زەبوورەکان 1:76-12
زەبوورەکان 1:76-12 پەیمانی نوێ و زەبوورەکان بە سۆرانی (PNTZS)
له ئیهوود دا خودا ناسراوه. له ئیسڕائیلدا ناوی مه‌زنه. كه‌پری له شالیمه، هه‌واری له سیهیۆنه. له‌وێ تیره گڕداره‌كان و قه‌ڵغان و شمشێر و جه‌نگه‌كانی تێكشكاند. سیلاه. تۆ ڕه‌وشه‌نی، له چیای جه‌رده‌كان به‌هێزتری. دڵپته‌وه‌كان ماڵیان به تاڵان چوو. خه‌وی خۆیان خه‌وتن، هیچ جه‌نگاوه‌رێک نه‌یتوانی ده‌ست بكاته‌وه. ئه‌ی خودای یاقوو به سه‌رزه‌نشتی تۆ، ئه‌سپ و سوار پێكه‌وه كه‌وتنه خه‌وێكی قووڵه‌وه. تۆ خۆت به‌سامیت. كێ له به‌رده‌مت ڕاده‌وه‌ستێت، له كاتی تووڕه‌ییت؟ له ئاسمانه‌وه حوكمت بیسترا. زه‌وی ترسا و كپ بوو. به هه‌ستانی خودا بۆ دادوه‌ری، بۆ ڕزگاركردنی هه‌موو دڵنه‌رمه‌كانی زه‌وی. سیلاه. چونكه تووڕه‌یی مرۆڤ سوپاست ده‌كات. پاشماوه‌ی ڕقه‌كه به ناوقه‌دته‌وه ده‌به‌ستیت. نه‌زر بۆ په‌روه‌ردگار خوداوه‌ندتان بكه‌ن و به‌جێی بهێنن، ئه‌ی هه‌موو ئه‌وانه‌ی له ده‌وری دان. دیاری پێشكه‌ش به سامناک بكه‌ن. ئه‌وه‌ی ڕووحی سه‌رۆكه‌كان هه‌ڵده‌كه‌نێت. سامناكه بۆ پاشاكانی سه‌ر زه‌وی.
زەبوورەکان 1:76-12 كوردی سۆرانی ستانده‌رد (KSS)
لە یەهودا خودا ناسراوە، لە ئیسرائیلدا ناوی گەورەیە! کەپری لە شالیمە، هەواری لە سییۆنە. لەوێ تیرە گڕدارەکان و قەڵغان و شمشێر و جەنگەکانی تێکشکاند. تۆ ڕەوشەنی، لە چیای نێچیرەکان شکۆدارتری. قارەمانەکان ماڵیان بە تاڵان چوو، دوایین خەوی خۆیان نوستن، هیچ جەنگاوەرێک نەیتوانی دەست بکاتەوە. ئەی خودای یاقوب، بە سەرزەنشتی تۆ، ئەسپ و سوار پێکەوە کەوتنە خەوێکی قووڵەوە! تۆ خۆت بەسامیت! لە کاتی تووڕەییت، کێ لەبەردەمت ڕادەوەستێت؟ لە ئاسمان حوکمت بیسترا، زەوی ترسا و کپ بوو، بە هەستانی خودا بۆ دادوەری، بۆ ڕزگارکردنی هەموو ستەملێکراوانی زەوی. بێگومان تووڕەیی مرۆڤ ستایشت دەکات، خۆتت بە پاشماوەی تووڕەیی چەکدار کردووە. نەزر بۆ یەزدانی پەروەردگارتان بکەن و بەجێی بهێنن. ئەی هەموو ئەوانەی لە دەوریدان، دیاری پێشکەش بە سامناک بکەن. ئەوەی ڕۆحی میرەکان دەشکێنێت، سامناکە بۆ پاشاکانی سەر زەوی.