Matayo 7
7
Kutaghanya wazima
(Luka 6:37-38,41-42)
1“Simwataghanye, nenyo simojetaghanyo ni Mlungu. 2Kwani selyi kwenyi mtaghanyagha niko kwenyi mtaghanyogho ni Mlungu, na kipimo chilya mpimagha nicho chenyi mpimilogho ni Mlungu. 3Kudani uonagha kilaghulu chio kele iziso lya wakwenyu na somanyagha kigogo chio kele iziso lyako? 4Ango udimagha ije kumuza wakwenyu, ‘Sigha nikufunye kilaghulu chio kele iziso lyako,’ nawe mwenyi uwo na kigogo kele iziso lyako? 5Mundu wa ngolo mbili uwe, Funya jako kigogo chio kele iziso lyako, nao uone kirani kilaghulu chio kele iziso lya wakwenyu.
6“Simwahawe chuchu vindu vielile; sizejemughalukia na zimushoghonole. Simwakumbe lulu zenyu hambiri ya nguluwe zijezichang'acha.
Lomba, hada, daha
(Luka 11:9-13)
7“Lombeni nenyo mjepata, hadeni nenyo mjeona na daheni nenyo mjerughuriro. 8Kwani kila mundu elombagha upatagha, naye ehadagha uonagha, naye edahagha urughurirogho. 9Ango ni mundu muni kwenyu ilyi mwana wake amlomba mkate emuhawagha iwe? 10Ango amlomba ikumba emuhawagha nyoka? 11Ndamu inyo muo walaghelaghe mwamanya kuwahawa wana wenyu vindu valoli. Sikuchumba Tatio ewo mlunguni kuwahawa vindu valoli awa wamlomba! 12Wadeileni wandu wazima selyi mushaile wamudeile inyo. Kwani iyi niyo Sheria ya Musa na mafundiso gha wana tondolo.
Mjango msuse
(Luka 13:24)
13“Ngileni kwa mjango msuse; kwani mjango ghongila kuhaiteni ni mshabwa, na ngila yanawanguwe ighendagha kuhaiteni na awo weighendelagha ni wengi. 14Ela mjango ghughenda kele umana ni msuse na ngila yake yanakulile; na weionagha ni wachache.
Mwiti na mavalo ghake
(Luka 6:43-44)
15“Kulindeni na wana tondolo wa ndimi awa wemjilagha warwara marwari gha ng'onzi, ela amweni kwawe ni turugha zibile. 16Mjewamanya kwa madeo ghawe. Ado wandu wanawahagha zabibu kele miya ango tini kele malamata? 17Kwa hung'u mwiti ghwaloli kele uloli ghwake ghwanavalagha mavalo ghaloli, ela mwiti ghuwase kele kuwasa kwake ghwanavalagha mavalo ghawase. 18Mwiti ghwaloli sighudimagha kuvala mavalo ghawase; hata mwiti ghuwase sighudimagha kuvala mavalo ghaloli. 19Kila mwiti sighovalagha mavalo ghaloli ghutemogho na kukumbo motoni. 20Kwa hung'u mujewamanya kwa madeo ghawe.
Na lyingi semweni
(Luka 13:25-27)
21“Si kila mundu eniitagha, ‘Bwana, Bwana,’ engilagha kele uzuri ghwa Mlungu; sala uyu edeagha mashayo gha Aba ewo mlunguni. 22Kele ijua lyilya Lyetaghanya, wengi wejenuza, ‘Bwana, Bwana,’ sitierese uvoro ghwa izina lyako na kugusa pepo na kudea mwakilimbita nyingi kwa izina lyako? 23Nemi nijewauza, ‘Semweni lyingi. Fumeni kwangu inyo wadei laghelaghe.’
Wawaghali waili
(Luka 6:47-49)
24“Kila mundu esikilagha malagho agha ghangu na kughadea, nimufwananisagha na mundu mlachu awaghale nyumba yake kele iwe. 25Nao mvula ikanya, na meji ghakaruka, na mbeo ikaruma na kuikwita; ela siighwile kwa kukala yewaghalo iweni. 26Na kila mundu esikilagha malagho agha ghangu na kulegha kughadea, nimfwananisagha na mundu mpumbavu awaghale nyumba yake kele msanzaghala. 27Nao mvula inya na meji gharuka, na mbeo iruma na kuikwita, ikagwa, na kugwa kwake koluo kubwaa.”
Udimo ghwa Jesu
28Nao Jesu aghenda amalila kughora agha, makoghano weshiniso ni mafundiso ghake; 29kwa kukala ofundise sa mundu ewo na udimo na si sa Walimu wa Sheria.
S'ha seleccionat:
Matayo 7: SAGALLANT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
(C) The Bible Society of Kenya, 1993