Ə́rɨ́b nùb tómé yi ə́llé 1
1
Nyéhè Sarîn Mèín ya ɓwáína nùb tóméé
1Tèwòfîl,
Káàtà yàyɨ̀rí moò no, mɨ átií nɨ́ɨ́b lâs Yésù ya ndɨŋndé ɓe kɨ́b ŋgə́ ya tɔhe yàwòó yàllì 2há̧á̧ ɨ́ gò féínnɨ ye Mèín yi áwú ŋgə́ ɓɨllɨnne. Ŋgə́ ɓànɨ wúínɨ ɓɨllin ku, nùb ŋgə́ ya ca dù nùb tómé níì rè, ŋgə́ ɨ́ nàkɨ́sò ŋgáb sóóŋ nóò ɓe nyòm Nyéhè Sarɨ́nne. 3Cùr cwá noò, ŋgə́ ɨ́ túùmnà ŋgáb síí ɓe lɨ̀m túmne ɨnayâna ŋgə́ á cùmèɓà jááŋ: ŋgə́ ɨ́ túùmnà ŋgáb síí há̧á̧ jíì vii bɨrɨ́b, ŋgə́ a nyinnace ŋgáb àm Ŋgɔ̧́ɔ̧̀ Mèèín. 4Ye kù ŋgə́ ɓe ŋgáb yi du cɔŋ tàŋniì, ŋgə́ ɨ́ nà ŋgáb ɓíì ɨnè: «Nyí nɨ Yèrúsàlèm fô̧ gìnɨ yɨ́ kù cóo, ɨ́dù móŋnáam nɨ́m Tá ɓwállé, nyər mɨ ya takɨ́na nyí rɨ. 5Ɓetí Jâŋ yi kɔhií kɔ ə́mní ɓe mvúm, ɨ́dù hò̧ jíì ti ŋgób, Mèín ɓa nyí kɔ̀ɔ̀nɨ kɔ ə́mní ɓe Nyéhè Sarîn á.»
Yésù á wúínɨ ɓɨllin
6Nùb ya du ɓáhîn gín Yésùù ɨ́ fɔ́gì ŋgə́ ɨnè: «Kéké, ɗàrò á wu ɓa ndɨ̀ŋnɨ gbàŋ Ísràyéèl a ŋgáŋcù ru à?»
7Yésù ɨ́ pììnà ŋgáb ɨnè: «Ɗə̀ŋhȩ̀ȩ́ ɓwâ, kɨ́ kù mvókín kíì nɨ ɓe nyí ókwa, ɓetí Tá nɨ̀mɨr ya ɓwáíɓa nɨ́ ɓe nyòm ŋgə́ nɨ̀mɨrí ru. 8Ɨ́dù nyí ɓa kwànɨ nyòme ɓwâ Nyéhè Sarîn ɓa sónɨ nyí só léniì á. U̧ á nyí ɓa dùnɨ mɨ̀námé móò, nyí a nyìn ɓe ɨ́r moò Yèrúsàlèm, ɗɔ̀ɔ́b Jùdéè ɓe Sàmàríì no, ɓe ŋgɨ̀ŋgɨ́ŋ ɗɔ̀bí bɨ̂ŋ.» 9Cùr Yésù yi nyincáŋhȩ nyindí kíì, á ŋgə́ wúí ɓɨllin, ŋgáb a góomwúce ŋgə́; ɗà ɓɨ̀ ɨ́ gò ŋgə́ yòkkɨ́nɨ ŋgábè íhín. 10Ŋgáb yaáyè íí còóm kpéín yɨ́ Yésù yi du wúíniì, á ŋgáb pə́cì na nɨ̀ŋgwáàb bɨrɨ́b júúb mɨ̀vúùb#1.10 Nùb júúb só mɨ̀vúùb lè, káàtà Mèèín ɓélɨ́ŋ dùgallɨb Mèèín á. só gín ŋgábè ə́ŋhîn, 11á nùb kɨ́ tana ŋgáb ɨnè: «Nùb Gàlìléè, nyí mekɨ́cɨ nɨ ɓè ɓɨɨr góòmnɨ ɓe ní? Yésù, Mèín áwúkɨ́na nyí ɓɨllin kɨ́, kwá cuwoɓwée hȩ nyí pə́ ŋgə́ gìnɨ ku kɨ́ u̧.»
Cə́ndì Yúdààs
12Kí á nùb tómé éícuwo ŋgòm yɨ̀ɨ́b kúrúmì kùb du ɓénɨ «ɓe Òlìvíyéè» rɨ ya gòcùnɨ Yèrúsàlèm. Ŋgòm kɨ́ yaá gín kúrì sàmàìn ɗàŋhȩ̀ȩ́ kílòmétà mwi̧. 13Ɓwâ ŋgáb ya féín Yèrúsàlèèm, ŋgáb ɨ́ wúì dúú còmné kù no yá ŋgáb ya ɓáalɨ́ŋkomndé. Ŋgáb yaá: Píyéèr, Jâŋ, Jâk ɓe Àndɨ̀rê, Fɨ́lɨ̂b ɓe Tòmâ, Bàrtèlèmî ɓe Màtíyò, Jâk mwin Àlféè, Sìmôŋ nò ya lɨɨŋkom ɓe ɨ́r tií, ɓe Jûdə̀ mwin Jáàk. 14Vùùm ɓoò lâs, ŋgáb yaá ɓáàlɨ́ŋnɨ mɨ̀yú̧ú̧ ŋgábe nɨ̀gub kù, ɓe Màríyà yà Yésùù ɨ́ mwin yàá bɨ Yésùù.
15Ye kù, nùb ə́mní yaá ɓáhîn sàmàìn nɨ̀vɨ́tɨ̀b təmərì mwi̧ ɨ́ yɔ̀k vɨríí, á Píyéèr yi éíwú còóm ŋgábè tə̧ə̧́, ŋgə́ ɨ́ tànà ŋgáb ɨnè: 16«Mwin yàá bɨ, tɨ ɗú nɨ́m Nyéhè Sarîn ya takɨ́yaye káàtà Mèèín noò ndɨ̀ŋmètɨ á: Dàvíìt ɓɔ̧ɔ̧, ŋgə́ ya takɨ́yayeé àm Yúdàs kwá du ŋgwé tíí gewo nùb bɨ Yésùù rè. 17Yúdàs yɨɨ́m nɨ̀mwi̧ kpáín nɨ́mè no yi kwaɓwéhe gɔ̀ ə́r nɨ́mè rèè á. 18(Mwèìn kùb ya na ŋgə́ ɓe ɨ́r nɨ́m ŋgə́ ya ndɨŋjállé, nɨ̀ŋgwá kɨ́ ɨ́ gwɨ̀ì mwar ɓe kí; ŋgə́ ɨ́ njwéínláàcù gusɨ̀r mwai kɨ́ no, ɓur ɨ́ kándê ŋgə́ tə̧ə̧́ bɨrɨ́b, lèé lúu fá̧à̧. 19Nùb Yèrúsàlèèm lâs yi óktɨ́ àm kɨ́ á ŋgáb yi bɨ́ ɨ́r mwai kíì ɓe nyindí ŋgábè ɨnè: ‹Hàkèldàmâ›, kí ta ‹mwar tɨ́m yi sú ɓe ɨ́r kíí› yáá na á.) 20Nɨ́ɨ́b du tɨín káàtà wààìbì noò á rè:
Dúú nóò dù u̧, nò kù ŋgéé yó féin,
nò kù cè yó ku gwîn.
Á kwà tɨín ɨnè:
Nò kù ácù ə́r ŋgéé.
21-22Àm kɨ́ á du ɗúnɨ nɨ̀vɨ́tè mwi̧ kpɔ̀ɔ̀ré nɨ́m ya, dùnɨ mɨ̀námé sə̀ə̀mcùhô̧ sèrɨ̀nnè Yésù nò du Kékéé. Á ɗúnɨ nò kɨ́ dù kpáín nùb ya háateekom nɨ́m ɓwâ lâs nɨ́me Yésù bɨ ya yəŋkom ti rèè, yànɨ ɓwâ Jâŋ ya kɔhe ŋgə́ kɔ ə́mní há̧á̧ ye Mèín áhó̧kɨ́ nɨ́m ŋgə́ ŋgáré gèwúnɨ ɓɨllɨnne.»
23Á kùb ya túumhó̧ nɨ̀vɨ́tɨ̀b bɨrɨ́b: Màtíyàs ɓe Yòsə̂b kùb yi ɓékom Bàrsàbâs kùb ɨ́ lòndɨ̀kwà ŋgə́ Jùstûs lɨ. 24Kí á vùùm ŋgábè lâs ŋgáb ya yóŋɓáhe ɨnè: «Kéké, wu nò ɗəŋhȩ njɔ̧̀ nɨ̀vɨ́tɨ̀b lâs, túumnam nɨ́m mvókín nùb bɨrɨ́b lèè, nò wu cahó̧, 25gò ácùnɨ mɨ̀yɨ́ juu ə́r Yúdàs nò tómé yi éíkom ɗà ŋgə́ ɨ́ mbɨ́kkɨ́sò kí gìnɨ dùnɨ mɨ̀yɨ́ juu ya ɗóhe ɓe ŋgéé rè.» 26Ŋgáb ɨ́ lèhè dùr càhó̧nɨ nɨ̀mwi̧ mvókín nùb bɨrɨ́b kíì. Kí á dùr ya ndóblé Màtíyàs ya, ɗà ŋgə́ ɨ́ lê kpáín nùb tómé cóóŋ ɨ́ mwi̧ ya me rè no.
S'ha seleccionat:
Ə́rɨ́b nùb tómé yi ə́llé 1: NTV
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2007 Alliance Biblique du Cameroun, B.P. 1133, Cameroon