Luka 18
18
Isisenio yɔ woko nɔ joji ata ɓɨɓɨ
1Kʉdɔ, Yeso ɔ꞉tɔɓinjo isisenio mɛngana, naɓɔ apanɨa ɓɔ yɔsisekio anɨta angbinga ta muɓomu, sɔkɔmʉ nɔ bɔmbana. 2Ga ɨyɔ naɓɔ ɓɔ: «Ya꞉ɓio nɔ joji mʉngana, akɔ ɨkʉmbʉ mɛngana ɓɔ, ɨya a꞉ngɔɓikumomʉ Asɔɓɨɨ, nɔ, ɛ꞉na ɓombi kʉ ɓʉtʉʉ. 3Amati ɔ gʉlʉ ngɨananɨ, ya꞉ɓio tɨa kʉ nɔ woko mʉngana ngɨa a꞉ɓika nayɔ asigio ɓɔ: ‹Kio mʉkɔmbʉ ngʉwɔsɛmɨ nɔ mombi ɔ mʉkɔmbʉ ngɨasɛmɨ, nɔ, ta ɨmɨ akɛ nɨnɨanɨa nɔ ingono.› 4Amati ɔ makwaa maja, joji ɔ꞉yaa nawɔ akio ta yaa. Yakamɛngana, mbise ɔngɔ, ɔ꞉pʉnga yakanaka akɔsugo ɓɔ: ‹Gʉtʉ ndʉ nangɔkumomʉ Asɔɓɨɨ, gʉtʉ pɔ mombi kʉɓanɨ, 5dɔ, woko ngɨa anɛmɨ adamaniso, na꞊kio-sɨ mʉkɔmbʉ ngʉwangɔ tɨta kioni, ambɔ ɨsɨa-sɨ anɨka nɛmɨ anagbiso mʉtʉ aka, tɨa sɨanɨ.›»
6Kʉdɔ, Makwɔɓɨɨ a꞉ɓusigio ɓata ɓɔ: «Ʉkeni yaka ngɨyɛ joji ata ɓɨɓɨ ngɨananɨ a꞉sugo! 7Yɔɓieni-sɨ ɓɔ joji ata ɓɨɓɨ ngɨananɨ a꞉kio mʉkɔmbʉ ɓanɨ, Asɔɓɨɨ a꞊ngɔkwanana ndɨ kio mʉkɔmbʉ wɔ ɓombi ngʉɓa a꞉ɓʉchwa tɨa uɗo nɔgbɛ, ʉɓa, ɓanayɔ andɨanɨa angbinga muɓomu? Agbalɨa ndɨ ta gbalɨanɨ naɓɔ anɨkɨa isingo? 8Nanenu asigio ɓɔ, a꞊ɓʉɓɨnyɨa ɨɓɔ akɔ mʉkɔmbʉ ngʉweɓo ta gagaa. Yakamɛngana, angbinga ngɨa, ɨmɨ, Mwana ngɨyɔ Mombi, na꞊tɔa-ɔɔ, na꞊gbʉka ndɨ kʉɔ ɓombi ngʉɓa ɓanɔ báya, akɔ dɔdɔ ngɨakɛ?»
Migbo yɔ nɨta ɓepini
9Yeso ɔ꞉tenjo ɓata isisenio mɛngana akʉʉ ɔ ɓombi nganangana ngʉɓa, ɓa꞉sɨkana ndʉ ɓombi ɓɔta ngbingbii apɛɨ ɔ Asɔɓɨɨ, nɔ ʉɓa, ɓɛ꞉na ɓangɛ ɓaɓomu ta ɓʉtʉʉ. 10A꞉sugo ɓɔ: «Ɓombi ɓapɨnɨ ɓa꞉sa aɨkáá yɔ Asɔɓɨɨ anɨta. Mʉngana a꞉ɓio Mʉfalisayɔ nɔ ɨyɔmɔ ndɔmbɛ ɔ lipisa manjanja. 11Mʉfalisayɔ ɛ꞉maa apɛɨ ga gba, ɔ꞉pʉnga nɨta amʉtɨma ɓɔ: ‹Hoo Asɔɓɨɨ, nɔnatosio ʉbɨba, dɔ, nangɔmʉ ɨmɨ ngbanga ndʉ ɓombi ngaɓɔmɔ, ʉɓa, ɓa ɓombi ɓɔ ndiɓo, ɓombi ɓɔta ɓɨɓɨ nɔ ɓombi ɓɔ muso, nɔ pɔ ndʉ ndɔmbɛ ɔ lipisa manjanja ngɨa. 12Nakyɔtaa idyo akɔ angbinga, machaa kapɨnɨ amati ɔ pɔsʉ mʉngana, nɔ, akɔ ɨyɛmɔ iɓomʉ ngɨyɛ nɛnɨanɨa nayɔ, nakyenjo mʉngana wɔ tɛkɛɓɛ.› 13Yakamɛngana, ndɔmbɛ ngɨananɨ, ɛ꞉maa yangɔ ta ɗu ɓɔ kɛlɛ. Sɔkɔmʉ ɔ꞉kanio pɔ nguso ajwa nɛkʉʉ, yakamɛngana, ɔ꞉ɓotono ɨgʉngʉ nɔ ikoko, ɔ꞉pʉnga nɨta ɓɔ: ‹Hii Asɔɓɨɨ, anɛnɨa ɓaka ikoko, ɨmɨ mombi ata ɓɨɓɨ.›» 14Kʉdɔ, Yeso ɔ꞉tɔpipio akɔsugo tɨa ɓɔ: «Nanenu aɓɨa ɓɔ, mombi ɔ lipisa manjanja ngɨananɨ a꞉sa andɔngɔ tɨta ɓɔ Asɔɓɨɨ ɔmʉbayeni bayanɨ ɓɔ, a mombi ata ngbingbii, sɔkɔmʉ Mʉfalisayɔ. Dɔ, mombi ngɨa akʉnda apanana amesu kɔ ɓombi, Asɔɓɨɨ a꞊mudiso nɔ mʉdʉʉ, nɔ mombi ngɨa anudisoniso nɔ mʉdʉʉ, Asɔɓɨɨ a꞊mʉtʉmba tɨa nɔ ɨkʉʉ.»
Yeso ɔkiokio ɓana
(Mat 19:13-15; Mlk 10:13-16)
15Ɓombi ɓa꞉mɨkɨa Yeso nɔ ɓana ɓɔta bele bele, ɓɔ dɔ, ɨnapɨa lɨkɔndɔ akʉʉ eɓo. Ɨyɛ ɓakpata ɓɛna ɓanɨ, ɓɔ꞉ɓʉnyakɨa ta nyakɨa. 16Yakamɛngana, Yeso ɛ꞉soko ɓana ngʉɓɔnanɨ andɔngɔ, ga ɨyɔ ɓɔ: «Sɨeni ɓana anɨka andamɨ, nátɨɓʉnangyenimʉ, dɔ, Ɓʉngama ngʉɓɔ Asɔɓɨɨ, ɓa akɔ ɨkananja yɔ ɓombi ngʉɓa ɓa kʉndʉ ɨɓɔ. 17Ɨmɨ, nanenu asigio ta ingono, mombi ɔtɛtɨenimʉ Ɓʉngama ɓɔ Asɔɓɨɨ, ngbanga ndʉ mwana ata bele, a꞊ngɔkumonio sina amati ɔngɔ pɔ bele.»
Mombi ɔ lɨkyɛmʉ ɔyakanakɔ nɔ Yeso
(Mat 19:16-29; Mlk 10:17-30)
18Ngama mʉngana ɔ Ɓayuda ɔ꞉ɓokuo Yeso akɔsugo ɓɔ: «Mʉpananakɨa wɔta ngbingbii, nɔsisekio kɨa tanɨ anɨnɨanɨa nɔ uɓei wɔ mago nɔ mago?»
19Kʉdɔ, ga Yeso nayɔ ɓɔ: «Wɔnesoko ɓɔ mombi ata iɗo, dɔtanɨ? Mombi pɔ mʉngana angɔmʉ iɗo, yɔɓienimʉ ta Asɔɓɨɨ nangana. 20Ʉwɛ, wanɨmbɨa mapanʉ iɗo: ‹Watɨkɨamʉ ɓuso, watɨwamʉ mombi, watɨɓomʉ, watɨchwɛamʉ ɓʉdɛmʉ ɓɔ mʉjɛɛ, nɔ, kumo atɔ nɔ anʉ.›»
21Kʉdɔ, ngama ngɨananɨ, ɔ꞉mutosio Yeso ɓɔ: «Mapanʉ ngʉkɔnanɨ maɓomu, na꞉kʉkyananakɨa kyananakɨanɨ, anɨngwa ta nɔ ɨɓwana ngɨyɛsɛmɨ.»
22Ndʉ Yeso ɔ꞉ka yaka ngɨyɛnɛnɨ, ga ɨyɔ nayɔ ɓɔ: «Tɨta yaka mɛngana yɔnajangɔ. Sa agaba ɓayaka ɓaɓomu ngʉɓa wanaɓɔ, nɔ, wɔpakɨa ɓajanga ɓagyɛgyɛ ɓɔngɔ. Kʉdɔ, wɛ꞊nɨanɨa tɨa nɔ ɨjangɨa akʉʉ ɔ ɓisi. Mbise ɔngɔ, wɛka, nɔ, wɔnakpata.» 23Angbinga ngɨa ɔ꞉ka-ɔɔ ɓanɨ, gue ngɨananɨ ɔ꞉kwa ikoko nɔgbɛ, dɔ, a꞉ɓio nɔ lɨkyɛmʉ lɨja nɔgbɛ.
24Yeso anɨna ɓɔ, mombi ɔ lɨkyɛmʉ ɔkwɔ ikoko nɔgbɛ, kʉdɔ, a꞉sugo tɨa ɓɔ: «Ya ɓʉkaɨ akɔ ɓombi ɓɔ lɨkyɛmʉ akumonio akɔ Ɓʉngama ɓɔ Asɔɓɨɨ! 25Ya siasia akɔ nama ata mʉja ndʉ ngamɨa, akumonio akɔ ihoo yɔ ɗipio, anagaaka mombi ɔ lɨkyɛmʉ, akumonio akɔ Ɓʉngama ɓɔ Asɔɓɨɨ.»
26Ɓombi ngʉɓa ɓa꞉ɓio anʉka yaka ngɨyɛnɛnɨ, ɓɔ꞉ɓokuono ɓɔ: «Ndʉ yaɓio dɔ ɓanɨ, tɨa anɨ ɨyakɛ akwanana anɨnɨanɨa nɔ ɓʉhɛa?»
27Kʉdɔ, Yeso ɔ꞉ɓutosio ɓɔ: «Yaka ngɨyɛ yangɔkwanana kyananakɨa nɔ ɓombi, akɔ Asɔɓɨɨ, yakyananakɨa kyananakɨanɨ.»
28Kʉdɔ, ga Pɛtɛlɔ nayɔ ɓɔ: «Andɔ tɨa isu ngʉɓa ta꞉sɨa lɨkyɛmʉ ngɨleso, nɔ, tɔnakpata tɨta ʉwɛ.»
29Yeso ɔ꞉ɓusigio ɓɔ: «Nánenu anʉngɨa ta ingono, mombi ngɨa a꞉sɨa ɨkáá ngɨangɔ, pɔ moi angɔ, pɔ ɓamanye, pɔ ɨsɛ nɔ inye, pɔ ɓana ɓangɔ akʉʉ ɔ yaka yɔ Ɓʉngama ɓɔ Asɔɓɨɨ, 30ɛ꞊nɨanɨa tɨa nɔ lɨkyɛmʉ lɨja nɔgbɛ, akɔ angbinga ngɨa ɔ ɓʉɓʉnʉ, achana ɨlɛ a꞉ɓio jɛnɛ nalɔ pɛɨ. Nɔ akɔ makwaa ngʉka kanɨka, ɛ꞊nɨanɨa tɨa nɔ ɓʉhɛa ngʉɓɔ mago nɔ mago.»
Yeso ɔngakɔ yaka akʉʉ ɔ ikoko ngɨyɛ ɔmanɔ anɨdya
(Mat 20:17-19; Mlk 10:32-34)
31Yeso ɔ꞉sɨka ɓatitima tɛkɛɓɛ nɔ ɓapɨnɨ anɔ ambamba angɔ, kʉdɔ, ɔ꞉ɓusigio ɓɔ: «Ʉkeni iɗo, kyɛnda ngɨyeso anɔ Yelusalɛma ɨyɛ. Yaka iɓomu ngɨyɛ, magbɛ kɔ Asɔɓɨɨ ka꞉tɛndakɨa akʉʉ asɛmɨ, Mwana ngɨyɔ Mombi, yanɨsa akyananakɨa. 32Dɔ, ɓabinenjo alɨkɔndɔ lɔ ɓombi ngʉɓa ɓangɔmʉ Ɓayuda, nɔ ɨɓɔ, ɓɔ꞊nanononoko, nɔ, ɓɔ꞊nasɛaka, nɔ, ɓɔ꞊natokoko nɔ maɗaʉ. 33Ambise ɔ nɛmɨ akɔɓɛnda pimbo, ɓabinawa, nɔ, ambise ɔ makwaa kaatʉ, nɔ꞊jʉkana akɔ ingwo.»
34Yakamɛngana, ɓatitima ɓa꞉pemisomʉ yaka ngɨyɛnɛnɨ pɔ bele. Ɨsɨ yɔ yaka ngɨyɛnɛnɨ kʉ iɓomu, ya꞉ɓio ɨnayanɨɛ, nɔ ɓata sɔkɔmʉ ɓɨ꞉mbɨa ɓɔ Yeso a꞉ɓio-sɨ akʉnda anʉnga tanɨ.
Yeso ɔheiso mombi ɔ mamɔmɔ
(Mat 20:29-34; Mlk 10:46-52)
35Tɨa ndʉ Yeso a꞉ɓio tinene aɓɔya anɔ Yeliko, ɛ꞉na mombi ɔ mamɔmɔ mʉngana ɓawele anɔ ambamba ɔ ɨngbaa achochonoko. 36Ɨyɛ ɔ꞉ka ambaja ɔ ɓombi achana, ɔ꞉ɓokuo ɓɔ: «Ɨmanɨ-sɨ ɨyɛ yakɔchana?»
37Ɓɔ꞉mimbiiso ɓɔ: «Yeso ngɨa ɔ Najalɛtɨ ɨyananɨ akɔchana.»
38Kʉdɔ, ɔ꞉tʉɓɨa asugo ɓɔ: «Hii Yeso, Mwana ɔ mwana ɔ Dawidi, anɛnɨa ɓaka ikoko!»
39Ɓombi ngʉɓa ɓa꞉ɓio akyɛndaka apɛɨ amati ɔ ambaja ngɨananɨ, ɓɔ꞉mʉnyakɨa ɓɔ ɨgbaa ɓɔ woo. Yakamɛngana, ɨyɔ, ɔ꞉natɨa tɨa ɓʉmʉ nɔgbɛ ɓɔ: «Yeso, Mwana ɔ ngama Dawidi, anɛnɨa ɓaka ikoko!»
40Kʉdɔ, Yeso ɛ꞉maa, nɔ, ɔ꞉titio ɓɔ ɓɨmɨkɨa nayɔ. Ndʉ ɓɛ꞉ka nɔ mombi ɔ mamɔmɔ ngɨananɨ tinene nayɔ, Yeso ɔ꞉muɓokuo ɓɔ: 41«Wakʉnda ɓɔ nɨnakɨa ɨmanɨ?»
Ɔ꞉mutosio ɓɔ: «Makwɔɓɨɨ, nɨpʉnga ɓaka ɓata nɨna.»
42Ga Yeso nayɔ ɓɔ: «Pʉnga pɨ anɨna. Báya ngɨyɛsɔɔ, yɔnaheiso.»
43Ta angbinga ngɨananɨ, ɔ꞉pʉnga nɨna, nɔ kpata Yeso, ɨhɔ nɔ bibiso Asɔɓɨɨ. Ɓombi ɓaɓomu ngʉɓa ɓɛ꞉na yaka ngɨyɛnɛnɨ, ɓɔ꞉bibiso ɨɓɔ, Asɔɓɨɨ kʉ bibisoni.
S'ha seleccionat:
Luka 18: buuN
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc.