Joaancha Laenai 19
19
1Nii jaunte Cana Coaunera Calaohi Jesoso bisichate rai soondarooru que Filato.
2Nitohaneein bisihuruhane baihate, ojoa caje janojoin comai curuhacure Jesoso couturi que. Nii baihate coaiteen que cajione lanaajiojoai curuhacure.
3Nitohaneein teeuruhane baihate, Jesoso rohan turuhin: “Caa Jorioocuru curuaanaa reey coaracuche”, naain Jesoso meri faohafacoaaure biji que Romanocuru rai soondarooru.
4Nii janate jelai caje mituhin Jorioocuru rai: “Coaraquichene coinana caa cacha mitaa uun, neniha que chatoanai baaso ichaenihane coaracaaunne jaun”, nae Filato.
5Nii jaunte, inae ojoa que jerichanejeein comaiquiin, lanaajiojoai que cajionequin mituha uhe Jesoso. Mituha uha Jesosone janate: “Caa cacha coaracuche”, nae Filato.
6Niritoha Filatone jaunte, Jesoso coaraain: “Coroso que teeuche. Coroso que teeuchera”, naain nujuae soaisoaiuruha batirichuru curuaanaacuru, folisihacuru naaonjoainurine jaun:
“Inara amaain coroso que teeuche. Neniha carai que chana jaunna, nitohaneein tenaa naineneeun canu”, naa Filatone jana:
7“Canacaanu quiricha inoaesi cuhanete aite, nitohaneein nei nihane sohin jaohacaanune coina. Cana Coaunera Calaohi niha nocoetohane corenihate caohachae, sohin jaohacane”, naauruha Jorioocurune 8aonajihane jaunte, jataain casi Filato.
9Nii jaunte nacoauneein loreri asaae enohin:
“Chaa cajena unaaneei”, naain bajaa Filatone jana, ninauhene chujuhequiin aonaje Cana Coaunera Calaohi Jesoso. 10Nitohaneein tonoraeniha Jesosone jaunte: “Chanuna catoonraeneei. Tana cocoainanacaineein nihanune coitucuhine. Canune nainereeun coroso que ii teratihanune. Chaaen nachu naineeun caa ii colurujueeuruhane jaan caje jianacoon chetichaaunne”, naa Filatone jana:
11“Cocoainanacaine lanaala cheteein nii jereniha Cana Coaunerane, canasia nainihei. Nii jaunte, chamurijiriin osaque caa catohaneein ichei caetera”, naa Cana Coaunera Calaohi Jesosone jaunte, 12Jesoso jianena jere Filato niqui. Nete:
“Jiaohine jianeeine. Aca, curuaanaa reey neein nenaa jerihane jaun, caohacharihei jianeeine. Jianeeinete, satiin inara curuaanaacuru curuaanaa enferadoro aina nejeratenaa neriquiin”, naauruha nujuae soaisoaain Jorioocurune jaun, 13Jesoso raerate, nii Cabata naauruha Ebereeo ere cuhanene jaan ajeri caje ichanohineein nenaa aranichoae uhaauruhane coina. Nitohaneein raerateeuruhane jaun, raain turuaauruhane jana, nii casetecocuru neruujuena jaaun nelauriariin lauheque nelaurianaana jaan rori choae, 14enoto chujutaain Fasocoa catainajeein. Nii jaunte nitohaneein raerateein:
“Nocoa inara curuaanaa reey”, naa Filato Jorioocuru raine jana: 15“Coroso que teeuchete coaraain cuu ohine”, naain nujuae soaisoaiuruhane jana:
“Chasiina inara curuaanaa reey tereeun coroso que”, naa Filatone jana:
“Romanocuru curuaanaa enferadorohachate canacaanu curuaanaa reey neein nera. Nihei nii baiha curuaanaa reeyta”, naauruha batirichuru curuaanaacuru Filato raine jaun, 16acaauru que Jesoso amaerate Filato.
17Nii jaunte nii Jesoso amaain, que corosonu baijieratecuruhane jana, Couturi Bejeroneein curuajaain nenaa atane ucuuno que baaibaaichaain amaain, nii coroso tiha cue Jesoso. (Nii Ebereeo ere cuhane Golgota naauru najaan Couturi Bejeroo.)
18Nii janate cuu coroatajai coroso que, cuu neeuruha coroatajaain soserenacaaurune jaun, acaauru cataaun Jesoso teeure coroso que, leinjiin jera que, leeocha jera que, naaonjoaain.
19Nii janate, cuu Jesoso curuaa laenaerate Filato. “Nasarete cocoaicha Jesoso, Jorioocuru curuaanaa reey”, nasiin laenaerate coroso que, tabara que teein Filato. 20Nii jana arajiin Jorioocurute nii Jesoso curuaa Filatohacha laenaeratei ereretaaure, nii Jesoso teeuruha coroso quene jaan caje icharaeniha Jerosaleeunne jaun. Ebereeo ere, Curieco ere, Romano ere, naaonjoain que nichata lauriin erenaa cuhane teeinte laenaaure, nii que erenaa inaaurera ereretaauruhane coina.
21Nii jaunte: “Coa, Jorioocuru Curuaanaa reeyneein teein laenaratihara”, naaure Joriocuruneein batirichuru curuaanaacuru Filato rai. “Nii Jorioocuru curuaanaa reey niha nocoeti, nasiin laenaerateeura”, naauruhane jana:
22“Nii rijieeincha nedaainera”, nae acaauru rai Filato.
23Nitohaneein coroso que Cana Coaunera Calaohi Jesoso curabaain teeuruhane baihate, Cana Coaunera Calaohi Jesoso cajione raaure jenai soondarooru. Rai nobirine maajeein raaure. Rai nobiri, coaracuruhane jana nirijieein ijiabereeonu farueraelanaala tocoonojoi nelanaala niha nii rai nobirine jaun: 24“Coa soaihachete naajeein amaacache, Nenacaaentejia caohachare naajeen amaacachene. Aihute que necoatijianaa neeine, chariji rai neeincha nedareein”, naaure soondarooru. “Ita raite cacajione leruhin raaurureein que necoatijiain”, naa Cana Coaunera Quiricha Inoaesi cuhanene jaunte, nii Cana Coaunera Quiricha cuhane aitohane nainaane coina nitohaneein teeure soondarooru.
25Nii jaunte, inae Jesoso mucuuruhane coitucuuriin, coroso asaae cuhin coaraje rai neba, nichatajai enecuru aina. Nocoasai, Cureeofasi comasaineein nenaa Mariha, Mariha Maadala bene, naaonjoaain. 26Nii janana cuu nihacaanu, jataain niicha belaai nichaanune temeecohacaanu neba ainane jana, neba coaariin:
“Nii ii calaoita oma”, naa neba raine baiha:
27“Nii chobata”, naa caraine jaunna jerichanejeein cafojiara raanune rijijieein raain amaaun coloheri asaae.
Oha Jesosone
(Mt 27.45-56; Mr 15.33-41; Lc 23.44-49)
28Inae nitohaneein nihane coina letoaa Cana Inaca Cana Coaunerane nainaane coitucuha raotojoeinne jaunte, inae Cana Coaunera Quiricha Inoaesi cuhane aitosiha inaene jaun: “Cocoiintohanura”, nae Cana Coaunera Calaohi Jesoso.
29Nii janate baichaje laaojoiri nainecojoain ecu niha bino baasone jaun, enuha que sie rijijieein nenaa nujuateein, nii bino sisiaain Jesoso ujuae que suesuecaauruhane jana, 30nii bino baaso cohane baiha: “Inae laaenra”, naain ocoai couturi tijitaain ohe Cana Coaunera Calaohi Jesoso.
Jesoso jaleri rucuaitoha leinjiin soondaro rejoon quene
31Le janojoeein lanaa Fasocoa besetane janate, Filato rai aitoha cuure Jorioocuru, coroso que nenacaauru anaae bacoerateein, naain nii coroso caje rocoeratenajaain, naain rucuhenaaratiha Filatone coina, nabana nebetacanaa janonaa bana cuu neeuruhane, coaranaaca cachaaurune coataa, acaauru rai jataain beseta tabaineein niha Fasocoa besetana jaun. 32Nii jaun soondarooru letoaa Filatone jaun, cuhin nii Jesoso ajiniha coroso que nenacaauru anaae bucu bateeichure soondarooru.
33Nii baiha Jesoso rohan turuhin coaracuruhane jana, inae oha Jesosone jaun, rai nanaae bacoorene. 34Nete laaen rai nanaae bacoorenihane caniha laaen, rai jaleri rucuaaite leinjiin soondaro rejoon que.
Nii janate rai jaleri rucuaitohane jana chujuhare ichana, acau que jasisiin.
35Canune coaaraneein aitoon inara rai, inara netonai rauhijiriin aonaain esenetaaichene coina.
36“Nihei chatohaneein bacoorurihaainta”, naa Cana Coaunera Quiricha Inoaesi cuhanena jaunte, Jesoso bucu bacoorene.
37Cana Coaunera Quiricha Inoaensi leeocha cuhanete “Focooruhane janate, ninauhene coarajiha cuurureeincha”, naain aitohane rijijieein coarajeeure.
Oo jana ajeri jachu cuhane Jesoso jaberoco teeuruhane
(Mt 27.57-61; Mr 15.42-47; Lc 23.50-56)
38Nii janate Cana Coaunera Calaohi Jesoso jaberoco bajae Filato caje Arimatea cocoaicha Jose, rucuhecuruhane coina. (Nii Josete asinojoineein Cana Coaunera Calaohi Jesoso ere tonoraera ne, leeochaauru Jorioocuru coasiha.)
Nii jaunte, Jesoso jaberoco jianiha Filatone jaun, Jesoso jaberoco raain amae.
39Nii janate turuha uhe nii jauriaanejeein janotiin Jesoso rene turuhin erenaa Necodemo netonai, nichatachoonca quironeein meetoora tocohaneein nenaa ujujuai uhain.
40Nitohaneein Jesoso jaberoco amaain, nii juujijiai que rujuaain, cajione que baluluhin conajaain, Jesoso jaberoco rucuheca cue Jose, Necodemo aina.
Nitohaneeinte onaa rucuhecure Jorioocuru, nitohaniha acaauru ichaona jaun.
41Nii Cana Coaunera Calaohi Jesoso teeuruha Jorioocurune jaaunte ne enuha inaa neeonjoain. Nii enuha inaa neeonjoain janate ne atanebana. Ecute ne achasineneein ajeri jachu jaiti lesajeeinejein onaa teeurenihane jaan. 42Cuhanete Jesoso jaberoco teeure, ichuunejeein niha cajene jaun, chaaen inae beseta bitoauruhane coina neruujihajeeuruha Jorioocurune jaun.
S'ha seleccionat:
Joaancha Laenai 19: URA
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2005, 2024, Wycliffe Bible Translators, Inc.