KEJADIAN 33
33
Yakub ru Esau Baibeburuk
1Pek liu ju kenjeh Yakub kibakek Esau kihol ru 400 urag ianak buah. Jadi, kek kicerlah ikekenon antare Lea, Rahel, ru nar mom igundek. 2Kek kidek nar mom igundek ajeh besama ru kekenon ubai ku ingar, telas ajeh Lea besama ru ikekenon, lalu Rahel ru Yusuf ku ikeknit sekali. 3Yakub pen kicip ku ngar enai semua. Sambel kiperek nu itenek, kek kisujod lei tujoh kali.
4Tapi Esau kijerjar kaha-terbuk nu Yakub, lalu kikawal ru kinyui kek. Ubai rimnar baijinjap. 5Bile Esau kiburuk kekerdor ru sesanget ajeh, kek kitanya, “Bokka enai de mong besama ru hek adeh?”
Yakub kiberlag, “Enai ajeh kekenon de biog ya Jenang nu eng.” 6Telas ajeh rimnar urag igundek ru kekenon ubai naiterbuk ru naisujod nu Esau. 7Lea ru ikekenon pen naiterbuk lalu naisujod. Ipenyudah Rahel ru Yusuf pen baiterbuk lalu baisujod.
8Esau kitanya, “Ha ma kenawat binatag daknek de ngburuk nek?”
Yakub kiberlag, “Eng nghod jenbekenan nu eng.”
9Tapi Esau kiurok, “Harta eng ya cukop. Hek pek payah haog hadiah nu eng.”
10Yakub kiurok, “Tok. Amen jenbekenan nu eng, terimaloh hadiah eng ajeh. Ku eng, ngneng renes jen sama begei ngneng renes Jenang kerana jen ihad ramah ru eng. 11Ngsemanj, terimaloh hadiah de ngen ajeh. Jenang ihad bor nu eng ru Kiog dikdij ma de ngperlukan.” Yakub teros kipaksa lei Esau kiterima ihadiah-hadiah ajeh.
12Telas ajeh Esau kiurok, “Beiloh harsekyap harha-cip. Eng doh ngcip besama ru hek.”
13Tapi Yakub kiberlag, “Ya jenpanei sesanget adeh pek kuat, ru eng mesti ngberhati-hati nu dikdij binatag daknek de tengah naipermem kenon. Amen hiwag deras hamapen nuarik, dikdij binatag ajeh doh naidat. 14Ciploh canuk. Eng doh ngdalag pelenghat ngjoi ceknip binatag daknek ru kekenon eng, lei ngdalag jen ku tik Seir.”
15Jadi, Esau kiurok, “Amen begei ajeh, borloh ngwes memerip urag anak buah eng ru hek.”
Yakub pen kiberlag, “Pek payahloh susah-susah. Eng had ngha-pesenang sengik jen.” 16Jadi, ku arik ajeh Esau kijog nu tik Seir. 17Tapi Yakub ru iperingak naiet nu Sukot lalu naibeh deg ha liknai ru tempat nelindog ha binatag daknek enai. Ajehloh isebab tempat ajeh bigelar Sukot.#33:17 Sukot: Muh adeh imaksod, tempat betedoh.
18Memerip iluniu ju kenjeh Yakub ru iperingak naiet ju Sukot ru naipeteros ceknip enai nu tik Kanaan. Ipenyudah, enai selamat nailei ku kote Sikhem ku tik Kanaan. Ku pajeh naipasag kemah ku englag kote ajeh. 19Lalu Yakub kibeli tempat de kibeh kemah ajeh ju kekenon Hamor. Kek kibayar 100 kepeg duet perak. Hamor ajeh apak Sikhem. 20Telas ajeh kek kibeh nanek tempat ennog pesembahan ku pajeh ru kiog muh tempat ajeh ‘El-Elohe-Israel’ de imaksod ‘Jenang ajeh Jenang Israel.’
S'ha seleccionat:
KEJADIAN 33: AEH
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.