Jon 1
1
God siragl mere moglkwa i, Jisas i nogugl ede norukwa
1Okna kaima ibo taragl ta plau dikrukwa igne, Ka mogl kodugwa. Ka i God bogl akie miurka te, Ka i yene God moglkwa. 2Oknayene Ibo ye God bogl miurka. 3Te, Ka i taragl mudu ere yogwa. Taragl mudu yene ta plau dikrikwa. Ye taragl mudu ere yogwa keme paigwa.
4Kor meglkwa mabuno i, ye mem moglkwa. Te, ye kor moglmara i, yoba abuglage si togwa. 5Abuglage i, si mim erumara edugwa. Te, mim ere mogl, abuglage si goginagledi erukwa i, kuno erekrukwa.
6Ana God ere mogl, yagl ta kogon dedugwa, ye kagie Jon we digwa. 7Jon udre, Abuglage siragl mere moglkwa di poran, yoba mudu pre medraiglkwa pre God ye dedugwa. 8Jon yene Abuglage moglkrukwa ba Abuglage di poragledi ugwa.
9Abuglage i, Abuglage kaima moglsre, yoba mudu abuglage si tenagledi ede makadigle ugwa. 10Ye ede makanagle ugwa ba taragl mudu ye ere yogwa meglkwa i, ye kan pogl sikrikwa. 11Ye yene yobama meglmara ugwa ba ye yobama ye ta kan, di ikrikwa. 12Ba yoba tau ye ira moglkwa pre kan ersre, pre mediglkwa i, ye God gagiglma moraiglmedi ere edugwa. 13Yoba u God gagiglema eigwa i, gak kiglmere mere yegl mo yoba yobuglno mina mo yoba nomaneno mina mo i ta manugwa. God swara ere edugo, u gagiglma eigwa.
14Ka i u yoba pidre, ede makandigle ugo, no yoba bogl akie munga. Mungo, ye siragl mere wakai yene moglkwa i kamga. Wakai yene moglmedi kamga i, God Wam swara moglkwa i, wakai yene yegl morabuka. Te, ye moglkwa i, ye ege ege dem muduo yoko kaima norsre, ka kaima keme di norukwa.
15Ana yagl Jon ikra we, ye yoba di nogugl ede tedre, ka podo yegl dugwa, Na okna ene di te, Yagl ta okuo udre, Yagl Kade mogl, na egre narabe diga i, yoba i pre diga. Na moglkrika igne, ye okna kaima ibo moglkwa pre ye Yagl Kade mogl, na egre narumiwe dugwa.
16God Wam moglkwa i, dem muduo podo norukwa pre ye nono ege ege yoko kaima ere wakai ere noro moglkwa. Ye mabunomo i ta dudukrukwa. 17Ene prio! God lomo i, ye Moses togo, Moses i nogugl edugwa ba God dem muduo yoko kaima norukwa ya ka kaima di nogugl ede norukwa mabunomo i, ye Jisas Krais mina i nogugl ede norukwa. 18Nono yoba munga i, ege swara ta gumuglno mina God kankrumga. God Wam swara ye God Nem bogl swara kaima miurko, te ye ama God moglkwa i, ye swara God Nem siragl mere moglkwa i, i nogugl ede norukwa.
Jon ye ira moglkwa i, Israel yoba kade di pogl togwa
(Matyu 3.1-12, Mak 1.7-8, Luk 3.15-17)
19-20Ana Juda yoba kade dumo Jerusalem meglkwa i ere mogl, yoba tau ye Jon moglmara pidre, kira pogl praiglmedi dedigo, eigwa. Ye tawa teigwa yoba tau ya Livai yoba tau dedigo, ye pidre, Jon yegl di prikwa, God Kere Yugwa Yagl Krais unabe digwa ikra, ene yagl i motnga uno? di, yegl di prikwa. Di priko, Jon nogugl di ikne ede te, Na ta moglkrie dugwa. 21Yegl dugo, ye aglke kor di prisre, Ene ira motne? Ene Elaija ikra motnga, uno? digwa. Digo, Jon, Na ta moglkrie dugwa. Dugo, ye, Ka Kep Yagl ta unabe digwa i, motno? digwa. Digo, Jon, Na ta manumiwe dugwa.
22Dugo, ye yegl di teigwa, Ene ira motnga i, no di noro. Di notn, Juda yoba kade no dedigwa i, kanen prisre, ede ikne pi ye di tenamga. Ene ira kaima mole dine? digwa. 23Yegl digo, Jon ye di tedre, God kamo kep yagl ta okna moglkwa, kagie Aisaia we digwa i, ye okna yegl dugwa, Yagl ta okuo dumo wau yomara moglsre, yoba ka kade di te, yegl dinabe dugwa, Yagl Kade unabara ene konbaunamo ake kun ersre, ere wakai erio!#1.23 Aisaia 40.3 dinabe dugwa. Na yagl i moluwe di, Jon yegl dugwa.
24Ana yoba Jon ka kira peglkwa i, Farisi ye dedigwa wigwa. 25Ye kira kor yegl di prikwa, Ene Krais moglkrie didre, Elaija moglkrie didre, God kamo kep yagl ta unabuka i, ene ama ta moglkrie dinga. Ene yoba yegl moglkitnga pre siragl eruko, ene yoba ake nigl atne ede, nigl bugl tene? di, yegl digwa. 26-27Yegl digo, Jon di ikne ede te, yegl dugwa, Na ede okna pidre, yoba ake nigl atne ede, nigl bugl teiga. Na kogon yegl erika ba yagl ta na moknamugl udre, kogon podo erabuka i, erme nono adigl munara magigl i, suna adigl moglkwa. Ye magigl i adigl moglkwa ba ene ye guma dra ta kankrime dugwa. Ye yagl kade kaima mogl, na egre narukwa. Ye yagl wakai kaima moglko, na yagl wakai ta moglkrika pre na ye niglmo kogonmo yoba mere yegl moglsre, kagle towo kan poko edenaglka i, na kuno ta erekriwe di, Jon yegl dugwa. 28Yoba u Jon moglmara kira peglkwa i, Jon yoba nigl Jordan nigl bugl tomara koglo ibo dumo ta Betani we digwa i, Jon moglko, digwa.
Jon ere mogl Jisas ye God sipsipmo nagigle moglme dugwa
29 Ana tagugo i, Jisas ye Jon moglmara ugo, Jon ye kandre, yoba magigl meglkwa i yegl di togwa, Yagl ta ugwa iro kanio! dugwa. Ye God sisipmo nagigle ugwa. Ye yoba mudu tadaglmeno gugl edenabuka yagl moglmiwe dugwa. 30Na okna ye pre digra, Yagl ta na moknamugl unabuka i, ye na moglkrika igne okna kaima ibo moglkwa pre ye kade mogl, na egrume diga. 31Na Israel yoba ake nigl atne ede, nigl bugl teiga i, yagl ta na moknamugl unabe diga ikra unan, yoba ye kan pogl sinaiglkwa pre kogon yegl eriwe dugwa. Na kogon yegl erika ba yagl ta unabe diga i, na ama ye ira moglkwa i, okna pre kan erekriwe dugwa. 32Na taragl swara ta kandre, yagl ugwa iro ye yagl ta unabuka ikra moglmedi kan pogl sie dugwa. Na kan moglko, God Murubuglo heven ibo mogl, kua yumugl pru dumere mere yegl pru di ede atne u ye moglmara pai moglko, kanie dugwa. 33Na yegl ta kankria, ye ira moglkwa i ta kan pogl sikriko, ba God, na yoba nigl bugl tenatnedi dedugwa i, okna yegl di narukwa, Na Murubuglona ede atne u yagl swara ta moglmara aimadi mogl tenan, ene kanatniwe dugwa. Yagl swara i ere mogl, Mudu Murubuglo ama yoba tenabiwe di, God yegl di narume dugwa. 34Ana God ye ene taragl yegl ta kanatne dugwa ikra na kaniga pre na ene erme di teiga, yagl erme ugwa iro, ye God Wam moglmiwe di, Jon yegl dugwa.
Yagl tau koragle Jisas duglo beglkwa
35Ana tagna ta i, Jon ye aglke kor nigl Jordan bina ye duglo biurka yagl suo bogl adigl meglko, 36Jisas wogwa. Wogo, Jon kandre, ye duglo biurka yagl suo i di te, yegl dugwa, Yagl ta God sipsipmo nagigle moglme diga ikra wogwa iro wa, kaniro! di, yegl dugwa. 37Jon yegl dugo, ye duglo biurka yagl suo i prisre, Jisas omara sika si ede ebrika. 38Sika si ede ebriko, Jisas kan ikne ede, ye ubrika i kandre, yegl dugwa, Ene siragl pre na mokna kogl, na sika si ubre? di, yegl dugwa. Ana Jisas ka yegl dugo, yagl suo i di ikne edibrika, Rabai, ene yugu aglo mere pai motnga i, kanabugledi ubugle dibrika. Ye Rabai we dibrika i, ye kano mina Neno Yagle mere yegl dibrika. 39Ana yagl suo i ka yegl dibriko, Jisas di ikne ede te, yegl dugwa, Ana, ene kanabra, wiro! di, yegl dugwa. Dugo, yagl suo i ye Jisas omara sika si pidre, ye yugu aglo mere paugwa i kan, ege swara i Jisas bogl akie wan ede pi paigwa. I siragl pre ye Jisas kandre, sika si ede ebrika igne i min paugwa, 4 klok mere yegl yogwa.
40Ana Jon duglo biurka yagl suo ye Jon ka dugwa i prisre, Jisas sika si ede ebrika i, swara ta kagie Andru, ye Saimon Pita agigle moglkwa. 41Andru ye Jisas moglmara kide kodidre, tabre kana pi ye agigle Saimon doko kandre, ye di te, yegl dugwa, No God Kere Yugwa Yagl, Mesaia we digwa ikra, kanumniwe dugwa. Mesaia i, ka Grik mina Krais we digwa. 42Ana Andru ye agigle Saimon ka yegl di tedre, agre i pi Jisas moglmara edugwa. Edugo, Jisas ye Saimon kandre, yegl dugwa, Ene yagl ta kagie Jon we digwa i wam motngo, kagn Saimon we digwa. Yegl digwa ba na erme ene kagn kor yei teiga. Ene kagn kor i, Sifas pamiwe dugwa. Kagie Sifas i, ka Grik mina Pita we digwa. Sifas ya Pita i, suo akie mabuno swara paugwa. Mabuno i, Kobuglo.
43Ana tagugo i, Jisas ye dumo ta moglmara i kide kodidre, ye duglo beglkwa yagl bogl ede distrik Galili enamnedi prukwa. Yegl prukwa ba ye komono kana pi yagl ta kagie Filip we digwa i doko kandre, ye di te, Na duglo boglo dugwa. 44Yagl Filip i ye Andru ya Pita bogl dumo swara nem meglkwa. Dumo i, kagie Betsaida we digwa. 45Ana Jisas ye Filip di te, na duglo boglo dugwa mokomugl i, Filip ede pi yagl ta kagie Nataniel doko kandre, ye yegl di togwa, Moses ya kap kep yoba tau okna ka bogl atne edidre, yagl ta unabe digwa i, kamniwa. Ye kagie Jisas, Josep wam moglsre, dumo Nasaret nem moglmiwe dugwa. 46Ye yegl dugo, Nataniel di ikne ede yegl dugwa, Dumo Nasaret i, taragl wakai swara ta plau dinan, kankramnedi prie dugwa. Yegl dugwa ba Filip ye aglke kor di te, yagl Jisas i kanatna wo! dugwa.
47Ana Filip ye ka yegl mere Nataniel di togo, ye akie ede Jisas moglmara enabugledi ede ebrika. Ede ebriko, Jisas ye Nataniel ugwa i kandre, Nataniel pre yegl dugwa, Yagl ta ugwa i, ye Israel yoba kaima moglko, ka kibi mabuno ye moglmara ta paikrumiwe di, yegl dugwa. 48Jisas yegl dugo, Nataniel ye di pre, yegl dugwa, Ene siragl mere na kan pogl sidre, yegl dine? dugwa. Yegl dugo, Jisas ye di ikne ede te, yegl dugwa, Filip ene motnara pidre, ene agle dikrukwa igne, ene ede fik mabuno mina motngo, na ene kaniwe dugwa. 49Dugo, Nataniel ere mogl, yegl dugwa, Tisa, ene God Wam moglsre, Israel yoba kingno motniwe dugwa. 50Yegl dugo, Jisas aglke kor ye di te, yegl dugwa, Ene ede fik mabuno mina motngo, na ene kanie diga i pre ene na pre mediglno? dugwa. I taragl kebra yogwa. Na okuo taragl tau podo eribo, ene kanatniwe#1.50 Oknayene Ibo 28.12 dugwa.
51Jisas ye Nataniel yegl di tedre, ye duglo beglkwa yagl mudu ama yegl di togwa, Na ene ka kaima di teiga, Kamun mitna ibo ede u koglo koglo enan, yoba lada mina ede egli pidre, ede atne udre, erimere mere yegl, God angeloma na Yoba Wam moglka i, moraglmara i mina ede egli pidre, ede atne udre, eribi, ene kanaiglmiwe dugwa.
S'ha seleccionat:
Jon 1: KB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Copyright 2015 New Tribes Mission