Matiyu 1
1
Yesu cunsaa ki
(Luki 3.23–38)
1Yesu Kirisa po-i koŋ wɔ̀ri ru, nini tɔ kiri i kari i. Yesu i masa Dawuda nupo o, masa Dawuda i ji Aburahamu nupo o.
2Aburahamu Ishaka ji-i,
Ishaka i Yakuba ji,
Yakuba i Yuda fa a tindaŋ kiri ji.
3Yuda Farɛsi fa Nsara ji-i, Tamaari wuru nini ɲiŋ ki i.
Farɛsi i Eshirɔmu ji,
Eshirɔmu i Aramu ji.
4Aramu Aminadabu ji-i,
Aminadabu i Naasɔn ji,
Naasɔn i Salimɔn ji.
5Salimɔn Boonsi ji-i, Arahabu wuru niŋ jiɲiŋ ki i.
Boonsi i Yobɛdi ji, Uruti wuru ninwɔ̀ jiɲiŋ ki i.
Yobɛdi i Yesayi ji.
6Yesayi masa Dawuda ji-i.
Masa Dawuda i masa Solomani ji,
ninwɔ̀ jiɲiŋ ki wuru Uri#1.6 Uri : Uri wɔ bi ɲaan ki i bi-a Samuyɛli (2) 11.2–5, 12.24 kiri ru. wɔ mari i sun.
7Masa Solomani Orobowamu ji-i,
Orobowamu i Abiya ji,
Abiya i Asafu ji.
8Asafu Yosafati ji-i,
Yosafati i Yorowamu ji,
Yorowamu i Osiyasi ji.
9Osiyasi Yotamu ji-i,
Yotamu i Akasi ji,
Akasi i Esikiyasi ji.
10Esikiyasi Manase ji-i,
Manase i Amɔn ji,
Amɔn i Yosiyasi ji.
11Yosiyasi Yekoniyasi fa a tindaŋ pyɛ kiri ji-i.
Niŋ waaci ki ru, kí Isirayɛlidaŋ kiri pa tiri-i jonbi ki ru Babilɔni kɛniŋ ki ru.
12Isirayɛlidaŋ kiri somaan ki kɔɔtɛ Babilɔni :
Yekoniyasi i kila niŋ i Salatiyɛli ji,
Salatiyɛli i Nsorobabɛli ji.
13Nsorobabɛli Abiyudi ji-i,
Abiyudi i Eliyakimu ji,
Eliyakimu i Ansɔɔri ji.
14Ansɔɔri Sadɔki ji-i,
Sadɔki i Akimu ji,
Akimu i Eliyudi ji.
15Eliyudi Eleyansaari ji-i,
Eleyansaari i Matan ji,
Matan i Yakuba ji.
16Yakuba Yusufu ji-i.
Yusufu wɔ mari ki tɔ ki i ji tu Mariyamu.
Niŋ Mariyamu tɔ ki Yesu ji-i, ninwɔ̀ i dɔri-ra tu Kirisa.
17Niŋ ɲaan ki tɛ, ŋì i shi Aburahamu sun, ŋì i na bo masa Dawuda sun, sɛri bwununpyiiraŋ fwuude-i. Ŋì i shi masa Dawuda sun, ŋì i ta so Isirayɛlidaŋ kiri pa tiri waari ki sun jonbi ki ru Babilɔni kɛniŋ ki ru, sɛri bwununpyiiraŋ tɔri i ji fwuude. Ŋì i shi Isirayɛlidaŋ kiri pa tiri waari ki sun jonbi ki ru Babilɔni, ŋì i ta so Kirisa ji ki sun, sɛri bwununpyiiraŋ i ji fwuude sɛbɛ.
Yesu ji bi ki
(Luki 2.1–7)
18Dɔnsaŋ, nwɔ̀ i Yesu Kirisa ji bi ki i, niŋ ma-i ɲaan wɔ̀ tɛ, niŋ i kaa : Mariyamu, ninwɔ̀ i ntiŋ ɲiŋ ki i, niŋ sunpamaan wuru Yusufu gbɛ. Kí dɛbɛ ki jɛŋ, Mariyamu wuru cii wu, Ɲiniwɔlinŋ ki wɔ so ki baraka ra. 19Yusufu wuru koŋ telimaan a. Ntiŋ ǹʼtɔ-i waarinŋ wɔ̀ ru, tu afɔɔn mari sunpa ki ciitiŋ i, ntiŋ i ji ǹʼtɛ a i a kaan nmari tɛ du ru, nwɔma nmari tɔ fa li kì.
20Jibi bɛɛ, ŋì i Yusufu tu niŋ bi kiri miiri-ra, ntiŋ i Ŋuntiŋ Kirinŋ wɔ mɛlɛkɛn ki bɛɛ ja jii ru, niŋ i ǹʼbi ntiŋ tɛ tu : « Yusufu, masa Dawuda nupo, fa kɛni Mariyamu shi bi ki ra nʼwɔ mari ki, sabu cii wɔ̀ i nmari ru, niŋ kila-i Ɲiniwɔlinŋ ki wɔ so ki baraka ra. 21Nmari ra na danshuru ji. Ŋi i na ǹʼtɔ ki ye tu Yesu#1.21 Yesu : Yesu tɔ ki kɔri ki i tu Ŋuntiŋ Kirinŋ i Mwutɔnŋ i., sabu ŋì a na awɔ konanbi ki mwu san arɔɔ bijɛ kiri wu. »
22Niŋ bi kiri bataa ma-i, nwɔma Ŋuntiŋ Kirinŋ wɔ cintɔnŋ ki wulu wɔ̀ bi wuru-i, niŋ i ma a ɲaan tɛ. 23Sɛli ki ra, Ŋuntiŋ Kirinŋ ǹʼbi wuru awɔ cintɔnŋ ki tɔnŋ na tu :
« Maannaanŋ shurubitɔbali a na danshuru ji,
niŋ daŋ ki a na dɔri tu Emanuwɛli. »
Emanuwɛli kɔri ki i tu Kirinŋ yibɛɛ fan.#Esayi 7.14.
24Yusufu ŋmɛni-i. Niŋ kɔɔtɛ, Ŋuntiŋ Kirinŋ ki wɔ mɛlɛkɛn ki ǹʼbi-i ntiŋ tɛ ɲaan wɔ̀ tɛ, ntiŋ i ǹʼma ninkunŋ. Ntiŋ i Mariyamu cɛn awɔ mari i. 25Nka Yusufu fa Mariyamu dɛbɛ kì, fɔ ŋì i ta so nmari jɛri ki sun. Nmari i na jɛri danshuru ra, Yusufu i ǹʼtɔ ki ye tu Yesu.
S'ha seleccionat:
Matiyu 1: JOB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Wycliffe Bible Translators, Inc.