Ə́rɨ́b nùb tómé yi ə́llé Yààr Ə́rɨ́b Nùb Tómé yi Ə́llé
Yààr Ə́rɨ́b Nùb Tómé yi Ə́llé
Káàtà ə́rɨ́b nùb tómé yi ə́llé du tùré káàtà Kìn Nyɔ̧ɔ̧́ Lúkàs yi tɨnndé á. Ŋgə́ á átɨ̀nɨ hȩ nùb tómé Yésùù yi ahe Kìn Yésùù. Ŋgáb yi tayaye kìn kɨ́ Yèrúsàlèm á, ŋgáb ɨ́ tàtèègì ti bɨ dutee gín mɨ̀kwehɨ̀r kùb ɓé Mèdìtèrànê rɨ no. Ɓe ndɨ̧̀ɨ̧́ u̧nè kɨ́, ŋgáb éítɨ́ ə́r Yésù yi ɗob ŋgábè hàrák (Lk gɔ̀ 24.47-48, Ə́.N.T gɔ̀ 1.8).
Yààr káàtà Ə́.N.T no, Yésù á wɨ́ínɨ ɓɨllin yɨ́ Mèèín (Gɔ̀ 1.9). Ɗàrò ŋgə́ nɨ mvókín nɨ̀fubì hȩ ŋgə́ tɨ dukom tíí ɗàà, ɨ́dù ŋgə́ nasówoó nùb tómé Nyéhè Sarîn Mèín tómsóworé (Gɔ̀ 2). Nyéhè kɨ́ á ŋgáb nànɨ nyòm ŋgáb ɓéhɨ nɨ́ɨ́b kàtɨ́b Mèín du ndɨ̀ŋniì. Káàtà Ə́.N.T kɨ́ no, yàá yàllì há̧á̧ cáŋhɨ̀rí, Nyéhè Sarîn á ndɨ̀ŋnɨ nɨ̀vɨ́tɨ̀b ə́mnɨ̀ Yésù. Há̧á̧ gɔ̀ 12, Píyéèr, nò tómé Yésùù ɨ́ du nò káàtà Ə́.N.T du nyìnɓànɨ àm noò ceí.
Nɨ̀fuùb Yésùù du bɨ gbàŋ Jwîf á. Ŋgáb á bɨ gɨ̀háyènɨ Dúú Jíri Mèèín Yèrúsàlèèm no ŋgáb a nyince àm Tá tɔ̀hí ŋgábè. Nɨ́m mwi̧ ŋgáb á ɓwê ɓe jábɨ́r ɓe kɨ̀jííb Jwîf bɨ hȩ Yésù ɓwê (Gɔ̀ 3 há̧á̧ 8)
Nùb ə́mní gɨteetɨ́ Jùdê bɨ̂ŋ, ɗɔ̀ɔ́b Sàmàríì no ɓe yɨ́ bɨ kù ɓwê. Ŋgáb ɓéenaɓwéetɨ́ nùb du Jwîf séé Kìn Nyɔ̧ɔ̧́ (Gɔ̀ 8 há̧á̧ 12). Nɨ́m kɨ́ duɓa nɨ́m heé á. Ɓwâ ya kɨ́, jɔ̀ sé Jwîf bɨ yi ɨ́ ɗəŋhȩ Mèín mɨr, ŋgə́ nò du mwi̧cááŋ. Ŋgáb yaá bɨ lə́ə̀mnɨ ɨnayâna nùb mɨ̀yú̧ bɨ kwè yi bɨ́ sàmàìn ɗəŋhɨ ŋgéé ɗàà. Ɨ́dù Yésù á nànɨ nɨ̀vɨ́tɨ̀b lâs nyòm ŋgáb du ɓaín ɓe Mèèín. Ɓáhɨ́r nùb ə́mní kùb du ɓénɨ Mɨ̀kwìn nùb ə́mní rɨ á vínɨ. Ŋgáb á víndóŋnɨ tíí tíí, ŋgáb á cè Jwîf bɨ ɓe nùb du Jwîf séé ɓáhîn.
Káàtà Ə́.N.T no, yàrénɨ gɔ̀ 13, Pôl nò tómé Yésùù gamɓwéetɨ́ ə́r Píyéèr. Yésù Krístù ya ɓéé Pôl (Gɔ̀ 9). Mɨ̀kwìn nùb ə́mní Àŋtìyôs du Sìrî rɨ yi caá Pôl ɓe nùb kù àm ɓéhɨ Kìn Nyɔ̧ɔ̧́ du ɓe ɨ́r Yésùù cóo ɓà. Yàrénɨ gɔ̀ 13 há̧á̧ gɔ̀ 28 Lúkàs á átɨ̀nɨ gùr bɨ Pôl yi gɨteeré. Ŋgə́ á tànɨ hȩ Kìn Mèèín gakɨ́ gín mɨ̀kwehɨ̀r Mèdìtèrànéè há̧á̧ Rôm.
Kìn Nyɔ̧ɔ̧́ Lúkàs yi tɨnndé á túùmnɨ ju Yésù yi duré. Káàtà Lúkàs tɨin ɓe ɨ́r ə́rɨ́b nùb tómé yi ə́llé no, ŋgə́ á tànɨ hȩ ju mɨ̀kwìn nùb ə́mní yi yaréré. Yàrê ɓwâ kíì á nùb ə́mní yi yaré ɓéènɨ há̧á̧ mwáín kìn du ɓe ɨ́r Yésù nò du Krístùù ru. Ŋgáb á ɓéènànɨ kìn kɨ́ nùb lâs wu dùgɨ̀ gbàŋ ŋge, wu dùgɨ̀ ə́ə́m ŋge no, wu dùgɨ̀ mutí wu dùgɨ̀ kɨ̀jíri, dugɨ nùb njɔdìì ɓe nùb tiri cúk.
S'ha seleccionat:
Ə́rɨ́b nùb tómé yi ə́llé Yààr Ə́rɨ́b Nùb Tómé yi Ə́llé: NTV
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2007 Alliance Biblique du Cameroun, B.P. 1133, Cameroon