Lukɨ 18
18
Yaanyɨwaake' gamɨre kotɨya'na yawɨbwa'derɨ jaka wɨja'nesɨ.
1Sagaa' yuyagaa'na Gotɨyarɨna yɨdaangabɨ'de', maa'na nyunadɨ'de'na Jizaazai ke'ba'na dara wɨjɨwaakɨna 2“Anga naanga pɨba yawɨbwa'de pwai mwaalɨna. Yawɨbwa'de dazai Gotɨyarɨna myawɨri yada nabaai a'mwe kwaraavɨnajɨ sɨmunya kwalaalya myawɨryadei. 3Nabaai a'mwe pɨrɨ' yaanyɨwaake' anga naanga dazaba mwaalɨna. Yuyagaa' yawɨbwa'de dazaryawɨnna bɨbya yɨbainadaa'dehaa' wɨdadesɨ ‘Nɨmɨre yɨkamaangei kayaaka nyɨgalakade'nanyɨ. Sahwarɨ gɨmɨ kotɨyavɨ nayaa dɨnyɨgaimwade'nanyɨra.’ 4Sara wɨdɨwɨja yada sɨnnawɨ sagaa' yawɨbwa'de dazai sahɨrɨvɨna kotɨyavɨ gaimwange'na ‘Aala,’ yawɨ'na. Sara yawɨ'na yaka kɨrɨ' dɨvi sai gannya sɨmunyavɨ dara yawɨ'na ‘Nɨmɨ Gotɨyarɨna lɨka mivanɨgeinyɨ. Nabaai a'mwe kwaraavɨnajɨ sɨmunya yawɨrɨkwaasa mivanɨgeinyɨ. 5Kɨrɨ' a'mwe dathava datha' yaanyɨwaaka datha' nɨmɨnyɨ taanga nyɨjaavadeinyɨra. Yuyagaa' yuyagaa' bɨbya yɨbainada'davadaawori dɨvi nɨmɨre kɨlaakejɨ' yuna maa'na nanyɨma'nadɨka!’ daka gamɨre kotɨya'na gaimwanna wina yakelyɨ.” 6Naangei sara wɨdɨna yaka dara wɨdɨna “Yawɨbwa'de kayaa'nanya dazare yagaalya' nayaa jawɨrila! 7Yawɨbwa'de kayaa'nanyai kave kave yawɨbwarakelyɨ. Gotɨyai avaalyai daaka! Gotɨyare dahɨlakakera yuya yɨrɨkerɨkaavɨjɨ yuya sawɨsarɨkaavɨjɨ sahwarɨ yɨdaangadɨvɨsaraavɨ kotɨya'na yarai gaimwanna mwi yadei daaka! Sahwaraavɨ kave kave gaimwanna mwi yadei daaka! Aawa. 8Yɨhɨthɨvanɨge. Sai kotɨya'na yarai wɨgaimwagathelyɨ. Sare' kɨrɨ' dɨvi A'mweraavɨne Kaimɨraayai bathehaa' dazagaasagaa' a'mwe Kwaakevakɨyaraavɨ tɨnna wanganaja' dɨragɨnna lɨmwadɨvɨ' dɨngaka!” wɨdɨna.
Taakɨzɨya maa'delyɨ Perɨzɨyalyɨ saraarɨna ke'ba'na dɨnɨke'nesɨ.
9A'mwe pwara yaya' yune kumɨ saraavɨne'na makinadɨvɨ' “Nemɨ a'mwe yɨda'maraangeinera. A'mwe pwara yuna kayaa'nanaangerera,” dadɨvɨsaraavɨ ke'ba'na dara wɨdɨna 10“A'mwe pwaraai Gotɨyarɨ wɨja'neraai Gotɨyare Angevɨna kaanna wɨlaawɨna. Pwai Perɨzɨyai. Nabaai pwai a'mwe taakɨzɨya maa'delyɨ. 11Perɨzɨyai dazai daa'da yune gannya sɨmunyavɨna Gotɨyarɨna dara dɨna ‘Gotɨyaigɨ, nɨmɨ a'mwe pwarabɨtainyɨ mɨka! Sarevɨdaa'nyɨ gɨmɨnyɨna “Su! Su!” gɨthɨwa. Pwara kwaasɨ yɨna yadɨvɨ' kuka yɨna yadɨvɨsare. Nayaa yɨda'maraangebwi myadɨvɨsare. Pwaraavɨrengɨ ata lɨmwadɨvɨsare. Nabaai nɨmɨ a'mwe taakɨzɨya maa'de dazaibɨtainyɨ mɨka. Kɨrɨ' nɨmɨ aawa. 12Yuya wikɨyarɨkaavɨ yɨrɨka pɨrɨkaarɨna tɨka wapaaya kɨmaakɨya dakadɨnyainyɨ. Nabaai yuya maa'dɨnya ata yuyɨraai jaapaidɨ pimagɨnyavaa' gɨmɨnyɨ gɨzaavadɨnyainyɨ.’ 13Sara wɨdɨna kya' kɨrɨ' a'mwe taakɨzɨya maa'dei menya saamɨnya keiba daavɨna yaka Sɨgunyavɨna kekina mamaranganya'. Aawa. Sai gamɨre kayaa'nanyabwina kale wiada gannya kɨhɨsaba mala tannyɨna yaka dɨna ‘Gotɨyaigɨ, nɨmɨ a'mwe kayaa'na yadɨnyainyɨ. Sareinyɨna kale'na dɨnyɨgaimwana! Nɨmɨnyɨna gɨmɨre sɨnna tɨka wɨda'devwi dɨnyɨmarasɨ'na!’ 14Sarɨmɨnyɨ yɨhɨthɨvanɨge. A'mwe taakɨzɨya maa'de dazai, Gotɨyai gamɨre kayaa'nanyanna marasɨ'naka ‘Tewaanyaigɨnyɨra,’ wɨdakei sarei gannya angevɨna ayɨna wawakelyɨ. Kɨrɨ' nabaai a'mwe pwai aawa. A'mwei yaya' yune gamɨnne'na munyaba makɨlajai, Gotɨyai dalaangewɨ marulawakadelyɨ. Kɨrɨ' a'mwei gamɨnyɨne yaya' munyaba mamakinyɨ yajai, yɨ Gotɨyai gamɨnyɨne yaya' munyaba makɨladelyɨ.”
Jizaazai kaimɨraaya maalɨkemɨlɨkaavɨ ata nayaa dathɨwagake'nesɨ.
(Matɨyui 19:13-15; Maakɨ 10:13-16)
15Kaimɨraaya maalɨkemɨlɨkaavɨjɨ gamɨnyawɨnna makabɨna yɨna. Sahɨyura yawɨ'na “Tewaanya'na asa' dathɨwagathe'na gamɨnyawɨnna makwawaana!” deva makabɨna yadaapi kɨrɨ' gamɨre mɨdɨdɨvɨsara dazavɨ tɨnna wanganna yeva sahɨyuraavɨ maanga wɨdɨna. 16Maanga wɨdɨna yadaapi Jizaazai kaimɨraayamɨlɨkaavɨ gamɨnyabanna jaka jɨvwarɨjɨmaa'nyɨna yaka wɨdɨna “Kaimɨraayamɨlɨka yune nɨmɨnyawɨnna bɨpɨka! Sarɨmɨ magaladalɨmwabɨnera! Sare' dare'nesɨ. Gotɨyai a'mweraavɨ maremwaaide', yɨ sasaremɨlɨkaavɨnesɨ. 17Nebulya'na yɨhɨthɨvanɨge. Pwai kwai Gotɨyai a'mweraavɨ maremwaaide' kaimɨraaya maalɨkemɨlɨ'bɨ' mamaaryajai, yɨ sai kusawɨ yɨnɨga wi'na wɨladei mɨka. Arɨkewɨ.”
A'mwe naangei gɨlyɨvɨkɨravɨnakerɨnesɨ.
(Matɨyui 19:16-30; Maakɨ 10:17-31)
18A'mwe naanga pwai gamɨnyɨ yɨdaanganna “Wɨjɨwaakya tewaanyaigɨ, nɨmɨ gara ya'mujɨ gaala yuyagaa' yuyagaa' tewaanya mwaalya'ne' maarɨdeinyaka?” 19Yɨdaanganna kya' Jizaazai wɨdɨna “ ‘Tewaanyaigɨnyɨreva,’ be'na nyɨdɨwaana? Tewaanyai, Gotɨyai yune gave sahwainanyalyɨra. Pwara aawa. 20Kɨwɨnya dɨnɨkevɨ mena yawɨ'dɨnyaigɨnyɨ. Dara dɨnɨ' ‘A'mwe pwaraavɨrengɨ ata malɨmwadɨnna! A'mweraavɨ maramakɨnna! Kuka mamaa'dɨnna! A'mwe pwarɨne'na kwaasɨ majalɨkurakɨnna! Gɨnnya gɨmaamaangelyɨ gwaangesɨ sawaare yagaalyangɨ nayaa dɨmɨdɨna! Kɨrɨmɨre yaya' dɨmakɨla!’ ” 21Wɨdɨna kya' sai wɨdɨna “Kɨgaa' yune kawe'nyagaa'daa'nyɨ dahaakɨgaasɨ kɨwɨnya yuya dazangɨ mɨdɨmanɨgeinyɨ.” 22Jizaazai yagaala daza' kadɨka wɨ'naka sahwarɨ wɨdɨna “Yune gave pɨnɨnne'na kuna gɨmudaasɨvanɨkeigɨnyɨra. A'mwera mubya gipɨ'de'na gɨmɨre gɨlyɨvɨta yuya duzaama! Nɨgwia maara'gɨzɨ a'mwe gɨlyɨvɨ'maayaraavɨ gɨmɨre nɨgwia duzaama! Gɨmɨ sasara yɨja', Sɨgunyavɨne nawɨ'nyaange kɨnɨnnakeigɨnyɨra. Sareigɨ dɨnyɨmɨdɨnaama!” 23Wɨdɨna kya' dazai yagaala daza' kadɨka wɨ'naka gamɨre sɨmunyai taanga yɨma'nyɨna. Sare' dare'nesɨ. Sahwai a'mwe gɨlyɨvɨkɨravɨnakei. 24Gamɨre sɨmunyai taanga yɨma'nyɨna kya' Jizaazai sahwarɨ tɨnna wangada wɨdɨna “A'mwe gɨlyɨvɨta kwalaalyajɨyara Gotɨyai maremwaaidevɨ yagɨyagɨ wibɨ'derera. 25Sare' dare'nesɨ. Kaamelɨya' ‘Langerɨkɨre daibu'nyavɨ wɨlɨma!’ dozɨ yaja' sara mi yadesɨ. Sahɨbaaibɨ' a'mwe gɨlyɨvɨkɨravɨnakei ‘Gotɨyai maremwaaidevɨ wɨlaawɨma!’ dada yagɨyagɨ yɨna yaja' yadei mɨ'.” 26Wɨdɨna kya' a'mwera daza' kadɨka wɨ'nevera wɨdɨna “Nabaai sasara yaja' aarɨ wɨvadaihasamaaradelaka? Gaala yuyagaa' yuyagaa' mwaalya'ne' maarojɨ mwaaladei aaihwalaka?” 27Sara wɨdɨna kye' sai wɨdɨna “A'mwera yuya mi yɨpɨne sangɨ, sa Gotɨyai yɨnɨga wi'na yadengɨra.” 28Wɨdɨna kya' Pitai wɨdɨna “Yɨthaa, nemɨre angebanyajɨ gɨlyɨvɨsangɨjɨ mena yagalya'mavoneinera. Sara yona gɨmɨnyɨ gɨmɨdɨdaanya'nanyɨ.” 29Wɨdɨna kya' sai kumɨnyɨ wɨdɨna “Nebulya'na yɨhɨthɨvanɨge. A'mwe aane pwai kwai, Gotɨyai maremwaaidevɨna yawɨ'da angevɨjɨ a'mwevɨjɨ gathaa'gahwaaravaavɨjɨ ganɨmaangeyorɨjɨ kaimɨraayangɨjɨ yagalya'mavakerɨna, 30nabaai dahaasavɨ Gotɨyai kwalaalya sanna mibwa'mwagi yadei daaka! Nebulyasɨ. Nabaai sarei dɨvi naanga yɨma'najahaa' gaala yuyagaa' yuyagaa' mwaalya'ne' maaradelyɨra.”
Jizaazai dahasaai dahaa' “Bala'mujɨyainyɨ ayɨna dɨkaavɨdeinyɨra,” dake'nesɨ.
(Matɨyui 20:17-19; Maakɨ 10:32-34)
31Sagaa' gamɨre atɨraai sɨvɨlɨrɨdaa'nyɨ pwaraalyaraavɨ maarɨna yɨna yaka wɨdɨna “Yɨthaanyi, dahaa' Jeruzaalemɨna wimanaabɨho. Sahɨba A'mweraavɨne Kaimɨraayainyɨna Gotɨyai pɨropetɨyaraavɨ kujaa' yagaala yuya sa yɨdayaasangɨ yuna yɨma'nyɨna yade'nanyɨra. 32Sare' dare'nesɨ. Sahwainyɨ a'mwe Anga Naanga Pimagɨnyaraavɨna nyɨmarɨmwangɨpɨ'deinyɨra. Sara yapɨjɨ yagaaibɨraizɨkejɨ nyɨdangadɨvɨ' yuna kayaa'na nyɨgaidɨvɨ' nɨmɨre sɨnnyɨkɨ maagwala nyura'mwawakɨpɨ'deinyɨra. 33Wɨlyabaalyɨ dɨka nyɨlɨ'bwarapɨjɨ maratamanyɨrɨmupɨ'deinyɨra. Bala'muri yɨrɨka daryaai darɨkɨ ayɨna dɨkaavɨdeinyɨra.” 34Wɨdɨna kya' yagaala daza' myawɨrina. Yagaala dazavɨne aaya kaavɨlya' kumɨnyɨ lɨka yulya'na. Sahwara sɨmunya' nayaa myawɨri yagaala wɨdaka dazavɨ.
Jizaazai a'mwe tɨbɨnya pwarɨ tewaanya yavada'galake'nesɨ.
(Matɨyui 20:29-34; Maakɨ 10:46-52)
35Sahwai anga Jeriko aya kɨbanna yɨ'ma'na yaka, yadaa'nyɨ tu'maangebaarɨ a'mwe pwai tɨbɨnyai walamwaaida a'mweraavɨ nɨgwianna jaka wɨdangadelyɨ. 36Sarevɨ sahwai a'mwe kwala bwa'naanya' yɨkabɨvanɨgaveva, kadɨka wɨ'nyɨna yaka sai a'mwe pwaraavɨ yɨdaanganna “Gatha'dara yɨvanɨgaveva?” 37Yɨdaanganna kya' ja'nawɨdɨna “Jizaazai Naazaretɨ mwaalyai kaanya bɨvanɨkeva.” 38Sara wɨdɨna kye' sai jaka wɨdanganna “Jizaazai, Devitɨmɨ gawaalɨ'gɨ nɨmɨnyɨna kale gyana!” 39Jaka wɨdangadaa'nyɨ a'mwe aaya sɨnnawɨ yɨkwaadɨvɨsara maanga dara wɨdɨna “Maange' bɨpaina ya'gɨzɨ dɨmaku'nana!” Kɨrɨ' jaka naanga kuna danganna yada wɨdɨwɨja yɨna “Devitɨmɨ gawaalɨ'gɨ, nɨmɨnyɨ kale'na dɨnyɨgaimwana!” 40Sara wɨdɨwɨja yɨna yadaa'nyɨ Jizaazai bathaa'na yɨna yaka saraavɨ dɨragɨnna wɨdɨna “Davanna nɨmɨnyabanna dɨmakabila!” Wɨdɨna kya' sai mena aya kɨbanna wɨlaabɨna yɨna yaka yadɨ'nyɨ sai sahwarɨ yɨdaanganna 41“Nɨmɨ gɨmɨnyɨ berɨ' gara gide'nanaka?” Yɨdaanganna kya' sai wɨdɨna “Naangeigɨ, ‘Nɨmɨ tɨnnya' ayɨna wanganɨma!’ dena yawɨ'manɨgena.” 42Wɨdɨna kya' Jizaazai wɨdɨna “Gɨmɨre tɨnnyai ayɨna danganna! Gɨnnya dɨragɨnna lɨmwangebwi gɨmɨnyɨ tewaanya gyavada'gaimwaka.” 43Sara wɨdɨna kya' jaahwasa'bɨ' gamɨre tɨnnyai tewaanya yɨma'nyɨna yaka yennyɨna. Sarei Jizaazarɨ mɨdɨnna yɨna yaka Gotɨyarɨne yaya' byaannake' munyaba makina. Sarevɨ a'mwera dazavɨ tɨnna wanganeva Gotɨyarɨne yaya' munyaba makina ye'.
S'ha seleccionat:
Lukɨ 18: byr
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2013, Wycliffe Bible Translators, Inc. All rights reserved.