu ngianjaga iɓɛ (7) ɓáosia kángá ɗeketa á miki tanda moci. 32Ka sungiaga, nke ndɔ â phɔtɔ okuwa. 33Cɔ, esa á jujúka ka kukuwa, ka ɓɔ sina sɔsɔɓɛ á ɓǒko ndɔ ande munya-nke? Nga ɓɔbu ngianjaga iɓɛ (7) ɗáɓámukí tɔ ka yɛ.»
34Mpɔ Yéso áǒsikisia te: «Ɓǒko á ka matú nde ɓáunge ɓáǒɓuka ɓake na ɓake ɓá phɔtɔ ɔɔmana. 35Ɓakpa nde ɓákeni jujúka ka kukuwa ka matú ndɔ aobika, ɓǒko ɓákáeɓukɛku ye ɓake na ɓake ɓákáɔmanɛku ye. 36Ɓákátɔkɛku ye na ɓáku nga, ɓáɓande ɓea ɓamalaéka. Ɓánde ɓana-Mokonga, ɓî ɓájujúki ka kukuwa. 37Suɓi á ɓuku, ɔma nde Mósa aɗundu nyɔngɔ á esasa nde aǒtoɓoaga, ɗáɗundu phɔtɔ base gea ɓakpa nde ɓáku, ɓájujukande ka kukuwa. Nga, aɔmɔphana Mɔkɔta: ‹Mokonga nde ɓa Abalaámu, Mokonga nde ɓa Isáka na Mokonga ɓa Yakɔ́ɓɔ#Ɔna Jua 3.2,6.› 38Ka nyɔngɔ índɔ unge Mokonga nna Mokonga á ɓasí, a ndiu Mokonga á ɓunde ɓáoenda. Nga mosá akɛ, ɓɔbu ɓa tɔ oenda.»
39Mpɔ ka ɓaɗundu-ɛɔphi ɓáɔyɔnga gea: «Ngoisigi, ɔyɔngi tɔ ánjá.» 40Nga, ɗáɓáɓángi ye úsiaga akɛ.
Kiísito na Daúdi
(Ɔna phɔtɔ Mat 22.41-46; Mkɔ 12.35-37)
41Yéso â goto ǒngoɗea te: «Ɓáɔyɔnga gea Kiísito ande mosuko á Daúdi ka ɓo? 42Nga Daúdi sasakɛ aámbé ayɔngi suɓi á ɓuku nɛkɛ á embɔ gea:
‹Mɔkɔta Mokonga ɗángoɗi Mɔkɔta nɛmɔ:
Ika ka njaga ani á mǔku,
43na ka ɓî něbisande ɓaɓiɓia nɛkɔ kusi á ecinji akɔ#Ɔna Jab 110.1.›
44Daúdi aɔmɔphana gǎkɛ Mɔkɔta. Cɔ, Kiísito aɓande gǎkɛ mosuko á Daúdi ka ɓo?»
Óengani na ɓaɗundu-ɛɔphi!
(Ɔna phɔtɔ Mat 23.1-36; Mkɔ 12.38-40)
45Ɓî ɓakpa ɓɔbu ɗáɓáɔmɔ́ka Yéso, yɛ áǒngoɗea ɓagoigi nɛkɛ gea: 46«Óengani na ɓaɗundu-ɛɔphi. Ɓákondi tamba na ɓáɔ́ligi ngɔ́mbɛ éndandandǎ, na ɓakpa ɓaɓɛǒsesea k'ɔ́ma á madondanɔ. Suɓi éndu á madondanɔ ndea Ɓayúda ka nyɔngɔ á Mokonga, ɓákondi phɔtɔ ikiɗia kankaanga á mosá na ka jaí ɗanga-ɗanga ɓáikɛ k'ɔ́ma á kɔkɔta. 47Ɓɔ, ɓá phɔtɔ kouta kema bui ndea ɓake á kekusa na mɛma á Mokonga ka mbenɔ éndǎ mosá á ɓakpa ka gea ɓakpa ɓɛ́ɓɔnɛ. Mokonga atenaeka gǎkɛ nyɔngɔ nɛɓɔ akpɛ phɛɛ.»
S'ha seleccionat:
Lóka 20: KMW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc.