Lucas 22
22
Ro Plano nga Patyon si Jesus
(Mat 26:1-5; Mar 14:1-2; Juan 11:45-53)
1Maeapit lang mag-abot ro Pagtililipon sa Pagdumdum ku Pagkaon it Tinapay nga Owa it Pangpaalsa, nga ginatawag man nga Pagdumdum ku *Pagtaliwan. 2Ro mga pinuno it mga saserdote ag ro mga maestro it Kasuguan hay nagainusoy it ideya kon paalin nanda hipapatay si Jesus pero nahadlok man sanda ay basi magkagulo ro mga tawo.#22:2 Ro andang nahadlukan hay basi magkagulo ro mga tawo kon dakpon nanda si Jesus sa Pagtililipon (basaha sa Mat 26:5 ag Mar 14:2).
Nakigkunsabo si Judas sa mga Pinuno it mga Saserdote nga Traiduron si Jesus
(Mat 26:14-16; Mar 14:10-11)
3Nagsueod dayon si Satanas kay Judas nga ginatawag nga Iscariote nga sambilog man sa doseng ka sumueunod ni Jesus. 4Nag-adto imaw sa pinakapinuno nga saserdote ag sa mga opisyal it mga gwardya it Templo agod makigkunsabo kon paalin nana buligan sanda nga hidakop si Jesus. 5Nalipay gid sanda ag ginpangakuan nanda si Judas nga taw-an it kwarta. 6Nagsugot man si Judas ag umpisa kato hay nagbinantay imaw it kahigayunan nga ikapadakop kanda si Jesus kon owa eon it abong tawo.
Ginpapahaom ni Jesus ro Ihapon Para sa Pagdumdum
(Mat 26:17-19; Mar 14:12-16)
7Nag-abot eon ro primero nga adlaw it Pagtililipon sa Pagdumdum ku Pagkaon it Tinapay nga Owa it Pangpaalsa. Ruyon ro adlaw nga ginapatay nanda ro tiyo it karnero para sa ihapon sa Pagdumdum ku *Pagtaliwan. 8Ngani ginsugo ni Jesus sanday Pedro ag Juan. Hambae ni Jesus, “Panaw eon kamo ag magpahaom ku atong ihapon sa rayang Pagdumdum ku *Pagtaliwan.”
9Nagsabat sanda, “Siin mo ra gusto nga ipahaom namon?” 10Nagsabat si Jesus, “Adto kamo sa syudad. May inyo idto nga hisubeang nga eaki nga may daea nga sangka banga nga tubi. Sunda ninyo imaw hasta sa sueod it baeay nga anang sudlan. 11Hambaea dayon ninyo ro tagbaeay nga ginapapangutana maton it maestro kon siin ro kwarto nga puydi nandang gamiton kon mag-ihapon sanda ku anang mga sumueunod makaron nga Pagdumdum ku *Pagtaliwan. 12Daehon dayon kamo it tagbaeay sa ibabaw. May idto nga mabahoe nga kwarto nga una eon ro tanan natong kinahangeanon. Idto ninyo pahauma ro atong ihapon.”
13Nagpanaw ro daywa ag hapamatud-an nanda nga matuod ro mga ginhambae ngato ni Jesus. Nagpahaom dayon sanda ku tanan nandang kinahangeanon para sa ihapon sa Pagdumdum ku *Pagtaliwan.
Ro Ihapon nga Mangin Padumdum ku Kamatayon ni Jesus
(Mat 26:26-30; Mar 14:22-26; 1 Cor 11:23-25)
14Tag oras eon nga inog-ihapon, nagkaon si Jesus kaibahan ro mga apostoles. 15Naghambae imaw kanda, “Gusto ko gid nga mag-ililiba kita sa pagkaon it rayang ihapon sa Pagdumdum ku *Pagtaliwan bago ako mag-antos. 16Ginahambae ko kinyo nga indi eon ako magkaon it uman kara hasta nga indi matuman ro ana kara nga ginapatungdan. Ruyon ro oras kon siin ro kaeuwasan ku tanan nga sinakpan it Dyos hay kumpleto eon gid.”
17Nagbuoe dayon imaw it kopa nga may bino ag ginpasaeamatan ra sa Dyos. Naghambae dayon imaw, “Hara, inom kamo kara tanan. 18Ginahambae ko kinyo nga umpisa makaron hay indi eon ako mag-inom pa it bino hasta sa oras nga nagaselebrar eon idto sa eangit ro tanan nga mga sinakpan it Dyos.”
19Pagkatapos, nagbuoe imaw it tinapay, ginpasaeamatan ra nana sa Dyos, ginpihak-pihak ag gintao kanda. Hambae nana, “Raya ro akong eawas nga ginatao para kinyo. Himua ra ninyo permi sa pagdumdum kakon.”
20Pagkakaon nanda, nagbuoe eon man imaw it kopa nga may bino ag naghambae, “Ro sueod ku rayang kopa hay nagasimbolo ku bag-o nga kasugtanan nga gintao it Dyos sa tawo, ag ro akon nga dugo nga igauea por dahil kinyo hay gapalig-on ku kasugtanan ngara.
21“Pero, pamati kamo kakon. Ro tawo nga magatraidor kakon hay kaibahan nakon iya sa lamisa.#22:21 Sa andang kultura, maeain gid kon halitan it sangka tawo ro anang kasaeo (basaha sa Salmo 41:9). 22Magataliwan eon ako nga Unga it Tawo suno sa gintaeana it Dyos pero makaeueuoy ro magatraidor kakon ay makangingidlis gid ro matabo kana sa ulihi.” 23Pagkabati nanda kara hay nagpaeangutan-an ro mga sumueunod kon sin-o kanda ro gahimo kara.
Ro mga Sumueunod ni Jesus hay Dapat nga Mapainubuson ag Mabinuligon
24Ku ulihi, nagbinais ro mga sumueunod ni Jesus kon sin-o kanda ro ginakilaea it mga tawo nga pinakaimportanti. 25Ngani naghambae si Jesus kanda, “Ro mga hari iya sa kalibutan hay nagapamintas sa andang mga sinakpan ag gusto ku mga manogdumaea kuno nga tawgon sanda nga mga ‘Manogbulig it mga Tawo.’ 26Pero bukon dapat kamo it makaruyon tungod kon sin-o ro pinakaimportanti kinyo hay dapat nana nga bilangon ro anang kaugalingon nga matsa imaw ro pinakabata nga indi pa ikataha it iba, ag ro manogdumaea hay dapat mangin pareho it manogserbi. 27Sin-o sa daywa ro mas dungganon, ro gakaon sa lamisa o ro nagaserbi kana? Syempre, ro nagakaon sa lamisa. Pero umpisa nga nangin kaibahan ninyo ako hay nagsinerbi eo't-a ako kinyo.#22:27 Basaha sa Mat 20:28 ag Mar 10:45.
28“Kamo ro nag-unong kakon sa mga kalisod nga akong haagyan nga nagtentar kakon nga indi lang magpadayon sa atong bueuhaton. 29Dahil karon hay taw-an ko kamo it otoridad nga maghari pareho ku pagtao karon kakon ku akon nga Ama sa eangit. 30Ngani padunggan ko kamo ag mangin kaibahan nakon kamo permi sa pagkaon kon magselebrar eon idto sa eangit ro tanan nga sinakpan it Dyos. Ag padumaeahon ko kamo ku dose nga ka tribo ni Israel.”#22:30 Si Israel hay ginatawag man nga si Jacob ag may dose imaw nga ka unga ag gintawag nga Dose ka Tribo ni Israel ro andang mga kaapo-apohan.
Ginhambae Eagi ni Jesus nga Ipanghiwaea Imaw ni Pedro
(Mat 26:31-35; Mar 14:27-31; Juan 13:36-38)
31Naghambae dayon si Jesus, “Simon, Simon, pamati kakon. Nageaong si Satanas sa Dyos nga testingan nana kamo nga matsa ginaayag kamo pareho it harina. 32Pero ginpangamuyuan ko ikaw, Simon, nga indi maduea ro imong pagtuo ag pagkatapos nga makapanumbalik ka kakon hay palig-una man ro pagtuo ku imong mga igmanghod.” 33Nagsabat si Simon, “Ginuo, haom ako nga magpapriso ag mamatay kaibahan nimo.” 34Pero ginsabat imaw ni Jesus, “Patiha ako, Pedro. Bago magpamaeo ro manok sa rayang gabii hay ipanghiwaea mo it tatlong beses nga kilaea mo ako.”
Ginpapahaom ni Jesus ro anang mga Sumueunod sa Pag-atubang it mga Kalisod
35Naghambae dayon si Jesus sa anang mga sumueunod, “Tag ginpapanaw ko kamo ku hauna ngato nga owa ko kamo pagpadaeha it kahita, bag ag sandalyas, ginkueang baea kamo?” “Owa gid,” sabat nanda. 36Hambae pa gid ni Jesus kanda, “Pero makaron, kon magpanaw kamo, daeha ro inyong kahita ag bag, kon may inyo. Kon owa kamo it daga hay baligyaan ro inyong pangsanib agod makabakae kamo. 37Himua ninyo ron dahil ginahambae ko kinyo nga dapat nga matuman rondayang ginsueat ngara sa Sagrado nga Kasueatan parti kakon nga, ‘Ginbilang imaw nga isaea sa mga nagabaliwala sa Kasuguan it Dyos.’#22:37 Isa 53:12. Rondaya mismo nga ginsueat parti kakon hay madali lang matuman.” 38Nagsabat ro anang mga sumueunod, “Hara, Ginuo, may among daywang ka daga.” Hambae ni Jesus, “Hipos eon! Indi eon don naton pag-istoryahan.”
Nagpangamuyo si Jesus sa Getsemani nga sa Ubos it Bukid it Olibo
(Mat 26:36-46; Mar 14:32-42)
39Tapos, nagguwa si Jesus sa syudad ag nag-adto sa Bukid it Olibo pareho ku ana permi nga ginaobra. Nagmunot kana ro anang mga sumueunod. 40Pag-abot nanda idto, naghambae imaw kanda, “Pangamuyo kamo nga indi kamo matentar.” 41Nagpaeayo-eayo dayon imaw kanda ag nageuhod ag nagpangamuyo. 42Hambae ni Jesus, “Ama, kon mahimo hay indi mo lang ako pagpaagihon sa grabi nga kasakit nga akon nga aeatubadngon. Pero bukon it akon nga pagbuot ro dapat matuman kundi ro imo.” 43[May nagpakita dayon nga anghel halin sa eangit nga nagpabaskog ku anang buot. 44Matsa maeupok ro anang dughan ngani nagpangamuyo pa gid imaw. Ginpinanghueasan imaw it dugo nga nagtaeabilis ag nagtueo sa eugta.]#22:44 Ro mga bersikulo 43 ag 44 hay owa pagtapean sa ibang kopya it Sagradong Kasueatan sa Griniyego. 45Pagkapangamuyo nana, nagtindog imaw ag nagbalik sa anang mga sumueunod. Haabutan nana sanda nga hakatueugan sa andang kasubo. 46Ginhambae sanda ni Jesus, “Ham-an it nagakinatueog kamo? Bangon eon ag magpangamuyo agod indi kamo matentar.”
Gintraidor ag Gindakop si Jesus
(Mat 26:47-56; Mar 14:43-50; Juan 18:3-11)
47Nagahambae pa si Jesus kat may nag-abot nga abo nga mga tawo ag ginapangunahan sanda ni Judas nga sambilog sa doseng ka sumueunod. Nagpaeapit imaw kay Jesus ag ana ra kunta nga ginaharuan. 48Pero ginhambae imaw ni Jesus, “Haro pa ring gamiton sa pagtraidor kakon nga Unga it Tawo, Judas?” 49Pagkapan-o ku mga kaibahan ni Jesus nga matsa maeain eo't-a ro matabo hay naghambae sanda, “Hay ano, Ginuo, pangeab-on namon sanda ra?” 50Pero linabo eagi it sambilog kanda ro ulipon ku pinakapinuno nga saserdote. Ag nautas ro anang tuo kara nga dueunggan. 51Naghambae si Jesus, “Tama eon don!” Ana dayon nga ginbuytan ro dueunggan ku ratong ulipon ag ginpamayad. 52Ginhambae dayon si Jesus ro mga pinuno it mga saserdote, ro mga opisyal it mga gwardya it Templo ag ro iba pang mga lider it mga Judio nga nagadakop kana, “Ano ay? Matsa rebelde't-a ako nga nagdaea pa kamo it daga ag bakulo sa pagdakop kakon. 53Adlaw-adlaw hay gakilita kita idto sa Templo pero owa ninyo ako kato pagdakpa. Pero nag-abot eon ro inyong oportunidad nga gintaeana it Dyos ag gintaw-an eon ro nagahari sa kadudueman it oportunidad nga himuon ro anang gusto kakon.”
Ginpanghiwaea ni Pedro nga Kilaea Nana si Jesus
(Mat 26:57-58, 69-75; Mar 14:53-54, 66-72; Juan 18:15-18, 25-27)
54Gindakop dayon nanda si Jesus ag gindaea sa palasyo it pinakapinuno nga saserdote. Nagsunod man si Pedro pero idto imaw sa maeayo-eayo. 55Idto sa *lagwirta it ratong palasyo hay may kaeayo ag idto dapit nagpueungko ro mga tawo. Nag-iba man kanda si Pedro. 56Hakita imaw idto it sangka sueuguon nga bayi tag hahayagan imaw it kaeayo. Tinueok ku bayi si Pedro ag naghambae, “Kaibahan gid nana ro tawo ngara ho!” 57Pero nagbalibad 't-a si Pedro. Nagsabat imaw, “Tao kimo, nga bayi ka! Owa't-a ako kakilaea ku haning tawo ngato.”
58Maangan-angan hay may eaki nga nakapan-o kay Pedro. Hambae ku eaki, “Kaibahan ka gid-ing nanda.” Pero nagbalibad gid si Pedro, “Bukon a!”
59Pagkataliwan it mga sang oras, may eaki nga ginapinilit na gid-a nga magkaibahan sanday Pedro ag Jesus. Hambae nana, “Matuod gid-a nga kaibahan gid nana ro tawo ngara, ay tagaGalilea man ra imaw!”#22:59 Sayod ra nana dahil parehas maghambae si Pedro sa mga tagaGalilea. Basaha sa Mat 26:73. 60Pero nagsabat si Pedro, “Tao't-a ra! Owa't-ang kasayod ku imo ngarong ginahinambae!” Tag nagahambae pa si Pedro hay may nagpamaeo nga manok. 61Dikato man naglingot ro Ginuo ag ana nga gintueok si Pedro ag hadumduman ni Pedro ro ginhambae it Ginuo nga, “Bago magpamaeo ro manok sa rayang gabii hay ipanghiwaea mo it tatlong beses nga kilaea mo ako.” 62Pumanaw dayon si Pedro ag nagtinangis imaw it pwerti.
Si Jesus hay Gin-intrimis, Ginbakoe ag Gin-insulto
(Mat 26:67-68; Mar 14:65; Juan 19:1-3)
63Si Jesus ma't-a hay gin-inintrimis ag ginbinakoe ku mga nagagwardya kana. 64Anda imaw nga gintabunan sa mata ag ginbueus-bueusan it tueop ag paghinambaeon dayon, “Tugmaha abi kon sin-o ro nagtueop kimo.” 65Ag abo pa't-a ro andang ginhinambae sa pag-insulto kana.
Gin-imbistigar si Jesus sa Atubang it *Sanedrin
(Mat 26:59-66; Mar 14:53-64)
66Kat agahon eon hay nagtililipon ro bilog nga *Sanedrin, nga sanda ro mga pinuno it mga saserdote, ro mga maestro it Kasuguan ag ro kaibahan nandang mga lider. Anda dayon nga ginpadaea si Jesus sa andang atubang. 67Naghambae sanda, “Sabta kami kon ikaw ro Maneueuwas nga ginpromisa it Dyos.” Pero nagsabat si Jesus, “Bisan sabton ko pa kamo hay indi gid gihapon kamo magpati, 68ag kon magpangutana man ako kinyo hay indi gid ninyo ako pagsabton. 69Pero umpisa makaron, ako nga Unga it Tawo hay magapungko sa pinakadungganon nga pwesto sa tuo it Makagagahom nga Dyos.”#22:69 Salmo 110:1. 70Nagpangutana dayon sanda tanan, “Kon mawron hay ikaw baea ro Unga it Dyos?” Nagsabat si Jesus kanda, “Tama ro inyong hambae ngaron.” 71Pagkatapos hay naghambae sanda, “Ham-an it mausoy pa abi kita it iba pang testigo? Habatian eon naton ro ana mismong ginhambae!”
S'ha seleccionat:
Lucas 22: akl
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
2024 (Active) Wycliffe Bible Translators, Inc.