Apozelɨyara 2
2
Kuryai Tewaanyai walaabake'nesɨ.
1Tɨka Munne Pedikozɨyagaa' mena kavura' anga gavevɨna Jizaazarɨ wɨ'nadɨvɨta yuyara yɨkabe'. 2Kyɨkabe' sɨgunyavɨdaa'nyɨ yɨhu'jake'bɨsa' yarai yaka anga yunevɨ buzaaimwaalesavɨ naanga ya' jaka sa'. 3Sara yakegaa' dara wanganesa' “O, pɨwɨnna pɨwɨnna dɨtaalɨtabɨsa wawaka nemɨ yuyainaavɨ daneyɨme'nɨwaka!” 4Sara kade' Kuryai Tewaanyai kumɨre sɨmunyangɨ yunebanna wɨlamwaalaka yagaala tewaanya' wɨja'na dɨragɨnna kujaava' Maaveraavɨre yagaala ge' ge' gaai wɨde'.
5Sagaa' Anga Jeruzaalemɨ Juyara ajɨmya yuyangɨya gazavasavakɨdaasara mwaale'. Pwara Juyaraavɨre kɨwɨnya lɨmwadɨvɨsarera. 6Sahwara yɨhu'jake' kadɨka wɨ'neva kwala bwa'naanya yarai yɨ'bwa'naabɨna. Yarai yɨ'bwa'naabɨna yeva Jizaazarera ajɨmya yuyangɨyaraavɨre yagaala wɨdadɨvɨsa'na kadɨka wɨ'neva yɨ gazaizai gannya yagaalya' wɨ'naka atɨka maru'na'na. 7Yuyara maru'na'dɨvɨ' dɨne' “Nɨwaava, berɨvaka? A'mwe dara nemɨre yagaala ge ge nedɨvanɨgasara Kwaaka Galɨli mwaalyara yuyarera. Nɨwaava! 8Garanevaka? Nemɨ yuyainaavɨ gazaizai kadɨka dara wɨ'nɨvanɨke' ‘Ai, nennya aangyagaala danedɨvanɨgava!’ 9Sahwaina Kwaaka Paatɨya mwaalyainajɨ Kwaaka Mithɨya mwaalyainajɨ Kwaaka Yɨlaamɨ mwaalyainajɨ Kwaaka Mezopotemya mwaalyainajɨ Kwaaka Juthɨya mwaalyainajɨ Kwaaka Kapaathozɨya mwaalyainajɨ Kwaaka Podaazɨ mwaalyainajɨ Kwaaka Ezɨya mwaalyainajɨ 10Kwaaka Pɨrɨzɨya mwaalyainajɨ Kwaaka Paabɨlɨya mwaalyainajɨ Kwaaka Yɨzɨpɨ mwaalyainajɨ Kwaaka Lɨvya Anga Saairini pimagɨ mwaalyainajɨ Anga Romɨ mwaalya pwainajɨ mwaaiho. 11Nabaai Juyainajɨ Maaveina Juyaraavɨrebwi yadaanyainajɨ pwaina Ahu'manna Kɨritɨ mwaalyainajɨ Kwaaka Arevɨya mwaalyainajɨ yuya saina bamwaalona Gotɨyai tewaanya yakenna nennya yagaalya nedɨvanɨgasa' kadɨka wɨ'nɨvanɨgone!” 12Sɨmunya kwalaalya yawɨ'dɨvɨ' atɨka maru'na'dɨvɨ' yɨwaara'ne' “Gara yɨwaka?” 13Sara kyɨwaara'ne' kɨrɨ' pwara kadɨka wɨ'nya'ne' sɨnna tɨka wɨda'daasɨ bɨrala wie' “Biyaaya naanga neva kunya maayara mwaaihava sara dɨvanɨgasara.”
Pitai wɨdake'nesɨ.
14Sagaa' Pitai Jizaazai Wɨdaasadera atɨraai sɨvɨlyɨrɨdaasɨ pwalyarajɨ daavaka kwala bwa'naanyavɨ yagaala naange' gaai wɨda' “Kwaaka Juthɨya mwaalyaihɨlyɨ Anga Jeruzaalemɨ mwaalyaihɨlyɨ yuyaihi yɨhɨthɨwɨja' kadɨka nayaa du'nyɨla! Nɨmɨre yagaalya' jawɨrila! 15Sare' dare'nesɨ. Nyɨdɨwaasa'na a'mwe dara biyaaya manyeva sɨdu'nakera mwaaiha'. Sawɨsaburɨ daaka! Sawɨsavɨ daaka! Mwanyavɨ naainɨ kɨlokɨyagaa' biyaaya'na a'mwera kumaayara mwaaidɨvɨsara daaka! 16Arɨkawɨ. Da' Gotɨyarɨ wɨ'nawɨjɨwakyaakei Ne Jowelɨ yɨdayaake' yɨma'nɨvanɨ'. 17Dara yɨda'nɨka
‘Gotɨyai dɨnɨkesɨra. Aayagaa' dara yɨdeinyɨra,
Kɨlaa'naka yuyaraavɨna Nɨnnya Kuryarɨ wɨdɨngikɨdeinyɨra.
Kujaava'mujɨ Kuryai Tewaanyai kumɨre sɨmunyangɨ kulamwaalojɨ
Sɨrɨraavaangejɨ sɨrɨbwaalɨvaangerajɨ nɨmɨnyɨ nyu'nawɨjɨwaakɨpɨ'desɨra.
Sarɨmɨre mɨgɨnyara se mwaryapɨjɨ a'mabaaitɨnna wangabɨ'derera.
Sarɨmɨre nera se warapɨjɨ waja ya'nɨpɨ'derera.
18Yo, sagaa' Nɨnnya Kuryarɨ wɨdɨngikɨdengɨra,
Nyɨdaayadɨvɨta a'mwejɨ a'mwerajɨ samɨlɨka.
Kuryai mena kulamwaalojɨ sagaa'
Nɨmɨnyɨ nyu'napi pwaraavɨ wɨjɨwaakɨpɨ'derera.
19Munyaba sɨgunyavɨ dɨragɨnyangɨjɨ gengɨjɨ yɨdeinyɨ.
Kwaakeba Kwaakevakɨ kujɨwaaina'mujɨ atɨka maru'napɨ'derera.
Tawesɨ dɨkesɨ jɨta naangesɨ wangabɨ'derera.
20Nyɨlyai mavuri yojɨ jɨhɨnyai yɨma'nadelyɨ.
Lawei wayaaka tawe'bɨ' yɨma'nadelyɨ sagaa'.
Kwanganapɨri Naangere dɨragɨnyagaa' naangegaa' yɨma'nadehaakɨ.
21Gazaizai gaimwange'na Naangerɨ jaka kadanganori
Naangei kavadaihasamaarojɨ Naangerei yɨma'nadelyɨ sahwai.’
Sara dɨnɨkesɨra.
22Yɨzɨrelɨyareihi yagaala dangɨ kadɨka du'nyɨla! Gotɨyai yawɨ'na ‘A'mwera dara yawɨpɨ'de' “O, Gotɨyai Naazaretɨ mwaalyai Jizaazarɨ wɨdasɨwaabɨkei daaka!” ’ Sara yawɨraka gannya dɨragɨnya' sahwarɨ kujaava' sai dɨragɨnyajɨ atɨka maru'nasa'nejɨ wɨjɨwaainya'nejɨ yɨna ya'. Sara yada dava sarɨmɨnyaba yadaasɨya'na sahwaihi mena yawɨ'mwaasaihɨlyɨ. 23Kɨgaa' Gotɨyai sɨdu'nakei dɨragɨnna yawɨraka ‘A'mweraavɨre kayaa'nanyanna Nyɨbwaalɨvaangei balade'na wɨdaasɨdeinyɨ.’ Gotɨyai sara dakei Jizaazarɨ kyɨhɨmaarya' sarɨmɨ ‘Aala!’ dɨna yeva dɨnyɨna ‘Yɨsavɨri Gotɨyare kɨwɨnya maayara sahwarɨ nilɨya tabɨka!’ Dɨnyɨna kye' Romɨyara sahwarɨ tamaketa sarɨmɨre wawɨnyasɨra. 24Sarɨmɨ sara yesa' kɨrɨ' Gotɨyai sarɨ ayɨna yɨdɨkaava'. Jizaazai yuyagaa' baryai mwari kyadɨke'na gɨleangeba taanga kɨnɨnnakeba padaihasamaa'na yaka yɨdɨkaava'. 25Sare' dare'nesɨ. Ne Devitɨ gamɨnyɨna yɨda'nɨka wɨjaa'
‘Yuyagaa' sɨnnyɨmagɨ Naangei mwaaida wangadɨnyainyɨ.
Nɨmɨre aangasɨmagɨ mwaaide'na lɨka myɨwɨneinyɨ.
Sai “Lɨka nyadɨkajɨ,” dɨragɨnyainyɨ nyɨmwaaihɨwa'.
26Savɨna nɨmɨre sɨmunyavɨ yɨlaaya yadɨ
Nɨmɨre taalɨsasɨ yɨleyagaainakeinyɨ wɨdadɨnyainyɨ.
Nɨmɨre kɨlaakejɨ' wakadehaa' Gotɨyarɨ yemwaalɨdezɨkɨ.
27Gɨlaayaraavɨreba nɨmɨre kuryai myagalya'mayɨ jɨtheigɨnyɨ.
Jɨwaalɨvaanga tewaanyainyɨre kɨlaakejɨ' bwia maburannejɨkɨ.
28Gaalyaburɨne tusanna nawɨ'nyɨna nyɨjɨwainɨwaana.
Nɨmɨnyaba mwaaidɨnya'na yɨlaayabwi dɨnyeku'deinyɨra.’
Ne Devitɨ sara yɨda'nɨkesɨra.
29Nya'mweihi, Ne sɨnnawɨnyai Devitɨmɨna nayaa nebwina yɨhɨthɨma! Devitɨ gamɨnyɨna myɨdayaa'. Aawa, sahwai kabala' kwakyaa' sai madɨkaayɨ yaa'. Madɨkaayɨ kyaa' dahaasagaa'na dava nemɨnyaba gamɨre wakɨnɨkevɨ wangadaanyainera. 30Devitɨ pɨropetɨyai Gotɨyarɨ wɨ'nawɨjɨwakyaakei mena yawɨryaa'. Gotɨyai Devitɨmɨ yagaala dɨragɨnya' wɨjaa' ‘Gɨmɨ kingɨyaigɨ maremwaaidɨnyabaaibɨ' gɨnnyai a'mweraavɨ maremwaaladerɨ wɨmwaaihɨdelyɨ.’ 31Sarevɨdaa'nyɨ yawɨraka dara wanganyaake' ‘O, Gotɨyai sara yadei daaka!’ Daka Kɨraazɨtɨyai baryai ayɨna dɨkaasa'na dɨnɨkesɨ.
‘Gotɨyai gɨlaayaraavɨreba myagalya'mayɨ yakelyɨ.
Gamɨre kɨlaaka bwia maburyakelyɨ.’
32Sara dɨnɨke'na Gotɨyai Jizaazarɨ yɨdɨkaavakelyɨ a'mwe dai baryai. Kyɨdɨkaava' nemɨ yuyaina sahwarɨ tɨnna wanganorɨna yɨhɨzalɨkurakɨvanɨgoinera. 33Sɨgunyavɨ Gotɨyare aangasɨmagɨ dɨragɨnnakeba kamwaala' Gotɨyai Ganɨmaangei sara wɨdake' gannya Kuryai Tewaanyarɨ sara kujaava' Jizaazai Kuryarɨ yange'na nemɨnyɨna yaasɨwakevɨdaa'nyɨ sarɨmɨ kadɨka wɨ'nɨvanɨgasajɨ tɨnna wangamanɨgasajɨ Kuryai Tewaanyarɨna sara yɨvanɨkelyɨ. 34Sare' dare'nesɨ. Sɨgunyavɨ Jizaazai yɨlaawaka kɨrɨ' Ne Devitɨ yɨda'nɨka sahwai myɨlawiaa'. Aawa. Sɨnnawɨ Devitɨ dara wɨjaa'
‘Naangei nɨmɨre Naangerɨ wɨda'
“Nɨmɨre aangasɨmagɨ dava mwaaida'gɨzɨ
35Gɨmɨre sɨvɨlyɨraarɨ yɨkamaangeraavɨ marulawakɨdehaa'nanyɨ.
Dɨragɨnaangeigɨ nɨmɨre nawɨ'nyaba gɨmwaaihɨdehaa'nanyɨ.” ’
Ne Devitɨ sara dɨnɨkesɨra.
36Sarevɨdaa'nyɨ Yɨzɨrelɨya yuyaihi nayaa jawɨramaremwaalyɨla! Jizaazai darɨna yɨhɨthɨvanɨgorɨ yɨsavɨri nilɨya wɨramesaihɨlyɨ. Sarɨmɨ sara yeta Naangerɨ Kɨraazɨtɨyarɨ wɨmwaaiha' Gotɨyai.” Pitai sara wɨdakesɨ.
37Savɨ a'mwera kadɨka wɨ'neva sɨmunyangɨ kale naanga wiadaa'nyɨyagaa' “We'!” deva Pitarɨjɨ Apozelɨya pwaraavɨjɨ wɨde' “Nya'mweihi, gara yaajɨwo? We'!” 38Pitai wɨda' “Sarɨmɨjɨya gazaizai kayaa'nanyabwi myanna! ‘Sɨmunya mudɨke Gotɨyarebwi yɨwɨjainyɨ,’ kadapɨjɨ Kɨraazɨtɨya Jizaazare yayavɨna aalyavɨ bavɨtaazɨya' kyɨhyawaajɨ sarɨnnya kayaa'nanyabwi Gotɨyai marasɨ'nadelyɨ. Kamarasɨ'nojɨ Gotɨyare yangerɨ Kuryai Tewaanyarɨ dɨmaaryideihɨlyɨ. Nabaai, Gotɨyai dɨnɨ' ‘Nɨmɨre Kuryarɨ gɨzaavɨdeinyɨ.’ 39Sare' dare'nesɨ. Yagaala yune naanga nebulya'na wɨja savɨ gɨmɨnyɨnajɨ gɨmɨre kaimɨraayaraavɨnajɨ menyawɨnyaraavɨnajɨ dɨnɨkesɨ. Yɨ gamɨnyawɨ nemɨre Gotɨyai Naangei yuyaraavɨ jaka wɨjɨvwaramaarojɨya sahwaraavɨna gannya Kuryarɨ wɨjaavadelyɨra.”
40Pitai tewaanna wɨdaka yagaala pɨnɨ dɨragɨnna wɨjalɨkurakada wɨdɨhaa'bwara' “A'mwe dahaasa dara kayaa'na yadɨvɨsaraavɨ kayaaka yojɨ gɨmɨnyɨjɨ kayaaka nyɨhyadɨka! Gotɨyarɨ jaka duthana! Yɨhɨvadaihasamaarana!” 41Sarevɨdaa'nyɨ a'mwe gamɨre yagaala nayaa wɨ'nesaraavɨ Jizaazarera bavɨtaazɨya yɨna ye'. Bavɨtaazɨya yɨna kye' yɨrɨka sagaa' Naangei kurɨnaka kwala naanga 3,000 saraavɨ gannyaraayawɨ ye'mwannawɨmwaaiha'. 42Sarera Wɨdaasadera Gotɨyare yagaala wɨjɨwaakadɨvɨsagaa' kadɨka dɨragɨnna wɨ'nɨbainyɨna. Kadɨka wɨ'nɨbainadɨvɨ' yavada'galya'na yuyara nayaa dɨnyɨna yadɨvɨ' “Jizaazai nemɨnyɨneba balakelyɨ,” dadɨvɨ' gave pɨba gɨrɨkula gunyɨna, nadɨvɨ' yuyagaa' Gotɨyarɨ wɨdadɨvɨkɨ.
Kɨraazɨtɨyareraavɨrebwinesɨ.
43A'mwe yuyara Gotɨyarɨna lɨka ye'. Gotɨyai gannya dɨragɨnya' Wɨdaasaderaavɨna kujaava' kumɨ dɨragɨnyajɨ nawɨ'nya wɨjɨwaainyajɨ kye' a'mwera atɨka maru'nareva lɨka ye'. 44Lɨka yadaapɨjɨ wɨ'nadɨvɨsara avaaizɨmunya yawɨ'dɨvɨ' kuna yɨkabadɨvɨ' Naangerɨna dɨdɨvɨ' kumɨre wapaayajɨ gɨlyɨvɨsajɨ jaapaina yadɨvɨ' yanga yɨnyɨna. 45Yanga yɨnyɨna yadɨvɨsara kumɨre kwaakejɨ gɨlyɨvɨsajɨ mubadɨvɨ' “Nɨgwɨmaayai damwaalɨka!” dadɨvɨ' nɨgwɨmaaya sahwaraavɨ wɨmudaasakeraavɨ wɨmunna. 46Wɨmunna yadɨvɨ' yɨrɨka gazarɨsarɨkɨ Gotɨyare Angevɨ kuna yɨkabadɨvɨ' yɨlaaya yadɨvɨ' kumɨre angengɨ gɨrɨkula gunyɨna, namwaaina. Namwaaina yadɨvɨsara pwaraavɨna yawɨ'na yadɨvɨ' sɨmunya yɨda'nanyangɨ yɨlaaya yadɨvɨ' wapaaya jaapalanamwaaina. 47Jaapalanamwaaina yadɨvɨ' Gotɨyarɨne yayavɨ munyaba makidɨvɨ' a'mwejɨ a'mwerajɨ sa dɨnyɨna “Jizaazarera tewaanyarera.” Dɨnyɨna yadɨvɨ' yɨrɨka gazarɨsarɨkɨ Naangei a'mweraavɨjɨ a'mwengɨjɨ padaihasamaa'da gannyaraayaba kusɨlaanyaraayaba wɨmwaaihada mwaale'.
S'ha seleccionat:
Apozelɨyara 2: byr
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2013, Wycliffe Bible Translators, Inc. All rights reserved.