Ja̰ 11
11
Lawjar gə to njekura lə Jeju uy
1Dəw kara ga̰ kəne əng, ɗaa rɔ-ɛ to-e, ri-a na Lawjar, n-to dəw gə Ɓetani gə to ɓe kuji Məri je gə ngon ko̰-ɛ gə jene Madə. 2To Məri gə nee le ja ɓa um ubu gə ba̰y kəndə mambo̰ to kəne dɔ Mbayɓe gə cibi ngaɓa bɔrə gɔl-ɛ gə bḭ dɔ-ɛ. Ɗaa, ngon ngaw lə-a Lawjar ɓa rɔ-ɛ to-e. 3Ko̰ nan-ɛje le d-ula ꞌpa d-ar Jeju na: Mbayɓe, rɔ njekura lə-i to-e.
4Logə tar-ɛ oso mbi Jeju gə ɗaa, pa na: Rɔ to gə kən le n-a kuy ne ang baa, ngaa to rɔ to gə kar kila riɓar dɔ Luba gə ngaɓa gə ɗəb-e gə nee nama Ngon lə Luba a kinga ne riɓar tɔ. 5Mba Məri je gə ngon ko̰-ɛ Madə gə Lawjar le, Jeju njigi-je ya̰. 6Ngaa, logə n-o som to gə rɔ Lawjar to-e ja ɗaa, n-gangə rɔ-ɛ n-isi lo gə n-ga̰ kəne kəm ndɔ joo ja cibi. 7Go-e gə ɗaa, n-pa n-ar ngan njenendoje na: J-a təlje j-awje Jude. 8Ngan njenendoje lə-a ꞌpa d-ar-ɛ na: Njenetɔji, ɓisine ɓi Jiibije ꞌsangə ɗəw gə mba cila-i gə kɔr ər nee le ja, ꞌnjigi mba təl kaw gugu ja cibi wa? 9Jeju ila kəne na: Lo gə arə le, ngira kar kəne dɔg gə gir-je gə joo ang wa? To gə ɓo dəw nja dan kara nama tuga gɔl-ɛ ang, mba n-o lokarə gə dɔ nangə gə nee; 10ngaa to gə ɓo dəw ja dan lo ndul gə nama, tuga gɔl-ɛ mba lokarə ndogo ɗəw kab-ɛ gə ang.
11Go tarje gə n-pa to gə be ɗaa, n-təl n-pa ja cibi na: Njekura lə-sijee Lawjar aw cibi, ngaa m-a kaw ndol-e. 12Ngan njenendoje ꞌpa d-ar-ɛ na: Mbayɓe, to gə ɓo n-cibi gə cibi baa nama n-a kaji. 13Jeju pa tar kuy lə Lawjar, ngaa ꞌjejee d-əji to gə n-pa tar cibi gə kar kuwa kɔr. 14Be ɓa Jeju pa wɔ̰y ja ar-je na: Lawjar uy. 15Ngaɓa rɔ-m ndɔɔ ya̰ ɔji dɔ sisəy mba godo gə m-godo kəne, mba kar-sisəy ꞌtaje ne kagə-m. Ngaa j-awje rɔ-ɛ gə. 16Be ɓa Toma gə ꞌɓar-ɛ Ndunga pa ar ngan njenendoje gə kɛm na: Sijee kara, j-awje mba kar-si j-uyje gə Mbayɓe tɔ.
17Logə Jeju ce təsərə ɗaa, o to gə ꞌdubu Lawjar nam, ɗa ndɔ sɔɔ ngaa. 18To gə Ɓetani to dəb baa gə Jerujalɛm, asə kula mɛdərɛ mundaje əng le ɗaa 19Jiibije bula ya̰ ꞌɗe ɓə lə Madə je gə Məri mba bɔrə man no kəm-je gə ɔji dɔ ngon ngaw lə-je. 20Logə Madə tuga mbi-a o to gə Jeju ɗe ɗaa, ɔdə aw cila kəm-e, ngaa Məri ɗaa isi k-ɛ nangə kəy. 21Madə pa ar Jeju na: Mbayɓe, to gə ɓo ꞌga̰ nee nama ngon ngaw lə-m a kuy ang baa. 22Ngaa ɓisine ja kara, m-gərə to gə ne tɔ̰y gə a dəji Luba le, Luba a kar-i ja. 23Jeju pa ar-ɛ na: Ngon ngaw lə-i a ndol. 24Madə ila-a kəne na: M-gərə to gə dɔ ɗudu ndɔ nama n-a ndol ndɔ ndol gə lə nje gə d-uy. 25Jeju pa ar-ɛ na: ꞌMa ja m-to gə kuy ɓa ndol gə kisi kəm baa nəm tɔ: Dəw gə ta kagə-m le, uy gə kuy ja kara, a kaw kəm baa. 26Cibi dəw gə aw kəm baa ngaɓa ta kagə-m nama a kuy ang saar gə no. ꞌTa kagə tar gə nee le ja wa? 27N-ila-a kəne na: Oyo, Mbayɓe, ꞌma le, m-ta kagə to gə ꞌI ꞌto gə Kirisi, Ngon lə Luba, ye gə ɗe dɔ nangə gə nee le. 28Go tar gə Madə pa to gə be ɗaa, ɔdə aw ɓar ngon ko̰-ɛ Məri. Ɗaa n-pa wɛd baa n-ar-ɛ na: Njenetɔji ar kən aw dəji-i. 29Logə Məri tuga mbi-a tə̰y o ne tar nee ɗaa, uba nangə gə ngɔdə baa ḭ taar aw cila kəm-e. 30Jeju ar gə lo gə Madə cila kəm-e inga-a kəne ja baa ɓi, ɓo andə mə ɓe gə ang ɓi. 31To gə be ɓa Jiibije gə d-isi gə Məri kəy mba bḭ man no kəm-e gə le, d-o-e lo kḭ gə n-uba nangə gə ngɔdə n-ḭ taar n-ce ɗaga ɗaa, ꞌndole go-e. D-əji to gə n-aw gə dɔbarə gə mba no kəne. 32Logə Məri ce lo gə Jeju ar kəne, ngaɓa unda kəm-e tə̰y o-e ɗaa, oso nangə burugə no gɔl-ɛ gə ɗaa pa ar-ɛ na: Mbayɓe, to gə ɓo ꞌga̰ nee nama ngon ngaw lə-m a kuy ang. 33Logə Jeju o to gə n-aw no ngaɓa Jiibije gə ꞌdan-ɛ kara ꞌno nəm ɗaa, n-si m-e mbig-mbig ngaɓa m-e gangə man badə. 34N-pa na: ꞌDubu-eje ɗa wa? D-ila-a kəne na: Mbayɓe ꞌɗe ɓoo. 35Jeju no. 36Be ɓa Jiibije ꞌpa na: Oje njigi gə n-njig-e kara nee ɗa! 37Ngaa nje gə naaje horo-je gə pa na: ꞌNe gə nje kar kəm nje kəm tɔ unja le n-asə gə mba kɔgə Lawjar kar-ɛ uy ang mba ɗi wa?
38Be ɓa Jeju təl-si gə no m-e mbig-mbig ja cibi, ar-ɛ ɔdə aw dɔbarə gə. To gə bolo ər gə d-ila pil mbal t-ɛ gə. 39Jeju pa na: Uwaje pil ər le gə ɗangə. Madə gə ko̰ nan njegodoje le pa ar-ɛ na: Mbayɓe, n-ə̰ndə ɗɔdə ngaa mba to gə ndɔ gə njekum gə sɔɔ ngaa ɓogəne. 40Jeju ila-a kəne na: To gə ɓo ꞌta kagə nama a ko rɔnduba lə Luba ɓa m-pa be m-ar-i ang wa? 41Be ɓa d-uwa pil ər le d-ila ɗangə. Jeju un kəm-e gə taar, ɗaa pa na: Bɔ dəwje, m-ar-i oyo mba ndu-m gə o. 42Kar-m ꞌma le ɗaa, m-gərə to gə o ndu-m ja jaga-jaga, ngaa m-pa ɔji dɔ bula dəwje gə d-ar lo gə nee gə mba kar ꞌta kagə to gə ꞌI ja ɓa ula-m. 43Go tar gə n-pa to gə be ɗaa, n-pa tar gə ndu-e gə boy wəəl na: Lawjar, ꞌce gə ɗaga nee. 44Ɗaa dəw gə uy le ce gə kula kubu gə ꞌtɔ ne gɔl-ɛ gə ji-a, ngaɓa gə ta kubu gə ꞌɓiri kəm-e nəm tɔ. Jeju pa ar-je na: ꞌTud-eje ɓo ḭya̰-je ar-ɛje n-aw.
D-ula ꞌmɔdəməri dɔ Jeju gə
45Logə Jiibije gə ꞌɗe gə kobəre-kobəre ɓə lə Məri, d-o ne gə Jeju ɗa nee le ɗaa, ꞌta kag-ɛ. 46Ngaa nje gə kɛm horo-je gə d-ɔdə d-aw d-inga Parijiyɛ̰je ꞌpa tar ne gə Jeju ɗa le d-ar-je. 47Ye əng ngaa, buba njekapoloje gə Parijiyɛ̰je d-uwa dɔ naa no ngɔ gangə tar gə lə Jiibije ɗaa ꞌpa na: Ɗi ngaa j-a ɗa wa? Mba dəw gə nee le ɗa netɔjije bula ya̰ ngaa. 48To gə ɓo j-ḭya̰-aje j-ar-ɛje n-ɗa dɔ-ɛ gə kede-kede to gə bənəng nama d-a ta kag-ɛ tɔ̰y ɗaa njeko̰ ɓeje gə Rɔm d-a ɗe kila ɗɔ dɔ-si gə mba tuji ne lo gə to gə losang-ɛ ngaɓa gə gəl kuji-si tɔ. 49Ngaa kara lə-je, Kayip gə to gə buba njekapolo dɔ ɓal-ɛ gə əng le, pa ar-je na: ꞌGərəje ne kara kəne ang. 50Ngaɓa to ne gə may ar-sisəy mba kar dəw kara ɓa uy ta ne dɔ dəw mə ɓeje tɔ̰y ngaɓa kar gəl kuji ja kərəng tuji ne ang tɔ. 51Be ɓa, ꞌne n-pa tar gə kən le gə dɔ rɔ-ɛ ang, ngaa mba to gə n-to buba njekapolo dɔ ɓal-ɛ gə əng le ɗaa n-ila ne mbərə tar na may kar Jeju uy mba gəl kuji Ijirayɛl. 52Ngaɓa gə mba gəl kuji Ijirayɛl ja gə kar-ɛ baa ang, ngaa gə mba mbo̰ ne nganje lə Luba gə ꞌsɛ̰rɛ̰ naa le dɔ naa gə gə darɔ gə kara baa. 53Dɔ ndɔ-ɛ əng ja ɗaa, d-un ndu-je gə mba tɔl-ɛ.
54Be ɓa Jeju ila ngangə nja horo Jiibije gə ɗaga ngəw-ngəw: N-ɔr rɔ-ɛ n-aw dɔ nangə gə to mbɔr ndag lo gə, mə ɓebo gə ꞌɓar-ɛ Epərayim, n-isi kəne gə ngan njenendoje lə-a.
55Ndɔ ɗa nay Pagə lə Jiibije nay dəb baa ɗaa, dəwje bula ya̰ d-ḭ gə ko ɓeje, d-ḭya̰ ndɔ kara gə kede baa, d-uba naa mbura-mbura gə Jerujalɛm gə mba kɔr rɔ-je togo rɔ-je ɔji dɔ neɗa gə kṵra̰y. 56ꞌSangə Jeju ɗaa ꞌpa tar horo naa gə gə yo gə nee ta kəy gə lə Luba na: Əjije to gə ban wa? N-a ɗe lo ɗa nay gə le ang saar wa? 57Buba njekapoloje gə Parijiyɛ̰je d-un nduje na: Dəw gə ɗa-ɗa gə o lo gə ga̰ kəne nama may kar un dɔ-ɛ mba kar d-uwa-a.
Právě zvoleno:
Ja̰ 11: lap
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2020, ATALTRAB. All rights reserved