Luka 20
20
Angu ɔ ʉpanʉ ngʉwɔ Yeso
(Mat 21:23-27; Mlk 11:27-33)
1Ɓisi mʉngana, Yeso a꞉ɓio apanɨa, nɔ, ɓɨakɨa ɓombi Ɨsaʉ yɛta Iɗo amati ɔ ɨkáá yɔ Asɔɓɨɨ. Ɓangama ɓɔ ɓakumukumu, nɔ ɓapananakɨa ɓɔ mapanʉ, ɨhɔ nɔ ɓatataɓasie ɓɔ ɨkʉmbʉ, ɓɔ꞉mʉchwɛanɨa ga tutee. 2Kʉdɔ, ɓɔ꞉muɓokuo ɓɔ: «Atɨɓɨa-sɨ, yaka ngɨyɛ wa-sɨ akɨa ɨpɛ ɓɔ, ya akɔ ʉpanʉ wɔ anɨ, ga pɔ ɓɔ, anɨ akɛ a꞉nenjo ʉpanʉ wɔngɔ?» 3Yeso ɔ꞉ɓutosio ɓɔ: «Ɨmɨ, na-sɨ nenu aɓokuo kʉ yaka. Aɓɨeni-sɨ ɓɔ, 4uɓatiso ngʉwɔ Yɔanɨ a꞉tɨɓatisa, ga pɔ ɓɔ wa꞉ngwa atɨ Asɔɓɨɨ, ga pɔ ɓɔ wa꞉ngwa atɨ ɓombi?»
5Kʉdɔ, ɓɔ꞉pʉnga ayakanaka ati eɓo ɓɔ: «Tɔmutosieni ɓɔ: ‹Wa꞉ngwa atɨ Asɔɓɨɨ›, a꞊tɨɓokuo ɓata isu kʉ ɓɔ: ‹Akɔ yaka yɛmanɨ ná꞉mʉbayamʉ-ɔɔ?› 6Nɔ pɔ ɓɔ, tɔmutosieni ɓɔ: ‹Wa꞉ngwa atɨ ɓombi›, ɓombi ɓaɓomu ɓa꞊tɨɓɛnda nɔ makopi, dɔ ɨɓɔ ɓaɓomu, ɓɛ꞉mbɨa ɨmbɨanɨ ɓɔ Yɔanɨ, a꞉ɓio ɨgbɛ yɔ Asɔɓɨɨ.» 7Kʉdɔ, ɓɔ꞉mutosio Yeso ɓɔ: «Tangɔmʉ anɨmbɨa ɓɔ wa꞉ngwa gbanɨ.» 8Ga Yeso naɓɔ kʉ ɓɔ: «Gʉtʉ ɨmɨ, nangɔnisigiomʉ kʉɓanɨ ɓɔ, nakɨa yaka ngɨyɛnɛnɨ nɔ ʉpanʉ wɔ anɨ.»
Isisenio yɔ ipumo yɔ mujabibo
(Mat 21:33-46; Mlk 12:1-12)
9Kʉdɔ, Yeso ɔ꞉pʉnga anʉngakɨa ɓombi isisenio ɓɔ: «Mombi mʉngana a꞉hʉna kʉbaa ɔ mijabibo, nɔ, ɔ꞉mʉsɨa alɨkɔndɔ lɔ ɓombi ngʉɓa ɓahʉna mijabibo. Mbise, ɔ꞉sa kyɛnda yɔ makwaa. 10Tɨa akɔ angbinga ɔ ɗʉkʉa lipumo, ɔ꞉tʉma baya angɔ mʉngana, atɨ ɓombi ngʉɓa a꞉ɓʉsɨa nɔ tɛa yɔ kʉbaa, dɔ, ɓiminjo tɨa ʉkangɔ. Yakamɛngana, ɓombi bɔ tɛa yɔ kʉbaa, ɓɔ꞉mʉɓɛnda baya ngɨananɨ ta ɓɛnda, nɔ, ɓɔ꞉mutoso ta lɨkɔndɔ ɓʉtʉʉ. 11Kʉdɔ, makwɔ ɔ kʉbaa ɔ꞉tʉma ɓata ta baya ngɔmɔ, yakamɛngana, ɓombi ngʉɓa ɓa꞉ɓio apɛmakɨa kʉbaa, ɓɔ꞉mʉsɛaka ɓɔ kyɛ kyɛ kyɛ, ɓɔ꞉mʉyapakiso, nɔ, ɓɔ꞉mutoso ɓata ta lɨkɔndɔ ɓʉtʉʉ. 12Ɔ꞉tɔtʉma ɓata baya ngɨyɔ ɓeetu. Gwa ngɨananɨ pɛpɛ tɨa, ɓɔ꞉mʉkwakaka lɨpɨ, nɔ, ɓɔ꞉mugiso aɓei.
13Makwɔ kʉbaa, ɔ꞉ɓokuono tɨa ɓɔ: ‹Nɔsisekio kɨa tɨa tanɨ aka? Na꞊tʉma-sɨ tɨa mwana ngɨa asɛmɨ ɔ ɓʉkʉnda. Haya! Ɓa꞊mukumo pɛpɛ ɨyɔ, tɨa kumoni.› 14Yakamɛngana, ndʉ ɓɛ꞉na mwana ngɨananɨ ɔ makwɔ kʉbaa, ɓɔ꞉pʉnga yakanaka ati eɓo ɓɔ: ‹Oi, ɨyɔ akɛ, a꞊dya suo mʉgyɛndɔ wɔ maɓɨɨ ngʉwa, tʉmʉweni, iɗo ambɔ tɨta isu akɛ tʉʉdya.› 15Kʉdɔ, ɓa꞉muchweiso aɓei ɔ kʉbaa, nɔ ɓɔ꞉sa nayɔ anɨwa.» Kʉdɔ, Yeso a꞉ɓuɓokuo tɨa ɓɔ: «Makwɔ kʉbaa a꞊ɓʉkɨa sina tanɨ? 16Ɨyɛ ɛ꞊ka sinani, a꞊ɓʉmaa ɓombi ngʉɓɔnanɨ ta ɓaɓomu ɓɔ sɛ, nɔ, e꞊njo kʉbaa tɨa alɨkɔndɔ lɔ ɓombi ngaɓɔmɔ.» Ndʉ ɓombi ɓɔ꞉ka yaka ngɨyɛnɛnɨ, kʉdɔ, ɓa꞉tosio aka ɓɔ: «Yaka ngɨyɛnɛnɨ ya꞊tɨkyananakɨamʉ-gɔ sinani pɔ!»#20:16 Ɓayuda ɓa꞉nga ɓanɨ, dɔ ɓɔsɨkeni ɨtaka ngɨyeɓo, ɓakumonio mʉgwɛ
17Yakamɛngana, Yeso ɔ꞉ɓʉkanga ɓɔ gbɔɔ, ga ɨyɔ naɓɔ ɓɔ: «Ɨsɨ yɔ Mabii kɔ Asɔɓɨɨ ngʉka ɓa꞉tɛndakɨa-a, ya-sɨ tanɨ?
‹Ikopi ngɨyɛ ɓombi ɓɔ tuɓoko lɨkáá, ɓa꞉igiso anɔ ambamba,
tɨa ɨyɔ, yɛ꞉ka ikopi yɔ ɨjangɨa nɔgbɛ!›#popoko Mmb 118:22
18Mombi muɓomu ngɨa a꞊kwa akʉʉ ɔ ikopi ngɨyɛnɛnɨ, a꞊ɓunjoko ɓunjokoni, nɔ mombi ngɨa ikopi ngɨyɛnɛnɨ ya꞊mʉkwɨa, ya꞊mutio ta ɓɔ sɛkɛsɛkɛ.»
Alipa manjanja
(Mat 22:15-22; Mlk 12:13-17)
19Ɓapananakɨa ɓɔ mapanʉ, nɔ ɓangama ɓɔ ɓakumukumu, ɓa꞉pemiso ta iɗo ɓɔ Yeso, ɔ꞉ngakɔ isisenio ngɨyɛnɛnɨ ta akʉʉ eɓo. Kʉɓanɨ, ɓɔ꞉pʉnga ahata ɓɔ ɓamʉfa Yeso tanɨ. Yakamɛngana, ɓɔ꞉kumo tɨa ɓombi. 20Kʉdɔ, ɓɔ꞉pʉnga tɨta yengio Yeso. Kʉdɔ, ɓɔ꞉mʉtʉmɨa ɓombi ngʉɓa ɓa꞊ɓio akɨaniso ndʉ ɓa ɓombi ɓɔta ngbingbii. Ɓombi ngʉɓɔnanɨ, ɓa꞉ɓio ahata ɓɔ Yeso ɨfana akɔ ipindi, ta ɨngbaa akɔ yaka ngɨyɛ a꞊chwɛiso amonu ngʉkangɔ ingainga. Dɔ, ɓɨmʉchɔngɨa, nɔ, ɓɨmʉgaba alɨkɔndɔ lɔ Pilatɔ, ngama wɔ ihoi yɔ Yudɛa. 21Ga ɨɓɔ nayɔ ɓɔ: «Mʉpananakɨa, tanɨmbɨa ɓɔ yaka ngɨyɛ wanʉngaka, nɔ ɨyɛ, wakɔpanɨa ya ngbingbii. Wangɔnapiokomʉ ʉwɛ ɓombi nɔ mababa. Yakamɛngana, wakyɔpanɨa mapanʉ kɔ Asɔɓɨɨ maɗo nɔgbɛ. 22Atɨsigio-sɨ yaka ngɨyɛ: Ya ndɨ kʉɔ ʉpanʉ akɔ isu, alipa manjanja ngʉkɔ ngama ata mʉja ngɨyɔ Ɓalɔma#20:22 ngama ata mʉja ngɨyɔ Ɓalɔma: pɔ ɓɔ Kaisali nɔ ɨbʉla? Ga pɔ iii, ga pɔ ɓɔ haa.»
23Yakamɛngana, ndʉ Yeso ɛ꞉mbɨa lipindi ngɨleɓo, ga ɨyɔ naɓɔ ɓɔ: «Anapaneni-sɨ agyɛgyɛ mʉngana ananɨ. 24Mesu, nɔ mabii ngʉka ɓa꞉tɛndakɨa akʉʉ angɔ, kanɨ?» Ɓɔ꞉mutosio ɓɔ: «Ya muyendu wɔ ngama ata mʉja ngɨyɔ Ɓalɔma.» 25Kʉdɔ, Yeso ɔ꞉ɓusigio ɓɔ: «Ndɨ ya ɓanɨ, lɨkyɛmʉ ngɨlɛ ngama ata mʉja ngɨyɔ Ɓalɔma, minjeni kʉ ngama ata mʉja ngɨyɔ Ɓalɔma, nɔ, lɨkyɛmʉ ngɨlɛ Asɔɓɨɨ, nɔ́minjo kʉ Asɔɓɨɨ.» 26Nɔ tɨa kʉ ananɨ, sɔkɔmʉ ɓɛ꞉na ɨngbaa ngɨyɛ ɓamʉnapɨa-ɔɔ nɔ mʉkɔmbʉ. Yakamɛngana, yaka ngɨyɛ a꞉ɓutosio, yɔ꞉ɓʉmbangɨa, nɔ, ɓɔ꞉gbaa ga woo.
Ɓɔɓokuo yaka akʉʉ ɔ jʉkana akɔ ingwo
(Mat 22:23-33; Mlk 12:18-27)
27Mbise ngɨananɨ, nganangana ɔ Ɓasadukayɔ, ɓɛ꞉ka atɨ Yeso, (Ɓasadukayɔ ngʉɓa, ɓa꞉ngɔtɨbayamʉ ɓɔ jʉkana akɔ ingwo, ya sina kʉɔ.) Ga ɨɓɔ nayɔ ɓɔ: 28«Mʉpananakɨa, Musa a꞉tɨtɛndakɨa ʉpanʉ ɓɔ: ‹Gue ɔweni, nɔ, ɔsɨa moi ngɨa ɓa꞉nɔtamʉ nayɔ mwana, moi ngɨananɨ, anasana tɨta manye ɔ swaɨ. Iɗo ambɔ, ɨnɔtɨa abɨɨ ɔ manye ɓana.› 29Ɨnadɔ, ya꞉ɓio nɔ ɓana ɓɔ ɓegue mɛɗɨanɛka ʉɓa ɓa꞉chwɛa ta ɓʉa mʉngana. Tapio ɔ꞉sɨka moi, nɔ ɔ꞉wo sɔkɔmʉ ɓɨnɔta mwana. 30Gwa ngɨyɔ ɓepini ɔ꞉mʉnasana, 31nɔ gwa ngɨyɔ ɓeetu ɓata kʉɓanɨ, akɔɓɔya ta aka mupipio a꞉tɔmʉnasana-ɔɔ, nɔ ɨyɔ, ɔ꞉wo sɔkɔmʉ ɓɨnɔta pɔ mwana kʉɓanɨ. 32Ambise ɔ yaka ngɨyɛnɛnɨ, ɨyɔ woko ngɨananɨ, ɔ꞉tɔwo ɨyɔ tɨa kʉ woni. 33Sina tɨa akɔ ɓisi ɓɔ jʉkana akɔ ingwo, ʉɓa ɨɓɔ ɓaɓomu, ɓa꞊jʉkana-ɔɔ, woko ngɨananɨ, a꞊ɓio tɨa moi ɔ anɨ? Dɔ ɨɓɔ ɓaɓomu mɛɗɨanɛka, ɓa꞉mʉsɨka sɨkanɨ.»
34Kʉdɔ, Yeso ɔ꞉ɓutosio ɓɔ: «Amati ɔ uɓei ngʉwa ɓʉɓʉnʉ, ɓague nɔ ɓoi ɓakyɔsɨkana sɨkana. 35Yakamɛngana, ɓague nɔ ɓoi ngʉɓa ɓa꞊ɓio sina ɓasisekie akɔjʉkana aingwo, nɔ, ɓio amati ɔ uɓei ngʉwa wa sina anɨka, ɨɓɔ, ɓa꞊ngɔsɨkana ɓata sina pɔ sɨkana. 36Nɔ, ɓa꞊ngɔwo sina ɓata kʉɓanɨ, dɔ, ɓaɓio tɨa ndʉ ɓamalaika. Ɓa꞊ɓio tɨa ɓana ngʉɓɔ Asɔɓɨɨ, dɔ ɨyɔ, a꞊ɓio tɨa ɓɔ ɔɓʉjʉkaniso aingwo jʉkanisoni. 37Amati ɔ ɨkpa ngɨyɛ ya꞉ɓio aɗɛtɨa, Musa ɛ꞉soko Makwɔɓɨɨ ɓɔ: ‹Asɔɓɨɨ ɔ Abalaama, Asɔɓɨɨ ɔ Isaka, nɔ Asɔɓɨɨ ɔ Yakɔɓɔ ngɨa ɓanayɔ abibiso.›#popoko Chw 3:6 Ɨyɛnɛnɨ, yapananiso aɓʉmba ɓɔ, ɓombi ngʉɓa ɓa꞉sio, ɓa꞊jʉkana sina akɔ ingwo jʉkananɨ. 38Asɔɓɨɨ angɔmʉ Asɔɓɨɨ ɔ mɨnda, yakamɛngana, ɨyɔ a, Asɔɓɨɨ ɔ ɓombi ngʉɓa ɓa-sɨ kʉɔ, dɔ, ɓombi ɓaɓomu ɓanɔ uɓei apɛɨ angɔ.»
39Ga nganangana ɔ ɓapananakɨa ɓɔ mapanʉ nayɔ ɓɔ: «Mʉpananakɨa, wɔ꞉ngakɔ yaka ngɨyɛnɛnɨ iɗo.» 40Mbise ngɨananɨ, mombi a꞉kanio tii ɓata nayɔ aɓokuo yaka.
Klisito a Mwana ɔ mwana ɔ Dawidi
(Mat 22:41-46; Mlk 12:35-37)
41Kʉdɔ, Yeso ɔ꞉tɔɓuɓokuo tɨa ɓɔ: «Nɔ ɨngbaa nga yeno tanɨ, ɓombi ɓa dɔ tɨa asugo ɓɔ Klisito#20:41 Klisito: pɔ ɓɔ Masia a꞉chwɛa akɔ ɨfananja ngɨyɔ ngama Dawidi? 42Dɔ ɨyɔ Dawidi, a꞉tɛndakɨa amati ɔ ɨtaɓʉ yɔ Mambɔ ɓɔ:
‹Asɔɓɨɨ Makwɔɓɨɨ a꞉sigio Makwasɛmɨ ɓɔ:
wolo aɨkɔndɔ ngɨyɛsɛmɨ yɔ gue ɔngɔ.
43Akɔɓɔya aka na꞊napɨa-ɔɔ ɓamʉyaa ngʉɓɔsɔɔ,
ɨda yɔ napɨa mɨtɨndɨ ngɨyɛsɔɔ.›#popoko Mmb 110:1
44Dɔ, Dawidi ɛ꞉soko Masia ɓɔ: ‹Makwɔɓɨɨ›. Masia a dɔ-sɨ tɨa mwana angɔ, nɔ ɨngbaa nga yeno tanɨ?»
Kanganɨeni nɔ ɓapananakɨa ɓɔ mapanʉ
(Mat 23:1-36; Mlk 12:38-40)
45Ta ananɨ apɛɨ ɓombi ɓaɓomu ngʉɓa, ɓa꞉ɓio nayɔ anʉka, ga Yeso nɔ ɓakpata ɓɔ: 46«Pɛmanɨeni nɔ ɓapananakɨa ɓɔ mapanʉ. Ɨɓɔ, ɓakʉnda kyɛndanaka nɔ lɨpʉkʉ lɛta lɨta lɨta ɓɔ yuu yuu, ɨlɛ lɔ ʉbɨba, nɔ, ɓɔkʉnda ɓɔ ɓombi ɓɨɓuɓokuo nɔ ʉbɨba alɨda lɔ nujonokio. Nɔ, ɓɔhata wolo ta apɛɨ amati ɔ ɨkáá yɔ nɨta, nɔ akɔ lɨda lɔ mambɔ, ɓɔhata kʉ mawolo kɔ ʉbɨba. 47Ɓahɨnɨa ɓawoko lɨkyɛmʉ ta hɨnɨa, nɔ, ɓɔgbaliso nɨta ɓɔ ndɨɨ, dɔ, ɓombi ɓiɓio naɓɔ anɨna. Ɓa꞊kio sina mʉkɔmbʉ wɔ ɓague ngʉɓɔnanɨ, ɓʉkaɨ nɔgbɛ.»
S'ha seleccionat:
Luka 20: buuN
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc.