Luka 24
24
Ebuhuna Yesu
(Mat 28:1-10; Mar 16:1-8; Yoa 20:1-10)
1Nyia taŋatio motie berien to oloŋ Dominika, iwanyi nyia aŋoruo hunia ilume. Iyarai nyia isi ariaa ninyia ihuhumuni isi. 2Onyurani nyia isi amoruo otto hutuk ilume ittaborori addi. 3Ati ninyia ajiŋari isi attua, obeŋi nyia isi onyurani ahuan ono Yesu Lamonye diya. 4Owotiai nyia isi diya buo illillihai te erre hunia, attati omuk aliawa arrihai ileyehino jihosi buo iyyafatie aboŋojin hunno opipiahi. 5Inef nyia abaŋi aŋoruo hunia, ette isi ijurru afau buo aliawa hia ette jiaran jihosi, “Nyio ittifiati itai lesuoni ihiji hayaak? 6#Mat 16:21; 17:22-23; 20:18-19; Mar 8:31; 9:31; 10:33-34; Luk 9:22; 18:31-33Abeŋ inyi tene, ati ibuhu inyi. Ogiluna ekenita hunyia iramak inyi itai howon inyi Galilea. 7‘Isiori adi Lonyi Tulo ihas heyyak. Isihoni adi inyi likruce, ati ihalu oŋitek hunihoi, ibuhu adi inyi toye.’ ”
8Attati aŋoruo hunia igiluna ekenita Yesu, 9ette icaharu telume, ette iramana erre huna 'daŋ jio lejifak hula 'tomon habotie iko jio hullomuk 'daŋ. 10Aŋoruo hunia isi nyia ba; Maria Madalina, Yoana, iko Maria honye Yakobo. Isi iko aŋoruo hunnomuk nyia iramani erre hunia jio lefahat. 11Ati igigiloi nyia lefahat jio ikianai nyia aŋoruo hunia erre asai, ette isi ibiaŋan iruhi eram hosi. [12Ati odioto nyia Petro ette iŋioron ilume, ette irrafa, ette iluŋur attua, ette igonyuna aboŋojin enuhiti ijiai. Attati inyi icaharu haŋ buo illilliha te eram hirre hunyia iduoŋi 'to.]#24:12 Obeŋ ekori ana omuk egierita.
Adaharu Emaus
(Mar 16:12-13)
13To oloŋ nyia, ofuoi nyia omuk lejifak arrihai jio obo amiji anna anya Emaus anna ara alamaji honyi to Yerusalem ihuo amaili hattarik. 14Iyiyabarai nyia isi, isi hama te erre hunia 'daŋ hunyia iduoŋi 'to. 15Ninyia hékianai isi, ette Yesu ta ahuan honyi ittuna many jihosi, ette idaharu ikosi. 16Igonyuni nyia isi inyi, ati itattiranyi nyia isi oŋida obeŋi omijani inyi; 17ette Yesu jiaran jihosi, “Anyio hirre hunne ikikianati itai hunia buo idahati?”
Owotiai nyia isi jillili buo ijiriŋai. 18Attati obo olosi alla anya Keleopas itarraŋ jihonyi jiojio, “Iyye alia atamononi abotie to Yerusalem, elle etimo 'to erre hunyia iduoŋi 'to diya to oŋitek hunne hetehi 'to hunia illaŋan?”
19Buo inyi ette jiaran jihosi, “Anyio hirre?”
Itarraŋi nyia isi inyi ojio, “Erre huno Yesu olo Nasaret, linyia ara 'to ahekianani Hollum linyia oduari ehanita iko ekenita honyi 'daŋ ihosiere Hollum iko ihosiere waati 'daŋ. 20Inefuni nyia ehumak elettaha iko elettaha waati hohoi inyi, ette isiarana inyi jio gala Roma, oŋida oŋotoni jihonyi aye; ania, itisihonierek inyi likruce. 21Ati eyihi nyia hohoi jio, inyi adi alia ollo ottu 'to italahuna aati Israele! Buo fe ihide erre hunia 'daŋ, ahana arai oŋitek hunihoi ihalu eduoŋ erre hunia. 22Ati italafuhi nyia hohoi omuk aŋoruo tehiji hohoi, hunyia ofuoi 'to nyia motie hanyik ilume. 23Obeŋi nyia isi onyurani ahuan honyi diya; ania, ette isi icohuno, ette jiaran jio, oleyehinie duo ajilohien jihosi ihuo arigia; isi duo iramani isi jio, isu inyi. 24Ofuoi nyia omuk hulohoi ilume, ette inyurana erre hua ihuo ojiori duo aŋoruo hua, ati obeŋi nyia isi igonyuni inyi.”
25Attati Yesu jiaran jihosi, “Aii, itai aati hullo obeŋi hossi! Oddiŋi atajia hatai iruhori erre 'daŋ hunyia ikianai ekianak Hollum! 26Obeŋi nyia soho ojiori jio oŋida ittigemie Olonyimoto te erre hunia, buo diya ette inyi ijiŋana ikuatan honyi?” 27Attati Yesu ikukubonia erre 'daŋ hunyia igioroni tenyi ibuhi Hollum. Itterio inyi ibuhi Mose many jio egierita huno ekianak Hollum hullomuk 'daŋ.
28Ninyia iliahai isi iŋer miji onno ofuarik isi, itihan nyia Yesu ahuan ihuo ollo ojio ecul ahosiere. 29Attati isi ittana inyi jiojio, “Itoŋoi ikohoi, nyio, attu akekai buo fe oloŋ iddorro.” Ania, ette inyi ijiŋara attua itoŋori iko isi. 30Ninyia itoŋo inyi iŋiyere iko isi, ette inyi iduhuna emune, ette isio ahumo, ette ibibeny inyi, ette isiarana jihosi. 31Attati oŋite hosi iŋa, ette isi imijana inyi, buo inyi ette ilitohina tehiji hosi muluyaŋ. 32Ikianai nyia isi, isi hama jiojio, “Obeŋi duo soho atajia hohoi omunoi teneduo ikianari inyi jihohoi tehiji ekoi, buo fe iramak hohoi ekenita hutto buk Hollum?”
33Teya teya, odiotoi nyia isi ette icaharu Yerusalem. Buo diya, onyurani nyia isi lejifak hula 'tomon habotie inosonie arabotie iko aati hullomuk, 34buo ikianai jio, “Ibuhu Lamonye hode toye! Aleyehino jio Simone!”
35Attati aati hulo iramana jihosi erre hoduo iduoŋi 'to jihosi ihiji ikoi, buo fe aŋai emijak isi Lamonye te neduo obenyiere inyi emune.
Oleyehino Yesu jio Lejifak Honyi
(Mat 28:16-20; Mar 16:14-18; Yoa 20:19-23; Ehanita 1:6-8)
36Ninyia hekianai isi erre hunia, owotia nyia Yesu ta ahuan honyi ihiji hosi ette jiaran jihosi, “Hatawana nelik tajia ikatai.”#24:36 Obeŋi omuk egierita owoni iko ette jiaran jihosi, “Hatawana nelik tajia ikatai.”
37Abaŋi nyia isi bebe buo fe ikikiroi, nyio, igigiloi nyia isi jio emijio isi oloholio hayaani. 38Buo inyi ette jiaran jihosi, “Nyio ilafuhoti itai buo fe atajia hatai okuayai? 39Imijata ahas iko eejek hoŋ, oŋida imijana jio ani alia hode. Iko ottiroto ahuan hoŋ, imijana adi itai jio obeŋ oloholio owon iko eriŋo buo ahoi ihuo igonyuna itai owoni jihoŋ.”
40Ninyia liken inyi hunia, ette inyi itahutana ahas iko eejek honyi.#24:40 Obeŋ ekori ana jio omuk egierita. 41Ati, hogol nyia jihosi iruhori nyio, obolo nyia amuno iko ellilliha jihosi bebe; ania, ojiari Yesu jihosi jio, “Owon obo ariŋ jihatai onno oŋiye?” 42Ette isi isiarana jihonyi ahami alla amuda, 43buo inyi ette imojuna, ette ihonya ihosiere hosi.
44Attati inyi jiaran jihosi, “Ekenita hoŋ hunia, hunyia ajio ni jihatai ninyia hawon ni ikatai, jio: itasiruni adi erre 'daŋ hunyia igioroni toni ifahita huno Mose iko egierita huno ekianak Hollum buo fe ibuk Fureta.”
45Attati inyi iŋahina ossi hosi imijaniere egierita hutto buk Hollum, 46ette jiaran jihosi, “Igioroni nyia jio: ittigemie adi luŋa Olonyimoto, buo ihalu oŋitek hunihoi ibuhu adi inyi toye 47jio, oŋida buo fe ittittoye ehara iyyata iko ahohina iyyata ta afure honyi ifauhien 'daŋ; itterio Yerusalem. 48Irata itai asuuti erre huna. 49#Ehanita 1:4Efahu adi ni jihatai ariŋ ninyia ocorok Monyoŋ. Ati, itilati itua bore gala many osuuniere aduaran to hide jihatai.”
Iyarai Yesu Lidou
(Mar 16:19-20; Ehanita 1:9-11)
50 #
Ehanita 1:9-11
Attati inyi iyaru isi many iger Betani, ette ikaf ahas honyi ahide, ette imojonia jihosi amuno. 51Ninyia homojok inyi isi amuno, ette inyi leten addi to hosiere hosi, ette ikafaru inyi idou.#24:51 Obeŋi omuk egierita owoni iko, “Ette ikafaru inyi idou.” 52Buo isi ette itahabuyo inyi, ette icaharu Yerusalem buo omunoi bebe. 53Odulori nyia isi etahabuyo Hollum Ihaji emojit enne ittokon.
Právě zvoleno:
Luka 24: EA2003
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in South Sudan 2003