ᒨᓯᓯ ᓯᕗᓪᓖᑦ 14
14
ᐂᑉᕋᐅᑉ ᓴᐳᑦᔨᓂᖓ ᓘᑎᒥᒃ
1ᑍᑦᓱᒪᓂ ᐊᖓᔪᖅᑳᕐᔪᐊᖅ, ᐊᒻᕋᐱᐅᓕ ᐹᐱᓘᓂᐊᒥ ᐊᖓᔪᖅᑳᕐᔪᐊᖑᑎᓪᓗᒍ, ᐊᕆᐅᑭᓗ ᐃᓚᓵᕆᒥ ᐊᖓᔪᖅᑳᕐᔪᐊᖑᑎᓪᓗᒍ, ᑭᑐ-ᓚᐅᒥᕆᓗ ᐃᓛᒥᒥ ᐊᖓᔪᖅᑳᕐᔪᐊᖑᑎᓪᓗᒍ, ᑍᑕᐅᓪ ᒍᐃᒥᒥ ᐊᖓᔪᖅᑳᕐᔪᐊᖑᑎᓪᓗᒍ, 2ᑖᒃᑯᐊ ᐅᓇᑕᕆᐊᓚᐅᕐᐳᑦ ᐊᖓᔪᖅᑳᕐᔪᐊᓄᑦ ᐅᑯᓄᖓ: ᐱᕋᒧᑦ ᓱᑑᒪᐅᑉ ᐊᖓᔪᖅᑳᕐᔪᐊᖓᓄᑦ, ᐱᕐᓴᒧᑦ ᒍᒨᕋᐅᑉ ᐊᖓᔪᖅᑳᕐᔪᐊᖓᓄᑦ, ᓯᓈᐱᒧᑦ ᐊᑦᒪᐅᑉ ᐊᖓᔪᖅᑳᕐᔪᐊᖓᓄᑦ, ᓯᒥᐸᒧᑦ ᔨᐳᐃᒥᐅᑉ ᐊᖓᔪᖅᑳᕐᔪᐊᖓᓄᑦ, ᐲᓚᐅᓪᓗ (ᑕᕝᕙ ᔪᐊᕆᐅᑉ) ᐊᖓᔪᖅᑳᕐᔪᐊᖓᓄᑦ. 3ᑖᒃᑯᐊᓕᒫᓪᓗ ᐃᒻᒥᖕᓄᑦ ᑕᐱᕇᓕᓪᓗᑎᒃ ᐅᓇᑕᕆᐊᓚᐅᕐᐳᑦ ᓇᕐᓴᒥ ᓯᑎᒥᒥᒃ ᐊᑎᓕᖕᒥ, ᒫᓐᓇᓕ ᑍᔭᐅᓕᕐᑐᒥᒃ ᐃᒪᕐᒥᒃ ᑕᕆᐅᕐᒥᒃ. 4ᑖᒃᑯᐊ ᐊᐅᓚᑕᐅᓚᐅᕋᒥᒃ ᑭᑐ-ᓚᐅᒥᕆᒧᑦ ᐊᕐᕌᒍᓂᒃ 12ᓂᒃ, ᐊᕐᕌᒍᓪᓕ 13ᒋᓕᕐᑕᖓᓂ ᑖᒃᑯᐊ ᑖᑦᓱᒥᖓ ᐊᑭᕋᕐᑐᓕᓚᐅᕐᐳᑦ. 5ᐊᕐᕌᒍᓪᓕ 14ᒋᓕᕐᑕᖓᓂ ᑭᑐ-ᓚᐅᒥᕆ ᑖᑦᓱᒪᓗ ᑕᐱᖏᑦ ᐅᓇᑕᕐᑐᒃᓴᖁᑎᓂ ᐃᓚᒋᓪᓗᒋᑦ ᐅᓇᑕᓚᐅᕐᐳᑦ ᓵᓚᒋᓪᓗᒍᓗ ᕆᐰᒻ ᐊᔅᑕᕈᑎ-ᑲᕐᓁᒥᒥ, ᔪᔨᒻᒥᓗ ᕼᐊᒥᒦᑦᑐᒥᒃ, ᐃᒥᒻᒥᓗ ᓴᕕ-ᑭᕆᐊᑍᒦᑦᑐᖅ, 6ᕼᐅᕅᑎᓪᓗ ᓰᐊᕐ ᖃᖅᑲᖓᓂᒥᐅᑦ ᓄᓇ ᐃᐅᓪᐸᕋᓐ ᐃᓄᖃᔪᐃᑦᑑᑉ ᑭᒡᓕᖓᓃᑦᑐᖅ ᑎᑭᓪᓗᒍ; 7ᑕᕝᕙᓐᖓᓪᓗ ᐅᑎᕆᐊᕐᓗᑎᒃ ᑲᑎᓯᒧᑦ ᑎᑭᓚᐅᕐᐳᑦ ᐃᓐᒥᓯᐹᑦᒧᑦ (ᑍᔭᐅᕙᓚᐅᕐᑐᖅ ᑲᑎᓯᒥᒃ), ᐊᒪᓕᑬᑎᓪᓗ ᓄᓇᓕᒫᖏᓐᓂᒃ ᐊᕐᓵᓚᐅᕐᐰᑦ, ᐊᒧᕅᑎᓪᓗ ᓄᓇᖃᕐᑐᑦ ᕼᐊᔭᔭᓐᒥ ᑕᒫᕆᒥ.
8ᑕᕝᕙ ᐊᖓᔪᖅᑳᕐᔪᐊᖅ ᓱᑑᒪᒥ, ᐊᖓᔪᖅᑳᕐᔪᐊᕐᓗ ᒍᒨᕋᒥ, ᐊᖓᔪᖅᑳᕐᔪᐊᕐᓗ ᐊᑦᒪᒥ, ᐊᖓᔪᖅᑳᕐᔪᐊᕐᓗ ᔨᐳᐃᒥ, ᐊᖓᔪᖅᑳᕐᔪᐊᕐᓗ ᐲᓚᒥ (ᑕᕝᕙ ᔪᐊᕆᒥ) ᐅᓇᑕᕐᑐᒃᓴᖁᑎᒥᖕᓂᒃ ᐅᓇᑕᕆᐊᕐᑐᕐᑎᑦᓯᕗᑦ, ᓯᑎᒥᐅᑉ ᓇᕐᓴᖓᓂ ᑲᑐᑦᔨᓪᓗᑎᒡᓗ ᐅᓇᑕᓕᕐᐳᑦ. 9ᑭᑐ-ᓚᐅᒥᕆᒥᒃ ᐃᓛᒥᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᑍᑕᐅᓪᑎᒃᓗ ᒍᐃᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᐊᒻᕋᐱᐅᓕᒥᒡᓗ ᐹᐱᓘᓂᐊᑉ ᐊᖓᔪᖅᑳᕐᔪᐊᖓᓐᓂᒃ, ᐊᕆᐅᑭᒥᒃᓗ ᐃᓚᓵᕆᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᐊᖓᔪᖅᑳᕐᔪᐊᑦ ᓯᑕᒪᑦ ᐅᓇᑕᓚᐅᕐᐳᑦ ᑕᓪᓕᒪᓄᑦ ᐊᖓᔪᖅᑳᕐᔪᐊᓄᑦ. 10ᑕᒪᓐᓇᓗ ᓇᕐᓴᖅ ᓯᑎᒻ ᒪᕐᕆᓐᓇᕐᑐᓂᒃ ᐅᓄᕐᑐᓂᒃ ᐃᑎᕐᓴᖃᐅᓚᐅᕐᐳᖅ; ᓱᑑᒪᒥᐅᓪᓗ ᒍᒨᕋᒥᐅᓪᓗ ᐊᖓᔪᖅᑳᕐᔪᐊᖏᑦ ᐅᓇᑕᕐᓂᕐᒥᑦ ᕿᒫᓇᓱᐊᕐᓗᑎᒃ, ᒪᕐᕆᓐᓇᕐᑐᓄᑦ ᑲᑕᖃᑦᑕᓚᐅᕐᐳᑦ; ᐊᓯᖏᓪᓕ ᐊᖓᔪᖅᑳᕐᔪᐊᑦ ᐊᓐᓇᓚᐅᕐᐳᑦ ᖃᖅᑲᓄᑦ ᕿᒫᓪᓗᑎᒃ. 11ᐊᑭᕋᖏᓪᓕ ᐱᖁᑎᓕᒫᖏᓐᓂᒃ ᑎᒍᓯᓚᐅᕐᐳᑦ ᓱᑑᒪᒥᑦ ᒍᒨᕋᒥᓪᓗ, ᓂᕿᒃᓴᓕᒫᖏᓐᓂᒡᓗ, ᑕᕝᕙᓐᖓᓪᓗ ᐊᐅᓪᓚᕐᓗᑎᒃ. 12ᓘᑎᓕ ᐂᑉᕋᐅᑉ ᖃᖏᐊᖓ, ᓱᑑᒪᒥ ᓄᓇᖃᓚᐅᕐᐳᖅ, ᑖᓐᓇᑦᑕᐅᖅ ᑎᒍᔭᐅᓚᐅᕐᐳᖅ ᐱᖁᑎᓕᒫᖏᓪᓗ ᑕᒪᕐᒥᒃ ᐱᖃᓯᐅᑦᔭᐅᓪᓗᑎᒃ, ᐊᐅᓪᓚᕈᑦᔭᐅᓪᓗᑎᒡᓗ.
13ᐃᓚᖓᓪᓕ ᕿᒪᒃᓯᓪᓗᓂ ᐊᓐᓇᓚᐅᕐᑐᖅ ᑎᑭᑉᐳᖅ, ᑕᒪᓐᓇᓗ ᑕᒪᕐᒥᒃ ᐅᖃᐅᓯᕆᕚ ᐂᑉᕋᒻᒧᑦ ᐄᑉᕉᒧᑦ, ᓄᓇᖃᕐᑐᖅ ᐆᒃᓂᒃ ᓇᐹᕐᑐᖃᕐᑑᑉ ᖃᓂᒋᔮᓂ ᒪᒻᕆᒧᑦ ᐱᖁᑎᒋᔭᐅᔪᓄᑦ ᐊᒧᕅᑎᒧᑦ, ᖃᑕᓐᖑᑎᖏᓪᓗ ᐃᔅᑯᓪ ᐊᓂᕆᓗ; ᑖᒃᑯᐊ ᐂᑉᕋᐅᑉ ᑕᐱᕆᓚᐅᕐᐰᑦ. 14ᐂᑉᕋᒻᓕ ᑐᓴᕋᒥ ᖃᖏᐊᖓᑕ ᑎᒍᔭᐅᓂᖓᓂᒃ, ᐅᓇᑕᕈᓐᓇᕐᑐᖁᑎᓕᒫᓂ ᓄᓇᒥᓃᑦᑐᑦ ᐊᖏᕐᕋᖓᓂ ᐃᓅᓯᒪᔪᑦ, ᑖᒃᑯᐊᓗ ᑲᑎᓪᓗᒋᑦ 318ᖑᓚᐅᕐᐳᑦ, ᐅᓇᑕᓚᐅᕐᐳᓪᓗ ᓄᓇᒧᑦ ᑖᓐᒧᑦ ᑎᑭᓪᓗᑎᒃ. 15ᑕᕝᕗᖓᓗ ᑎᑭᓐᓇᒥᒃ ᐅᓇᑕᕐᑐᒃᓴᖁᑎᓂ ᐊᕕᒃᑐᓚᐅᕐᐰᑦ ᐅᓐᓄᐊᒃᑯᑦ, ᑖᓐᓇ ᐱᔨᓂ ᐃᓚᒋᓪᓗᒍ, ᓯᕗᕐᖏᕐᐰᑦ. ᒪᓕᒡᓗᒋᓪᓗ ᓄᓇᒧᑦ ᕼᐅᐸ ᑎᑭᓪᓗᒍ, ᑕᒫᓯᑰᓯᐅᑉ ᐅᓐᓄᐊᓪᓗᐊᖓᓃᑦᑐᒧᑦ. 16ᑕᒪᕐᒥᒡᓗ ᐱᔭᐅᓚᐅᕐᑐᓕᒫᑦ ᐅᑎᕐᑎᓚᐅᕐᐰᑦ, ᖃᖏᐊᓂᑦᑕᐅᖅ ᓘᑎ ᐅᑎᕐᑎᓚᐅᕆᕚ ᐱᖁᑎᓕᒫᖏᓪᓗ ᑕᒪᕐᒥᒃ, ᐊᕐᓁᓪᓗ ᐊᓯᖏᓪᓗ ᑎᒍᔭᐅᓯᒪᔪᓕᒫᑦ.
ᒥᓪᑭᓯᑎᐅᑉ ᓮᒻᒪᕐᑎᑦᓯᓂᖓ ᐂᑉᕋᒻᒥᒃ
17ᐂᑉᕋᒻᓕ ᐅᑎᕐᒪᑦ ᓵᓚᖃᕐᓯᒪᓕᕐᓗᓂ ᑭᑐ-ᓚᐅᒥᕆᒥᒃ ᐊᓯᖏᓐᓂᒡᓗ ᐊᖓᔪᖅᑳᕐᔪᐊᓂᒃ, ᓱᑑᒪᒥᐅᑦ ᐊᖓᔪᖅᑳᕐᔪᐊᖓᑕ ᐸᕐᕆᐊᕐᐹ ᓇᕐᓴᒥ ᓵᕕᒥᒃ ᐊᑎᓕᖕᒥ (ᑍᔭᐅᕙᖕᒥᔪᒥᒃ ᐊᖓᔪᖅᑳᕐᔪᐊᑉ ᓇᕐᓴᖓᓂᒃ). 18#ᐄᑉᕈᐃᓄᑦ 7:1-10.ᒥᓪᑭᓯᑎᑦᑕᐅᖅ ᓴᓕᒥᒥ ᐊᖓᔪᖅᑳᕐᔪᐊᖑᔪᖅ ᑐᓂᓯᔭᕐᑐᓚᐅᕐᐳᖅ ᓂᐊᖂᔭᒥᒃ ᕔᓂᒥᒡᓗ; ᑐᓂᕐᕈᓯᕐᑎᑦᓯᔨᐅᓪᓗᓂᓗ ᒎᑎᒧᑦ ᖁᑦᓯᖕᓂᕐᐹᖑᔪᒧᑦ. 19ᓮᒻᒪᕐᑎᓪᓗᒍᓗ ᐅᖃᐅᑎᕚ, “ᐂᑉᕋᒻ ᒎᑎᐅᑉ ᖁᑦᓯᖕᓂᕐᐹᖑᔫᑉ ᓮᒻᒪᕐᑎᓪᓕᐅᒃ, ᕿᓚᖕᒥᒃ ᓄᓇᒥᒡᓗ ᓴᓇᓚᐅᕐᑑᑉ! 20ᒎᑎ ᖁᑦᓯᖕᓂᕐᐹᖑᔪᖅ ᖁᔭᒋᔭᐅᓕ, ᑖᓐᓇ ᐃᓕᖕᓂᒃ ᓵᓚᖃᕐᑎᑦᓯᖕᒪᑦ ᐊᑭᕋᕐᑐᕐᑎᖕᓂᒃ!” ᐂᑉᕋᐅᓪᓗ ᒥᓪᑭᓯᑎ ᑐᓂᓯᕕᒋᕚ ᓵᓚᖃᕐᓂᒃᑯᑦ ᐱᑖᕆᔭᒥ ᑕᓪᓕᒪᐅᔪᖏᓐᓂᒃ.
21ᓱᑑᒪᐅᓪᓗ ᐊᖓᔪᖅᑳᕐᔪᐊᖓᑕ ᐂᑉᕋᒻ ᐅᖃᐅᑎᕚ, “ᐱᖁᑎᓕᒫᑦ ᐱᑖᕆᓕᒃᑭᑦ, ᐃᓄᖁᑎᒃᑲᓕ ᐅᕙᓐᓄᑦ ᐅᑎᕐᑎᓪᓗᒋᑦ.”
22ᐂᑉᕋᐅᑉ ᑭᐅᕚ ᓱᑑᒪᐅᑉ ᐊᖓᔪᖅᑳᕐᔪᐊᖓ, “ᐊᑕᓂᐅᑉ, ᒎᑎᐅᑉ ᖁᑦᓯᖕᓂᕐᐹᖑᔫᑉ, ᕿᓚᖕᒥᒡᓗ ᓄᓇᒥᒡᓗ ᓴᓇᓚᐅᕐᑑᑉ ᓵᖓᓂ ᐅᖃᕕᒃᐳᖓ, 23ᐱᒋᔭᕐᓂᒃ ᓱᓇᒥᒡᓘᓐᓃᑦ ᐱᓂᐊᓐᖏᓚᖓ, ᐃᕙᓗᒃᓴᐅᑎᐅᒐᓗᐊᕐᐸᑦ, ᐃᑎᒐᒍᑎᐅᓪᓘᓐᓃᑦ ᓯᖏᕆᒐᓗᐊᕐᐸᒍ,#14:23 ᓯᖏᕆᒐᓗᐊᕐᐸᒍ ᐅᕝᕙᓗ ᐅᖏᕈᑎᒋᒐᓗᐊᕐᐸᒍ ᐅᖃᕐᑐᒃᓴᐅᖁᓇᒃ, ‘ᐅᕙᖕᒊᓐᓇ ᐂᑉᕋᒻ ᐊᔪᕐᓴᕈᓐᓃᕐᑎᓯᒪᔭᕋ.’ 24ᓇᖕᒥᓂᕐᑖᕆᓂᐊᕐᑕᓐᓂᒡᓕ ᐱᓂᐊᓐᖏᓚᖓ, ᐃᓅᓱᒃᑐᐃᓪᓕ ᐃᓚᒋᔭᒪ ᓂᕆᖃᑦᑕᓚᐅᕐᑕᖏᑦ ᑭᓯᒥ, ᐅᓇᑕᕆᐊᖃᑎᒋᓚᐅᕐᑕᒪᓗ ᐱᑖᕆᔭᕆᐊᖃᕐᑕᖏᓐᓂᒃ; ᐅᑯᐊᓗ ᐱᔭᕆᐊᖃᕐᑕᖏᓐᓂᒃ ᐱᑎᑕᐅᑦᓴᓚᐅᕐᐸᑕ ᐊᓂᕆ, ᐃᔅᑯᓪᓗ, ᒪᒻᕆᓗ.”
S'ha seleccionat:
ᒨᓯᓯ ᓯᕗᓪᓖᑦ 14: EAIB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Eastern Arctic Inuktitut Bible © Canadian Bible Society, 2012, 2021-2023.