Lukas 24
24
1Donetoo di allo Mingku mebengngi'-bengngi', yato sangngaka-sangngaka bahine to pentindo'na Puang Yesus sika mao pano di ku'bu' umbaha yato minnä'-minnä' bomammi' ang inang puhang sika napatoka. 2Ya' sika ullambi'mi yato batu pelapa' ku'bu' puha dikisu' lambi' titungka'mi. 3Anna sika tamai yato di ku'bu' ampo' dang aha nalambi' yato bahkena Puang Yesus. 4Lella' sika ke'de' umpihki' yato aka ang dahi, ya' pihsa'mi aha derua tau ke'de' sidungku'ii mepakeang mabusa anna pangngillo' salamang pesilona kila'. 5Ya' sika moluhku-luhkung naung di tampo tandana mahea' liu, ampo' ma'tula' yato to deruai pano diii naoatee, ”Akana la umpeändakoa' dio to tuho tama di alla'na to mate? 6Dante' aha dinne aka' tuhong sumule di hoi' mai di kamateang. Kalehaia' yato ang si natula'ingko naonge di hoi'ke' di Galilea naoatee, 7‘Kodi' inde Änä' to Lino pahalluä' dibeho tama di teyyena to madosa anna natoke'ä' dai' di kayu sitambeng, ampo' la tuhoä' sumule tahpana allo katallunna.’ ” 8Ya' sika nakalehai si'dang yato tula'na Puang Yesus.
9Tahpana sika sumule di hao mai di ku'bu', ya' napalambi'mi yato kaheba pano di sampulo mesa pahsikolana Puang Yesus anna pano toe' di ingkänna to mampetahpa' ang senga'. 10Yato ang umpalambi' kaheba pano di to pentindo'na Puang Yesus dianto: Maria Magdalena, Yohana, Maria indona Yakobus anna sambahinena ang senga'. 11Ampo' yato to pentindo'na Puang Yesus dai umpetahpa' yato kaheba ang napalambi' yato sebahineang; nasanga supu ma'tula' tasanda-sanda. 12Ampo' tahpa kaliasa' sianne' ta Petrus anna menanda-nandai mao pano yato di ku'bu'. Tahpana nanenne'i yato ku'bu', ya' supung nalambi' yaling pebalunna. Ya' le'ba'mi sumule pano mekutana yaling di inahanna didiona aka setonganna ang dahi.
Puang Yesus umpepaitaing Kalaena pano di derua to pentindo'na
13Di allo donetoo aha derua to pentindo'na Puang Yesus le'ba' naung di Bohto Emaus luyaho mai di Yerusalem, umbai sampulo mesa kilo alla'na, 14anna semata sipa'tula'i didiona yato kaha-kaha ang mane dahi. 15Menge sika sipa'kara, ya' suleng Puang Yesus mendungku' anna mellaoi sibaha-baha, 16ampo' noa ang aha manghehengngi matanna lambi' dai mala sika nainsang menna yato setonganna.
17Mekutanang Puang Yesus pano diii naoatee, ”Akaa' inde mengea' unsitula'i yaling di pellaoammu?”
Ya' sika tohhong sämpäi' masuhsa liu nasa'ding. 18Mane mentimba'i yato ang mesa ang disanga Kleopas mekutana naoatee, ”Mane sulerakako di hao di bohto senga' lambi' dai ungnginsang kaha-kaha ang mane hali dahi yaho di Bohto Yerusalem?”
19Natimba' sala bung Puang Yesus mekutana sala naoatee, ”Kaha-kaha akarakae' nee?”
Sika natimba'mi naoatee, ”Didiona kadahiang ang unghoa Puang Yesus to Nazaret, mesa nabi ang handang ma'kuasa. Ke dihingngii tula'na anna diita pembabena, ya' maleso dioatee umpamasannang Puang Alataala anna ingkänna tau. 20Ampo' puhang napapetahungkung mate kapala-kapala imang anna ingkänna to pambahananta, anna puhang sika natoke' dai' di kayu sitambeng. 21Ketaladara Dia setonganna ang kisanga umbai Diang ang la umpabeba' to Israel. Yato kadahiang tallu allona ang puha. 22Ampo' napapusa'ang sangngaka-sangngaka bahine di alla'ki' ang sika mao langngena' di mebengngi' pano yato di ku'bu'na, 23ampo' dang aha sika nalambi' bahkena. Sika sumulei pano di kami' umpalambi' kaheba. Naoatee napengkalanda'i are' malaeka' ang mangngoaintee tuhong sumule. 24Anna aha tung sangngaka-sangngaka solaki' mao pano yato di ku'bu' anna sika nasa'bii yato aka ang sika napalambi' yato sebahineang, ampo' dai aha sika naita yato Puang Yesus ang sika nadaka'.”
25Ya' sika napa'tula'ing Puang Yesus naoaintee, ”Oa' ingkämmu to maho, ahana inang malammaa' pepähängammu lambi' daia' ungngaku umpetahpa' ingkänna siamo ang hali napalambi' senabiang. 26Darakae' inang la ungngolai dolu kamadahhaang yato To Dilanti' la Mepasalama' mane mentamai di kamatandeanna?” 27Mane napahandu'i pole' napakaleso pano diii ihsinna Suha' Masero ang tiuki' didiona Kalaena, napahandu' di suha'na Musa anna suha'na senabiang ang senga'.
28Tahpana sika undungku'ing yato Bohto Emaus, ya' boheng naangka'inne' yato Puang Yesus umpatahhi' lolo pellaoanna. 29Ampo' sika napahsa tohho naoaintee, ”Tatohhomokoa' dinne sibaha-baha, aka' la tempu'mi allo anna la benging.” Ya' lempäng si'dang Puang Yesus tama di dasannaii anna tohhoi sibaha-baha.
30Tahpana mohko' mande sibaha-baha, ya' ungngalang roti anna malaui behe dai' di Puang Alataala, nabika-bikai mane nabeai sika naande. 31Donetoo ya' tibuhkeng pole' matannaii anna tahpa nainsangngi naoate Puang Yesus yatoo, ampo' tahpa pa'da siang yaling di alla'naii. 32Sioamintee, ”Darakae' inang noa ang tasa'ding masannang si'da-si'da sangngallo yaling di pellaoang naonge napakalesoingke didiona ihsi Suha' Masero lella' napa'karaiingke?”
33Ya' sika mengkalao siang sumule dai' di Yerusalem. Yato sampulo mesa pahsikolana Puang Yesus menge sika ma'himpung sibaha to pentindo'na ang senga'. 34Sika naoatee, ”Ahana inang tuhong sumule Puang Yesus, anna puhang umpepaitaing Kalaena pano di ta Simon.” 35Ya' ma'tula' tunne' yato to deruai untula' yato aka ang dahi yaling di pellaoannaii anna umba noa sika ungnginsang Puang Yesus, dianto tahpana naita umbika-bika roti.
Puang Yesus umpalanda' Kalaena pano di ingkänna pahsikolana
36Lella' sika unsitula'-tula'i yato kaha-kaha, pihsanannarang pihsa' tomande' Puang Yesus ke'de' yaling di alla'-alla'naii anna ma'tula'i pano diii naoatee, ”Salama'ku mating di dioa'.”
37Sika sangka' tungke'du'mi mahea' aka' sika nasanga anitu ang sika naita. 38Ampo' ma'tula' pano diii naoaintee, ”Akana tungke'du'rakoa' dio, anna akana bata-bataia' yaling di inahammu? 39Itangnga' indee teyyeku anna bihti'ku. Kodi' si'danto indee. Maikoa' antiä' anna umpekalesoä', aka' ponna anitu, ya' daete'ne' kebale bahtu' kebuku sinnoa ang ungngitaa' pano di Kalaeku.”
40Lella' ma'tula' noa yatoo menge siang umpepaitaing teyyena anna bihti'na pano diii. 41Mengeke' sika dai napetahpa' sakali napobua' sika pusa' si'da-si'da, ya' mekutana Puang Yesus pano diii naoaintee, ”Aharakaa' andeammu dinoa?” 42Ya' sika natandoming sambose' bau ang puha ditunu. 43Naalang anna naandei di olona matannaii.
44Ma'tula'ke' pano diii naoatee, ”Indee tula'ku dianto tula' ang inang hali kutula'ingkoa' naonge tohhokä' yaling di alla'-alla'mu sibaha-bahaingkea', dianto pahallu dipasundung asang ingkänna ang tiuki' didioku yaling di suha'na Musa, suha'na ingkänna nabi anna suha' Pampudiang.
45Ya' nabuhkeing pihkihannaii anna malai sika umpähäng bahtuanna Suha' Masero. 46Naoake'te pano diii, ”Aha tiuki' naoatee, ‘Yato To Dilanti' la Mepasalama' pahallu ungngolai kamateang anna la tuho sumule di hoi' mai di alla'na to mate di allo katallunna. 47Anna yaling di sanganna, kaheba pengkatoba'ang anna pampaampungang pahallu dipepakahebaing pano di ingkänna mobohto-bohtoang mengkalao yaho di Yerusalem. 48Diongnga'to inde ang unsa'bii ingkänna indee. 49Anna la baha' kusuoingkoa' yato Inaha Masero#24:49 Itai Yl 2:28-29; Yoh 14:16-17. ang puha nadandi Ambeku, ampo' la tohho lolokoa' yaling inde di bohto mahoa' lambi' dipatamaikoa' kakuasaang ang sule yaho mai di ongeang malängkä'.”
Katiängkä'anna Puang Yesus dai' di suruka
50Donetoo yato sampulo mesa pahsikola sika naposola Puang Yesus umpellei bohto mahoa' mao pano di mesa ongeang ang sidungku' Bohto Betania. Di haonto sika naängkä'ing teyyena napalauing behe. 51Lella' umbehe yatoii, ya' tiängkä'mi dai' di suruka umpensähä'i yatoii. 52Sika malimuntu'mi menomba, mane sumulei dai' di Yerusalem punno kamasannangang. 53Anna sika umpudi lolo sanganna Puang Alataala tama di Dasang Ada'na.
Právě zvoleno:
Lukas 24: ATQ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
LAI 2004