A-pûn Awang 16
16
Hagara Eq Ishima-elaq É Hkyô
1Ahkuî, Abram é yhûmsîng myhí Sarai gi, yhâng é matú zodù a wó byi nghut ri. Nghut kôlhang, Sarai gi, Hagara gâ é Egutuq byù duìnhâng zoshâng myiwe rayùq wó ri. 2Haû mù, yhang gi, Abram lé, “Haû Yhûmsîng Garai gi, ngo lé zodù a wó nhâng nghut ri; ngá é duìnhâng zoshâng myhî chyáng ê wâng aq; yhang dông mai i-kun hkûngxoq wó âbe.” ga taî ri.
Abram gi, Sarai é dang lé myìt huî ri. 3Haû mù, Abram gi, Hkanan má raxê zàn nyi é htâng, yhâng yhûmsîng myhí Sarai gi, yhâng é Egutuq byù duìnhâng zoshâng myiwe myhí Hagara lé, yhâng é yhûmsîng hpô é myi-ngê kut râ matú àp byî ri. 4Abram gi, Hagara chyáng wàng luî, Hagara gi, zo dap bê nghut ri.
Yhang gi, zogûng dùt é lé wó sé jáng, yhâng yhûmsîng Sarai lé byù ngè wò wú bê nghut ri. 5Haû mù, Sarai gi, Abram lé, “Ahpau ayùm kut é hkyô lé, ngò hui zô nyi é gi, náng chyáng wò joq lhê. Ngò, ngá é duìnhâng zoshâng myhí lé, náng é lòqhkaû má àp byî é nghut lhê; ahkuî, yhang gi, yhang zogûng dùt é lé sé jáng, ngo lé byù ngè wò wú nyî bê nghut ri. Haû Yhûmsîng Garai gi, nàng eq ngá é gyoro má jéyáng byi sháng gàq.” ga taî ri.
6Abram gi, “Náng é duìnhâng zoshâng gi, náng é lòq má ru nghut lhê. Nàng myìt le je ge é dông, yhang lé kut àq.” ga taî ri. Haû mù, Sarai gi, Hagara lé rhoî zo zìk zô nyì bê nghut ri; hau é yánmai, Hagara gi, yhâng chyáng mai hpang htoq ló bê nghut ri.
7Haû Yhûmsîng Garaî é maumang lagyo gi, yòso mâ é wuìbúm rabúm nàm má Hagara lé myang ri; wuìbúm haû gi, Shura jowò shut ló é hkyô yàm má jòq tô ri. 8Haú hkûn, yhang gi, “Sarai é duìnhâng zoshâng Hagara ê, nàng gi, hká mai lò mù, hká shut ló lhê lhú?” ga taî ri.
Hagara gi, “Ngò, ngá é yhûmsîng myhí Sarai chyáng mai hpang htoq wún lhê.” ga tû taî ri.
9Haú hkûn, haû Yhûmsîng Garaî é maumang lagyo gi, “Náng é yhûmsîng myhî chyáng taû ló mù, yhâng é a-ô má ló nyî aq.” ga taî ri. 10Hau htoq agó, “Ngò gi, náng é awùt ashîn pé lé, lháng a ung nghap loshoq lhoqmyo byi râ nghut lhê.” ga maumang lagyo haû xoq taî ri.
11Haû Yhûmsîng Garaî é maumang lagyo gi, yhang lé,
“Ahkuî, nàng gi, zogûng dùt to bê nghut luî,
yùqzo rayùq bau râ nghut lhê.
Nàng gi, yhang lé, Ishima-elaq#16:11 Ishima-elaq gâ é gi, Garai Gasang wó gyo byi gâ é lichyúm nghut lhê. nghû myìng myhíng byi ra râ nghut lhê;
hkâsu mù gâ le, haû Yhûmsîng Garai gi, nàng hpû wún shô wún é hkyô lé wó gyo byi bê nghut ri.
12Yhang gi, kyang é htîm é loze su dùt râ nghut lhê;
yhâng é lòq gi, yùq hkangmó lé htim râ nghut luî,
yùq hkangmó é lòq gi, yhang lé htim râ nghut lhê;
yhang gi, yhâng é gu-mang wuì bànshoq eq gyè dut#16:12 Gyè dut gâ é lé, buìhtoq hkyam shut gâ é lichyúm le htoq lhê. mù, nyì ra râ nghut lhê.” ga le taî ri.
13Hagara gi, yhang lé nyo é haû Yhûmsîng Garai lé, “Nàng gi, ngo lé myàng sû Garai Gasang nghut ri.” ga myìng myhíng byî ri; hkâsu mù gâ le, yhang gi, “Ngò lé myàng Sû lé, ahkuî ngò myàng bê.” ga taî ri. 14Haû nghut é yánmai, wuìhtúng haû lé, Beri Lahai Roi#16:14 Beri Lahai Roi gâ é gi, ngo lé myang é rû dui nyì Su é wuìhtúng gâ é lichyúm nghut lhê. gâ ri. Haû gi, ahkuî jé shoq, Kadesha eq Beret gyoro má jòq tô ri.
15Haû mù, Hagara gi, Abram é matú yùqzo rayùq hkû byî é nghut luî, Abram gi, yhang hkû byî é yùqzo haú lé, Ishima-elaq ga myìng myhíng byî ri. 16Abram gi, yhâng é matú, Hagara èq Ishima-elaq lé hkû byî é hkûn, chyungxe zànwut 86 zân bò bê nghut ri.
S'ha seleccionat:
A-pûn Awang 16: znot
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2025, Wycliffe Bible Translators, Inc.