KEJADIAN 32
32
Yakub Kisekyap Kaha-Beburuk ru Esau
1Jadi, Yakub ru iperingak pen naipeteros ceknip enai. Lalu malikat-malikat Jenang naihol naiha-buruk kek. 2Bile Yakub kibakek malikat-malikat ajeh, kek kiurok, “Adehloh tempat pekemahan aska Jenang!” Kerana ajeh, kek kisebot tempat ajeh Mahanaim.#32:2 Mahanaim: Muh adeh imaksod, nar tempat pekemahan.
3Telas ajeh Yakub kingeng memerip urag naicip canuk untok naiburuk ru Esau itenek. Ku mase ajeh, Esau kigei ku tik Seir, daerah Edom. 4Yakub kior naiurok nu itenek Esau begei adeh: “Eng Yakub hambe jen. Selame adeh eng ya nggei ru Laban sebegei mai aseg. 5Hunen eng ya mong jeoi lembu, keldei, dombe, kambeg, ru hambe keral ru kerdor. Eng ngperlei gah ajeh nu jen supaye jen doh bor sengik nu eng.”
6Jadi, mai de bingeng ajeh naiet nu Esau ru naiperlei bengsat ju Yakub. Telas ajeh enai pen naijog nu Yakub ru naiurok, “Jik ya jiterbuk Esau tenek jen. Hunen kek ku kateh iceknip nu madeh kaha-buruk jen. Mong 400 urag sengoi de besama ru kek.”
7Bile kicerngai gah ajeh, Yakub ihad kisengoh ru kirisau. Jadi, kek kibahagi sengoi de besama ru ilei naijadi nar kumpulan. Begei ajeh juga de kibeh nu jeoi idombe, ikambeg, ilembu, ru iunte. 8Kek kipiker, “Amen Esau ru ianak buah naihol ru naiserag kumpulan de petame, doh kumpulan de kedue enggamak sempat naipeselamat ha diri liknai.”
9Lalu Yakub kibedoa, “Jenang de bisembah ya atok eng Abraham ru apak eng Ishak, cerngailoh eng! Enjen Yahweh. Jen ya Jenurok, ‘Jogloh nu tik lihek ru nu sesedara hek. Eng doh Ngbeh bor nu hek.’ 10Eng pek layak ngterima dikdij haknok ru kesetiean de ya Jenperneng nu hambe Jen adeh, kerana mase eng nglintas Batag arik Jordan adeh entem, had tungkat eng taleh de ngen. Tapi hunen eng ya ngjadi nar kumpulan. 11Eng ngsemanj, peselamatloh eng ju tenek eng Esau. Eng ngsengoh kek kihol kaha-serag ru kaha-pebinasa jik semua, temasok kekerdor ru sesanget. 12Ingatloh Jen ya Jenbejanji hal adeh: Jen doh Jenator bor dikdij ma pen ha eng ru doh Jenog jeoi kenon-cenok nu eng. Jengoi enai doh begei paser ku pantei lei pek mong numom pen de dapat bekira ha enai.”
13-15Telas Yakub kibet ku pajeh kelem ajeh, lalu kek kikot memerip ikor ju ibinatag daknek kaha-og nu Esau sebegei hadiah. Kek kikot 200 ikor kambeg ikenan, 20 ikor kambeg ibek, 200 ikor dombe ikenan, 20 ikor dombe ibek, 30 ikor unte ikenan de lekat naipermem ikekenon, 40 ikor lembu ikenan, 10 ikor lembu ibek, 20 ikor keldei ikenan, ru 10 ikor keldei ibek. 16Dikdij binatag ajeh kibahagi naijadi memerip kumpulan, lalu jap kumpulan ajeh kiserah nu ihambe-hambe. Telas ajeh kek kiurok nu enai, “Ciploh canuk ju eng, ru hodloh mong jarak ku engkap kumpulan de nanek ru kumpulan de kilek.”
17Lalu Yakub kiog arahan nu ihambe de cekcip canuk, “Amen tenek eng Esau kiburuk hek ru kitanya, ‘Bokka tuan hek? Nu belok haet? Binatag daknek bok de hawag ajeh?’ 18Urokloh begei adeh: ‘Dikdij adeh hak Yakub hambe jen. Kek kiog kumpulan adeh sebegei hadiah nu jen ituan. Yakub hambe jen tengah kidalag jik.’ ”
19-20Yakub kiog arahan de sama nu ihambe de kedue, ketige, ru dikdij sengoi de bitugas naiuros dikdij kumpulan binatag ajeh. Yakub kipiker kek buleh kipujok Esau ya hadiah-hadiah ajeh, ru bile baibeburuk doh, Esau mungken kimaap ha kek. 21Kerana ajeh, kek kiperlei hadiah-hadiah ajeh lebeh canuk tapi ilei sendiri kibukbet ku ikemah ku ikelem ajeh.
Yakub Kibegumul ku Peniel
22Ku kelem ajeh juga Yakub kikos. Lalu kek kien nar mom ikenah, nar mom igundek, ru 11 urag ikekenon nailintas Batag arik Yabok. 23Telas Yakub kipelintas enai, kek kilos nij ru kikirep juga dikdij ihak nu englag. 24Lalu kek kigei ku ikemah kihalei.
Mase kigei ku pajeh, hol numom keral ru kibegumul ru Yakub lei pegelap. 25Bile sengoi ajeh pek kimenang ku kateh pegumulan ajeh, kek kipet wog Yakub lei iengcop wog besalej. 26Lalu sengoi ajeh kiurok, “Terlasloh eng, pek liu nij mat arik doh kihol.”
Yakub kiberlag, “Amen pek jenberkat eng, eng pek ngha-terlas jen.”
27Sengoi ajeh kitanya, “Ma muh hek?”
Kek kiberlag, “Yakub.”
28Sengoi ajeh kiurok, “Muh hek pek Yakub nij. Hunen muh hek Israel kerana hek ya hamenang habegumul ru Jenang juga ru sengoi.”
29Yakub kiurok, “Pasalloh nu eng muh jen.”
Tapi sengoi ajeh kiberlag, “Pek payah hapanei muh eng!” Lalu kek kiberkat Yakub.
30Jadi, Yakub kiurok, “Eng ya ngneng renes Jenang, tapi lekat ngsui.” Kerana ajeh, kek kisebot tempat ajeh Peniel.#32:30 Peniel: Muh adeh imaksod, renes Jenang.
31Ku mase mat arik ya kihuj, Yakub kiet ju Peniel. Kek kicip dedueg kerana iengcop wog besalej. 32Lei hunen kenon-cenok Israel pek naicak sej de kitutop engcop wog binatag kerana Yakub kikena peknet ku iwog.
S'ha seleccionat:
KEJADIAN 32: AEH
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.