San Lucas 20
20
Jesús y'ane̱'e̱mu̶ñ
(Mt 21.23-27; Mc 11.27-33)
1Du'un tu'u'ook jyajty, cham najty je̱'e̱ Jesús je̱'e̱ kajptja'ay yaj'u̶xpu̶ky ma je̱'e̱ mu̶jtzajptu̶jku̶ñ y kapxwa'kxy najty je̱'e̱ ayuuk tu̶y'ajt mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, ko jya'tku̶xy je̱'e̱ teedy windzu̶ndu̶jk y je̱'e̱ Moisés y'ane̱'e̱mu̶ñ windzu̶ndu̶jk ajku̶xy kipxy mu̶u̶d je̱'e̱ amu̶jja'aydyu̶jk ajku̶xy, 2y chi ñu̶maayu̶ ajku̶xy:
—¿Ti ane̱'e̱mu̶ñ adaa du'un mu̶u̶d mduñ ko je̱'e̱ ja'ay yaa myajpu̶dzu̶u̶mda'awu̶ch ma je̱'e̱ mu̶jtzajptu̶jku̶ñ y ko yaa myaj'u̶xpú̶gu̶ch ma je̱'e̱ mu̶jtzajptu̶jku̶ñ? ¿Pu̶n adaa ane̱'e̱mu̶ñ du'un tu̶ xymyo'oy?
3Chi je̱'e̱ Jesús y'adzoowu̶ ajku̶xy:
—U̶u̶ch miich nandu'un nyajtu̶waangu̶xypy tu'ug je̱'e̱ ayuuk. Adzoogu̶xu̶ch. 4¿Pu̶n je̱'e̱ Juan Bautista ke̱jx ja'ay yajnu̶u̶be̱jtpu̶, je̱'e̱ Dios o je̱'e̱ ja'ay ajku̶xy?
5Chi ñay'amayu̶ydyu̶gu̶u̶yu̶ ajku̶xy amiñ u̶xyu̶py: “Pu̶nu̶ n'adzoowu̶mby ko je̱'e̱ Dios ke̱jx, du'un yu̶'u̶ yaa xyñu̶maayu̶mu̶ch ajku̶xy: ‘¿Y ti ko mga'amu̶bu̶jku̶ ajku̶xy je̱' y'ayuuk?’ 6Y ka'p mu̶baad n'adzoowu̶m ajku̶xy ko je̱'e̱ ja'ay ke̱jx ajku̶xy, je̱' ko tzojku̶ je̱'e̱ kajptja'ay xychaagu'uga'tztaayu̶mu̶ch ajku̶xy, je̱' ko nigu̶xyu̶ yu̶'u̶ du'un nejwu̶u̶ygyu̶xy ko je̱'e̱ Juan ijty jaanch jye̱'e̱ju̶ch je̱'e̱ Dios y'ayuuknajtzkapxu̶u̶ybyu̶.” 7Y chi y'adzooy ajku̶xy ko ka'p nejwu̶u̶ygyu̶xy pu̶n je̱'e̱ Juan najty tu̶ kyexyii ja'ay yajnu̶u̶be̱jtpu̶. 8Mu̶'it je̱'e̱ Jesús y'adzoowu̶ ajku̶xy:
—Nan ni u̶u̶ch nga'anigapxa'añ tii ane̱'e̱mu̶ñ u̶u̶ch adaa du'un mu̶u̶d nduñu̶ñ.
Je̱'e̱ ju̶bu̶k tuumbu̶du̶jk ijxpe̱jt
(Mt 21.33-44; Mc 12.1-11)
9Chi je̱'e̱ Jesús mu̶dmu̶dyaaktu̶gu̶u̶y je̱'e̱ mayjya'ay, y yajmu̶dmu̶dyakku̶xy adayaaba ijxpe̱jt: “Jii ijty ja'ay tu'ug mu̶dyiibu̶ je̱'e̱ uvakam pu̶daaku̶ñ, chi piiwa'kxy yejky ma je̱'e̱ tuumbu̶du̶jk nije̱' ajku̶xyu̶ñ; y chi choñ ñu̶kxy jeky ju̶gue̱m'it. 10Ko je̱'e̱ uva piw'aatz paaty, chi je̱'e̱ tyuumbu̶ tu'ug kejxy ma je̱'e̱ tuumbu̶du̶jk ajku̶xyu̶ñ ko je̱'e̱ pu̶da'aky wan mo'oyii je̱'e̱ mu̶dyiibu̶ najty paattu̶bu̶ñ; peru̶ je̱'e̱ tuumbu̶du̶jk wyinwojp jyu̶jpwojpku̶x je̱'e̱ kexyo'oybyu̶, yajwimbijtku̶xy du'uñyu̶, ka'p ni tii mooygyu̶xy. 11Mu̶'it je̱'e̱ kugam wiingpu̶ tyuumbu̶ ja'adu'ug kejxy, peru̶ nandu'un je̱'e̱ tuuñ ajku̶xy, win'ojy ju̶jp'ojy ajku̶xy, wingojxy ju̶jpkojxy ajku̶xy y du'uñyu̶ ke̱jxwimbijty ajku̶xy, ka'p ni tii mooygyu̶xy. 12Chi je̱'e̱ wiingpu̶ ja'adu'ug jaktimykejxy, peru̶ je̱'e̱ tuumbu̶du̶jk nan yajtzu̶chu̶u̶ygyu̶x je̱'e̱ kexyo'oybyu̶ y yajkeeky ajku̶xy.
13“Mu̶'it je̱'e̱ uvakam windzú̶n myu̶naañ: ‘¿Ti u̶u̶ch n'oktúnu̶py? N'okkéxyu̶ch yu̶'u̶ n'ung mu̶dyiibu̶ u̶u̶ch oy ndzojkypy nju̶wu̶u̶ybyu̶ñ; ka'p jékyu̶ch ko u̶u̶ch yu̶'u̶ n'ung xy'ijxu̶ch ajku̶xy, yajmu̶j'ádu̶py yu̶'u̶ ajku̶xy.’ 14Peru̶ ko je̱'e̱ tuumbu̶du̶jk je̱'e̱ windzú̶n y'ung ijxu̶ ajku̶xy, chi ñayñu̶maayu̶ ajku̶xy amíñ u̶xyu̶py: ‘Yu̶'u̶ yu̶'u̶ tyeedy pyu̶da'agy mu̶wu̶'u̶maanu̶py; tzu̶k yaj'o'ku̶m ajku̶xy y wan yu̶'u̶ kam nje̱'e̱'ajtu̶mu̶ch ajku̶xy.’ 15Chi yajpu̶dzu̶u̶mgu̶xy uvakamjooty y yaj'o'ky ajku̶xy.
“¿Y nej miich m'okmu̶naangu̶xpu̶, tii je̱'e̱ uvakam windzú̶n da'a tyúnu̶py mu̶u̶d je̱' ajku̶xy? 16Pues nú̶kxu̶p je̱'e̱ ku̶'u̶m; nu̶kxy je̱'e̱ tuumbu̶du̶jk yaj'o'kta'ay ajku̶xy, y chi je̱'e̱ kyam yé̱gu̶ch ma je̱'e̱ wiingpu̶ tuumbu̶du̶jk ajku̶xyu̶ñ.”
Ko adaa du'un mu̶dooy ajku̶xy, chi myu̶naañ ajku̶xy:
—¡Nika'atzógu̶ch je̱'e̱ Dios nu̶kxy du'un njajtu̶m ajku̶xy!
17Chi je̱'e̱ Jesús wyindu̶kxpe̱jtu̶ ajku̶xy y ñu̶maayu̶ ajku̶xy:
—¿Ti adaa du'un tyije̱e̱mby je̱'e̱ mu̶dyiibu̶ kuja'ay miimb ma je̱'e̱ Dios ñakyu̶ñ?:
‘Je̱'e̱ oybyu̶ tzaa mu̶dyiibu̶ je̱'e̱ pojtzpu̶du̶jk ka'p yajtuuñ ajku̶xyu̶ñ,
je̱' oy tu̶ wyu̶'u̶mnu̶ ma je̱'e̱ poch chonda'agyu̶ñ.’
18Pu̶njaty tzaagú̶xp yujkku̶daagu̶xpu̶ñ, tu̶j wi'idz je̱'e̱ jyajtta'awu̶ch ajku̶xy; y pu̶nu̶ je̱'e̱ tzaa ni'igu̶daagóttu̶gu̶xp, jo'ptz jo'ptz je̱'e̱ jyajtta'awu̶ch ajku̶xy.
19Je̱'e̱ teedy windzu̶ndu̶jk y je̱'e̱ Moisés y'ane̱'e̱mu̶ñ windzu̶ndu̶jk ajku̶xy jya'amadzaangu̶x je̱'e̱ Jesús mu̶k'eemby, je̱' ko wyinju̶wu̶u̶ygyu̶x ko je̱'e̱ Jesús najty je̱' tu̶ ñimu̶dyaaku̶gu̶xy mu̶u̶d je̱'e̱ ijxpe̱jt. Peru̶ ka'p majch ajku̶xy, je̱' ko je̱'e̱ mayjya'ay najty tzu̶gu̶u̶ygyu̶xy.
Yajtu̶u̶gu̶xy pu̶nu̶ mu̶baad je̱'e̱ kube̱jtu̶ñ yaj'yéky o pu̶nu̶ ka'p
(Mt 22.15-22; Mc 12.13-17)
20Chi je̱'e̱ mu̶'ixnaaybyu̶ nije̱' kejxy ajku̶xy ma je̱'e̱ Jesúsu̶ñ mu̶dyiibu̶ naybyu̶daaku̶gu̶xpu̶ñ neby je̱'e̱ tu'uda'agyjya'ayu̶ñ, neby je̱'e̱ Jesús mu̶baad yajkapxtu̶gooygyu̶xyu̶ñ; y neby mu̶baad mu̶'it xu̶'u̶gu̶xyu̶ñ, y neby mu̶baad ku̶'u̶ye̱jkku̶xyu̶ñ ma je̱'e̱ gobernadoru̶ñ. 21Chi je̱'e̱ Jesús yajtu̶u̶y ajku̶xy:
—Windzú̶n, u̶u̶ch nejwu̶u̶ybyu̶ch du'un ajku̶xy ko du'un neby miich mmu̶na'añu̶ñ y neby myaj'u̶xpú̶kyu̶ñ janch'oy je̱'e̱ du'un, y ka'p miich win'ixy myaj'u̶xpú̶ky. Miich tu̶y'ajt je̱'e̱ Dios tyu̶y'ajt myaj'u̶xpu̶jku̶ neby je̱'e̱ ja'ay mu̶baad chu̶naaygyu̶xy jyugy'ajtku̶xyu̶ñ du'un neby je̱'e̱ Dios tzokyu̶ñ. 22¿Nej mu̶baad u̶u̶ch nmu̶gubety ajku̶xy je̱'e̱ mu̶j'ane̱'e̱mbu̶ romano ja'ay, o ka'p?
23Peru̶ je̱' ajku̶xy winju̶wu̶u̶yu̶xu̶ je̱'e̱ Jesús jyu̶bu̶kwinma'añ ajku̶xy je̱'e̱ mu̶dyiibu̶ najty myu̶dajtku̶xypyu̶ñ, chi ñu̶maayu̶ ajku̶xy:#20.23 Nije̱' wiingpu̶ versión myu̶na'añ: ¿Ti u̶u̶ch ko miich xyjyoot'ijx xywyinma'añ'ijxku̶xy?
24—Yaj'ijxku̶ch je̱'e̱ meeñ tu'ug ajku̶xy. ¿Pu̶n je̱'e̱ y'awinnax y pu̶n je̱'e̱ xyu̶u̶ yam yujkja'ay miimb ma adaa meeñu̶ñ?
Chi y'adzooy ajku̶xy:
—Je̱'e̱ romano mu̶j'ane̱'e̱mbu̶.
25Chi je̱'e̱ Jesús ñu̶maayu̶ ajku̶xy:
—Pues mooygyu̶x je̱'e̱ mu̶j'ane̱'e̱mbu̶ je̱'e̱ mu̶dyiibu̶ je̱'e̱ mu̶j'ane̱'e̱mbu̶ paattu̶bu̶ñ, y mooygyu̶x je̱'e̱ Dios je̱'e̱ mu̶dyiibu̶ je̱'e̱ Dios paattu̶bu̶ñ.
26Y ka'p nineby'eemby mu̶madaaky ajku̶xy neby je̱'e̱ Jesús mu̶baad yajkapxtu̶gooygyu̶xyu̶ñ mayjya'ayjyooty y neby mu̶baad xu̶'u̶gu̶xyu̶ñ, ni'igyu̶ je̱'e̱ mu̶k ok'yajnú̶kx ok'yajju̶wu̶u̶ygyu̶xnu̶ neby y'adzoowu̶ ajku̶xyu̶ñ, chi y'amoonu̶ ajku̶xy.
Yajtu̶u̶gu̶xy pu̶nu̶ juugypyu̶gaamb je̱'e̱ o'okyjya'ay ajku̶xy
(Mt 22.23-33; Mc 12.18-27)
27Chi je̱'e̱ saduceotu̶jk oy nije̱' ijxku̶xy je̱'e̱ Jesús. Je̱'e̱ saduceotu̶jk ka'p je̱'e̱ mu̶bu̶jkku̶xy ko je̱'e̱ o'okyjya'ay jyuugypyu̶gaangu̶xy; paady adayaaba mu̶dya'agy yajmu̶dmu̶dyaaky ajku̶xy:
28—Windzú̶n, du'un u̶u̶ch je̱'e̱ Moisés kuja'ay xy'u̶xyo'oyu̶ ajku̶xy ko je̱'e̱ pu̶kyya'aydyu̶jk tu'ug y'o'ogu̶ch y pu̶nu̶ ka'p naty je̱'e̱ tyo'oxyu̶jk ni tu'ug tu̶ yaj'ungpaady, je̱'e̱ jamyii pyuya'ay paattu̶p pú̶gu̶ch je̱'e̱ ku'o'ogytyo'oxyu̶jk wan du'un yaj'ungpaadu̶ch mu̶u̶d je̱'e̱ pyuya'ay gyu̶xpu̶ mu̶dyiibu̶ naty tu̶ y'o'ogyu̶ñ. 29Bueno, jii ijty je̱'e̱ ja'ay tu'kke̱'e̱xk, nijuxtujk ijty je̱'e̱ tyu'kke̱'e̱xk'ajtku̶xy agu̶ ya'aydyu̶jk. Chi je̱'e̱ kob'ung jayu̶jp pyu̶jky y chi je̱'e̱ tyo'oxyu̶jk u̶x'o'ky, ka'p ni tu'ug yaj'ungpaaty. 30Chi je̱'e̱ mu̶me̱tzkpu̶ pyu̶jky mu̶u̶d je̱'e̱ ku'o'ogytyo'oxyu̶jk, peru̶ nan y'u̶x'o'k je̱'e̱ tyo'oxyu̶jk y nan ka'p ni tu'ug yaj'ungpaaty. 31Y nan chi je̱'e̱ mu̶du̶gu̶u̶kpu̶ pyu̶jky mu̶u̶d je̱'e̱ ku'o'ogytyo'oxyu̶jk, y du'un je̱'e̱ nijuxtujkpu̶ mu̶dtzu̶naay abu̶dzu̶u̶mdaaygyu̶xy je̱'e̱ to'oxyu̶jk y u̶x'o'ktaay ajku̶xy, ka'p ni tu'ug yaj'ungpaaty ajku̶xy. 32Kujeky je̱'e̱ to'oxyu̶jk oy nandu'un y'o'knu̶. 33Bueno, y ko naty je̱'e̱ jyuugypyu̶jkku̶xy, ¿mu̶dyii je̱'e̱ da'a okto'oxyu̶jk'adu̶u̶ju̶p je̱'e̱ to'oxyu̶jk, je̱' ko nijuxtujku̶ je̱'e̱ tu̶ to'oxyu̶jk'ajtu̶gu̶xyu̶?
34Chi je̱'e̱ Jesús y'adzoowu̶ ajku̶xy:
—Ma adayaaba naaxwiiñ je̱'e̱ ya'aydyu̶jktu̶jk y je̱'e̱ to'oxyu̶jktu̶jk pu̶jkku̶xp uukku̶xp je̱'e̱ ajku̶xy#20.34 Nije̱' wiingpu̶ versión myu̶na'añ: y ñaymyooyu̶gu̶xy je̱'e̱ y'ung y'ana'k ko wan pu̶jkku̶xy uukku̶xy. 35Peru̶ je̱'e̱ ja'ay ajku̶xy mu̶dyiibu̶ naty jiinu̶ paattu̶p chu̶na'awu̶ch ma je̱'e̱ Dios y'ane'emyu̶ñ y jyuugypyu̶jkku̶xu̶ch, wan ya'aydyu̶jktu̶jk o to'oxyu̶jktu̶jku̶ch ajku̶xy, ka'p je̱'e̱ pyu̶gaan y'u'ugaangu̶xnu̶#20.35 Nije̱' wiingpu̶ versión myu̶na'añ: y nan ka'p je̱'e̱ y'ung y'ana'k ñaymyo'owaanu̶gu̶xnu̶ ko wan pu̶jkku̶xy uukku̶xy. 36Je̱' ko ka'p je̱'e̱ y'o'ogaangu̶xnu̶. Du'un je̱'e̱ y'idaangu̶xnu̶ neby je̱'e̱ ángelestu̶jk ajku̶xyu̶ñ, y Dios je̱'e̱ ung'adu̶u̶ ana'k'adu̶u̶ju̶p ajku̶xy ko naty tu̶ jyuugypyu̶jkku̶xy mu̶u̶d je̱'e̱ jembyu̶ jugy'ajtu̶ñ. 37Je̱'e̱ Moisés du'un ku̶'u̶m xyajnejwu̶u̶yu̶mb ko je̱'e̱ o'okyjya'ay jyuugypyu̶gaangu̶xy, jiiby ma du'un myiñu̶ñ ko je̱'e̱ aay ujtz najty tyoy. Du'un jiiby myu̶na'añ ko je̱'e̱ Windzú̶n Dios Dios'ajtu̶p je̱'e̱ Abraham, je̱'e̱ Isaac y je̱'e̱ Jacob. 38¡Y je̱'e̱ Dios, ka'p je̱'e̱ Dyios'aty ma je̱'e̱ o'okypyu̶ja'ay ajku̶xyu̶ñ, je̱'e̱ Dios, Dios'ajtp je̱' ma je̱'e̱ juukypyu̶ja'ay ajku̶xyu̶ñ. Mu̶u̶d je̱'e̱ Dios ku̶xyu̶ je̱'e̱ ja'ay jugy'ajtmu̶u̶du̶ch ajku̶xy!
39Mu̶'it je̱'e̱ Moisés y'ane̱'e̱mu̶ñ windzu̶ndu̶jk nije̱' y'adzooy ajku̶xy:
—Janch'oy tu̶ m'adzoy, Windzú̶n.
40Y ka'p najty okjajtku̶xnu̶ neby jak'yajtu̶u̶gu̶xu̶chu̶ñ.
¿Pu̶n y'ok'ung y'ok'ana'k je̱' je̱'e̱ Cristo?
(Mt 22.41-46; Mc 12.35-37)
41Chi je̱'e̱ Jesús yajtu̶u̶wu̶ ajku̶xy:
—¿Ti ko du'un mmu̶naangu̶xy ko je̱'e̱ Cristo David y'ok'ung y'ok'ana'k je̱'? 42David ku̶'u̶m myu̶na'añ ma je̱'e̱ Salmo nakyu̶ñ:
‘Je̱'e̱ Windzú̶n Dios nu̶maay u̶u̶ch je̱'e̱ nWindzú̶n:
U̶ña'a yaa a'oy'eemby ma u̶u̶ch je̱'e̱ nnamu̶jku̶ñ,
43u̶xtu̶ koonu̶ u̶u̶ch naty je̱'e̱ mmu̶dzip tu̶ nmu̶madaakta'ay,
tu̶ nbu̶da'agyu̶ch mdekypya'tku̶'u̶by.’
44¿Neby je̱'e̱ Cristo mu̶baad y'ok'ung y'ok'ana'k'adyii je̱'e̱ David, y je̱'e̱ David du'un je̱'e̱ ku̶'u̶m myu̶naañ ko je̱'e̱ Cristo Wyindzu̶n'ajtypy?
Jesús ka'p je̱'e̱ Moisés y'ane̱'e̱mu̶ñ windzu̶ndu̶jk y'u̶xpu̶jku̶ñ ku'umaayu̶ ajku̶xy
(Mt 23.1-36; Mc 12.38-40; Lc 11.37-54)
45Ku̶xyu̶ je̱'e̱ kajptja'ay najty jim y'amdo'ijtku̶xy, y chi je̱'e̱ Jesús dyiscípulotu̶jk nu̶maay: 46“naygyweentu̶'ajtu̶gu̶x mu̶u̶d je̱'e̱ Moisés y'ane̱'e̱mu̶ñ windzu̶ndu̶jk ajku̶xy, je̱' ko oy je̱'e̱ janch adzojkku̶xy mu̶wu̶ditaangu̶xy je̱'e̱ oyjyatypyu̶ yoñjyatypyu̶ wyit tyukxy ajku̶xy, y janch tzojkku̶xy ko je̱'e̱ ja'ay y'u̶u̶bókx kyapxpókxu̶gu̶xu̶ch windzu̶gu̶'u̶ñ'eemby mayjya'ayjyooty, y janch adzojkku̶xy je̱'e̱ ku'uduumbu̶ u̶ñaaybye̱jt ma je̱'e̱ naymyujktaaktu̶ñ y je̱'e̱ u̶ñaaybye̱jt ma je̱'e̱ windzu̶ndu̶jk y'u̶ñaaygyu̶xyu̶ñ ma je̱'e̱ ja'ay xyu̶u̶duungu̶xyu̶ñ, 47y pyu̶jktaayu̶py je̱'e̱ ku'o'ogytyo'oxyu̶jktu̶jk je̱'e̱ tyu̶jk y je̱'e̱ kyojy pyu̶da'agy ajku̶xy, y Dyiosmu̶bu̶jktzoogu̶xy janch jekyjyaty neby je̱'e̱ ja'ay kyu'umayu̶u̶ju̶chu̶ñ ajku̶xy ko y'oyjya'ay tyu'uda'agyjya'ayu̶ch ajku̶xy. Peru̶ ni'igyu̶ je̱'e̱ Dios chaachtyunu̶u̶ju̶ch ajku̶xy.”
S'ha seleccionat:
San Lucas 20: MIXE
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005