KEJADIAN 12
12
Abram Bicereg ya Jenang
1Yahweh Kiurok nu Abram,
“Dekloh lengrik hek, sedara-mara hek, ru deg apak hek.
Etloh nu lengrik de doh Ngternyol nu hek.
2Eng doh Ngog hek kenon-cenok de jeoi,
ru enai doh naijadi nanek bangse de entoi.
Eng doh Ngberkat hek ru Ngpejadi muh hek bikenal
lei hek hajadi berkat ha bangse-bangse kilek.
3Eng doh Ngberkat sengoi de naiberkat hek,
ru Eng doh Ngpecelaka sengoi de naipecelaka hek.
Dikdij bangse ku bumi doh biberkat melalui hek.”
4-5Abram kidek ju pekan Haran, kena begei ma de bior ya Yahweh nu kek. Ku mase ajeh, umur Abram 75 tahut. Abram kiet nu tik Kanaan besama ru ikenah, Lot ikenon sedara, ru naien dikdij harta ru hambe-hambe de naikep ku pekan Haran.
Telas nailei ku Kanaan, 6naijelajah tik ajeh lei nailei ku keneng jehuk entoi ku More, ku kawasan kote Sikhem. (Ku mase ajeh, mai Kanaan lekat naigei ku tik ajeh.) 7Ku pajehloh Yahweh Kiperneng Ilei nu Abram ru Kiurok nu kek, “Adehloh tik de doh Ngog nu kenon-cenok hek.” Telas ajeh Abram kibeh nanek tempat ennog pesembahan ku pajeh ha Yahweh de ya Kiperneng Ilei nu kek. 8Telas ajeh Abram ru iperingak naipeteros ceknip nu tempat de berlod-lod ku englag timur Betel, lalu naibekemah ku engkap Betel ru Ai. Betel ajeh ku englag barat ru Ai ajeh ku englag timur. Ku pajeh juga enai beh nanek tempat ennog pesembahan ru naisembah ha Yahweh. 9Telas ajeh naipeteros ceknip ju nanek tempat nu tempat de kilek, naituju nu Negeb, bahagian selatan tik Kanaan.
Abram ku Lengrik Mesir
10Bile mong cengwag ku tik Kanaan, Abram ru iperingak naiet nu lengrik Mesir, naiha-gei ku pajeh sementare taleh, kerana cengwag ihad terok. 11Ku mase naiha-lintas sempadan lengrik Mesir, Abram kiurok nu ikenah Sarai, “Hek numom kerdor de kemmek. 12Bile mai Mesir naibakek hek, doh naiurok, ‘Kek adeh kenah Abram,’ lalu enai doh naiperdat eng ru naibiar hek hasui. 13Lebeh bor haurok hek adeh menang eng supaye naibeh bor ru naibiar eng ngsui kerana hek.” 14Telas nailintas sempadan lengrik Mesir, mai Mesir naibakek Sarai de ihad bor irenes. 15Memerip urag pegawei istane naibakek Sarai lalu naipasal nu raja tentang kerdor ajeh de ihad bor irenes. Jadi, Sarai bien nu istane. 16Kerana Sarai, raja kibeh bor nu Abram lalu kiog nu kek jeoi hambe kerdor ru keral, dombe ru kambeg, lembu, keldei, ru unte.
17Tapi kerana raja kikot Sarai kenah Abram ajeh, Yahweh Kipetiba penyaket de ihad terok nu raja ru dikdij mai ku kateh istane. 18Lalu raja kicereg Abram ru kitanya, “Maka de ya habeh nu eng? Yama hek pek hapasal kerdor adeh kenah hek? 19Yama haurok kek adeh menang hek ru habiar eng ngkot kek sebegei kenah eng? Adeh kenah hek, kotloh kek ru etloh!” 20Raja kiog perintah nu memerip urag ipegawei lalu naingeng Abram et ju lengrik ajeh besama ru ikenah ru dikdij iharta.
S'ha seleccionat:
KEJADIAN 12: AEH
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.