Luk 24
24
Jisas adigl u kor ogwa
(Matyu 28.1-10, Mak 16.1-8, Jon 20.1-10)
1Ana Sande, tagna kide kana, abu wagle ikra adiglsre, taragl demene wakai erukwa, ere wakai ere yeigwa ikra, idre, ede kobuglo mur eigwa. 2Ede kobuglo mur pidre, kanigwa i, kobuglo paglkane podo ta kobuglo dra si kegl dugwa i, i eglke edigo, kanigwa. 3Kandre, ede kobuglo mur yugugl eigwa ba Yagl Kade Jisas ogo nagie yekruko, kobuglo mur yoko yogo, kanigwa. 4Ana abu wagle ye nomano si, kinano gudu meglko, tabre yene yagl suo ta ye meglmara plau dibrika. Ye kuguglno gaglno pogl di yogwa kanigwa. 5Yagl suo i plau dibriko, abu wagle i kudugl goglsre, goglkono bodugl, gumano drano i pi makan mina edigo, yagl suo i ye yegl di tebrika, Ene yoba ta dokigwa i, kor moglkwa pre yoba geglkwa padiglmara dokigwa i, kuno ta erekrukwa. 6Ye adigl u kor ogwa. Magigl i ta pai moglkrukwa. Ye okna distrik Galili moglsre, ene ka ta di togwa i, pre meglmo? 7Ye yegl dugwa, Yoba ere mogl, Na Yoba Wam moglka i, i pi tadaglme yoba ogono mina yenaiglkwa paugwa. Ogono mina yebi, yoba i na ede prak mina si goraiglkwa ba na ege suota pai mogl, adigl u kor enaglka pamiwe di, Jisas ene okna yegl di tome di, angelo suo i yegl dibrika.
8Ana angelo suo i yegl dibriko, abu wagle ye Jisas siragl mere okna dugwa i pre moglsre, 9kobuglo mur kide kodo, ede ikne eigwa. Ye ede ikne pi siragl taragl plau dugwa i, Jisas dedugwa yagl 11-pela meglkwa i ya yoba tau ye bogl akie meglkwa i, mudu di teigwa. 10Abu wagle i, Maria, dumo Makdala mam moglkwa i yogo, Joana yogo, Maria ta Jems mam moglkwa i yogo, ye abu tau bogl akie u Jisas dedugwa yoba i, ka i di teigwa 11ba yagl wagle i, ka i mem wakai ta paikrumara dimedi prisre, ka digwa i ta pre mediglkrikwa. 12Yegl prikwa ba Pita adiglsre, muku di ede pi kobuglo mur pidre, magi didre, kan yugugl edidre, kanugwa i, lap kruo ikra yoko yogo, kanugwa. Kandre, ede ikne pi taragl tau plau dugwa i pre nagie koglsre, yene nomane mina kina gudu prukwa.
Jisas duglo biurka yagl suo ede dumo Emeus enabugledi ebriko, Jisas ye ebrara plau dugwa
(Mak 16.12-13)
13Ana Jisas adigl u kor ogwa ege i, ye duglo biurka yagl suo ta dumo Jerusalem kide kodo, ede dumo ta Emeus we dimara enabugledi ebrika. Dumo Jerusalem ede dumo Emeus enabrika i, 11 kilomita mere yegl yogwa. 14Ana yagl suo i, konbauna pi mogl, taragl tau plau digwa i di pre, pre, ede ebrika. 15Ye ka di pre ede ebriko, Jisas ede magigl ugo, ye konbauna akie ede eigwa. 16Akie ede eigwa ba yagl suo i gumuglno mina Jisas kan pogl sikre, yoba pere ta moglmedi kanibrika.
17Ana yagl suo i, Jisas bogl akie konbauna ede eigo, Jisas ye yegl di prukwa, Ene konbauna pidre, ka di ikne ikne edibrika i, siragl pre dibre? dugwa. Yegl dugo, yagl suo i adigl miurko, ye deno muduno yubun domara i, gumano drano ama u kide ogwa. 18Yegl eruko, swarano ta, kagie Kliopas we digwa i, di ikne ede, yegl dugwa, Taragl tau erme dumo Jerusalem plau digwa i, yoba mudu pra pra pre kan erikwa ba ene swara ta pre kan erekitnga pamiwe dugwa. 19Yegl dugo, Jisas aglke kor yegl dugwa, Ene siragl taragl plau digwa pre dine? dugwa. Yegl dugo, yagl suo i ere mogl, ye yegl di tebrika, Taragl plau digwa i, Jisas, ye dumo Nasaret nem to moglkwa i, moglmara plau digwa pre dubuglka. Ye God kamo kep yagl ta moglsre, God gumuglo mina ya yoba mudu gumuglno mina kogon gigledi ersre, ka ama gigledi didre, erukwa. 20Tawa teigwa yoba bitno meglkwa i ya nono yobano kade i, ye Jisas i pi Rom yoba ogono mina yeigo, ye kot ere tedre, ye ede prak mina si geglkwa. 21No okna pre gi dumga i, yagl Jisas i, ye no Israel yoba ere inan, wakai moramgra we di prumga. Ba taragl kane kane yegl plau digo, ama ye Jisas si geglko, erme ege suota ede omiwe dibrika.
22Yagl suo i yegl didre, ama yegl dibrika, Erme tagna kana, abu tau no bogl akie meglkwa i, ede pi yagl Jisas kobuglo mur yeimara pidre, ede ikne u ka tau di noriko, no nagino kunga. 23Ye Jisas ogo nagie ta kankrikwa ba ye u di norikwa i, Angelo suo kanumniwe digwa. Angelo suo i, kanumgo, ye no di noro, Jisas kor moglmiwe dibredi, abu wagle yegl digwa. 24Yegl digo, yagl tau no bogl akie munga i, ede kobuglo mur pi kandre, abu wagle kobuglo mur yoko yome dimere yegl yogo, kanigwa ba ye Jisas ta kankrimiwe di, yagl suo i yegl dibrika.
25Ana yagl suo i yegl dibriko, Jisas ye yegl di togwa, Ene nomane wakai ta paikrukwa paugwa. God kamo kep yoba ka mudu okna beglkwa i, ene tabre pre medra kiribrika. 26God Kere Yugwa Yagl i, ye giugl yegl mere prisre, okuo keme kagie kade inabuka paugwa i, ene ta prikribro? dugwa. 27Jisas yegl didre, God kamo okna beglmara i bage tau ye yene pre dugwa i, ye yagl suo i beke te ede ogwa. Ye Moses ka tau boglkwa i mabuno bogl idre, ka kep yagl mudu ta ka okna beglmara i mina bage tau idre, yagl suo i beke te ede ogwa.
28Ana yagl suo i ye Jisas bogl konbauna pi mogl, ye dumo ta enabugledi ebrara i, ede magigl eigwa. Ede magigl eigo, Jisas konbauna pi pai morabuka mere yegl erukwa. 29Yegl eruko, yagl suo i ye ka gigledi di tedre, Erme min pama. Nono akie mogl panamniwe dibriko, Jisas ye bogl akie moramnedi ede yugugl ogwa. 30Ede yugugl ogo, ye akie kaya mokna nenamnedi ame digo, Jisas bret ta idre, God di wakai yei te, bret ake buko di, yagl suo i togwa. 31Togo, ye Jisas moglmedi pre kan eribriko, Jisas tabre imim daglkwa. 32Jisas imim daglko, yagl suo i di ikne ikne ede, yegl dibrika, Nono konbauna u mungo, God kamo mem siragl mere paugwa i beke noro ugwa i, nono deno muduno mina pogglau boglko, wakai kaima prubuluwe dibrika.
33Ana yagl suo i tabre adigl, ede ikne Jerusalem pidre, Jisas dedugwa yoba 11-pela yoba tau bogl akie makai si meglko, kandre, ede suna ebrika. 34Ede suna ebriko, yoba u makai si meglkwa i yegl digwa, Yagl Kade ka kaima adiglsre, Saimon moglmara plau dumiwe digwa. 35Yegl digo, yagl suo i ye konbauna ebrara taragl tau plau dugwa i ye di tedre, Jisas ye bret ake buko dugwa igne ye kan pogl sibrika i, di tebrika.
Jisas ye duglo beglkwa yoba meglmara plau dugwa
(Matyu 28.16-20, Mak 16.14-18, Jon 20.19-23)
36 Ana Jisas duglo beglkwa yoba i, ka yegl di meglko, Jisas ye meglmara tabre yene plau didre, Ene deno muduno wida dinabiwe dugwa. 37Yegl dugo, ye nagino koglsre, kudugl gogl, murubuglo ta kan munedi prikwa. 38Yegl priko, Jisas yegl di prukwa, Ene siragl pre nagino keglme? Te, ene siragl pre kinano suo yome? dugwa. 39Na nana kaima wiga. Ene na ogona kaglna kandre, na ama ake prio. Na murubuglo ta ukrika. Murubuglo ogono nagino ta paikrukwa pre ene erme na ogona nagna ake prisre, pre kaima yenaiglmiwe dugwa. 40Ye yegl didre, ogo ya kagle ye obuno di togwa. 41Obuno di togo, ye gun podo yeigwa ba Jisas kaima adigl u kor omedi pre medraiglkwa i, kuno erekrukwa. Kuno erekrukwa pre Jisas ye di pre, yegl dugwa, Ene kaya mokna ta yeigwa yomo? dugwa. 42Yegl dugo, buglo bagle ta kodo gaiglkwa i, mie ta dre teigo, 43Jisas idre, ye gumuglnomugl nogwa.
44Ana Jisas ere mogl, ye duglo beglkwa yoba i, yegl di togwa, Okna nono akie munga igne, na ene di teiga, God kamo mina ka kane kane ta na pre beglkwa i, Moses lo boglmara suna i ya te, ka kep yoba tau ka beglmara suna i, ya te, buk Giglage beglmara suna i, mudu plau dinaiglkwa pre diwe dugwa. 45Jisas yegl didre, ye duglo beglkwa yoba nomano mina ye God kamo pre pogl sinaiglmedi ere togwa. 46Ere tedre, yegl dugwa, God kamo mina okna kibo beglkwa i, God Kere Yugwa yagl i, giugl prisre, gorabuka ba ege namba 3 adigl u kor enabe dugwa i, plau di kodumiwe dugwa. 47Ana na kana Jerusalem mabuno bogl beke tedre, okuo uglo kogl koglo di te ede enaiglkwa. Didre, ene yegl dio, Ene nomano yake tedre, Jisas pre mediglbi, God ene tadaglmeno gugl ede tenabe dinaiglme dugwa. 48Ana taragl kane kane na moglmara plau dugwa i, ene kanigwa pre ene yoba di tenaiglkwa paugwa. 49Te, ene prio. Na Nina ka di paduglmere na kuri ta moglsre, ene Mudu Murubuglo inaiglmedi dedibo, inaiglkwa. Ba ene dumo Jerusalem magigl i sugl kan meglbi, na Mudu Murubuglo dedibo, God igne i, ene yobuglo tenabiwe di, Jisas yegl dugwa.
God Jisas auro i ede heven ibo ogwa
(Mak 16.19-20, Aposel 1.9-12)
50Ana Jisas ye duglo beglkwa yoba auro i pi dumo Betani yomara magigl edugwa. Auro i pi edidre, ye ogo koglo koglo ake mitna ede, God kagie mina ye di wakai yei togwa. 51Ye di wakai yei te moglko, God ye auro i ede heven ibo ogwa. 52Jisas ede ogo, ye duglo beglkwa yoba i goglkono bodugl tedre, ye kagie kade teigwa. Yegl ersre, ye gun podo yei, ede ikne dumo Jerusalem suna eigwa. 53Ye ede ikne Jerusalem pidre, ege ege tawa teigwa yugu yomara moglsre, God kagie kade te pai meglkwa.
S'ha seleccionat:
Luk 24: KB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Copyright 2015 New Tribes Mission