M. Yohana 10
10
1LEZEE lezee numuuzyani, Uyo asaloŵa pa mulyango mnsito ya mbelele, lomba okwerera pambi, wamene uyo ni njivi na nyalufwimbi. 2Sembe uyo oloŵa pa mulyango ni chiŵeta wa mbelele. 3Chilindila omzulila, na mbelele zikumvwa lizu lake, naye ozitula mbelele zyake mwine mazina a zine nozitangulila kunja. 4Akazifumya zyonse zyake mwine ozitangulila, na mbelele zumkonka, pazuziŵa lizu lake. 5Mulwendo sizingamkonke; zingamuutuke pazisaziŵa lizu la alwendo. 6Yesu eŵasimikira linganizyo ili, lomba aliyoziŵa vyechilaŵira naŵo ni vinji.
7Teti Yesu ni pechiŵauzya soti, Lezee lezee numnenelani, Ne nine mulyango wa mbelele. 8Ŵonse enitangulila ni njivi na anyalufwimbi: sembe mbelele ziliyoŵamvwa. 9Ne nine mulyango: akaloŵa muntu pali neo azapuzumuke, azaloŵe nofuma nofwanga pakulyera. 10Njivi sikuza sembe kuti ipunshe nopaya nocheneka: neo nizila kuti akaŵe moyo, na kuŵa nawo unyinji. 11Nine chiŵeta muweme: chiŵeta muweme akupa moyo wake chikomo cha mbelele. 12Uyo wotumiwa, asali chiŵeta, mbelele siziri zyake mwine, ouŵona mmbulu ukuza nozitailizya mbelele noutuka, na mmbulu uzikata nozichulunganya. 13Uyo outuka chikomo ni wotumiwa, ntozindandaulila mbelele. 14Neo nine chiŵeta muweme; nuziŵa zyangu, na zyangu zuniziŵa neo, 15nga ni Ŵata mwakuniziŵira neo na neo numziŵa Ŵata; nane nuŵika moyo wangu chikomo cha mbelele. 16Mbelele ziyake nili nazyo, zyamene zisali zya luŵa luno: na zila noziula, zizimvwe lizu langu: zikaŵe mkusi umo wa chiŵeta umo. 17Chikomo choteti ni pakunitemwa Ŵata, pakuti nuŵika moyo wangu niuule soti. 18Paliye muntu onilonda, sembe neo nuuŵika neka. Nina nsaka youŵika, nane nina nsaka youula soti. Ili tetulo nilipokera kwa Ŵata.
19Penze soti kapatukano pa Ayuda chikomo cha malizu aŵa. 20Anyinji ŵala echiti, Ana chiŵanda: ni wofunta; mumvwilanji? 21Ŵambi echiti, Aŵa sali malaŵililo a wokulamwa chiŵanda. Kansi chiŵanda chingatwanusye menso a mpofu?
22Penze masiku akuru a mashukishilo pa Yerusalemi: penze pa mwera; 23na Yesu enzoyendayenda mchipupilo mlukoro lwa Solomoni. 24Pamene apo Ayuda echizomzingilila nonena naye, Mutikaikisya mpaka zuŵanji? Kati nimwe Kristo ula tiuzisyeni. 25Yesu eŵayasuka, Nimuuzyani, namwe simumvwila: milimo inuchita mzina la Ŵata, yamene iyi yunichitira untoni. 26Sembe mweo simumvwila pamsali a mbelele zyangu. 27Mbelele zyangu zikumvwa lizu langu: nuziziŵa, nazyo zunikonka. 28Nuzipa moyo wosasila, nazyo siziti zyochenekeka; paliye muntu ati azisompole mmanja mwangu. 29Ŵata amene enipa zyamene nakuru kupula ŵonse; paliye muntu angazisompole mmanja mwa Ŵata. 30Neo na Ŵata nise ŵamo. 31Ayuda ŵala eula myala soti ampozere nayo. 32Yesu eŵayasuka, Milimo inyinji iweme nuilangizya kwanu yufuma kwa Ŵata; ni mulimo uni wa iyi umunipozelela myala? 33Ayuda emyasuka, Situmpozerani myala chikomo cha mulimo uweme, sembe cha msiyakuŵi, na pakuti mweo pamuli muntu mulichisya Mlungu. 34Yesu eŵayasuka, Kansi ntekwilembewa mdango lanu kuti, Nichiti nimwe milungu? 35Kati eŵatula ŵala milungu kwilizila kwaŵo lizu la Mlungu (na malembo ŵala sangotyolewa), 36kansi munena zya uyo wechizizya Ŵata nomtuma mcharo cha pansi, Muchita msiyakuŵi; panati, Ne nine Mwana wa Mlungu? 37Kati sinuchita milimo ya Ŵata msanimvwila. 38Sembe kati nuichita, chukanga simunimvwila neo, imvwileni milimo ila: kuti mziŵe nomvwisya kuti Ŵata ali muli neo, na neo muli Ŵata. 39Esakomkata soti: naye efumako ku charo chaŵo.
40Lomba eimapo echiya soti kusilya lila la Yordani ku malo kwenzobatiza Yohana potatika, naye enkala kwamene. 41Anyinji naŵo emzila echiti, Yohana chendi aliyochita chiziŵikwilo: sembe vyonse vyechinena Yohana vya uyu muntu ni vyendi. 42Naŵo anyinji emmvwila kwamene uko.
S'ha seleccionat:
M. Yohana 10: MA23
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Mapangano Alomba © Bible Society of Zambia, 1923.